ESUNGA LIECI CI KUETELE ESILIVILO: Oku eca uvangi lotelefone, onjila yimue ya velapo ‘yoku imba uvangi wolondaka viwa.’ (Ovil. 20:24) * Eci ci tu kuatisa oku imba uvangi ku vana okuti ekalo lietu ka li tu ecelela oku ka va nyula kolonjo viavo.

NDOMO TU CI LINGA:

• Lipongiya. Nõla ulandu umue u vetiya. Noke soneha eci o yongola oku popia. Pongiyavo olondaka vimue vi lekisa esunga lieci wa telefonalela nda va ku tambulula. Ci kuete esilivilo oku tumala komesa yimue lulandu wa soneha kuenda ovimalẽho vikuavo o sukila, ndeci, o JW Library^® ya yikuka, ale o jw.org^® votelefone yove

• Tulumuha. Vangula ndomo wa tuwa. Memenapo kamue kuenda linga olondimbukiso nda omunu oku lete. Yuvula oku talayama calua. Ci kuete esilivilo oku talavayela kumosi la vakuetu. Nda omunu wa telefonalela wa linga epulilo limue, li pitulula lolukandi oco okuti omunu wa tundili kumosi o kuatisa oku sanga etambululo

• Sia epulilo liecelela oku linga epasu. Nda omunu wa lekisa onjongole, o pondola oku linga epulilo limue oco o li tambulule onjanja yikuavo u tieñela. Citavavo okuti u tumisa o link yimue, ale elivulu limue votelefone yaye. O pondolavo oku u tumisa ovideo yimue, ale ocipama cimue. Nda citava, sapuila komunu waco esokiyo lietu lioku lilongisa Embimbiliya vo internet, ale ocipama cikuavo ci sangiwa vonumbi yetu.