Ocisimĩlo Cembimbiliya

“‘Olomapalo vi Kapa Omuenyo Kohele’—Ca Sunguluka hẽ Oku vi Linga?”

“KOLONEKE VILO, OMANU VALUA VA LIWEKAPO OKU TALA OLOMAPALO, OCO OVO MUẼLE VA PANGE ONEPA KOLOMAPALO NDEVI: OKU TEHÃ VOLOMBALÃU, OKU LOKA VOLOMUNDA, OKU ENDA LOLOWATO KUENDA OKU LITEVA LOVIMUANDU.”—UKANDA WASAPULO WO WILLOW GLEN RESIDENT.

OLONDAKA evi vi lekisa ovituwa via siata volomapalo. Oku livokiya kuomanu va sole olomapalo ndeci, oku tehã volombalãu, oku londa olomunda viocikokoto, kuenda olomapalo vikuavo vi tukuiwa hati, paragliding kuenda BASE jumping   a vi situlula oluali lumue lu sanjukila oku kapa omuenyo kohele. Omanu va sole olomapalo vioku londa olomunda viocikokoto, oku endela losikaleta volomunda, kuenda oku enda lupuka lolosapato vi kuete alola, olonjanja viosi va siata oku sanda oku yula poku londa kolomunda via lepa calua, oku loka olomunda via cuhã calua kuenda oku tẽha ovinãla vinene. Ukanda waco wasapulo wa popiavo okuti, omanu valua va sole “olomapalo vi kapa omuenyo kohele”—olomapalo vina okuti vana va vi linga, va li kapa kohele yalua—havio vi situlula onjongole yomanu valua yoku pitĩla kovitumãlo “via velapo” kuna kuli ohele, ku sukila uloño haiko ku koka usumba, oco vi vetiye omanu va panga onepa kolomapalo viaco kasulilo osemana, kumue la vana va ci lingainga olonjanja viosi okuti va kuete onjongole yoku kala omunu watete oku yula.

Pole, oku livokiya kuomanu va panga onepa kolomapalo viaco, ku pesiwavo olombongo vialua. Omanu valua va siata oku lilemẽha eci va panga onepa kolomapalo vina vi molẽha ndu okuti via koka. Kofeka yo Estadus Unidus, vokuenda kunyamo 1997, etendelo liomanu va lilemẽha omo lioku linga omapalo yoku enda lolosapato vi kuete alola, oku londa olomunda viocikokoto kuenda oku londa kolomunda, via livokiya eci ci pitahãla 33 kolopulusendu, 31 kolopulusendu kuenda 20 kolopulusendu. Catiamẽla kolomapalo vikuavo, etendelo liaco lia livokiya calua okuti, ci letiwevo ketendelo liomanu va fa omo lioku linga olomapalo vi kapa omuenyo kohele. Vana va songuila olomapalo viaco, va kũlĩha ohele mua kongela kolomapalo viaco. Ukãi umue wa siata oku panga onepa kolomapalo yoku londa kolomunda viocikokoto wa popia hati: “Olonjanja viosi nda siata oku sima okuti ndi fa.” Ulume umue wa loñoloha komapalo yoku lupuka lolosapato vi kuete alola wa popia okuti, “omunu ka lilemẽha lika nda okuti ka kasi oku likolisilako calua.”

Ndomo tua ci konomuisa, Ukristão o pondola oku tenda ndati oku panga onepa kolomapalo viaco? Embimbiliya li pondola oku tu kuatisa ndati poku nõla nda tu panga onepa kolomapalo vi kapa omuenyo kohele? Oku konomuisa ndomo Suku a tenda oku kola kuomuenyo, ci ka tu kuatisa oku tambulula apulilo a-a.

Ndomo Suku a Tenda Omuenyo

Embimbiliya li popia okuti, Yehova eye ‘ono yomuenyo.’ (Olosamo 36:9) Eye ka lulikile lika omanu, pole, wa lingavo esokiyo lioku tu ĩha cosi tu sukila oco tu sanjukile omuenyo. (Olosamo 139:14; Ovilinga 14:16, 17; 17:24-28) Omo liaco, ca sunguluka oku popia okuti, eye o lavoka okuti, tu tata ciwa ovina a tu ĩha lohenda yalua. Ovihandeleko kuenda olonumbi a ecele kepata lia va Isareli, vi tu kuatisa oku ci kũlĩhĩsa ciwa.

Ocihandeleko ca eciwile ku Mose, ca lekisile okuti, omunu wa sukilile oku teyuila omuenyo waye lowu womanu vakuavo. Nda eye ka ci lingile kuenje omunu umue o fa, omunu waco okuti wa ponduile oku tateka elinga liaco, wa ponduile oku kuata eko liosonde. Ndeci, omunu umue o tunga onjo yimue, wa sukilile oku ñualisako evindikiyo volusoka luonjo yaco. Nda okuti ka ci lingile kuenje omunu umue o kupuka oku pisa kolusoka kuenda o fa, epata nda lia kuata eko liosonde. (Esinumuĩlo 22:8) Nda ongombe yimue ya toma omunu umue loku u ponda, muẽleangombe yaco nda ka tendiwile okuti o kuete eko. Pole, sokolola okuti, ongombe yaco ya kũlĩhĩwa ale okuti, ya tema kuenda muẽleaco va enda oku u lungula oco a yi lave loku u kuta. Nda okuti ongombe yaco ya toma omunu umue, muẽleaco nda wa kuata eko liosonde kuenda wa laikele oku pondiwa. (Etundilo 21:28, 29) Omo okuti kovaso a Yehova omuenyo u kola, ocihandeleko caye ca situluile esumbilo koku lava kuenda oku teyuila omuenyo.

Afendeli va Suku vakuekolelo, va kuatele elomboloko liokuti, olonumbi viaco vi ka piwakovo poku linga ocina cimue ci koka ohele. Ulandu umue Wembimbiliya u popia okuti Daviti wa situlula onjongole yoku nyua “ovava a tunda vocisimo ci kasi ocipepi lombundi yo Beteleme,” olupale lumue okuti, kotembo yaco ya kala oku vialiwa la va Filisiti. Asualali vatatu, eci va yeva Daviti oku situlula onjongole yaco, va iñila vocilombo ca va Filisiti kuenda vopa ovava vocisimo ocipepi lombundi yo Beteleme kuenje va a nena ku Daviti. Daviti wa kala ndati? Eye wa likala oku nyua ovava aco, pole, wa a pesila posi loku popia hati: “Ka ca sungulukile kokuange, kovaso a Suku yange oku ci linga! Ndi sukila hẽ oku nyua osonde yalume ava va kapa omuenyo wavo kohele? Momo ovo va kapa omuenyo wavo kohele oco va a nene.” (1 Asapulo 11:17-19) Ku Daviti ka ca sungulukile oku kapa kohele omuenyo umue oco a tẽlise onjongole yaye.

Yesu wa linga cimuamue eci, vocinjonde cimue Eliapu o seteka oco a limbe posi oku pisa kolusoka luonembele, oco a mole nda okuti ovangelo va ponduile oku u teyuila okuti ka lilemẽha. Yesu wa tambulula hati: “Ku ka seteke Yehova Suku yove.” (Mateo 4:5-7) Ndomo tua ci mola, ci kaile Daviti kuenda Yesu, va limbuka okuti, kovaso a Suku, ka ca sungulukile oku kapa omuenyo kohele.

Poku sokolola ovolandu aco, pamue tu lipula ndoco: ‘Nye ci lekisa nda omapalo yimue yi kapa omuenyo kohele ale, sio? Omo kuli olomapalo vimue okuti, ndaño ka vi koki ohele, pole vi pondola oku lingiwa lonjila ka ya sungulukile, tu nõlapo ndati nda tu panga onepa ale sio?

Ca Sunguluka hẽ Oku Kapa Omuenyo Kohele?

Oku kũlĩhĩsa lutate olomapalo tua kũlĩha, ci ka tu kuatisa oku sanga atambululo. Ndeci, tu pondola oku lipula ndoco: ‘Omanu vañami va siata ale oku lilemẽha komapalo yaco? Nda pindisiwa ale ñuete ocimãleho coku liteyuila oco ci ñuatise okuti si li lemẽha? Ovitangi vipi vi pondola oku yilila nda sia tehẽle ciwa ale ocimãleho coku liteyila ca nyõleha? Ndi pondola lika oku lilemẽhapo kamue ale ndi li lemẽha calua kuenda oku fa?’

Kukristão umue wocili, oku kapa omuenyo waye kohele omo liomapalo yimue, ci pondola oku nyõla ukamba waye la Yehova kuenda ovikele vi li kasi a kuete vekongelo. (1 Timoteo 3:2, 8-10; 4:12; Tito 2:6-8) Omo liaco, catiamẽla kolomapalo, Akristão va sukila oku konomuisa ndomo Ululiki a tenda oku kola kuomuenyo.

[Etosi Pombuelo Yemẽla]