Yesu wa eca omuenyo waye komanu ka va lipuile. (Va Rom. 5:8) Ka kuli atatãhãi okuti Yesu wa lekisa ocisola kokuetu poku tu ĩha omuenyo waye. Pole, olonjanja vimue tu sukilavo oku ivaluka okuti Yesu wa filavo vamanjetu. Tu lekisa ndati ocisola Cakristão ku vamanji okuti ndeci etu, ka va lipuilevo? Konomuisa ovina vitatu. Catete, tu pondola oku vokiya akamba tu kuete oku kongelamo omanu vana okuti va tunda kolonepa vikuavo. (Va Rom. 15:7; 2 Va Kor. 6:12, 13) Cavali, tu sukila oku lekisa utate oco ovina tu popia levi tu linga, ka vi ka sumuise vakuetu. (Va Rom. 14:13-15) Catatu, nda umue wa tu lueyela tu sukila oku wecela lonjanga. (Luka 17:3, 4; 23:34) Nda tua likolisilako oku setukula Yesu poku linga ovina viaco, Yehova o ka amamako oku sumũlũisa ekongelo lombembua kuenda omunga.

TALA OVIDEO LOSAPI HATI: KALA OMUNU UMUE O KUETE OVISIMĨLO VIA SUNGULUKA!, KUENDA TAMBULULA APULILO A KUÃIMO:

• Kefetikilo Miki wa kala ndati vekongelo?

• Nye co vetiya oku pongolola ovisimĩlo viaye?

• Ongangu ya Yesu ya kuatisa ndati Miki oku pongolola ovisimĩlo viaye? (Mar. 14:38)

• Elivulu Liolosapo 19:11 li tu kuatisa ndati oku tenda vamanji lonjila yimue ya sunguluka?