Ukuakupindisa etimba, o sukila oku amamako oku ci linga oco a loñolohe. Etu, tu sukilavo oku amamako oku lipindisa oco tu pindise unene wolondunge vietu. (Hev 5:14) Ndaño okuti olonjanja vimue tu setukula olonjila vakuetu va kuama, tu sukila oku pindisa ovisimĩlo vietu loku linõlela onjila tu kuama. Momo lie? Momo omunu lomunu o ka lombolola ovilinga viaye muẽle.—Rom 14:12.

Ka tu ka simi okuti tu pondola oku linõlela onjia yiwa omo tua papatisiwa osimbu. Oco tu nõle lolondunge onjila yiwa, tu sukila oku kolela ku Yehova otembo yosi, Kondaka yaye kuenda kocisoko caye.—Yeh 1:7, 8; Olo 3:5, 6; Mat 24:45.

TALA OVIDEO LOSAPI HATI, “AMAMAKO OKU KUATA OWANJI WUTIMA WA YELA” KUENDA TAMBULULA APULILO AKUÃIMO:

• Onjila yipi manji Emma a nõlapo?

• Momo lie tu sukilila oku yuvula oku situlula ovisimĩlo vietu catiamẽla konjila omunu umue a yongola oku kuama?

• Elungulo lipi li kuete esilivilo ohueli yimue ya sapuila manji Emma?

• Pi manji Emma a sanga olonumbi vio kuatisa oku tetulula ocitangi caye?