Akandu etu a pondola oku eceliwa, omo liocilumba Cocisembi Yesu a eca pocakati cosonde yaye. (Va Efes. 1:7) Embimbiliya li popia hati: “Suku wa kala oku lekisa epandi loku ecela akandu a lingiwa kosimbu,” okuti ceci handi Yesu ka ecele ocisembi. (Va Rom. 3:25) Yehova wa ponduile oku ecela ndati akandu, nda okuti handi ocisembi ka ca fetiwile kuenda oku amamako oku kala Suku umue ukuesunga ndomo ca kala ocipango caye?

Yehova wa likuminyile ‘ocitumbulukila’ cimue ca laikele oku popela vana va kolela kokuaye kuenda kolohuminyo viaye. Eci eye a linga ohuminyo yaco, ca kala ndu okuti ocisembi ca fetiwile ale. (Efet. 3:15; 22:18) Suku wa kũlĩhĩle okuti votembo eye a sokiya, omõlaye wongunga wa laikele oku eca ocisembi lutima wosi. (Va Gal. 4:4; Va Hev. 10:​7-10) Osimbu Yesu a kala palo posi, Yehova wo wihĩle omoko yoku ecela akandu eci handi ocisembi ka ca eciwile. Yesu wa ponduile oku ecela akandu a vana va kuatele ekolelo, momo wa kũlĩhĩle okuti ocilumba a laikele oku eca ca ponduile oku tuvika akandu avo.—Mat. 9:​2-6.