Yovi 42:1-17
42 Kuenje Yovi wa tambulula Yehova hati:
2 “Kaliye nda kũlĩha okuti, ove o kuete epondolo lioku linga ovina viosi,Kuenda lacimue o sokolola oku linga okuti, ku ci tẽla.+
3 Ove wa popia hati: ‘Omunu u helie, o kasi oku pengisa alungulo ange lekambo liukũlĩhĩso?’+
Kuenje nda vangula, pole, sia kuatele elombolokoLiatiamẽla kovina vi komõhisa calua kokuange, vina sia kũlĩhĩle.+
4 Ove wa popia hati: ‘Mange ohenda yevelela kuenda ndi vangula.
Ame ndi ka ku pula kuenda o ka ndi tambulula.’+
5 Atũi ange a yeva eci catiamẽla kokuove,Pole, cilo ndu ku lete lovaso ange muẽle.
6 Ndi litiukamo kueci nda popia,+Eli olio esunga lieci ndi tumãlela voneketela kuenda vatiko.”+
7 Eci Yehova a mala oku sapuila olondaka evi ku Yovi, Yehova wa sapuila Elifasi u Temani hati:
“Onyeño yange ya ku wengukila kumue lakamba vove vavali,+ momo ove kua vanguile ocili catiamẽla kokuange+ ndeci ukuenje wange Yovi a linga.
8 Kaliye tikuli olongombe epanduvali lovitupi violomeme epanduvali, kuendi kukuenje wange Yovi kuenda li lumbiliko ocilumba coku pia elisi. Kuenje ukuenje wange Yovi o ko likutililiko.+ Ame ndi ka tava kepingilo* liaye lioku yuvula oku vu tati ndomo ci likuata luveke wene, momo ka wa vanguili ocili catiamẽla kokuange ndeci ukuenje wange Yovi a linga.”
9 Omo liaco, Elifasi u Temani, Bilidade u Siuhi kuenda Sofare u Namati va enda kuenda va linga eci Yehova a va handeleka. Kuenje Yehova wa tava ohutililo ya Yovi.
10 Eci Yovi a likutililako akamba vaye,+ Yehova wopa ohali ya Yovi+ kuenda wa tumbulula ukuasi waye.* Yehova wa eca kokuaye eci ci soka olonjanja vivali vieci eye a kuatele ale.+
11 Vamanjaye vosi valume kuenda vakãi lakamba vaye+ vo kosimbu, veya kokuaye va lia laye konjo yaye. Ovo va lekisa ohenda kokuaye kuenda vo lembeleka omo liohali yosi Yehova a ecelela okuti, yiya kokuaye. Omunu lomunu pokati kavo wa eca kokuaye ombanjaile yolombongo kuenda ocinunga culu.
12 Omo liaco, Yehova wa sumũlũisa calua onepa ya sulako yomueyo wa Yovi+ okuti, kefetikilo ci sule kuenje Yovi weya oku kuata 14.000 kolomeme, 6.000 kolongamelo, 2.000 kolongombe kuenda 1.000 kovimbulu violomange.+
13 Eye weyavo oku kuata vali omãla epanduvali valume kuenda omãla vatatu vakãi.+
14 Eye wa luka omõla watete wukãi hati, Yemima, wavali Kesiya kuenda watatu Keren-Hapuki.
15 Vofeka yosi ka mua kaile akãi va posoka calua okuti omãla va Yovi vakãi va sule kuenda isiavo wa eca kokuavo ocipiñalo kumue la vamanjavo valume.
16 Noke liovina evi, Yovi wa kala komuenyo ci soka 140 kanyamo kuenda wa mola omãla vaye kuenda olonekulu viaye ci soka ovitumbulukila vikuãla.
17 Oku sulako, Yovi wa fa noke yoku kala komuenyo otembo yalua loku sanjukila oloneke viomuenyo waye.*
Atosi Pombuelo
^ Lit., “Ndi ka petula muẽle ocipala caye.”
^ Lit., “Yehova wa tiukilisa umandekua wa Yovi.”
^ Lit., “ukulu kuenda weyuka oloneke vialua.”
