1-2. Nye omunu umue a sukila oku linga osimbu ka papatisiwile?

 VOKUENDA kuanyamo atãlo a sulako, ci pitahãla ohulukãi yimosi yomanu va papatisiwa oco va linge Olombangi Via Yehova. Ndeci ca pita la ndonge Timoteo wo kocita catete, valua pokati kavo va longisiwa ocili “tunde vutila.” (2 Tim. 3:​14, 15) Vakuavo va fetika oku lilongisa catiamẽla ku Yehova eci va linga akulu kuenda vamue ceci okuti va kuka ale. Ndeci, ukãi umue wa longisiwa Embimbiliya Lolombangi Via Yehova, wa papatisiwa eci a kuata 97 kanyamo!

² Nda okuti o kasi oku longisiwa Embimbiliya, ale oku tekuiwa lolonjali vina okuti Olombangi Via Yehova, o kasi hẽ oku sokolola oku papatisiwa? Nda oco, o kuete ocimãho cimue ciwa! Pole, osimbu kua papatisiwile, o sukila oku litumbika ku Yehova. Ocipama cilo, ci ka lombolola eci ci lomboloka oku litumbika ku Yehova. Ci ka ku kuatisavo oku limbuka esunga lieci ku sukilila oku kuata ohele yoku tumbika omuenyo wove ku Suku kuenda oku papatisiwa, nda wa li pongiyila oku ci linga.

NYE CI LOMBOLOKA OKU LITUMBIKA?

3. Tukula ovolandu amue Embimbiliya omanu vana va litumbikile ku Yehova.

³ Vembimbiliya ondaka oku litumbika yi lomboloka oku nõliwila ocimãho cimue ci likasi. Va Isareli va kala epata limue lia litumbikile ku Yehova. Pole, vamue pokati kavo va litumbikile ku Yehova lonjila yimue yi likasi. Ndeci, Arone wa enda oku wala “ekolowa li kola,” okuti ulame u nina wulu kovaso yekofue liaye. Ulame waco wulu, wa lekisile okuti eye wa nõliwilile  oku linga upange umue u likasi woku kala ocitunda cinene ca va Isareli. (Ovis. 8:9) Va Nasiri va litumbikilevo ku Yehova lonjila yimue yi likasi. Ondaka u “Nasiri” kelimi lio Heveru okuti nasir, yi lomboloka “Umue wa Tepiwa,” ale “Umue wa Litumbika.” Va Nasiri va sukilile oku pokola Kovihandeleko via va tumbikiwilile Vocihandeleko ca eciwile ku Mose.—Ate. 6:​2-8.

4. (a) Nye o nõlapo oku linga eci o litumbika ku Yehova? (b) Nye ci lomboloka ondaka yokuti ‘ku ka lisokolole’ vali ove muẽle? (Talavo ociluvialuvia.)

⁴ Eci o litumbika ku Yehova ove o kasi oku nõlapo oku kala ondonge ya Yesu Kristu kuenda oku ecelela okuti ocipango ca Suku ci velapo komuenyo wove. Nye ca kongela velitumbiko liaco? Yesu hati: “Nda umue o yongola oku ñuama, ka ka lisokolole vali eye muẽle.” (Mat. 16:24) Ondaka yo Helasi yina ya pongoluiwa okuti “ka ka lisokolole vali eye muẽle,” yi pondola oku lombolokavo okuti “ka ka litende vali eye muẽle.” Noke lioku litumbika ku Yehova, ove o ka sukila oku yuvula ovina viosi vi li patãla locipango ca Yehova. (2 Va Kor. 5:​14, 15) Eci ci lomboloka okuti, o ka yuvula “ovilinga vietimba” ndeci, evĩho liukahonga. (Va Gal. 5:​19-21; 1 Va Kor. 6:18) Anga hẽ oku pokola Kocihandeleko eci, ca tĩla kokuove? Nda o sole Yehova kuenda wa kolela okuti ovihandeleko viaye vi pondola oku ku kuatisa, ci ka leluka kokuove. (Osa. 119:97; Isa. 48:​17, 18) Manji umue o tukuiwa Nicholas wa popia hati: “Pamue ove o pondola oku tenda olonumbi via Yehova ndocina cimue ci ku tateka oku linga eci o yongola, ale oku vi tenda ndocina cimue ci ku teyuila kohele.”

5. (a) Ove o litumbika ndati ku Yehova? (b) Etepiso lipi li kasi pokati kelitumbiko lepapatiso? (Talavo ociluvialuvia.)

⁵ Ove o litumbika ndati ku Yehova? O ci linga poku likuminya kokuaye vohutililo okuti,  eye lika o ka fendela loku pitisa kovaso ocipango caye, komuenyo wove. Eci ci lomboloka okuti, o kasi oku likuminya ku Yehova okuti o kamamako oku u sola “lutima wove wosi, lomuenyo wove wosi, lolondunge viove viosi kuenda longusu yove yosi.” (Mar. 12:30) Elitumbiko liove li lingiwila pokolika, okuti ove lika la Yehova. Pole, olio lia litepa lepapatiso, momo epapatiso li lingiwila powiñi oco o lekise komanu okuti wa litumbika ale. Elitumbiko liove ohuminyo yimue yi kola kuenda Yehova o lavoka okuti o yi tẽlisa.—Uku. 5:​4, 5.

MOMO LIE O LITUMBIKILA KU YEHOVA?

6. Nye ci vetiya omunu umue oku litumbika ku Yehova?

⁶ Ocisola o kuetele Yehova oco cu ku vetiya oku litumbika kokuaye. Ocisola caco hacokulikembisako. Oco, ca kunamẽla ‘kukũlĩhĩso wa suapo’ kuenda ‘kelomboloko liovina wa lilongisa viatiamẽla ku Yehova, vina via eciwa lespiritu’ okuti, via ku kuatisa oku pamisa ocisola u kuetele. (Va Kol. 1:9) Elilongiso Liembimbiliya lia ku vetiya oku kolela okuti, (1) Yehova o kasiko muẽle, (2) Embimbiliya Ondaka yaye kuenda (3) eye o talavaya locisoko caye oco a tẽlise ocipango caye.

7. Nye omunu a sukila oku linga osimbu ka litumbikile ku Suku?

⁷ Vana va yongola oku litumbika ku Yehova va sukila oku kũlĩha alongiso atete Embimbiliya kuenda oku pokola kolonumbi vialio. Ovo va likolisilako oku sapuilako vakuavo ovina va lilongisa. (Mat. 28:​19, 20) Ocisola va kuetele Yehova kuenda onjongole yoku u fendela lika eye, vi livokiya. Eci hẽ ci kasivo oku pita love? Nda okuti ove o sole muẽle Yehova lutima wosi, ku ka litumbika ño loku papatisiwa  oco o sanjuise una wa siata oku ku longisa Embimbiliya kuenda olonjali viove, ale omo okuti akamba vove vosi va kasivo oku ci linga.

8. Oku lekisa olopandu ci ku kuatisa ndati oku nõlapo oku litumbika ku Yehova? (Osamo 116:​12-14)

⁸ Eci o sokolola kovina viosi Yehova a ku lingila, o ka vetiyiwa oku litumbika kokuaye. (Tanga Osamo 116:​12-14.) Embimbiliya li popia okuti, “ongavelo yosi yiwa, lombanjaile yosi ya lipua,” yi tunda ku Yehova. (Tia. 1:17) Ombanjaile ya velapo Yehova a tu ĩha, ocilumba comõlaye, Yesu. Sokolola ndomo ombanjaile yaco yi komõhisa! Ocisembi ca ecelela okuti, ove o kuata ukamba wa pama la Yehova. Oco ca ku ĩha epuluvi lioku kala komuenyo otembo ka yi pui. (1 Yoa. 4:​9, 10, 19) Oku litumbika ku Yehova onjila yimue yoku lekisa olopandu kelinga liaco liocisola, oku kongelamo asumũlũho akuavo eye a ku ĩha. (Esin. 16:17; 2 Va Kor. 5:15) Ocisola caco ca situluiwa kocipama 46 ketosi 4 lielivulu Sanjukili Omuenyo Otembo ka yi Pui! muna mua kongela ovideo yakukutu atatu losapi hati: Eci Ovilumba Viene ku Suku.

OVE HẼ WA LIPONGIYILA OKU LITUMBIKA LOKU PAPATISIWA?

9. Momo lie omunu umue ka sukilila oku kisikiwa oku litumbika loku papatisiwa?

⁹ Pamue o liyeva okuti kua lipongiyilile oku litumbika loku papatisiwa. Citava okuti o sukila oku linga apongoloko amue komuenyo wove, oco o pokole kolonumbi viosi via Yehova, ale pamue o sukila vali otembo oco o pamise ekolelo liove. (Va Kol. 2:​6, 7) Oku kula kuondonge londonge konepa yespiritu, ka kua lisokele kuenda havosiko amalẽhe okuti va li pongiyila oku litumbika loku papatisiwa vutunga umuamue. Li kolisilako oku limbuka apongoloko o sukila oku linga, leci o tẽla oku tẽlisa kuenda oku yuvula oku lisokisa lomunu ukuavo.—Va Gal. 6:​4, 5.

10. Nye o sukila oku linga nda wa limbuka okuti kua lipongiyilile oku litumbika loku papatisiwa? (Talavo okakasia losapi hati: “ Ku Vana va Kasi Oku Kulila Vepata Liolombangi Via Yehova.”)

¹⁰ Ndaño wa limbuka okuti handi kua lipongiyilile oco o litumbike ku Yehova, amamako locimãho caco. Pinga ku Yehova oco a ku kuatise oku linga apongoloko a sukiliwa komuenyo wove. (Va Fil. 2:13; 3:16) Kolela okuti eye o ka yeva olohutililo viove loku vi tambulula.—1 Yoa. 5:14.

ESUNGA LIECI VAMUE VA KUETELE OHELE YOKU LITUMBIKA KUENDA OKU PAPATISIWA

11. Nda okuti tu kuete ohele yoku litumbika ku Yehova loku papatisiwa, ekolelo lipi o sukila oku kuata?

¹¹ Ndaño okuti vamue va lipongiya ale oco va litumbike loku papatisiwa, pamue va kuete ohele yoku ci linga. Ovo va pondola oku lipula ndoco: ‘Ndi kala hẽ ndati nda nda linga ekandu limue linene kuenje ndi tundisiwa vekongelo?’ Nda o kuete ohele yaco, kolela okuti Yehova o ka ku ĩha ekuatiso o sukila oco ‘wendaende ndeci ca sesamẽla kokuaye loku u sanjuisa.’ (Va Kol. 1:10) Eye o ka ku kuatisavo oku linga eci ca sunguluka. Yehova wa kuatisa ale valua oku linga eci ca sunguluka. (1 Va Kor. 10:13) Eli olio esunga lieci kua siatela oku tundisiwa lika omanu vatito vekongelo Liakristão. Yehova o kuatisa afendeli vaye oku amamako oku kala vakuacili.

12. Nye ci pondola oku tu kuatisa ou yuvula oku linga ekandu limue linene?

¹² Omo okuti vosi yetu ka tua lipuile tu pondola oku setekiwa oku linga ovina ka via sungulukile. (Tia. 1:14) Pole, ove o nõla eci o sukila oku linga poku setekiwa. Handi vali, ove o kuete omoko yoku nõla ndomo ambata ekalo liomuenyo wove. Omanu vamue va popia vati, ka tu pondola oku likandangiya  kovisimĩlo vietu kuenda kovina tu linga. Pole, eci haciliko. Ove o pondola oku lilongisa oku likandangiya kolonjongole viove vĩvi. Ndaño okuti pamue o kasi oku setekiwa, o pondola oku nõlapo oku yuvula oku linga ovina ka via sungulukile. Kulivo ovina vikuavo vi ka ku kuatisa oku yuvula oku linga ekandu. Ndeci: Oku likutilila ku Yehova olonjanja viosi, oku kuata esokiyo liwa lioku lilongisa Ondaka ya Suku pokolika, oku endaenda kolohongele viekongelo kuenda oku kundila vakuene ovina o kasi oku lilongisa. Oku linga ovina viaco, ci ka ku kuatisa oku tẽlisa ohuminyo yove yelitumbiko. Olonjanja viosi ivaluka okuti, Yehova o ka ku kuatisa oku ci linga.—Va Gal. 5:16.

13. Ongangu yipi yiwa Yosefe a tu sila?

¹³ Nda okuti wa nõlapo ale eci o ka linga poku setekiwa, ci ka leluka kokuove oku amamako oku tẽlisa elitumbiko liove. Embimbiliya li tukula omanu valua va ci linga, ndaño okuti ovo va kalavo omanu ka va lipuile. Ndeci, ukãi wa Potifara wa yonja Yosefe olonjanja vialua. Pole, Yosefe wa kũlĩhĩle ale eci a sukilile oku linga. Embimbiliya li tu sapuila okuti “eye ka tavele” kuenda wa popia hati: “Ndinga ndati evĩho eli linene loku lingila ekandu Suku?” (Efet. 39:​8-10) Ocili okuti, Yosefe wa kũlĩhĩle eci a sukilile oku linga osimbu handi ka setekiwile. Kuenje co kuatisa oku nõla onjila ya sunguluka eci a setekiwa.

14. Oco tu yule oseteko yimue nye tu sukila oku linga?

¹⁴ O pondola oku setukula ndati ongangu ya Yosefe yoku yula oloseteko? O sukila oku lipongiya cilo, oco o kũlĩhe eci o ka linga poku setekiwa. Lilongisa oku likala lonjanga ovina viosi Yehova a suvuka. (Osa. 97:10; 119:165) Poku ci linga, ku ka kupukila veyonjo lioku linga ekandu eci o setekiwa. O ka kũlĩha ndomo o yula oloseteko.

15. Omunu umue o lekisa ndati okuti o kasi oku ‘sanda Yehova lutima wosi?’ (Va Heveru 11:6)

¹⁵ Pamue ove wa limbuka okuti, wa sanga ocili kuenda o yongola oku vumba Yehova lutima wosi. Pole, o liyeva okuti handi kua lipongiyile oco o litumbike loku papatisiwa. Ove o pondola oku setukula ongangu ya Soma Daviti poku pinga ku Yehova ndoco: “Kũlĩhĩsa utima wange, a Suku kuenda kũlĩha utima wange. Ñulĩhĩse kuenda kũlĩha ovisimĩlo viange viesakalalo. Vanja nda vokuange muli ocina cimue cĩvi, kuenda ndi songuile vonjila  yi kala otembo ka yi pui.” (Osa. 139:​23, 24) Yehova o sumũlũisa vana “vo sanda lutima wosi.” Omo liaco, alikolisilo ove oku litumbika kuenda oku papatisiwa, a ka situlula kokuaye onjongole yaco.—Tanga Va Heveru 11:6.

AMAMAKO OKU PAMISA UKAMBA WOVE LA YEHOVA

16-17. Vana va kasi oku kulila vocili va pondola oku kokiwa ndati la Yehova? (Yoano 6:44)

¹⁶ Yesu wa popia okuti oco omunu umue a linge ondonge yaye Yehova eye u kokela kokuaye. (Tanga Yoano 6:44.) Sokolola kelinga liaco li komõhisa kuenda ndomo ci tiamisiwilavo kokuove. Yehova o vanja eci ciwa komunu lomunu a kokela kokuaye. Eye o tenda omunu waco okuti “ocipiñalo caye cilikasi.” (Esin. 7:6) Yehova wa ku tendavo lonjila yimuamue.

¹⁷ Ove pamue wumalẽhe umue okuti, o kasi oku tekuiwa lolonjali Violombangi Via Yehova. Kuenje o pondola oku liyeva okuti o kasi oku vumba Yehova omo liolonjali viove, hamomoko Yehova a ku kokela kokuaye. Embimbiliya hati: “Ameli ku Suku kuenje eye amela kokuene.” (Tia. 4:8; 1 Asa. 28:9) Nda ove wa likolisilako oku amela ku Suku, eye o ka amelavo kokuove. Yehova ka ku tendi lika ndomunu o panga onepa kocimunga cimue. Eye amela komunu lomunu, oku kongelamo vana va kasi oku kulila vocili. Nda omunu waco wa likolisilako oku amela ku Yehova, eye amelavo kokuaye ndomo ca lomboluiwa kukanda wa Tiago 4:8.—Sokisa 2 Va Tesalonike 2:13.

18. Nye tu ka lilongisa vocipama cikuãimo? (Osamo 40:8)

¹⁸ Eci o litumbika ku Yehova loku papatisiwa o kasi oku setukula ongangu ya Yesu. Eye wa lieca olumue ku Isiaye oco a tẽlise ovina eye o pinga. (Tanga Osamo 40:8; Va Heveru 10:7) Vocipama cikuãimo, tu ka lilongisa eci ci ka ku kuatisa oku amamako oku vumba Yehova lekolelo noke liepapatiso liove.