Amalẽhe vamue kosikola eci va kala oku ñualañuala, va lundiliwa okuti va putula umalẽhe umue okuti va tangela kumosi. Vosi yavo va kala oku tangela kosikola yimue ya kemãla calua ko Kanada. Catiamẽla kelinga liaco, ulume umue ukuasapulo o tukuiwa Leonard Stern, wa soneha ndoco: “Ci kuete esilivilo oku loñoloha, oku tanga kuenda oku linga onepa kocisoko cimue ca kemãla, pole ovina viaco ka vi takeka amalẽhe oku nõla onjila yimue ka ya sungulukile komuenyo.”

Leonard wa popiavo hati: “Tu lavoka okuti olonjali vi kuata ocimãho coku longisa omãla eci ciwa leci cĩvi. Pole, ocili ceci okuti, olonjali vimue via sakalala lika loku vetiya omãla vavo oco va li tunde ciwa kosikola loku kuata upange umue wa kemãla.”

Ocili okuti, oku lilongisa kosikola ci kuete esilivilo lialua. Pole, ndaño muẽle osikola yimue ya velapo, ka yi tẽla oku kuatisa omunu umue oku yula ovisimĩlo, ale onjongole ka via sungulukile. Oco hẽ, pi tu pondola oku sanga elilongiso limue li tu kuatisa, ale li tu longisa ovituwa viwa?

Embimbiliya li sokisiwa ndolumuĩlo. Olio li situlula ciwa ahonguo kuenda olongave vietu. (Tiago 1:23-25) Pole, hacoko lika. Olio li tu kuatisa oku linga apongoloko a sukiliwa, oco tu kuate ovituwa vi tu kuatisa oku kuata ombembua kuenda omunga ndeci, ohenda, epandi, ocituwa coku likandangiya kuenda ocisola. Embimbiliya li popia okuti ocisola oco “ci tokeka omanu vomunga yimuamue.” (Va Kolosai 3:14) Pole, momo lie ocisola ocina cimue ci likasi? Kũlĩhĩsa eci Embimbiliya li popia catiamẽla kocituwa caco.

• “Ocisola ci pandikisa kuenda ci lingainga uwa. Ocisola ka ci kuete onya. Ka ci lipandiya kuenda ka ci litunula, [ale oku lekisa epela] ka ci lingi akutisasõi, ka ci sandi ovina vialio muẽle, ka ci temi lonjanga. Ka ci amamako oku patekela onyeño. Ka ci yolela ekambo liesunga, [ale evĩho] cecaila ovina viosi, . . . ci pandakaisa kovina viosi. Ocisola lalimue eteke ci tokoka.”—1 Va Korindo 13:4-8.

• “Omunu o kuete ocisola ka lingi cĩvi ku una o lisungue laye.’’—Va Roma 13:10.

• “Ca velapo vali kovina viosi, lisoli pokati, momo ocisola ci tuvika akandu alua.”—1 Petulu 4:8.

Eci o kasi lomanu va ku sole, o liyeva ndati? O kolapo? O tula utima? O kala lombembua? Oco, momo wa kũlĩha okuti omanu vaco, va ku yonguila ovina viwa kuenda lalimue eteke va ka ku linga cimue cĩvi ocipango.

Ocisola ci vetiyavo omanu oku li kolisilako oku kuatisa vakuavo kuenda oku linga apongoloko komuenyo. Kũlĩhisa ulandu wa George. Eci a kuata onekulu, wa yonguile okuti o kala otembo yalua lonekulu yaye. Pole kua kala ocitangi cimue. George wa enda oku sipa calua kuenda ulume womõlaye ka yonguile okuti o sipila ponele yoñaña. George wa liyeva ndati? Tunde apa a fetika oku sipa, pa pita ale 50 kanyamo, pole, omo liocisola a kuetele onekulo yaye, wa nõlapo oku liwekapo oku sipa. Ocili okuti ocisola ci kuete unene walua!

 Ocisola ocituwa cimue tu sukila oku li longisa. Olonjali vi kuete ocikele cinene coku longisa omãla vavo, oku lekisa ocisola. Ovo va tekula, va teyuila omãla vavo kuenda va va tata eci va lilemẽha ale ceci va vela. Olonjali viwa vi sapela lomãla vavo, vi eca olonumbi kokuavo kuenda vi va pindisa muna mua kongela oku va longisa ovina viwa levi vĩvi. Handi vali, va eca ongangu yiwa oco omãla vavo va yi kuame.

Ci sumuisa calua ceci okuti, olonjali vialua ka via siatele oku tẽlisa ovikele viavo. Anga hẽ eci lomboloka okuti omãla vavo lalimue eteke va ka kala omanu vawa? Sio hacoko! Omanu valua oku kongelamo vana va tekuiwa lapata a kuete ovituwa vĩvi, va linga apongoloko a komõhisa komuenyo wavo. Ovo va linga omanu vamue okuti va koleliwa, haivo va kapako omanu vakuavo. Vocipama ci kuãimo, tu ka mola ovolandu omuenyo a lekisa okuti, ndaño muẽle omanu vana va molehẽle okuti lalimue eteke va ka kala omanu vawa, va pondola oku linga apongoloko!