Ocimãho colo Nações Unidas oku vetiya olofeka oku likuata omunga, oku sumbila omoko yomunu lomunu kuenda oku teyuila ekalo liongongo. Momo lie? O revista yimue ya sandekiwa lo ONU, ya lombolola okuti, apongoloko otembo, ungangala, oku li tepa kuomanu kua siata oku livokiya, ovoyaki ka a potoluiwile, omanu oku siapo olonjo viavo, oku tuika kuatenda, ovovei a sambuka kuenda ovina vikuavo vi koka ohele, ovitangi vimue via siata voluali luosi.

Omanu vakuavo va teyuila ocisimĩlo coku kuata lika ombiali yimosi voluali luosi. Pokati komanu vaco, pa sangiwa onoño yimue o tukuiwa Dante Alighieri okuti tunde eci a kala komuenyo pa pita ale ci pitahãla olohulukãi epandu vali kanyamo kuenda kua kalavo onoño yikuavo yi tukuiwa Albert Einstein. Dante wa tavele okuti ka ci tẽliwa oku kuata ombembua vokuenda kuotembo yalua voluali lumue lua tepiwa lopulitika. Poku tukula eci Yesu a popia, Dante hati: “Ovosoma osi okuti a likatukila pokati, a nyõleha.”—Luka 11:17.

Noke Liuyaki Wavali wa Pita Voluali okuti, kua imbiwa loku tuika atenda avali anene, Albert Einstein wa sonehela ukanda umue olo Nações Unidas. Eye hati: “Olo Nações Unidas, vi sukila oku talavaya lonjanga oco vi tumbike uviali umue u viala oluali luosi loku eca ekalo limue li kuatisa omanu vosi voluali, oku kolapo.”

Anga hẽ olombiali viopulitika violuali luosi va pondola oku kala va kuacili, oku tumila lonjila ya sunguluka kuenda oku lekisa ohenda ndaño okuti va kuete unene walua? Ale va ka kuata ovituwa vimuamue ka via sungulukile ndeci olombiali vikuavo vi kuete? Apulilo a-a, a tu ivaluisa olondaka via umue ukuovolandu wo ko Britania o tukuiwa Lord Acton viokuti: “Unene u nyõla, unene walua u nyõlavo calua.”

Pole, oco omanu va kuate ombembua yocili, vosi yetu tu sukila oku li kuata omunga. Nye tu sukila oku linga oco tu kuate ombembua yaco? Anga hẽ ci tẽliwa muẽle? Embimbiliya li popia okuti ci tẽliwa kuenda ci ka tẽlisiwa. Ndamupi? O ka linga apongoloko aco, uvialiko womunu una u pondola oku tava ovitukiko, pole, uviali wa Suku. Uviali waco u ka lekisa okuti, ululiki eye lika o kuete omoko yoku viala omanu. Uviali waco upi? Embimbiliya li popia hati: ‘Usoma wa Suku.’—Luka 4:43.

Yesu Kristu wa kala oku sokolola Kusoma wa Suku eci a popia vohutililo yaye hati: “Usoma wove wiye. Ocipango cove ci lingiwe palo posi.” (Mateo 6:9, 10) Ocili, Usoma wa Suku owo u ka lingisa okuti ocipango ca Suku ci tẽlisiwa palo posi, omanu va kuacipululu okuti va sokolola lika kokuavo muẽle, havoko.

Usoma wa Suku u tukuiwavo hati: “Usoma wovailu.” (Mateo 5:3) Momo lie? Momo ndaño okuti u ka viala omanu palo posi, pole, owo u ka viala oku upisa kilu. Sokolola kueci ovina evi vi lomboloka. Usoma waco okuti u ka viala ongongo yosi, ka u ka sukila oku tambula elisimu ale ekuatiso limue oco u kuate onima yiwa. Sokolola ekavuluko Usoma waco u ka nena kolonungi vialio!

Ndeci ondaka “uviali” yi lekisa, Usoma wa Suku Uviali umue wocili. Usoma waco, u kuete Osoma yimue okuti Yesu Kristu una wa tambula omoko yaco ku Suku. Catiamẽla ku Yesu Embimbiliya hati:

•   “Uviali u ka kala kapepe aye . . . Oku amamako kuviali waye kuenda kuombembua, ka vi ka sulila.”—Isaya 9:6, 7, Embimbiliya li Kola.

• “Eye wa tambula uviali, esumbilo kuenda usoma oco omanu, lolofeka kuenda omanu vakualimi a litepa vo vumbe vosi. Uviali waye . . . ka u ka kunduiwa.”—Daniele 7:14.

• “Usoma woluali wa linga Usoma wa Ñala yetu [Suku] kuenda wa Kristu yaye.”—Esituluilo 11:15.

Oco ku tẽlisiwe ohutililo ya Yesu, Usoma wa Suku u ka linga ovina viosi wa yonguilile palo posi. Olonungi Viusoma waco, vi ka lilongisa oku tata ongongo oco yi tumbuluiwe loku kala ocitumãlo cimue ka ci vĩhisiwa okuti, oviendalomuenyo vi kolapo.

Ca velapo vali ceci okuti, Usoma wa Suku u ka pindisa olonungi vialio. Ovo va ka lilongisa olonumbi vimuamue viovituwa viwa. Ka ku kakala vali ombuanja kuenda ekambo lioku likuata omunga. Catiamẽla kotembo yaco elivulu lia Isaya 11:9 li popia hati: “Ovio ka vi ka linga cimue cĩvi ale oku nyõla, . . . momo ongongo yi keyuka muẽle lukũlĩhĩso wa Yehova ndeci ovava a yukisa okalunga.”

Olonungi viosi palo posi, va ka kala omanu va sole ombembua omunu lukuavo okuti, ocina cimue olo Nações Unidas ka vi tẽla oku linga. Olosamo 37:11 vi popia okuti, vosi “va ka sanjukila ombembua yalua.” Ndopo “ungangala,” “oku vĩhisiwa kuogongo,” “uhũkui” kuenda “uyaki,” ka vi ka panga vali onepa komuenyo wetu. Pole, otembo yipi Usoma wa Suku u ka viala ongongo? Ci ka lingiwa ndati? Nye o sukila oku linga oco o kuatisiwe Luviali waco? Tu konomuisi a tambululo aco.