Voku likandangiya mua kongela:

• Oku lilongisa oku kevelela

• Oku lavulula olonjongole viove muẽle

• Oku malusula ovopange

• Loku kapako vakuene

Omãla vana va likandangiya, va tẽla oku pandikisa koseteko, ndaño ci lomboloka oku likolisilako calua. Omãla vana ka va tẽla oku likandangiya va pĩtila petosi:

• lioku yaka la vakuavo

• oku kuata esumuo

• oku sipa, oku nyua ale oku fenya olodroga

• ka va litekula ciwa

Ndomo ca konomuisiwa, omãla vana va tẽla oku likandangiya citava okuti, va ka kala akulu vamue ka va kuete ovitangi vialua viuhayele, va tẽla oku talavaya ciwa lolombongo kuenda ka va lueya calua ovihandeleko. Ekonomuiso liaco, lia vetiya ulongisi Angela Duckworth wo Kosikola ya Velapo ko Pensilvânia, oku popia hati: “Ci kuete esilivilo lialua oku likandangiya.”

Lilongisa oku popia hati “sio” kuenje amamako oku kakatela kondaka yaco.

ONUMBI YEMBIMBILIYA: “Ondaka yove yi kale okuti, nda ‘Oco,’ oco, nda ‘Hacoko,’ hacoko.”—Mateo 5:37.

Eci olonjali vi popia viti, “sio” omãla vatito va siata oku linga efiyo ndaño muẽle pokati komanu. Nda olonjali vi linga eci omõla a yongola, eye o ka sima okuti ca sunguluka oku linga efiyo oco vo wĩhe cosi a yongola.

Handi vali, nda olonjali vi tẽlisa ondaka yavo yokuti sio, omõla o li longisa ocina cimue ci kuete esilivilo komuenyo cokuti, lalimue eteke tu tẽla oku linga cosi tu yongola. David Walsh ukuakusakula uvei wowoño wa soneha hati, “ci kuete esilivilo oku limbuka okuti omanu vana va kũlĩha ocili caco, va kuete esanju lialua. Ka ca sungulukile oku ecelela  okuti omãla vetu osimbu va kula, va sima okuti olonjanja viosi va pondola oku kuata cosi va yongola.” a

Tunde vutila oku sapuila omõlove hati “sio,” ci ko kuatisa noke oku popia hati “sio,” si fenyi olodroga, oku lipekela osimbu kakuelele ale kocina cikuavo ci pondola oku u linga lãvi.

Kuatisa omõlove oku limbuka onima yi tunda kovina a linga, nda viwa ale vĩvi.

ONUMBI YEMBIMBILIYA: “Eci omunu a kũla, haico a kongula.”—Va Galatia 6:7.

Omõlove o sukila oku kũlĩha okuti elinga liosi li kuete onima yalio, omo liaco ekambo lioku likandangiya li nena ovitangi. Ndeci, nda omõlove olonjanja viosi ka lekisa epandi nda wa tema, omanu vosi ka va ka kuata onjongole yoku kala ocipepi laye. Pole nda wa lilongisa oku likandangiya eci vo sanumũla, ale wa lilongisa oku yuvula oku teta vakuavo kondaka, omanu va ko sola. Kuatisa omõlove oku limbuka okuti, o ka kuata ekalo liwa komuenyo nda wa lilongisa oku likandangiya.

Kuatisa omõlove oku kũlĩha ocina ci kuete esilivilo lia velapo.

ONUMBI YEMBIMBILIYA: “Vu kũlĩha ovina via velapo vali.”—Va Filipoi 1:10.

Oku likandangiya ka ku lomboloka lika oku yuvula oku linga eci cĩvi, mua kongelavo oku tẽlisa ovikele, ndaño olonjanja vimue upange waco ka u soliwe. Omõlove o sukila oku lilongisa oku nõla ovopange a kuete esilivilo kuenda oku a linga tete. Ndeci, eye o sukila oku linga upange wokonjo osimbu ka fetikila oku papala.

Lekisa ongangu yiwa.

ONUMBI YEMBIMBILIYA: “Ndo sili ongangu okuti, ndeci ame ndo lingi, haico vu lingavo.”—Yoano 13:15.

Omõlove o ka mõla ndomo ove o kala eci kuiya ovina vĩvi. Lekisa okuti oku likandangiya olonjanja viosi oyo onjila ya velapo. Ndeci, nye o linga eci omõlove a seteka epandi liove? Ove hẽ o vangula lonyeño ale lumbombe?