1. Atatahãi api afendeli vamue va Yehova va siata oku kuata?

 CI lembeleka calua oku kũlĩha okuti Yehova wa sanjukila afendeli vaye vosi! Embimbiliya li popia hati: “Yehova o sanjukila omanu vaye.” (Osa. 149:4) Olonjanja vimue, omanu vamue va siata oku kuata atatahãi nda Yehova wa va sanjukila muẽle. Afendeli valua va Yehova vakuekolelo vo kosimbu, olonjanja vimue va endavo oku kuata atatahãi nda Yehova wa va sanjukilile muẽle.—1 Sam. 1:​6-10; Yovi 29:​2, 4; Osa. 51:11.

2. Nye tu sukila oku linga oco Yehova a tu sanjukile?

² Embimbiliya li lekisa okuti ndaño ka tua lipuile, Yehova o pondola oku tu sanjukila. Ndamupi? Tu sukila oku kolela ku Yesu Kristu kuenda oku papatisiwa. (Yoa. 3:16) Nda tua ci linga, tu lekisa ku vakuetu okuti, tua likekembela akandu etu kuenda tua linga ohuminyo yoku linga ocipango ca Suku. (Ovil. 2:38; 3:19) Yehova o sanjuka calua eci tu tẽlisa ananga aco, oco tu kuate ukamba uwa laye. Nda tua likolisilako oku linga eci tu tẽla oco tu tẽlise ohuminyo yetu yoku u vumba, eye o ka tu sanjukila kuenda o ka tu tenda ndakamba vocili.—Osa. 25:14.

3. Apulilo api atatu tu konomuisa?

³ Momo lie omanu vamue va simĩla okuti Suku ka va sanjukilile? Yehova o lekisa ndati okuti wa tu sanjukila? Ukristão umue o pondola oku kolela ndati okuti Suku wo sanjukila?

ESUNGA LIECI OMANU VAMUE VA SIMĨLA OKUTI SUKU KA VA SANJUKILILE

4-5. Ekolelo lipi tu pondola oku kuata nda tu sima okuti ka tu kuete esilivilo?

⁴ Tunde vutila, valua pokati ketu tua siata oku liyaka locisimĩlo cokuti ka tu kuete esilivilo. (Osa. 88:15) Manji umue o  tukuiwa Adrián wa popia hati: “Tunde vutila nda enda oku liyeva okuti si kuete esilivilo. Pole, ndi ivaluka okuti, nda likutilila oco epata liange li ka kale voluali luokaliye.” Manji Tony okuti ka kulilile vepata limue Liolombangi Via Yehova wa popia ndoco: “Olonjali viange lalimue eteke via ndi sapuilile okuti vi ndi sole.” Kuenje nda simĩle okuti ovina nda enda oku linga ka via kaile oku va sanjuisa.”

⁵ Nda olonjanja vimue tu litenda okuti ka tu kuete esilivilo, tu sukila oku ivaluka okuti, Yehova wa tu kokela kokuaye. (Yoa. 6:44) Eye o vanja kovituwa vietu viwa kuenda wa kũlĩha eci tua tuwa vutima. (1 Sam. 16:7; 2 Asa. 6:30) Omo liaco, tu pondola oku kolela kokuaye eci a tu sapuila okuti tu kuete esilivilo.—1 Yoa. 3:​19, 20.

6. Upostolo Paulu wa liyeva ndati catiamẽla kakandu a linga kosimbu?

⁶ Osimbu ka tua fetikile oku lilongisa ocili, vamue pokati ketu, tua enda oku linga ovina vi pondola oku tu kokela oku livetela evelo. (1 Pet. 4:3) Ndaño muẽle afendeli vamue vakuekolelo va Yehova va siatavo oku liyaka lahonguo. Nye ci popiwa kokuove? Olonjanja vimue wa siata hẽ oku liyeva okuti Yehova ka pondola oku ku ecela? Nda oco, o pondola oku lembelekiwa poku kũlĩha okuti afendeli vamue va Yehova vakuekolelo, va liyakavo lovisimĩlo viaco. Ndeci, upostolo Paulu wa enda oku sumua calua poku sokolola akulueya aye. (Va Rom. 7:24) Ocili okuti, Paulu wa likekembelele akandu aye loku papatisiwa. Pole, wa litukula eye muẽle okuti o “sule koku velapo pokati kovapostolo” kuenda o ‘kuetepo’ vali ekandu.—1 Va Kor. 15:9; 1 Tim. 1:15.

7. Nye tu pondola oku ivaluka catiamẽla kakandu tua linga kosimbu?

⁷ Isietu wokilu o tu likuminya oku ecela akandu etu nda tu likekembela. (Osa. 86:5) Kuenje nda tu likekembela lutima wosi akandu tua linga, tu pondola oku kolela okuti Yehova o ka tu ecela.—Va Kol. 2:13.

8-9. Tu yula ndati ocisimĩlo cokuti lalimue eteke tu ka tẽla oku sanjuisa Yehova?

⁸ Vosi yetu tu yongola oku linga cosi citava, oco tu vumbe Yehova. Pole, pamue tu liyeva okuti lalimue eteke Yehova a ka tu sanjukila. Manji umue ukãi o tukuiwa Amanda wa popia ndoco: “Nda siata oku sima okuti, oku linga eci ndi tẽla kupange wa Yehova, ci lomboloka okuti olonjanja viosi ndi sukila oku likolisilako calua. Omo liaco, olonjanja vialua ndi linga eci ka ci kasi vepondolo liange. Pole, eci si tẽlisa ocimãho cange, ndi sima okuti nda sumuisa Yehova.”

⁹ Tu yula ndati ocisimĩlo cokuti lalimue eteke tu ka tẽla oku sanjuisa Yehova? Poku ivaluka okuti, Yehova ukuesunguluko. Eye lalimue eteke a ka tu kisika oku linga eci ka tu tẽla. Yehova o sanjukila alikolisilo tu linga lutima wosi. Ci kuetevo esilivilo oku sokolola kulandu wa vana va tukuiwa Vembimbiliya okuti, va vumba Yehova lutima wosi. Ndeci, sokolola eci catiamẽla ku Paulu. Eye vokuenda kuanyamo alua wa likolisilako calua, wa linga ovongende kuenda wa sokiya akongelo alua. Pole, eci ovina via pongoloka okuti, ka ponduile vali oku kunda calua ndeci a lingaile, ca lekisile hẽ okuti Yehova ko sanjukilile vali? Sio. Eye wamamako oku linga eci a tẽla kuenje Yehova wo sumũlũisa. (Ovil. 28:​30, 31) Cimuamue haico okuti, alikolisilo etu kupange wa Yehova a pondola oku pongoloka. Pole, ocina ca velapo kokuaye ocimãho cetu coku u vumba. Cilo, tu konomuisi olonjila vimue Yehova a situlula okuti wa tu sanjukila.

 NDOMO YEHOVA A LEKISA OKUTI WA TU SANJUKILA

10. Tu pondola oku “yevelela” ndati Yehova oku tu sapuila okuti wa tu sanjukila? (Yoano 16:27)

¹⁰ Yehova wa tu ĩha Embimbiliya. Eye o sanda olonjila vioku lekisa kafendeli vaye okuti o va sole kuenda wa va sanjukila. Ovisonehua vi tukula olonjanja vivali Yehova a sapuila ku Yesu okuti, eye omõlaye wa soliwa, haye a sanjukila. (Mat. 3:17; 17:5) Ove hẽ o yongola oku yevelela Yehova oku ku sapuila okuti wa ku sanjukila? Yehova ka vangula letu oku upisa kilu, pole, o ci linga pocakati Cembimbiliya. Eci tu tanga olondaka viocisola Yesu a sapuila kolondonge viaye, ci kasi ndoku “yevelela” Yehova oku popia olondaka viaco kokuetu. (Tanga Yoano 16:27.) Yesu wa setukula ciwa ekalo lia Isiaye. Omo liaco, eci tu tanga ndomo Yesu a situlula okuti wa sanjukilile olondonge viaye vakuekolelo, ndaño ka via lipuile, tu pondola oku sokolola Yehova oku tiamisila olondaka viaco kokuetu.—Yoa. 15:​9, 15.

11. Momo lie oku liyaka lovitangi ka ci lomboloka okuti Yehova ka tu sanjukilile vali? (Tiago 1:12)

¹¹ Eye o tu ĩha ovina tu sukila. Yehova poku ci linga, o lekisa okuti o yongola calua oku tu kuatisa. Pamue, Yehova ecelela okuti tu liyaka lovitangi ndeci ca pita la Yovi. (Yovi 1:​8-11) Pole, ka ci lomboloka okuti Suku ka tu sanjukilile vali. Eci ci tu ĩha epuluvi lioku lekisa kokuaye ocisola tu u kuetele kuenda ekolelo lietu. (Tanga Tiago 1:12.) Kuenje osimbu tu liyaka loloseteko viaco, tu ka limbuka ndomo eye a tu sole kuenda oku tu kuatisa oku pandikisa.

12. Nye wa lilongisila kulandu wa manji Dmitrii?

¹² Kũlĩhĩsa eci ca pita lamanji umue o tukuiwa Dmitrii. Eye wa pumba upange woku sanda eteku kuenda wa pita olosãi vialua okuti ka sangele upange. Kuenje, wa nõlapo oku vokiya upange waye woku kunda, oco a lekise ekolelo liaye ku Yehova. Papita olosãi vialua, pole, ka sangele upange. Noke wa kuatiwa luvei umue wa kãla. Kuenje wa fetika oku sima okuti ka kuatele vali esilivilo lalimue lioku kala ulume ale isia. Toke muẽle wa simĩle okuti Yehova ko sanjukilile vali. Kuteke umue, omõlaye ufeko wopa okopia yimue muli olondaka vi sangiwa ku Isaya 30:15 viokuti: “Vu ka kuata ongusu nda vu tula utima kuenda oku kuata ekolelo.” Eye wa vi kapa kovitue via isiaye, yu wa popia hati: “Atate,  eci o yeva evalo ivaluka olondaka evi. Manji Dmitrii wa limbuka okuti, lekuatiso lia Yehova epata liaye lia kuatele okulia, uwalo kuenda onjo. Eye wa popia ndoco: “Eci nda sukilile oku linga, oku amamako oku tula utima kuenda oku kolela ku Suku yange.” Nda o kasi oku liyakavo locitangi cimuamue, kolela okuti Yehova wa ku kapako kuenda o ka ku kuatisa oku pandikisa.

13. Lonjila yipi Yehova a lekisa okuti wa tu sanjukila kuenda ndamupi?

¹³ Eye wa tu ĩha vamanji. Yehova o talavaya la vamanjetu oco a situlule okuti wa tu sanjukila. Ndeci, eye o pondola oku vetiya vamanji, oco va tu sapuile olondaka vi tu lembeleka vepuluvi liwa. Eci oco ca lipita la manji umue ukãi wo ko Asia eci a kala lesumuo lialua. Ulume waye wopiwile ocikele cukulu wekongelo omo lioku linga ekandu limue. Manji ukãi wa popia hati: “Nda simĩle okuti nda linga ocina cimue cĩvi kuenje Yehova ka ndi sanjukilile vali.” Manjetu wa pinga ku Yehova oco eye a lekise kokuaye okuti handi wo sanjukilile. Yehova wa ci linga ndati? Manji wamisako Ndoco: “Akulu vekongelo va lekisa kokuange ocisola Yehova a ndi kuetele.” Noke wa pinga vali ku Yehova oco o kuatise. Eye hati: “Noke lioloneke vimue nda tambula ukanda umue wa tumiwa locimunga cimue ca vamanji vekongelo.” Eci nda tanga olondaka viavo vielembeleko nda limbuka okuti Yehova wa yeva epingilo liange. Ocili okuti, Yehova o situlula kokuetu okuti wa tu sanjukila pocakati, colondaka via vamanjetu.—Osa. 10:17.

14. Olonjila vipi vikuavo vi lekisa okuti Yehova wa tu sanjukila?

¹⁴ Yehova o lekisavo okuti wa tu sanjukila, poku vetiya vamanjetu oco va tu ĩhe elungulo tu sukila. Ndeci, kocita catete Yehova wa vetiya  upostolo Paulu oku soneha cisoka 14 kovikanda ku vamanji. Vovikanda viaco mua kongelele alungulo a teta onimbu, ha-o a situlula ocisola. Momo lie Yehova a vetiyila Paulu oku kongela vovikanda viaco olondaka vielungulo? Momo Yehova Isia umue uwa kuenda eye o pindisa omãla vaye “a sole.” (Olosap. 3:​11, 12) Eci omunu umue a tu ĩha elungulo li tunda Vembimbiliya ka ci lomboloka okuti, Yehova ka tu sanjukilile vali, pole, uvangi wocisola Yehova a tu kuetele. (Va Hev. 12:6) Ovovangi api akuavo a lekisa okuti Yehova wa tu sanjukila?

OVOVANGI AKUAVO A LEKISA OKUTI YEHOVA WA TU SANJUKILA

15. Ku velie Yehova a eca espiritu sandu liaye kuenda momo lie tua ci kolelela?

¹⁵ Yehova eca espiritu sandu liaye ku vana eye a sanjukila. (Mat. 12:18) Tu sukila oku lipula ndoco: Nda siata hẽ oku lekisa ovituwa vi tunda kespiritu sandu lia Suku? Wa limbuka hẽ okuti cilo wa siata oku lekisa vali epandi ku vakuene okuti kosimbu ci sule? Noke lioku lilongisa oku lekisa ovituwa viepako liespiritu lia Suku, ca leluka vali kokuove oku kolela okuti Yehova wa ku sanjukila! —Tala Okakasia losapi hati: “ Epako liespiritu lieli.”

16. Ku velie Yehova a eca ocikele coku kunda olondaka viwa kuenda ove o pondola oku liyeva ndati? (1 Va Tesalonike 2:4)

¹⁶ Yehova wa eca ocikele coku kunda olondaka viwa ku vana eye a sanjukila. (Tanga 1 Va Tesalonike 2:4.) Kũlĩhĩsa ndomo manji umue o tukuiwa Jocelyn a kuatisiwa poku kunda olondaka viwa ku vakuavo. Eteke limue wa sumuile calua. Eye hati: “Nda liyeva okuti sia kuatele ongusu kuenda nda honguele. Pole, omo okuti nda kala ukundi wotembo yosi, oku kunda kua kala upange wange weteke leteke.” Kuenje nda likutilila oco ndi tẽlise upange waco. Eteke limue lomẽle, manji Jocelyn wa lisanga lukãi umue o tukuiwa Mary una wa tava oku lilongisa Embimbiliya. Mary wo sapuila okuti volosãi via pita, wa kala oku likutilila ku Suku oku pinga ekuatiso kuenje manji Jocelyn wa totola kepito liaye. Nye manji Jocelyn a lilongisila kulandu owu? Eye wa popia ndoco: “Nda liyeva ndu okuti Yehova wa kala oku ndi sapuila hati, ‘nda ku sanjukila.’” Ocili okuti, havosiko va ka yevelela esapulo tu va kundila. Pole, tua kolela okuti Yehova o sanjuka calua eci tu likolisilako  oku kundila olondaka viwa komanu vakuavo.

17. Nye wa lilongisa kulandu wa manji Vicky catiamẽla kocisembi? (Osa. 5:12)

¹⁷ Yehova o situlula esilivilo liocisembi ku vana eye a sanjukila. (1 Tim. 2:​5, 6) Pole, nye ci popiwa nda tu kuete ocisimĩlo cokuti Yehova ka tu sanjukilile, ndaño okuti tu kuete ekoelelo kocisembi kuenda tua papatisiwa? Ivaluka okuti, ka tu pondola oku kolela kovisimĩlo vietu muẽle, pole, tu sukila oku kolela ku Yehova. Eye o tenda omanu vana va kolela kocisembi okuti, vakuesunga kovaso aye kuenda wa va likuminya oku va sumũlũisa. (Tanga Osa. 5:12; Va Rom. 3:26) Oku sokolola kesilivilo liocisembi ca kuatisa calua manji Vicky. Eteke limue noke lioku sokolola kocisembi, wa popia ndoco: “Yehova wa siata oku ndekisa epandi vokuenda kuotembo yalua. . . . Pole, ca kala ndu okuti nda kala oku sapuila Yehova hati: ‘Ove ku pondola oku lekisa ocisola komunu umue ndame. Ocilumba Comõlove ka ci pondola oku tuvika akandu ange.’” Poku sokolola kombanjaile yocisembi, co kuatisa oku limbuka okuti, o soliwe la Yehova. Tu pondolavo oku liyeva okuti tu soliwe la Yehova kuenda eye wa tu sanjukila, nda tua sokolola lutate kocisembi.

18. Ekolelo lipi tu pondola oku kuata nda tuamamako oku sola Isietu wo kilu?

¹⁸ Ndaño okuti tu likolisilako oku kapako ovina tua lilongisa vocipama cilo, pamue vokuenda kuotembo tu yeva esumuo kuenda tu liyeva ndu okuti Yehova ka tu sanjukilile. Nda oco ceya oku pita, tu ivaluki okuti, eye o sanjukila “vana vamamako oku U sola.” (Tia. 1:12) Omo liaco, tuamamiko oku pamisa ukamba wetu la Yehova loku limbuka olonjila viosi eye a lekisa okuti wa tu sanjukila. Olonjanja viosi tu ivaluki okuti, Yehova “ka kasi ocipãla lomunu lomunu pokati ketu.”—ovil. 17:27.