1, 2. Ovisimĩlo vipi via litepa omanu va kuete catiamẽla kocumbo celau?

VAMANJI valua va tunda kolofeka via litepa, va enda ko Seoul yo Korea kohongele yimue yofeka. Eci va kala oku tunda pocitumãlo cohongele vamanji vakuafeka yaco va va ñuala vosi. Ca posokele calua oku mola ndomo vosi va kaluka loku popia vati: “Tu ka li sanga Vocumbo Celau!” Ocumbo cipi celau o sima okuti oco va kala oku tukula?

² Omanu koloneke vilo va kuete ovisimĩlo via litepa catiamẽla kocumbo celau. Vamue ka va tava okuti ocumbo celau ci keya muẽle. Vakuavo va popia okuti ocumbo celau ocitumãlo cimue ci va nenela esanju. Omunu una o kasi lonjala yalua kuenje o tumala komesa kueyuka okulia kualua o liyeva ndu okuti o kasi vocumbo celau. Kanyamo a pita, ukãi umue wa mola ondamba yimue yeyuka olonelẽho via posoka kuenje wa komõha loku popia hati: “Tali ño, ocumbo celau!” Toke etaili ocitumãlo caco ci tukuiwa okuti Ocumbo Celau, ndaño okuti unyamo lunyamo ci yuka ocikokoto vocinãla ci soka 15 kolometulu. Nye osima kueci ci lomboloka Ocumbo Celau? O lavoka hẽ okuti eteke limue ku kala Ocumbo Celau?

3. Yipi onjanja yatete Ocumbo Celau ca tukuiwa Vembimbiliya?

 ³ Embimbiliya li tukula ocumbo celau ca kala kosimbu leci ci keya kovaso yoloneke. Tu tanga eci catiamẽla Kocumbo Celau onjanja yatete kelivulu Liefetikilo 2:8 ku popia hati: “Yehova Suku yu wa kũla ocumbo ve Edene lia kala kutundilo; omo a kapa omunu a sovola.” Vovisonehua vio Heveru ondaka “Edene” yi lomboloka “Esanju.” Ocumbo caco ca kala ocitumãlo ca posoka. Mua kala okulia kualua kuenda pokati komanu lovinyama pa kala ombembua.—Efetikilo 1:29-31.

4. Momo lie tu sokisila ocumbo Cedene locumbo celau?

⁴ Kelimi lio Heveru ondaka “ocumbo” ya pongoluiwa hati, pa·raʹdei·sos ko Helasi. Elivulu limue lia popia okuti, omunu umue o vangula o Helasi eci a yeva ondaka pa·raʹdei·sos, o sokolola kocitumãlo cimue ca fina haico ca tanda okuti ka muli lacimue ci koka ohele. Muli oviti via posoka vima apako añi añi, olondui via fina, lowangu wa fina okuti ocunda colonusi kuenda colomeme omo vi kasi.—Ci sokisa Lefetikilo 2:15, 16.

5, 6. Momo lie Adama la Eva va pumbila esumũlũho lioku kala Vocumbo Celau kuenda apulilo api vamue va siata oku linga?

⁵ Yehova wa kapelevo Adama la Eva vocumbo ca lisoka leci okuti, ocumbo celau. Pole, omo va sinĩla Yehova, ovo kumue lovitumbulukila viavo, va pumba oku kala Vocumbo celau. (Efetikilo 3:23, 24) Ndaño okuti kotembo yaco Vocumbo Celau ka mua kaile vali omanu, ci tava okuti handi ocumbo caco ca kalako toke Ketande lio koloneke via Noha.

⁶ Vamue pamue va pula ndoco: ‘Anga hẽ ongongo yi ka kala vali Ocumbo Celau?’ Nye ovolandu a lekisa? Nda o lavoka oku kala Vocumbo Celau la vana o sole, o kuete hẽ asunga awa oku ci lavoka? O pondola hẽ oku lombolola esunga lieci tua kolelela okuti ongongo yi ka kala muẽle ocumbo celau?

7, 8. (a) Ohuminyo yipi Suku a linga ku Avirahama? (b) Elomboloko lipi Avirahama a kuata catiamẽla kohuminyo Suku a tukula?

⁷ Atambululo apulilo atiamẽla Vocumbo Celau, tu a sanga Vembimbiliya, momo elivulu liaco lia Yehova usovoli Wocumbo Celau. Kũlĩhĩsa eci Suku a sapuila Avirahama ekamba liaye. Suku wo sapuila okuti wa ponduile oku luisa ombuto ya Avirahama “ndeseke li kasi pongongo yokalunga.” Omo liaco, Yehova wa linga ohuminyo ku Avirahama yokuti: “Olofeka viosi viokilu lieve vi sumũlũhila kombuto yove momo wa pokola kondaka yange.” (Efetikilo 22:17, 18) Noke yotembo yimue, Suku wa pitulula ohuminyo yaco komõla a Avirahama kuenda konekulu yaye.—Tanga Efetikilo 26:4; 28:14.

⁸ Layimue onepa Yembimbiliya yi popia okuti Avirahama wa kala loku sima okuti omanu va ka mola onima vocumbo Celau kilu. Omo liaco, eci Suku a likuminya okuti “apata osi okilu lieve” asumũlũha, Avirahama wa kuata elomboloko liokuti asumũlũho aco a ka kala palo posi. Anga hẽ owu owo lika uvangi u sangiwa Vembimbiliya u lekisa okuti ocumbo celau ci ka kala palo posi?

9, 10. Ohuminyo yipi yikuavo yi tu kuatisa oku kolela okuti ku ka kala ocumbo celau?

 ⁹ Suku wa vetiya umue pokati kovitumbulukila via Avirahama okuti Daviti, oco a lombolole eci catiamẽla kovaso yoloneke eci ‘olondingaĩvi ka vi ka kalako.’ (Osamo 37:1, 2, 10) Eye hati: “Ambombe puãi va piñala ofeka, kuenje va sanjukila okusalala kualua.” Daviti wa popiavo hati: “Olondingesunga vi piñala ofeka, vi tungamo oloneke ka vi pui.” (Osamo 37:11, 29; 2 Samuele 23:2) O sima hẽ okuti olohuminyo evi vi sanjuisa omanu vana va yongola oku linga ocipango ca Suku? Ovo va kuete elavoko liokuti ambombe ovo lika va ka piñala ofeka, eci yi ka linga vali ocumbo celau ndeci ca kala ocumbo Cedene.

¹⁰ Vokuenda kuotembo va Isareli vamue va popele okuti va vumba Yehova, vo likala kuenda va likalavo efendelo liocili. Kuenje Suku wa vetiya va Bavulono oco va yule afendeli vaye, oku nyõla ofeka yavo, loku vambata kumandekua. (2 Asapulo 36:15-21; Yeremiya 4:22-27) Pole, ovaprofeto va Suku va popele okuti, afendeli vaye va laikele oku tiuka kofeka yavo noke 70 kanyamo. Ovitumasuku viaco via tẽlisiwa ocili. Ovio vi kuetevo esilivilo koloneke vilo. Osimbu tu kũlĩhĩsa vimue pokati kovitumasuku viaco, limbuka okuti ovio vi tu ĩha esunga lioku lavoka ocumbo celau palo posi.

11. Otembo yipi kua tẽlisiwa tete olondaka via Isaya 11:6-9 kuenda apulilo api tu sukila oku linga?

¹¹ Tanga Isaya 11:6-9. Suku vocakati cuprofeto Isaya wa popia hati, eci va Isareli va tiuka vofeka yavo, mua laikele oku kala ombembua. Lomue o ka kuatela vali usumba ovinyama, ale omanu. Amalẽhe kuenda akulu va ka kolapo. Eci ka ci ku ivaluisa hẽ ekalo liwa lia kala vocumbo Cedene? (Isaya 51:3) Isaya wa popelevo okuti ongongo yosi, ya laikele oku “yuka ukũlĩhĩso wa Yehova ndeci ovava eyuka vokalunga,” okuti ha vo Isareliko lika. Ovina viaco via laikele oku tẽlisiwa otembo yipi? Ocili okuti ci ka tẽlisiwa kovaso yoloneke.

12. (a) Vana va tunda kumandekua ko Bavulono asumũlũho api va kuata? (b) Nye ci lekisa okuti olondaka via Isaya 35:5-10 vi ka tẽlisiwavo kovaso yoloneke?

¹² Tanga Isaya 35:5-10. Limbuka okuti Isaya wa popia vali catiamẽla ku va Isareli poku tunda ko Bavulono okuti, ka va kuatela usumba ovinyama, ale omanu. Eye wa lombolola okuti vofeka yaco mu ka ima apako awa momo mua laikele oku kuata ovava alua ndeci ca kala vocumbo Cedene. (Efetikilo 2:10-14; Yeremiya 31:12) Anga hẽ ocitumasuku caco ca laikele lika oku tẽlisiwa koloneke via va Isareli? Ocitumasuku caco ca popiavo hati, olomeke, ovilema kuenda ovisitatuĩ via ponduile oku sakuiwa. Pole, ocitumasuku eci ka ca tẽlisiwile ku va Isareli va tunda ko Bavulono. Suku wa lekisa okuti wa ponduile oku sakula ovovei osi kovaso yoloneke.

13, 14. Olondaka via Isaya 65:21-23 via tẽlisiwa ndati ku va Isareli eci va tunda ko Bavulono kuenda onepa yipi yocitumasuku handi yi ka tẽlisiwa? (Tala ociluvialuvia kefetikilo liocipama.)

 ¹³ Tanga Isaya 65:21-23. Eci va Yudea va tiukila kofeka yavo, va sanga okuti olonjo, ovapia kuenda oviumbo via yuva via nyõleha. Pole, omo Suku wa va sumũlũisa, vokuenda kuotembo ovina via pongoloka. Sokolola esanju omanu va kuata poku tunga olonjo loku kalamo kuenda oku lia kovikũla viavo va lima!

¹⁴ Ocitumasuku eci ci lombolola okuti oloneke vietu “vi linga ndoloneke vioviti.” Oviti vimue vi kala olohuluwa vianyamo. Oco omanu va kale otembo yalua, va sukila oku kuata uhayele uwa. Nda va kaile vekalo liwa halio liombembua ndeci Isaya a ci popia, ocili okuti nda ca lekisa ndoku kala vocumbo celau! Pole, ocitumasuku eci ci ka tẽlisiwa!

15. A sumũlũho api a tukuiwa kelivulu lia Isaya?

¹⁵ Sokolola kolohuminyo tua konomuisa, ovio vi lekisa okuti kovaso yoloneke ku ka kala muẽle ocumbo celau. Oluali luosi lu keyuka lomanu va sumũlũisiwa la Suku. Lomue o ka kuatela usumba ovinyama, ale omanu olongangala. Olomeke, ovilema kuenda ovisitatuĩ vi ka sakuiwa. Omanu va ka tunga olonjo viavo kuenda va ka sanjukila okulia kapako avo muẽle. Ovo va ka kala otembo ka yi pui okuti oviti vi sule. Ocili okuti, Embimbiliya lieca uvangi wokuti ocumbo celau ci keya muẽle. Omanu vamue tua siata oku sapela lavo, va popia okuti ovitumasuku evi ka vi lomboloka okuti ku ka kala muẽle ocumbo celau palo posi. Nye o pondola oku va sapuila? Asunga api o kuete oku kolela okuti ongongo yi ka kala muẽle ocumbo celau? Yesu ulume wa velapo wa kala palo posi, wa lekisa esunga liaco.

16, 17. Vepuluvi lipi Yesu a vangula catiamẽla Kocumbo Celau?

¹⁶ Ndaño okuti Yesu ka kuatele eko, wa sombisiwa kuenda wa valeliwa kuti oco a file kumosi lalume va Yudea olongangala, okuti umue kondio ukuavo kepĩli. Umue pokati kavo wa limbuka okuti Yesu eye soma kuenje wa popia hati: “A Yesu, njivaluke eci iñila Vusoma wove.” (Luka 23:39-42) Ohuminyo Yesu a linga ya eca kongangala elavoko. Ohuminyo yaco yi sangiwa kelivulu lia Luka 23:43. Vamue vakuakukonomuisa va kapa ovirgula konyima yondaka “etaili” kuenje va ci pongolola ndoco: “Ocili ndu ku sapuila, etaili siti o ka kala kumue lame Vocumbo Celau.” Ovisimĩlo vialua via litepa viatiamẽla ponepa va sukila oku kapa ovirgula. Pole, nye Yesu a yonguile poku popia hati, “etaili”?

¹⁷ Kalimi alua, ovirgula yi kapiwa oco ci kuatise oku eca elomboloko liulandu umue. Pole, ovisonehua viatete kelimi Liohelasi, ovirgula yaco halonjanja viosiko ya kuamiwa. Omo liaco pamue tu li pula ndoco: Anga hẽ Yesu wa kala oku popia hati: “Ocili ndu ku sapuila: Etaili siti o ka kala kumue lame Vocumbo Celau”? Ale wa kala loku popia hati: “Ocili, ndu ku sapuila etaili siti: O ka kala kumue lame Vocumbo Celau”? Vamue vakuakupongolola, va kapa ovirgula kovaso, ale konyima yondaka “etaili” loku sima okuti oco Yesu a yonguile oku popia kuenje ove o pondola oku sanga olondaka viaco Vembimbiliya koloneke vilo.

18, 19. Nye ci tu kuatisa oku kuata elomboloko lieci Yesu a yonguile oku popia hati, “etaili”?

 ¹⁸ Ivaluka okuti Yesu wa sapuila olondonge catiamẽla kolofa viaye. Eye wa va sapuila hati: “Mõlomunu o ka kala vutima wongongo ovotanya atatu lovoteke atatu.” Wamisako hati: “Mõlomunu o laika oku pakuiwa peka liomanu kuenda va ko ponda kuenje keteke liatatu o pinduiwa.” (Mateo 12:40; 16:21; 17:22, 23; Marko 10:34) Upostolo Petulu wa lombolola okuti ceya oku pita muẽle. (Ovilinga 10:39, 40) Omo liaco, Yesu ka endele Vocumbo Celau keteke eye a fa kumue lulume ongangala. Embimbiliya li popia okuti Yesu wa kala “Veyambo” oloneke vitatu, toke eci Suku o pindula.—Ovilinga 2:31, 32. * (Tala etosi pombuelo yemẽla.)

¹⁹ Omo liaco, Yesu poku popia hati, “Ocili, ndu ku sapuila etaili siti,” ca lekisa okuti wa linga ohuminyo kulume ongangala. Eyi onjila yimue ya siataile oku vanguiwa tunde kotembo ya Mose. Onjanja yimue Mose wa popia hati: “Olondaka evi ñasi loku ku sapuila etaili vi kale vutima wove.”—Esinumuĩlo 6:6; 7:11; 8:1, 19; 30:15.

20. Nye ci tu kuatisa oku kuata elomboloko lieci Yesu a popia?

 ²⁰ Vakuakupongolola Embimbiliya vo kolofeka vio Kutundilo va popia hati: “Vocinimbu eci, ondaka ‘etaili’ citava oku yi tanga ndoco, ‘Ocili, ndu ku sapuila etaili siti, o ka kala kumue lame Vocumbo Celau.’ Ohuminyo eyi ya lingiwa keteke liaco kuenda yi ka tẽlisiwa kovaso yoloneke.” Vakuakupongolola va popia vali hati, omo okuti omanu kolonepa viaco oco va siataile oku popia, ci lekisa okuti “ohuminyo yaco ya popiwa keteke limue kuenje yamamako.” Kelimi lio Suriaku kocita catãlo, ocinimbu caco ca pongoluiwa hati: “Amene, ndu ku sapuila etaili siti, o ka kala kumue lame Vocumbo Cedene.” Vosi yetu tu lembelekiwa lohuminyo yaco.

21. Ovina vipi ulume ongangala a sukilile oku tẽlisa kuenda momo lie?

²¹ Eci Yesu a sapuila ulume ongangala catiamẽla Kocumbo Celau, Yesu ka tukuile okuti ci ka kala kilu. Tua ci kũlĩha ndati? Esunga liaco lieli okuti, ulume ongangala ka kũlĩhĩle okuti Yesu wa linga ocisila lolondonge viaye vakuekolelo, coku ka viala laye kilu. (Luka 22:29) Kuenda ulume ongangala handi ka papatisiwile. (Yoano 3:3-6, 12) Eci Yesu a linga ohuminyo kulume waco, eye wa kala oku popia catiamẽla kocumbo celau palo posi. Noke lianyamo amue, upostolo Paulu wa popia eci catiamẽla kocinjonde culume umue “wambatiwa kocumbo celau.” (2 Va Korindo 12:1-4) Ndaño okuti Paulu kuenda ovapostolo vakuavo va nõliwa oku ka viala la Yesu kilu, Paulu wa kala oku popia catiamẽla kocumbo celau ci laika oku iya. * (Tala etosi pombuelo yemẽla.) Anga hẽ ocumbo caco celau ca laikele oku kala palo posi? Ove hẽ o ka kalamo?

22, 23. Elavoko lipi o kuete?

²² Ivaluka okuti Daviti wa popia eci catiamẽla kotembo eci “olondingesunga vi piñala ofeka.” (Osamo 37:29; 2 Petulu 3:13) Daviti wa tukula otembo eci omanu vosi palo posi va ka pokola kolonumbi viesunga via Suku. Ocitumasuku ca Isaya 65:22 ci popia hati: “Oloneke viomanu vange vi linga ndoloneke vioviti.” Eci ci lekisa okuti omanu vana va fendela Yehova, voluali luokaliye va ka kala otembo ka yi pui. Nye o lavoka? Ndomo elivulu Liesituluilo 21:1-4 li popia, Suku o ka sumũlũisa omanu kuenda amue pokati kasumũlũho aco ceci okuti, “oku fa ka ku kalako vali.”

²³ Ovina Embimbiliya li longisa catiamẽla Kocumbo celau, viocili. Adama la Eva va pumba esumũlũho lioku kala otembo ka yi pui Vocumbo Celau, pole, ongongo yi ka linga vali ocumbo celau. Suku wa likuminya okuti o ka sumũlũisa omanu palo posi. Daviti wa popia okuti ambombe kuenda vakuesunga va ka pinãla ofeka kuenje va kalamo otembo ka yi pui. Ocitumasuku ci sangiwa kelivulu lia Isaya ci tu kuatisa oku luluvalela kasumũlũho kotembo tu ka kuata omuenyo ko pui vocumbo celau palo posi. Ci ka kala otembo yipi? Eci Yesu a likuminya kulume ongangala ci ka tẽlisiwa. Ove o ka kala Vocumbo Celau. Kotembo yaco, olondaka vamanji va popia kohongele yofeka ko Korea vi ka tẽlisiwa muẽle viokuti: “Tu ka li Sanga Vocumbo Celau!”