ECI vakuetu va tu tata lesunga, tu liyeva ciwa. Ci tu lembeleka oku kũlĩha okuti ovo va tu kapako. Omo okuti eci vakuetu va tu tata lesunga ci tu nenela esanju, tu lekisavo ndati ocituwa caco?

Omunu una okuti o lekisa esunga liocili poku tata vakuavo, o ci lekisa kolondaka kuenda kovilinga. Eye ka lekisa lika esumbilo. Pole, o tata vakuavo lesunga, momo o va sole kuenda wa kũlĩha ndomo va liyevite. Handi vali, esunga li panga onepa kepako liespiritu sandu lia Suku. (Va Galatia 5:22, 23) Omo okuti Yehova o yongola okuti tu kala vakuesunga, tu kũlĩhĩsi ndomo eye kumue lomõlaye va siata oku lekisa esunga kuenda ndomo tu setukula ongangu yavo.

Yehova ukuesunga la vosi, oku kongelamo “vakualutukãi kuenda olondingaĩvi.” (Luka 6:35) Yehova o “tundaisaila ekumbi kolondingaĩvi kuenda komanu vawa, o lokaisaila ombela ku vakuesunga lava havakuesungako.” (Mateo 5:45) Ndaño muẽle omanu vana ka va tava okuti Yehova eye Ululiki, va pondolavo oku kuatisiwa lesunga liaye kuenda oku kuata esanju komuenyo.

Onjila ya velapo Yehova a lekisa esunga ceci a linga ku Adama la Eva. Noke lioku linga ekandu, “va litongela amẽla akuyu ha va liluvikiyila okowalo.” Yehova wa kũlĩhĩle okuti noke lioku tunda vocumbo Cedene va sukilile uwalo oco ka va ka kale epolõla, momo osi ya siñaliwile kuenda yeyukile “olosongo loholokoso.” Yehova locisola calua wa va “tungila ovikutu viovipa.”—Efetikilo 3:7, 17, 18, 21.

Ndaño okuti Yehova o lekisa ocisola ku “vakuesunga lava havakuesungako,” eye wa kapako vali calua afendeli vaye vakuekolelo. Ndeci, otembo Sakariya a kala uprofeto, ungelo umue wa lekisa esakalalo momo va Isareli va liwekelepo oku tunga onembele ya Yehova ko Yerusalãi. Yehova wa yevelela eci ungelo o sapuila kuenje wo “kumbulula lolondaka viwa haivio vielembeleko.” (Sakariya 1:12, 13) Yehova wa tatavo Eliya lonjila yimuamue. Vepuluvi limue uprofeto wa yeva esumuo lialua kuenda wa liyeva okuti o kasi ulika kuenje wa pinga ku Yehova oco a fe. Yehova wa kapaleko asakalalo a Eliya kuenje wa tuma ungelo umue oco o kuatise. Handi vali, Yehova wa sapuila uprofeto okuti ka kaile ulika. Esunga lia Yehova lia pamisa Eliya oku amamako locikele caye. (1 Olosoma 19:1-18) Pole, pokati kafendeli vosi va Yehova, helie o sima okuti wa setukula ciwa esunga lia Yehova?

Eci Yesu a kala palo posi, omanu va ponduile oku limbuka okuti eye ukuesunga. Eye wa sungulukile kuenda ka la kisika omanu oku linga eci eye a yongola. Eye wa kapeleko omanu kuenje wa popia hati: “Enjui kokuange, ene vosi wa kavi haene vu kuete ovilemo kuenje  ndu kavuluisi. . . . Okanga yange ya sunguluka.” (Mateo 11:28-30) Omo okuti Yesu wa sungulukile calua, omanu va enda oku u kuama kocitumãlo cosi a enda. Omo liohenda Yesu a kuata, wa va ĩha okulia wa va sakula kuenda wa va “longisa ovina vialua” viatiamẽla ku Isiaye.—Marko 6:34; Mateo 14:14; 15:32-38.

Yesu wa kapeleko asakalalo omanu kuenje wa va tata lesunga kuenda ohenda. Ndaño velivala lina okuti wa kuatele ovina vialua vioku linga, eye locisola calua wa kuatisa vosi veya kokuaye. (Luka 9:10, 11) Sokolola kueci ca pita lukãi wa kala locitangi coku pita osonde. Omo okuti wa yonguile oku sakuiwa, wa lamba kuwalo wa Yesu. Eye wa tendiwile okuti wa vĩha ndomo ca kisikiwile vocihandeleko ca Mose. (Ovisila 15:25-28) Nye Yesu a linga? Yesu poku vangula laye ko temẽlele. Yesu wa limbuka okuti ukãi o kasi lusumba kuenje wo kuatela ohenda omo wa kala ale luvei waco 12 kanyamo. Eye wo sapuila hati: “Amõlange, ekolelo liove lia ku kayisa. Kuende lombembua kuenda kaya kuvei wove.” (Marko 5:25-34) Yesu wa lekisa esunga liocili!

Ovolandu tua konomuisa a tu longisa okuti, nda tua lekisa esunga tu ka linga cosi citava oco tu kuatise vakuetu. Yesu wa lekisa esilivilo liaco eci a tukula olusapo lulume u Samaria. U Yudea umue wa pundiwa, wa tipuiwa, kuenje vo sia okuti wambuka konele yetapalo. Pole, ulume umue u Samaria poku pita ketapalo liaco eci o mola, wo kuatela ohenda ndaño okuti pokati ka va Samaria la va Yudea pa kala ukuse. Omo liesunguluko, wa kuatisa ulume waco. Wa kuta apute aye noke wo wambata konjo yolongende. Kuenje ulume u Samaria wa feta ku muẽleanjo oco a tate ulume u Yudea kuenda wa fetavo ovina vikuavo via sukiliwile.—Luka 10:29-37.

Esunguluko li tu vetiya oku tata kuenda oku lembeleka vakuetu hakolondakako lika, pole, lo kovilinga. Embimbiliya li popia hati: “Ohele vutima womunu yu petamisa, ondaka yohenda puãi yu petula.” (Olosapo 12:25) Nda esunga kuenda ohenda vi tu vetiya oku popia ovina vi lembeleka vakuetu, ovo va ka kuata esanju. * (Tanga etosi pombuelo yemẽla.) Olondaka vietu viocisola vi ka lekisa okuti tua va kapako kuenje ci leluka kokuavo oku pandikisa kovitangi.—Olosapo 16:24.

Vosi yetu tu pondola oku kala vakuesunga momo omanu vosi va lulikiwa lesetahãlo lia Suku. (Efetikilo 1:27) Ndeci, Juliu, ukualohoka ko Roma wa kuatele ocikele coku tuala upostolo Paulu ko Roma, wa “tata Paulu lohenda kuenda wa ecelela okuti eye enda kakamba vaye oco vo kuatise” volupale luo Sidono. (Ovilinga 27:3) Eci Paulu lomanu vakuavo va linga ungende lonaviyu okuti noke ya nyõleha, omanu vo ko Melita va “lekisa ohenda yalua” kokuavo kuenda va siakãla ondalu oco va yote. (Ovilinga 28:1, 2) Omanu vaco va lekisa elinga liwa. Pole, oco tu sanjuise Yehova, tu sukila oku lekisa esunga otembo yosi.

Yehova o yongola okuti esunga li kala ocituwa cetu. Omo liaco, o tu vetiya oku ‘wala’ ohenda. (Va Kolosai 3:12) Pole, ka ca lelukile oku kala ukuesunga otembo yosi. Momo lie? Pamue ka tu lekisa esunga omo liohele, omo ka tua likolelele, ale tu kuete epela. Ale pamue ci tĩla oku lekisa esunga ku vana va tu tata lãvi. Pole, nda tua likutilila oku pinga espiritu sandu lia Yehova loku u setukula, eye o ka tu kuatisa oku kala vakuesunga.—1 Va Korindo 2:12.

 Tu kũlĩha ndati okuti oku likolisilako ci tu kuatisa oku lekisa esunga? Lipula ndoco: ‘Ñuete hẽ ocituwa coku yevelela vakuetu loku kapako ekalo liavo? Anga hẽ ndi limbuka eci vakuetu va sukila ekuatiso? Yipi onjanja ya sulako nda lekisa esunga ku umue okuti ukuepatako, ale ekambako?’ Kuata ocimãho coku kũlĩha ciwa omanu o lisungue lavo, capiãla enene vamanji vekongelo. Nda wa ci linga, o ka kũlĩha ovitangi viavo kuenda asukila avo. Noke likolisilako oku tata omanu locisola ndomo o yongola oku tatiwavo. (Mateo 7:12) Omo liaco, pinga ku Yehova oco a ku kuatise kuenje eye o ka sumũlũisa alikolisilo ove oku lekisa esunga.—Luka 11:13.

Eci Paulu a lombolola ovina vio kuatisa oku kala ukundi uwa, cimue pokati kavio esunga. (2 Va Korindo 6:3-6) Omanu va solaile calua Paulu momo wa lekisa esunga kovina viosi a enda oku popia levi a lingaile kuenje ovo va enda oku limbuka okuti Paulu wa va kapeleko. (Ovilinga 28:30, 31) Nda tua lekisavo esunga, omanu va ka kuata onjongole yoku kũlĩha ocili. Nda tua lekisa esunga komanu vosi, ndaño muẽle vana va tu tata lãvi ci va vetiya oku linga apongoloko kovituwa viavo. (Va Roma 12:20) Citava okuti vokuenda kuotembo va ka lekisa onjongole yoku lilongisa Embimbiliya.

Voluali luokaliye omanu vosi va ka lekisa esunga komunu lukuavo. Vamue va ka pinduiwa ci ka kala onjanja yatete oku tatiwa lesunga. Ocili okuti, eci ci ka va vetiyavo oku lekisa esunga ku vakuavo. Wosi una okuti ukuesungako kuenda ka yongola oku kuatisa vakuavo, ka pondola oku kala vemẽhi Liusoma wa Suku. Omanu vana va lekisa ocisola kuenda esunga ovo lika va ka kala Voluali Luokaliye otembo ka yi pui. (Osamo 37:9-11) Voluali mu ka kala ombembua loku kolapo! Osimbu tu lavoka otembo yaco tu pondola oku kuatisiwa omo lioku lekisa esunga. Ndamupi?

Embimbiliya li popia hati: “Ukuahenda o lisumuluisa eye muẽle.” (Olosapo 11:17) Omanu va sole oku kala lomunu una o lekisa esunga kuenda ovo vo tatavo lesunga. Yesu hati: “Onjongo vu yonga layo haiyo vo yongelivo.” (Luka 6:38) Ci leluka omunu ukuesunga oku sanga akamba vawa, loku amamako lukamba waco.

Upostolo Paulu wa sapuila vamanji kekongelo lio ko Efeso hati, “likuateli ocisola pokati, lingi vakuahenda, loku liecela pokati.” (Va Efeso 4:32) Nda vekongelo vosi va lekisa esunga kuenda vakuahenda, ekongelo li pama kuenje li likuata omunga. Etu ka tu yongola oku lundila vamanjetu, oku va lingila olombonde, ale oku va lingila cimue ci va sumuisa kuenda oku va sepula. Omo liaco, tu sukila oku vangula ovina vi kuatisa haivio vi pamisa. (Olosapo 12:18) Nda tua ci linga, vosi vekongelo va ka vumba Yehova lesanju.

Ndomo tua lilongisa, esunga ocituwa cimue ci lekisiwa kolondaka kuenda kovilinga. Nda tua lekisa esunga tu setukula Yehova, Suku ukuacisola haeye ukuacali. (Va Efeso 5:1) Eci ci ka pamisa ekongelo kuenda ci ka vetiya omanu vakuavo oku vumbavo Yehova. Omo liaco, tu likolisiliko oku ci linga oco omanu va limbuke okuti Olombangi Via Yehova vakuesunga!