Elivulu Embimbiliya li Pondola Oku tu Longisa Nye?, lelivulu Embimbiliya li Longisa Nye?, limuamue. Alivulu aco avali oku longisa, a situlula ocili lonjila yimuamue. Pole, elivulu Embimbiliya li Pondola oku tu Longisa Nye?, li kuete upopi wa leluka awo wa teta onimbu. Lia pangiwila omanu vana okuti ka va tẽla oku kuata elomboloko lia suapo lielivulu Embimbiliya li Longisa Nye? Elivulu Embimbiliya li Pondola Oku tu Longisa Nye?, ka li kuete o apendise, pole kesulilo lielivulu liaco, kuli atosi a lombolola lonjila ya leluka olondaka vimue vi sangiwa vovinimbu vialua. Ovipama ka vi kuete apulilo oku fetika ale okakasia koku pitulula. Pole, ovipama vi malusula lonepa ulandu wocili Cembimbiliya wa lomboluiwa vovinimbu vialua. Ndeci tua enda oku linga lelivulu Embimbiliya li Longisa Nye?, tu pondolavo oku eca komanu elivulu Embimbiliya li Pondola Oku tu Longisa Nye? olonjanja viosi ndaño okuti ka lia sokiyiwile oku li eca vosãi yaco. Tu talavaya ndati lovina vi sangiwa velivulu liaco eci tu endisa elilongiso limue Liembimbiliya?

ULANDU: Komanu valua, onjila tua siata oku kuama poku longisa Embimbiliya okuti, tete ku tangiwa ocinimbu velivulu Embimbiliya li Longisa nye? noke ku lingiwa epulilo, yiwa calua. Pamue, ondonge yi kasi oku longisiwa ka ya kũlĩhĩle ciwa upopi waco, ale ka yi tẽla oku tanga ciwa. Omo liaco, citava okuti ove o nõlapo oku u longisa velivulu Embimbiliya li Pondola Oku tu Longisa Nye?. Noke citava okuti o kuama onepa yulandu wovipama ndono yelilongiso kuenda u vetiya oku tanga ovinimbu via velapo vocipama. Ocili, locili Cembimbiliya, olonjanja vialua ci pondola oku kuamiwa velilongiso limue vokuenda kuakukutu 15. Omo okuti vonepa yaco yulandu ka mua kongelele ovina vialua vi sangiwa vovinimbu, ulongisi o sukila oku lipongiya ciwa loku kapako eci ondonge yi sukila. Nda ulongisi o kasi oku kuama ovinimbu poku longisa, citava okuti onepa yulandu yi kala yoku pitulula.

ATOSI: Olondaka kuenda ovina vikuavo vi sangiwa ponepa yatosi a molẽha vovinimbu vialua. Citava okuti ulongisi eye o nõla nda o konomuisa atosi aco velivulu Embimbiliya li Pondola Oku tu Longisa Nye? vokuenda kuelilongiso.