Wa Yuda 1:1-25
1 Ame Yuda, ndupika wa Yesu Kristu, haime ndi manji a Tiago,+ ndi kasi oku sonehela+ vana va kovongiwa haivo va soliwe la Suku Isia okuti, va popeliwa oco va kuate ukamba la Yesu Kristu:+
2 Ohenda lombembua kuenda ocisola vi amameko oku livokiya kokuene.
3 A vamanji wa soliwi, ndaño okuti nda likolisilako calua oku vu soneheli catiamẽla kepopelo tua kakatela vosi,+ pole, nda nõlapo oku vu soneheli oco ndu vu vetiyi okuti, vu linga uyaki walua oco vu teyuili ekolelo+ lina lia eciwa onjanja yimosi lika kolosandu.
4 Nda ci soneha omo okuti alume vamue, va iñila latutu pokati ketu okuti esombiso liavo lia sokiyiwa ale tunde kosimbu Lovisonehua; ovo vakuakutomba Suku, haivo va pengisa ohenda ya piãla ya Suku yetu oco va kuate evelo lioku linga umbondo*+ kuenje va lekisa elimbi ku una okuti eye lika cime cetu, haeye Ñala Yesu Kristu.+
5 Ndaño okuti wa kũlĩhi ciwa ovina viosi evi, ndi yongola oku vu ivaluisi okuti, Yehova* ndaño wa popela omanu poku vopa vofeka Yegito,+ noke wa nyõla vana ka va lekisile ekolelo.+
6 Kuenje ovangelo vana ka va lavele ocikele cavo, pole, va siapo ocitumãlo cavo,+ eye wa va pongiyila oku kutiwa lalienge ka a pui vowelema wa piãla oco va sombisiwe keteke linene.+
7 Lonjila yimuamue, o Sodoma kuenda o Gomora lalupale a lisungue lao, a liecavo kevĩho lialua liukahonga* loku tẽlisa oloñeyi vietimba lonjila yimue ka ya sungulukile;+ kuenje ovina viaco vi kasi ndongangu yelungulo kokuetu omo va yambuiwa londalu ka yi pui.+
8 Ndaño lovina viaco, alume vaco vovisimĩlo viavo viesanda va vĩhisa atimba kuenda va sepula uviali loku popia lãvi* vana va sumbiwa la Suku.+
9 Pole, eci Mingeli+ ungelo unene+ a lipatãla Leliapu loku lihoyela eci catiamẽla ketimba lia Mose,+ eye ka kuatele o siata yoku u nenela esombiso lolondaka viesepu,+ pole, wa popia hati: “Yehova* a ku sombise.”+
10 Pole, alume vaco, va sepula ovina viosi ka va kuete elomboloko liaco.+ Kuenje kovina viosi va linga, va tuwa ndovinyama ka vi sokolola+ kuenje va li nyõla ovo muẽle.
11 Ngongo yavo, momo va kuama onjila ya Kaini+ kuenda va yolokela koku setukula elinga lĩvi lia Baliame+ oco va kuate onima kuenje va nyõliwa omo lioku popia lãvi+ alume vana va kuete omoko pokati kavo ndeci Kora a linga!+
12 Alume vaco, va kasi lene povipito+ vu linga oco va lekise ocisola ku vamanji. Pole, ovo va sokisiwa lovawe a salamisiwa kosi yovava, haivo angombo va litekula ovo muẽle okuti, ka va kuete usumba;+ ovo alende ka a kuete ovava okuti, ambatiwa lofela;+ ovo oviti ka vimi apako votembo yaco,* haivio via fa luvali* kuenda via tukũiwa;
13 alume vaco va sokisiwa lakimba a tema okalunga a tutuma efelefele liosõi yavo muẽle;+ haivo olombungululu vi tungayala okuti, via pongiyiwila owelema walua otembo ka yi pui.+
14 Ocili, Enoke+ okuti omunu wepanduvali kulala wepata lia Adama, wa imbavo owanji watiamẽla komanu vaco eci a popia hati: “Tali! Yehova* weya lolohuluwa violosandu viaye,*+
15 oco a sombise vosi+ loku pisa omanu vosi va tomba Suku, omo liovilinga viavo viosi vioku tomba Suku vina ovo va lekisa lonjila yimue ka ya sungulukile kuenda ovina viosi vĩvi vakuakandu va tomba Suku, va vangula viatiamẽla kokuaye.”+
16 Alume vaco, vakuakulisiõsiõla+ haivo vakuakuliyeya omo liekalo liomuenyo wavo, kuenda va tẽlisa oloñeyi viavo muẽle+ kuenje lovimẽla viavo, va popia olondaka vioku lipanda osimbu va lekisa ombambe* komanu oco va li kuatise ovo muẽle.+
17 Catiamẽla kokuene, a vamanji wa soliwi, ivaluki olondaka viosi via popiwa ale* lovapostolo va Ñala yetu Yesu Kristu,
18 ndeci va enda oku vu sapuili hati: “Koloneke* via sulako ku keya vakuakupembula, loku kuama oloñeyi viavo vĩvi oco va linge ovina vi tomba Suku.”+
19 Omanu vaco va koka olonepele,+ va tuwa ndovinyama,* haivo ka va kuete espiritu lia Suku.
20 Puãi a vamanji wa soliwi, li pamisi lekolelo liene li kola koku kola, loku likutilila lespiritu sandu,+
21 oco vu amamiko oku kala vocisola ca Suku,+ osimbu vu lavoka ohenda ya Ñala yetu Yesu Kristu, yina yi tuala komuenyo ko pui.+
22 Handi vali, amamiko oku lekisa ohenda+ ku vana va kasi latatahãi;+
23 va popeli+ poku vopa vondalu. Pole, amamiko oku lekisa ohenda ku vakuene, pole, ci lingi lesumbilo, osimbu vu suvuka uwalo wa vĩhisua letimba.+
24 Ku una o tẽla oku vu teyuili oco ka vu ka lilondoki, loku pua etondelo+ kovaso yulamba waye lesanju lialua,
25 okuti, eye lika Suku haeye Upopeli wetu pocakati ca Yesu Kristu Ñala yetu, kokuaye ku kale ulamba, ekemãlo, unene, uviali tunde osimbu toke cilo kuenda otembo ka yi pui. Amene.
Atosi Pombuelo
^ Ale “ovilinga vi kutisa osõi.” Kelimi lio Helasi aselgeia. Tala Elomboluilo.
^ Tala Alombo. A5.
^ Tala Elomboluilo.
^ Lit., “ovo va popia atonãi.”
^ Tala Alombo. A5.
^ Lit., “otembo yokuenye.”
^ Ale “via fa elisi.”
^ Tala Alombo. A5.
^ Ale “akũi kolohuluwa.”
^ Ale “oku komõha ovituwa.”
^ Ale “ovina via vanguiwa.”
^ Tala., “Kotembo.”
^ Ale “omanu vakuetimba.”
