Ovilunga vi kasi oku livokiya calua koloneke vilo. Eci kuiya ocilunga cimue, alikolisilo oku eca ekuatiso a sukila oku sokiyiwa loku songuiwa ciwa. Omo liaco, Osungu Yolombangi via Yehova ya sokiya okuti, ofiliyale lofiliyale yi kuata Oseketa Yoku Eca Ekuatiso Omo Liovilunga.

Eci vamanji va talavaya vosekata yaco va limbuka okuti kua pita ocilunga cimue, lonjanga yalua va kũlĩhĩsa akulu vekongelo vo pocitumãlo caco, oco va kũlĩhe ekuatiso akundi va sukila. Nda ocilunga caco cinene okuti akundi vo pocitumãlo ka va tẽla oku ci potolola, ofiliale yi nõla vamanji va loñoloha oco va songuile upange woku eca ekuatiso. Ovo va pondola oku pinga ku vamanji oco va liece olumue, oku eca olombanjaile ale oku vi landa, loku vi eca kakundi va pita locilunga caco.

Kuli onima yiwa koku tetulula ocitangi caco lonjila ndeyi. Nda okuti vamanji pocitumãlo va linga esokiyo lioku eca ekuatiso, ci kuatisa oku yuvula oku linga upange umue olivova, ombuanja kuenda oku pesela olombongo lovina vi sukiliwa.

Vamanji va nõliwa lofiliale va pondola oku kũlĩhĩsa olombongo vi sukiliwa kuenda vamanji oco va ece ekuatiso. Ovo va pondolavo oku vangula lolombiali viopocitumãlo caco okuti, olonjanja vimue via siata oku tu kuatisa oku linga upange waco. Linga ohenda, ku ka linge esokiyo liove lioku pinga olombanjaile, oku tuma ovina vi sukiliwa ale oku enda kocitumãlo kua pita ocilunga, nda ka va ku pingile oku ci linga.

Ocili okuti, eci kuiya ocilunga cimue, tu lekisa onjongole yoku kuatisa. (Hev 13:16) Tu sole vamanjetu! Nye tu pondola oku linga? Ocina ca velapo ceci okuti, tu kongeli volohutililo vana va pita locilunga kuenda ava va kasi oku eca ekuatiso. Citava okuti, tu ecavo olombanjaile oco vi kuatise kupange u lingiwa voluali luosi. Loku kuama onumbi Yosungu Yolombangi Via Yehova, oloseketa kolofiliale vi ka kũlĩhĩsa lutate ovitumãlo vi sukila ekuatiso. Nda tu yongola oku eca ekuatiso lietu, tu lekisi onjongole yaco poku soneha Ocicapa Coku Kuatisa Koku Tunga (DC-50).

TALA OVIDEO LOSAPI, ANDUNDE A NYÕLA OVINA KO BRAZIL, NOKE TAMBULULA EPULILO LI KUÃIMO:

Nye ca ku komõhisa kalikolisilo Olombangi Via Yehova, oku eca ekuatiso noke liocilunga ca pita ko Brazil kunyamo 2020?