Yovi 5:1-27
5 “Linga ohenda, vilikiya! Anga hẽ kuli umue o ku tambulula?
Pokati kolosandu kulie o ka lupukila?
2 Momo ocikumbiti ci ka ponda eveke,Kuenda onya yi ka ponda omunu wa kamba olondunge.
3 Nda mola eveke oku imba olumbombo,Pole, vocipikipiki ocitumãlo caye muna a tunga ci siñaliwa.
4 Omãla vaye va kasi kohele,Kuenda va nyanyũiwa pombundi yolupale okuti,+ lomue o va popela.
5 Omunu o kasi lonjala o lia eci eye ongula,O cupa ndaño muẽle pokati kolosongo,Kuenda ovipako viaye vi kuatiwa.
6 Momo ovina vĩvi ka vi tundi voneketela,Kuenda ohali ka yi tundi posi.
7 Ndeci ulienge wenda kilu,Cimuamue haico okuti, omunu ka tẽla oku puluka kohali tunde eci a citiwa.
8 Pole, ame nda nda livondela ku Suku,Kuenda nda nda eca ocitangi cange ku Suku,
9 Una o linga ovina vinene kuenda ovina ka vi konomuisiwa,Ovina vi komõhisa okuti ka vi tendiwa.
10 Eye eca ombela kilu lieve,Kuenda o tuma ovava kovapia.
11 Eye o kemãlisa ukuembombe,Kuenda o votola omunu wa sumua oco o popele.
12 Eye o nyõla asokiyo ãvi a vakuatutu,Oco upange wovaka avo ka u ka kuate onima.
13 Eye o kokela vakualondunge oku kupukila volonjanjo viavo muẽle,+Oco asokiyo avo a nyõlehe.
14 Ovo va lisanga lowelema vokuenda kutanya,Kuenda va papata kutanya ndu okuti kuteke.
15 Ovo va popeliwa la Suku peka lia vana va kuete osipata kovimẽla viavo,Eye o popela ohukũi peka lia una wa pama,
16 Omo liaco, ohukũi yi kuete elavoko,Pole, omunu hukuesungako o munĩha omẽla waye.
17 Tala! Wa sumũlũha omunu o lemẽliwa la Suku;Omo liaco, ku ka likale epindiso Liukuonene Wosi!
18 Momo eye o koka evalo, pole, o sakula apute;Eye o nyanyõla, pole, o sakula lovaka aye muẽle.
19 Eye o ka ku yovola kafengi epandu,Ndaño muẽle liepanduvali ka li ku lemẽha.
20 Vokuenda kuonjala, eye o ka ku yovola koku fa,Kuenda kunene wosipata vokuenda kuyaki.
21 Ove o ka teyuiwa komẽla u vangula ovina vĩvi,+Kuenda ku ka kuatela usumba ekundu eci olio liya.
22 Ove ku ka sakalala lenyõleho ale lonjala,Kuenda ku ka sukila oku kuatela usumba ovinyama viovusenge vio kilu lieve.
23 Momo ovawe o vepia ka a ka ku linga cimue,*Kuenda ovinyama viovusenge vi ka kala lombembua love.
24 Ove o ka kũlĩha okuti, ombalaka yove ya koka,*Kuenda eci o ka kũlĩhĩsa usenge wove woku lisila oviunda o ka limbuka okuti, lacimue ca kambelamo.
25 Ove o ka sanjukila omãla valua,Kuenda ovitumbulukila viove vi ka lua calua ndovikũla vio kilu lieve.
26 Ove handi o ka pama eci o ka enda vonjembo,Ndovitungu viotiliku viongoluiwa kotembo yaco.
27 Tala! Eci oco tua siata oku kũlĩhĩsa kuenda ovina via tuwa ndomo.
Omo liaco, sokolola kovina evi. Kuenje o ka limbuka ove muẽle okuti, ovina evi viocili.”
