Vokuenda kuosãi Yenyenye Linene, tu ka likolisilako oku fetika alilongiso Embimbiliya lomanu vosi tu ka sanga kolonjo, poku kuama ombrochura Sanjukili Omuenyo Otembo ka yi Pui! Akundi va pondola oku nõla nda va talavaya kupange wakundi va sokamo poku eca 30 kolowola vi sukiliwa. Tu ka kuatisa ndati kupange waco ulikasi?

• Ombangulo Yatete: Kuama olondaka vi sangiwa kemẽla lia sulako liombrochura, oco o vetiye omunu oku kuata onjongole kuenda lekisa ndomo elilongiso Liembimbiliya li lingiwa. Ivaluka vana va lekisa onjongole loku va kongela vapasu. Ndaño okuti kosimbu ka va tavele oku lilongisa Embimbiliya, ovo va pondola oku lekisa onjongole konjila yokaliye yoku longisa kuenda kombrochura. Ka citava okuti, ombrochura isiwa konjo yimue ka kuli omunu, oku kongelamo omanu vana ka va lekisa onjongole. Akulu Vekongelo Vakuacikele Cupange Woku Kunda, va pondola oku linga esokiyo liolohongele viupange vokuenda kuosãi.

• Apuluvi Akuavo: Nda ekongelo liene lia siata oku talavaya lotuakãlu tualivulu, lekisa ombrochura Sanjukili Omuenyo Otembo ka yi Pui! Sapuila ku vana va lekisa onjongole okuti, elilongiso Liembimbiliya kumue lekuatiso liombrochura, li lingiwa ocali. Lekisa lonjanga ndomo elilongiso Liembimbiliya li lingiwa ale linga esokiyo lioku tiuka oco o lekise ndomo li lingiwa. Manji ukuacikele cupange woku kunda, o sukila oku nõla akundi va loñoloha oco va ende kovitumãlo violomĩlu, loku fetika alilongiso Embimbiliya. Ove o pondolavo oku fetika elilongiso Liembimbiliya lomanu vu talavayela kumosi ale lomanu o lisanga lavo poku eca uvangi ka wa sokiyiwile.

Yesu wa tu handeleka hati ‘lingi olondonge, va longisi.’ (Mat 28:19, 20) Upange ulikasi u tu kuatisa oku tẽlisa ocimãho coku talavaya lelivulu, Sanjukili Omuenyo Otembo ka yi Pui!