1-2. Asumũlũho api omunu umue a pondola oku kuata noke lioku papatisiwa?

 ECI tu papatisiwa tu kuata esumũlũho linene, momo tu fetika oku panga onepa kepata lia Yehova. Vana va kuete esumũlũho liaco, va tava kolondaka Viukualosamo Daviti wa popia hati: “Wa sumũlũha omunu una ove o nõla haeye ove o laleka oco amẽle kokuove, oco a kale vovitali viove.”—Osa. 65:4.

² Havosiko Yehova a ecelela okuti va tiamẽla kepata liaye. Ndomo tua ci konomuisa vocipama ca pita, eye amela lika ku vana va likolisilako oku kuata ukamba laye. (Tia. 4:8) Eci o litumbika ku Yehova loku papatisiwa, o kuata ukamba umue ulikasi laye. Kolela okuti, noke lioku papatisiwa, Yehova o ka ‘sukumuĩla kokuove asumũlũho, toke eci ka ku kambi vali cimue.’—Mal. 3:10; Yer. 17:​7, 8.

3. Ukristão wa litumbika loku papatisiwa ocikele cipi a kuete? (Ukundi 5:​4, 5)

³ Epapatiso efetikilo liupange o lingila Yehova. Noke lioku papatisiwa o ka kuata onjongole yoku likolisilako oku tẽlisa ohuminyo wa linga yoku vumba Yehova kuenda oku amamako oku kakatela kokuaye, ndaño ceci o setekiwa oku linga eci ka ca sungulukile, ale ceci o lipita lovitangi. (Tanga Ukundi 5:​4, 5.) Omo okuti wa linga ondonge ya Yesu, o ka kuama lutate ongangu yaye kuenda ovihandeleko viaye. (Mat. 28:​19, 20; 1 Pet. 2:21) Ocipama cilo, ci ka ku kuatisa oku ci linga.

 ‘AMAMAKO OKU KUAMA YESU’ NDAÑO LOVITANGI KUENDA OLOSETEKO

4. Konepa yipi olondonge via Yesu via laikele oku ambata “uti wekangiso?” (Luka 9:23)

⁴ Noke lioku papatisiwa ku ka sime okuti ku ka liyaka vali lovitangi. Yesu wa lombolola ciwa okuti olondonge viaye via laikele oku ambata “uti wekangiso.” Ovo va ponduile oku ci linga “eteke leteke.” (Tanga Luka 9:23.) Anga hẽ Yesu wa kala oku popia okuti olondonge viaye otembo yosi via laikele oku tala ohali? Sio. Eye wa yonguile oku popia hati, ovo ka va ka kuata lika asumũlũho, pole, va ponduilevo oku liyaka lovitangi. Pole, vimue pokati kovitangi viaco, ka via laikele oku leluka.—2 Tim. 3:12.

5. Asumũlũho api Yesu a likuminya ku vana va likolisilako?

⁵ Citava okuti, wa liyakele ale lelambalalo li tunda kepata, ale oku siapo oku linga upange umue weca olombongo vialua oco o pitise kovaso Usoma wa Suku komuenyo wove. (Mat. 6:33) Nda eci oco ove wa linga kolela okuti, Yehova wa kũlĩha ovilinga viove viosi viekolelo. (Va Hev. 6:10) Pamue wa kuatisiwile ale lolondaka via Yesu viokuti: “Ka kuli omunu o sia onjo, ale vamanjaye alume la vamanjaye akãi, pamue isia ale ina, pamue omãla ale epia omo lionduko yange kuenda olondaka viwa, okuti cilo ka tambula ci pitahãla 100 kolonjanja, onjo, ale vamanjaye alume la vamanjaye akãi, pamue va ina, ale omãla, ale ovapia lalambalalo kuenda voluali lu laika oku iya, omuenyo ko pui.” (Mar. 10:​29, 30) Kolela okuti asumũlũho o ka tambula alua vali okuti, alikolisilo o linga a sule.—Osa. 37:4.

6. Noke lioku papatisiwa momo lie o ka sukilila handi oku likolisilako oku yula “oloñeyi vietimba?”

⁶ Ocili okuti noke lioku papatisiwa, o ka sukila oku likolisilako oco o yule “oloñeyi vietimba.” (1 Yoa. 2:16) Momo, handi kua lipuile. Olonjanja vimue o ka liyeva ndeci upostolo Paulu. Eye wa soneha hati: “Vutima wange ndi sanjukila ocihandeleko ca Suku, puãi ndete ocihandeleko cikuavo vetimba liange ci liyaka locihandeleko cutima wange okuti, ci ndi tuala kupika wocihandeleko cekandu ci kasi vetimba liange.” (Va Rom. 7:​22, 23) Pamue o pondola oku sumua momo o sukila oku liyaka lolonjongole ka via sungulukile. Pole, oku sokolola kohuminyo wa linga ku Yehova eci wa litumbika kokuaye, ci ka ku pamisa okuti ku yuliwa loloseteko. Ocili ceci okuti, ohuminyo yaco yi ka ku kuatisa eci o ka liyaka loloseteko. Ndamupi?

7. Oku litumbika ku Yehova ku ka ku kuatisa oku linga nye?

⁷ Eci o nõlapo oku litumbika ku Yehova, o ka yuvula oku lisokolola lika ove muẽle. Ci lomboloka okuti o likala olonjongole kuenda ovimãho vina ka vi sanjuisa Yehova. (Mat. 16:24) Kuenje eci o ka liyaka loseteko yimue ka ya lelukile, ku ka kuata atatahãi lieci o pondola oku linga. O ka tẽla oku nõla onjila o kuama okuti, oku amamako oku kakatela ku Yehova. Ove o kamamako oku sanjuisa Yehova. O ka linga nda Yovi okuti ndaño wa kala oku liyaka lovitangi vialua, wa popia hati: “Si liwekapo kekolelo liange!”—Yovi 27:5.

8. Oku sokolola kohutililo yelitumbiko ci ku kuatisa oku linga nye?

⁸ Poku sokolola kohutililo yelitumbiko wa linga ku Yehova, o ka tẽla ndomo o tamalãla leyonjo liosi. Ndeci, anga hẽ nda wa fetika oku linga ocitiokoso lohueli yomunu ukuavo? Ocili okuti nda wa yuvula elinga liaco! Momo wa likuminya ku Yehova okuti lalimue eteke wa laikele oku ci linga. Lonjila eyi o ka yuvula ovitangi vi tunda kovisimĩlo ka via  sungulukile. Poku ci linga o ka ‘tinduka vonjila yolondingaĩvi.’—Olosap. 4:​14, 15.

9. Oku sokolola kohutililo yelitumbiko ci ku kuatisa oku nõlapo oku linga nye?

⁹ Nye ci popiwa nda okuti omunu umue wa ku ĩha upange umue woku sanda eteku, pole, owo u ku tateka oku enda kolohongele? Ocili okuti, ove wa kũlĩha eci o pondola oku linga. Osimbu kua tambuile upange waco, wa nõlelepo ale okuti kua laikele oku tava upange una u ku tateka oku enda kolohongele. Kuenje ku ka vetiyiwa oku tava upange waco okuti, noke oco lika o sanda onjila yoku pitisa kovaso efendelo liove ku Yehova. Pole, oku sokolola kongangu ya Yesu ci pondola oku tu kuatisa. Momo eye wa nõlelepo oku sanjuisa Isiaye. Ndeci Yesu a linga, nõlapo oku likala lonjanga cosi ci sumuisa Suku una ove wa litumbika kokuaye.—Mat. 4:10; Yoa. 8:29.

10. Yehova o ka ku kuatisa ndati oco ‘wamameko oku kuama’ Yesu noke liepapatiso?

¹⁰ Onjila o kuama poku liyaka lovitangi ale ceci o setekiwa oku linga eci ka ca sungulukile, yi pondola oku situlula nda o yongola oku ‘amamako oku kuama’ Yesu ale sio. Pole, kolela okuti Yehova o ka ku kuatisa oku amamako oku kuama Yesu. Embimbiliya hati: “Suku wa koleliwa kuenda ka ka ecelela okuti vu yonjiwa leci ka vu tẽla, puãi kumue leyonjo u muisivo evelo lioku puluka okuti, vu pandikisi lalio.”—1 Va Kor. 10:13.

CECI O SUKILA OKU LINGA OCO AMAMEKO OKU KUAMA YESU

11. Onjila yipi ya velapo yoku amamako oku kuama Yesu? (Talavo ociluvialuvia.)

¹¹ Yesu wa vumba Yehova lutima wosi kuenda wamamako oku likutilila kokuaye. (Luka 6:12) Ocina cimue ci pondolavo oku ku kuatisa oku amamako oku kuama Yesu noke liepapatiso  liove, oku linga ovina vi pamisa ukamba wove la Yehova. Embimbiliya hati: “Ndaño okuti wa kuli ale, amamiko oku ci linga lonjila ndeyi.” (Va Fil. 3:16) Otembo lotembo o ka yeva ovolandu a vamanji vana okuti va nõlapo oku vokiya upange wavo va lingila Yehova. Pamue va pindisiwa Kosikola Yusoma, ale va ilukila kuna kuli esukila liakundi. Nda ekalo liove li ku ecelela, citava okuti o kuamavo ongangu yavo yiwa. Afendeli va Yehova va yongola calua oku vokiya upange wavo woku kunda. (Ovil. 16:9) Pole, nye ci popiwa nda ekalo liove ka li ku ecelela oku ci linga? Ku ka sime okuti vana va pondola oku ci linga va ku velapo. Ca velapo vali, amamako oku pandikisa. (Mat. 10:22) Ivaluka okuti Yehova o sanjuka calua eci o linga ovina vi likuata lepondolo liove. Eyi oyo onjila ya velapo yoku amamako oku kuama Yesu, noke liepapatiso liove.—Osa. 26:1.

12-13. Nye o sukila oku linga nda wa limbuka okuti ombili yove yoku vumba Yehova ya tepuluka? (1 Va Korindo 9:​16, 17) (Talavo o kakasia losapi hati, “ Amamako Oku Yoloka.”)

¹² Nye o sukila oku linga nda wa limbuka okuti olohutililo viove ka vi kasi oku lingiwa vali lutima wosi, ale ombili yove yoku kunda ya tepuluka? Nye o sukilavo oku linga nda okuti ku sole vali oku tanga Embimbiliya ndomo wa lingaile kosimbu? Nda wa fetika oku liyeva ndoco noke liepapatiso, ku ka sime okuti ku kuete vali ekuatiso liespiritu lia Yehova. Omo okuti ka tua lipuile ovisimĩlo vietu vi pondola oku pongoloka otembo lotembo. Nda ombili yove ya tepuluka, sokolola kulandu wupostolo Paulu. Ndaño okuti eye wa likolisilako oku setukula Yesu, wa kũlĩhĩle okuti halonjanja viosiko a ka linga eci a yongola. (Tanga 1 Va Korindo 9:​16, 17.) Omo liaco, wa popia hati: “Ndaño si ci lingi locipango cange haimo lumue, nda kundikiwa  ocikele caco.” Volondaka vikuavo, Paulu wa likapeleleko oku tẽlisa upange waye woku kunda ndaño halonjanja viosiko a laikele oku kuata onjongole yaco.

¹³ Cimuamue haico okuti, ku ka ecelele ovisimĩlo viove ka via lipuile oku ku vetiya oku nõlapo onjila ka ya sungulukile. Likolisilako oku linga eci ca sunguluka ndaño okuti ku kuete onjole yaco. Nda okuti ove wamamako oku linga ovina via sunguluka, ovisimĩlo viove vokuenda kuotembo vi ka pongoloka. Oku kuata ocituwa coku lilongisa pokolika, ohutililo, oku enda enda kolohongele kuenda kupange woku kunda, ci ka ku kuatisa oku amamako oku kuama Yesu noke liepapatiso. Eci vamanji va ka mola ombili yove yoku vumba Yehova va ka pamisiwa calua.—1 Va Tes. 5:11.

“AMAMIKO OKU LI SETEKA . . . AMAMIKO OKU SETEKA”

14. Nye o sukila oku likonomuisa olonjanja viosi kuenda momo lie? (2 Va Korindo 13:5)

¹⁴ Noke yoku papatisiwa ci kuete esilivilo oku likonomuisa ove muẽle olonjanja viosi. (Tanga 2 Va Korindo 13:5.) Otembo lotembo ci kuete esilivilo oku likonomuisa, nda o kasi oku likutilila olonjanja viosi, oku tanga loku lilongisa Embimbiliya, oku endaenda kolohongele kuenda kupange woku kunda. Likolisilako oku kuatisiwa lovina viaco. Ndeci, li pula ove muẽle ndoco: “Ndi tẽla hẽ oku lomboluila komanu alongiso Embimbiliya? Kuli hẽ cimue ndi sukila oku mioñolola kupange woku kunda? Olohutililo viange vi situlula hẽ okuti nda kolela muẽle Yehova lutima wosi? Nda siata hẽ oku laña kolohongele? Ndi mioñolola ndati ocituwa cange coku yevelela loku eca atambululo kolohongele?”

15-16. Nye wa lilongisa kulandu wa manji umue catiamẽla koku likala eyonjo?

¹⁵ Ci kuetevo esilivilo oku kũlĩha ahonguo ove. Manji umue o tukuiwa Robert wa lombolola ulandu umue u lekisa esilivilo liaco poku popia hati: “Eci nda kuata 20 kanyamo nda talavaya kupange umue wolowola vimue veteke. Pole, eteke limue ekula liange liupange, lia ndi laleka oku enda konjo yaye. Eye wa ndi sapuila hati tu ka kala lika kavali ketu oku ‘papala.’ Kefetikilo sia kuatele ndomo ndu tambulula, oku sulako ndo sapuila siti, si yongola kuenda ndo lombouila esunga liaco.” Manji Robert ka tavele oku yapuisiwa kuenje ci sanjuisa calua oku ci kũlĩha. Pole, noke lioku sokolola kueci ca pita, wa limbuka okuti wa sukilile oku kuama onjila ya litepa.  Yu wa popia hati: “Ame sia tẽlele oku likala lonjanga eyonjo, ndeci ca linga Yosefe eci ukãi wa Potifara o yonja. (Efet. 39:​7-9) Nda limbuka okuti ka ca lelukile kokuange oku likala elinga liaco. Eci ca ñuatisa oku limbuka okuti nda sukilile oku pamisa ukamba wange la Yehova.”

¹⁶ O pondola oku kuatisiwavo poku likonomuisa ove muẽle ndeci ca linga manji Robert. Nda ove wa tẽla oku yula eyonjo limue lipula ndoco: ‘Anga hẽ nda tẽla oku likala lonjanga eyonjo liaco?’ Nda wa limbuka okuti o sukila oku mioñoloha konepa eyi, ku ka sumue. Sanjuka momo wa limbuka ehonguo liove. Omo liaco, likutilila ku Yehova catiamẽla kehonguo liaco kuenda linga ovina vi ka pamisa onjongole yove yoku pokola kokuaye.—Osa. 139:​23, 24.

17. Onduko ya Yehova ya kongeliwa ndati vulandu wa manji Robert?

¹⁷ Kuli ovina vikuavo tu lilongisila kulandu wa manji Robert. Eye wamisako hati: “Noke lioku likala eyonjo liekula liange liupange, eye wa ndi sapuila ndoco: Nda ku seteka ño. Yu ndo pulisa cipi ca kala ocimãho caye.” Eye wa ndomboluila okuti umue kamba liaye okuti wa siapo oku kala Ombangi ya Yehova, wo sapuila hati amalẽhe vosi va tiamẽla Kolombangi Via Yehova va siata oku linga ovina ka via sungulukile vuyombeki. Kuenje wa sapuila kekamba liaye okuti wa laikele oku ndi seteka nda ndi tava ale sio. Omo lioku likala, nda kuata esanju momo ca nena esivayo konduko ya Yehova.”

18. Nye wa nõlapo oku linga noke liepapatiso liove? (Talavo okakasia losapi hati, “ Ovipama vivali o ka Sola Calua.”)

¹⁸ Eci o litumbika ku Yehova loku papatisiwa o lekisa okuti o yongola oku kemalisa onduko yaye kovina viosi o ka liyaka lavio. Kolela okuti Yehova wa kũlĩha oloseteko o liyaka lavio levi o tẽla oku yula. Eye o ka sumũlũisa alikolisilo ove oku amamako lekolelo. Kolelavo okuti pocakati cespiritu sandu liaye, eye o ka ku ĩha ongusu yoku ci linga. (Luka 11:​11-13) Lekuatiso lia Yehova ove o ka tẽla oku amamako oku kuama Yesu noke liepapatiso liove.