Ulandu u tukuiwa okuti, (Relatório de Riscos Globais de 2018, Fórum Econômico Mundial) wa lekisa ndoco: “Ocitumbulukila co koloneke vilo, ci kuete ovoloño alua okuti vio kosimbu ci sule . . . Pole, ndaño ndoco, citava okuti oco ocitumbulukila catete ci kasi oku kapa oluali kohele pocakati [copulitika, ekambo liolombongo kuenda oku vĩhisiwa kuongongo].”

MOMO LIE OMANU VALUA VA LILONGISA CALUA VA SAKALALELA LEKALO LIETU LIO KOVASO YOLONEKE KUENDA LIONGONGO? TALA ASUNGA AMUE.

• UNGANGALA U LINGIWA VO INTERNET: Ukanda umue wasapulo wo ko Australia wa popia hati: “Olonjanja viosi o internet yi kasi oku linga ocitumãlo cimue ci koka ohele yalua. Oyo ya linga ocitililo ca vana va putula omãla, ca vana va koka ovitangi pocakati casapulo, ca vakuakunyana kuenda comanu vakuakusanumula.” Ukanda waco wasapulo wamisako ndoco: “Oku nyaniwa kuolonumbi viomunu kua siata oku livokiya calua voluali. . . . O internet yeca komanu epuluvi lioku lekisa ovituwa viavo ndeci unene woku linga ungangala.”

• OKU LITEPA KOKU KUATA OLOMBONGO: Ulandu umue wokaliye wocisoko ceca ekuatiso komanu, wa popia okuti alume ecelãla okuti ovo olohuasi via velapo voluali, va kuete ovokuasi amuamue okuti, ci soka 3.6 kolohuluwa vivali viomanu, oyo onepa yomanu olohukũi voluali. Ulandu waco wa popia hati: “Elivokiyo liekambo lietu liolombongo, li lingisa okuti ocimunga cimue colohuasi ovo lika va kuata ovokuasi. Olonjanja vialua omanu vaco olohukũi, akãi.” Vamue va kuete usumba wokuti eci ci pondola oku koka ombuanja pokati komanu.

• OVOYAKI KUENDA ELAMBALALO: Ulandu umue wunyamo 2018 wa lingiwa Locisoko Colo Nações Unidas, wa popia hati: “Tua siata oku mola etendelo liomanu valua va tila uyaki okuti kosimbu ci sule.” Ci pitahãla 68 kolohuluwa viomanu, va sukila oku sia olonjo viavo ca piãla enene mekonda liovoyaki kuenda elambalalo. Ulandu wamisako ndoco: “Vokuenda kuolosengundu vivali, omunu umosi o kisikiwa oku siapo onjo yaye.”

• EKALO LIOFELA LI KASI KOHELE: Ulandu umue u tukuiwa okuti (Relatório de Riscos Globais de 2018) wa popia hati: “Apata alua ovinyama kuenda ovikũla, a kasi oku kunduka lonjanga yalua. Oku vĩhisiwa kuofela kuenda kuokalunga, ku kasi oku kokela ohele yalua kuhayele womanu.” Handi vali, kovitumãlo vimue etendelo liovipuka, li kasi oku tepuluka lonjanga yalua. Omo okuti ovipuka vi kuatisa koku kula kuovikũla, olonoño vi kuete ohele yokuti ongongo yosi yi pondola oku nyõliwa. Ovipuka vio vokalunga vi kasivo kohele. Olonoño vi popia okuti ci soka onepa yimue yovipuka viaco, via fa vokuenda 30 kanyamo a sulako.

Anga hẽ, citava oku linga apongoloko a sukiliwa oco ongongo yetu yi kolepo? Vamue va sima okuti elilongiso li pondola oku kuatisa. Pole, nda okuti ocili, elilongiso lipi li pondola oku pongolola ovisimĩlo viomanu kuenda ovituwa viavo? Ovipama vi kuãimo vi ka eca atambululo.