1, 2. Nye afendeli va Yehova amalẽhe olonjanja vimue va siata oku pula, kuenda elungulo lipi Embimbiliya lieca?

EKAMBA lia manji umue ukãi va tangela kumosi kosikola kofeka yo Grã-Bretanya wa popia hati: “Omo okuti ove o kuete uloño walua ku sukila oku tava okuti kuli Suku.” Manji umue ulume kofeka yo Alemanya wa soneha ndoco: “Alongisi vange vo kosikola va tenda ovolandu Embimbiliya atiamẽla kovina via lulikiwa okuti, viuhembi. Kuenje va siata oku likolisilako oku kisika olondonge oco va tave okuti ovina via tukuluka ño.” Manji umue ukãi okuti umalẽhe kofeka yo Fransa wa popia hati: “Alongisi vo kosikola ndi tangela va siata oku komõha esunga lieci olondonge vimue handi vi tavela Kembimbiliya.”

² Koloneke vilo, omanu vamue ka va tava okuti tua lulikiwa la Suku. Nda okuti ove umalẽhe umue ofendela Yehova, ale o kasi oku lilongisa ovina via tiamẽla kokuaye, citava okuti olonjanja vimue o lipula esunga lieci o tavela okuti Suku eye ululiki wetu. Embimbiliya li tu kuatisa oku sokolola lutate ovina tu yeva levi tu tanga kuenda esunga lieci tu sukilila oku ci linga. Ondaka ya Suku yi popia hati: “Utate u ku silamẽla.” Ci lingiwa ndati? Utate u ku kuatisa oku yuvula ovisimĩlo ka via sungulukile kuenda oku pamisa  ekolelo liove ku Yehova.​—Tanga Olosapo 2:10-12.

3. Nye tu konomuisa vocipama cilo?

³ Oco tu lekise ekolelo ku Yehova tu sukila oku u kũlĩha ciwa. (1 Timoteo 2:4) Eci o tanga Embimbiliya kuenda alivulu etu, ci kuete esilivilio lia velapo oku talamapo kamue loku sokolola ovina o kasi oku tanga. Kuata elomboloko liovina o kasi oku tanga. (Mateo 13:23) Nda wa kuama onjila yaco, o ka limbuka okuti Yehova eye ululiki wetu kuenda Embimbiliya lia tunda kokuaye. (Va Heveru 11:1) Tu konomuisi ndomo tu pondola oku ci linga.

4. Oku tava kelongiso liokuti ovina via tukulukaño ku sokisiwa ndati loku tava okuti ovina via lulikiwa? Nye vosi yetu tu sukila oku linga?

⁴ Citava okuti omanu vamue va ku sapuila ndoco, “Ame ndi tava okuti ovina via tukuluka ño momo olonoño via siata oku popia hati ovina viaco viocili. O pondola oku tava ndati okuti kuli Suku nda ka kuli omunu umue wo muĩle?” Omanu valua va siata oku kuata ovisimĩlo viaco. Ocili okuti, lomue pokati ketu wa muĩle Suku ale oku mola ndomo eye a lulika ovina. (Yoano 1:18) Nye ci popiwa komanu vana va tava okuti ovina via tukuluka ño? Ovo va tavavo kovina ka va lamola. Ka kuli onoño ale omunu umue wa mola okuti omuenyo umue wa pongoluiwa komuenyo ukuavo. Lomue wa muĩle ocinyama ci likoka posi oku pongoluiwa kocinyama ka ci likoki posi. (Yovi 38:1, 4) Vosi yetu tu sukila oku kũlĩha ocili caco, oku sokolola lutate kovina viaco kuenda oku kuata elomboloko liovina viaco. Omanu valua va konomuisa ovina via lulikiwa kuenje va ‘limbuka’ okuti kuli Suku. Ovo va ‘mola’ okuti Suku eye Ululiki, ukuonene wosi kuenda o kuete ovituwa vialua vi komohĩsa.​—Va Roma 1:20.

5. Ovimalẽho vipi vi pondola oku tu kuatisa oku lilongisa catiamẽla kovina via lulikiwa?

⁵ Eci tu mola ovina via lulikiwa loku sokolola lutate kovina viaco, tu pondola oku limbuka okuti ovina via lulikiwa lonjila yimue yi komohĩsa. “Omo liekolelo, tua limbuka” okuti kuli ululiki umue, ndaño okuti ka muĩwa. Tua limbukavo okuti eye o kuete ovituwa kuenda  olondunge vialua. (Va Heveru 11:3, 27) Tu pondola oku lilongisa ovina vialua viatiamẽla kovina via lulikiwa laye, omo liovina via limbukiwa lolonoño. Ovolandu amue, a sangiwa vovimalẽho vimue ndeci: Ovideo losapi hati, As Maravilhas da Criação Revelam a Glória de Deus, ombrochura losapi hati, A Vida — Teve um Criador? ombrochura losapi hati, A Origem da Vida — Cinco Perguntas Que Merecem Resposta kuenda elivulu losapi hati, Existeum Criador Que Se Importa com Você? Vo Despertai!,olonjanja vialua mua siata oku yilila ovalandu olonoño kuenda omanu vakuavo, va siata oku lombolola esunga lieci cilo va tavela okuti kuli Suku. Vovipama losapi hati, “Teve um Projeto?” mua kongelavo ovolandu amue atiamẽla kovinyama kuenda ovina vikuavo via lulikiwa okuti olonoño via siata oku setukula ndomo ovina via lulikiwa vi talavaya.

6. O pondola oku kuatisiwa ndati lovimalẽho vioku konomuisa?

⁶ Manji umue ulume kofeka yo Estados Unidos okuete eci ci soka 19 kanyamo, wa popia eci catiamẽla kolombrochura vivali via tukuiwa poku lombolola hati: “Nda kuatisiwa calua lolombrochura viaco. Nda vi tanga olonjanja vialua.” Manji umue ukãi kofeka yo Fransa wa soneha ndoco: “Ocipama losapi hati, ‘Teve um Projeto?’ via ndi komohĩsa calua! Ovipama viaco vi lekisa okuti o mitavaso ya velapo yupange, yi pondola oku setukula ovina vi sangiwa voluali pole, lalimue eteke a ka linga cimue ca lisoka lovina via lulikiwa.” Olonjali viufeko umue o kuete ci soka 15 kanyamo kofeka yo Afrika do Sul, va popia hati: “Ocina catete omõletu a sole oku tanga vo Despertai!, ‘Ovolandu omanu va pulisiwa.’” O pondola oku kuatisiwa lalivulu aco oco o limbuke okuti kuli ululiki umue, kuenda o pondolavo oku limbuka loku yuvula alongiso esanda. Ekolelo liove li ka pamisiwa kuenda li ka kala nduti umue u kuete olumbombo lua pama, okuti ndaño lofela yalua ka u teka.​—Yeremiya 17:5-8.

7. Momo lie Suku a yonguila okuti o talavaya luloño wove woku sokolola?

⁷ Anga hẽ ca sunguluka oku linga epulilo ndeci: ‘Momo lie ndi tavela kovina Embimbiliya li longisa?’ Ca sunguluka. Yehova ka yongola okuti ove o tava kocina cimue omo okuti omanu vakuavo va kasivo oku ci linga. Eye o yongola okuti ove o talavaya ‘lunene wove woku sokolola’ oco o kũlĩhe Embibmiliya kuenda oku limbuka okuti olio lia tunda kokuaye. Osimbu amamako oku kũlĩha ovina Embimbiliya li popia, ekolelo liove li ka pamisiwa calua. (Tanga Va Roma 12:1, 2; 1 Timoteo 2:4.) Onjila yimue yoku kũlĩha ciwa Embimbiliya oku tanga ovolandu ana o yongola okuti o a kũlĩha ciwa.

8, 9. (a) Ovina vipi omanu vamue va sole oku lilongisa? (b) Omanu vamue va kuatisiwa ndati omo lioku sokolola ovina va tanga?

⁸ Omanu vamue va sole oku tanga ovitumasuku Viembimbiliya. Ovo va sole oku sokisa ovolandu Embimbiliya lovina via siata oku popiwa la vakuasapulo oluali, lolonoño kuenda vana va siata oku lembulula ovina via lembikiwa. Elivulu Liefetikilo 3:15, li lekisa ndomo Yehova a tukula ocitumasuku ci kuete esilivilo lia velapo, eci Adama la Heva va lekisa esino kokuaye kuenda onjila yaye yoku viala. Ocitumasuku eci oco catete ci sangiwa Vembimbiliya ci pondola oku tu kuatisa oco tu kuate elomboloko liokuti, Usoma wa Suku u ka lekisa okuti onjila yaye yoku viala, oyo ya velapo kuenda yi ka malako ohali yosi. O pondola ndati oku lilongisa elivulu Liefetikilo 3:15? O pondola oku linga ulala wovinimbu vimue  Viembimbiliya okuti weca vali elomboloko lia suapo ndomo ocitumasuku caco ca laikele oku tẽlisiwa. Noke, o ka limbuka otembo ovinimbu viaco via sonehiwa kuenda o ka vi sokiya ciwa. Handi vali, o ka limbukavo okuti asonehi Vembimbimbiliya va kala komuenyo kotembo ya litepa, pole omunu lomunu wa soneha ovina via suapo vi ecelela oku kuata elomboloko liocitumsuku caco. Eci ci tu kuatisa oku limbuka okuti va kuatisiwa lespiritu sandu lia Yehova.—2 Petulu 1:21.

⁹ Manji umue ulume kofeka yo Alemanya wa sokolola ndomo elivulu lelivulu Liembimbiliya li lombolola catiamẽla Kusoma. Eye wa popia hati: “Ndaño okuti Embimbiliya lia sonehiwa leci ci soka 40 kalume pole, ovolandu aco a tiamisiwila Kusoma. Valua pokati kavo va kala komuenyo kotembo ya litepa kuenda ka va li kũlĩhĩle.” Manji umue ukãi kofeka yo Australia wa kala oku lilongisa Utala umue Wondavululi, kuenda wa limbuka okuti o Paskua yi kuete elitokeko lelivulu Liefetikilo 3:15 kuenda Mesiya. ^[1] (Tala etosi kesulilo liocipama.) Eye wa soneha ndoco: “Elilongiso liaco lia ndi kuatisa oku limbuka okuti Yehova o komõhisa. Nda komõha calua omo lioku kuata elomboloko keliangiliyo Yehova a linga la va Isareli kuenda ndomo eliangiliyo liaco lia tẽlisiwilavo vu Yesu. Omo liaco, nda talamapo kamue kuenje nda sokolola ndomo ondalelo yo Paskua ya kuata esilivilo lia velapo!” Momo lie manji a kuatela ovisimĩlo viaco? Eye wa sokolola lutate catiamẽla kovina a tanga kuenda wa kuata elomboloko. Eci ca pamisa ekolelo liaye kuenda ukamba waye la Yehova.​—Mateo 13:23.

10. Ocituwa coku kala vakuacili ca lekisiwa la vana va soneha Embimbiliya ci pamisa ndati ekolelo lietu Kembimbiliya?

¹⁰ Sokololavo ndomo alume va soneha Embimbiliya va kala vakuacili. Olonjanja viosi va enda oku popia ocili kuenda ka va kuatele usumba woku ci linga. Asonehi vokotembo yaco, va solele lika oku soneha ovina viwa viatiamẽla kapata avo kuenda kasongui vavo. Ovaprofeto va Yehova ka va sonehele lika ovina viwa viatimẽla kapata avo pole, va sonehavo ovina vivĩ omanu vo ko Isareli kuenda olosoma viavo via enda oku linga. (2 Asapulo 16:9, 10; 24:18-22) Ovo va tukulavo akulueya avo kuenda akulueya akuavo afendeli va Suku. (2 Samuele 12:1-14; Marko 14:50) Manji umue ulume okuti umalẽhe kofeka yo Grã-Bretanya wa popia hati: “Ocituwa caco coku kala ukuacili ka ca siatele, eci ci pamisa ekolelo lietu okuti Embimbiliya lia tunda ku Yehova.”

11. Olonumbi vi sangiwa Vembimbiliya vi tu vetiya ndati oku limbuka okuti olio lia tunda ku Suku?

¹¹ Eci omanu va ecelela okuti omuenyo wavo u songuiwa lolonumbi Viembimbiliya, va pondola oku limbuka ndomo va kuatisiwa. Ovina viaco vi va vetiya oku tava okuti Embimbiliya lia tunda ku Suku. (Tanga Osamo 19:7-11.) Manji umue umalẽhe okuti ukãi kofeka yo Japãu wa soneha ndoco: “Eci epata lietu lia fetika oku kapako olonumbi Viembimbiliya, tua kuata esanju liocili. Tua kuatavo ombembua, omunga kuenda ocisola.” Embimbilia lia kuatisa omanu valua oku limbuka okuti, ovina vimue va enda oku tava haviociliko. (Osamo 115:3-8) Olio lia vetiya omanu oku kolela ku Yehova ukuonene woluali luosi, kuenda kovina a ka linga kovaso yoloneke. Omanu valua ka va tavele okuti kuli Suku, cilo va tava okuti kuli o suku yimue. Handi vali, vakuavo va popia vati, omanu va pondola oku nena ekalo liwa kovaso yoloneke, pole eci tu tala ovina omanu va linga toke cilo tu limbuka okuti, ovo ka va kuete epondolo lioku potolola ovitangi violuali.​—Osamo 146:3, 4.

12, 13. Tu sapela ndati lomanu vakuavo catiamẽla kovina via lulikiwa ale Kembimbiliya?

¹² Eci o sapela lomanu catiamẽla kovina via lulikiwa ale Kembimbiliya, tete sandiliya oku kuata elomboloko liovina ovo va tava. Ivaluka okuti, omanu vamue va tava okuti ovina viosi via tukuluka ño, va tavavo okuti kuli Suku. Ovo va popia okuti Suku wa talavaya lovina via tukuluka ño oco a lulike ovina viosi vi kasi lomuenyo. Omanu vakuavo va tava okuti ovina via tukuluka ño momo oco va siata oku lilongisa kosikola. Vakuavo va liwekapo oku kolela ku Suku momo va sumua omo liovina via siata oku lingiwa vatavo. Omo liaco, pulisa komunu ovina eye a tava kuenda esunga lieci a tavela kovina viaco. Noke yevelela lutate ovina a ku sapuila. Nda wa ci linga, eye o ka lekisa onjongole yoku ku yevelela.​—Tito 3:2.

¹³ Nda omunu umue wa ku sapuila okuti ove uveke omo lioku tava okuti kuli ululiki, o pondola oku u tambulula ndati? Lekisa esumbilo komunu waco kuenda u pulisa ocisimĩlo caye catiamẽla kefetikilo liomuenyo. O pondolavo oku u sapuila okuti nda omuenyo wa tukulukile ño, ocendalomuenyo catete, nda ca kuatavo epondolo lioku linga oviendalomuenyo vikuavo via lisetahãla. Omo liaco, ulongisi umue wo Químika wa popia okuti ca sukilile ovina vikuavo ndeci: (1) ekova okuti li teyuila omuenyo, (2) uloño woku kuata ongusu kuenda oku talavaya longusu yaco, (3) olonumbi vi kuatisa oku teyuila etimba loku kula kualio kuenda (4) uloño woku patekela ovina. Eye wamisako loku popia hati: “Tu komõha calua poku mola oviluvo viosi ndaño vina vitito.”

14. Olondaka vipi via leluka ove o pondola oku tukula eci o sapela lomanu catiamẽla kovina via lulikiwa?

¹⁴ Eci o sapela catiamẽla kovina via lulikiwa o sukila oku tukula olondaka via leluka ndeci upostolu Paulu a linga. Eye wa soneha ndoco: “Ocili okuti onjo yosi ya tungiwa la umue, pole, u wa tunga ovina viosi Suku.” (Va Heveru 3:4) Ocili okuti, onjo yi pongiyiwa kuenda yi tungiwa lomunu umue. Omo okuti ovina vi kasi lomuenyo via tatama okuti oku tunga onjo yimue ci sule, eci ci lekisa okuti omuenyo wa lulikiwa lomunu umue. O sukilavo oku sapela lavo lekuatiso lialivulu etu. Manji umue ukãi wa sapela lumalẽhe umue ulume ka tavele okuti kuli Suku. Eye wa eca kumalẽhe waco olombrochura vivali via tukuiwa vocipama cilo, noke liosemana yimosi umalẽhe waco wa popia hati: “Kaliye ndi tava okuti kuli Suku.” Umalẽhe waco wa fetika oku lilongisa Embimbiliya kuenje wa papatisiwa.

15, 16. Nye tu sukila oku linga oco tu lombolole komunu umue okuti Embimbiliya lia tunda ku Suku? Nye tu sukila oku ivaluka olonjanja viosi?

¹⁵ O pondola oku sapela ndati lomunu umue ka tava Kembimbiliya? Ndomo ca lomboluiwa ale, catete pulisa komunu ovina eye a tava. Kũlĩhĩsavo ovina a sole. (Olosapo 18:13) Nda omunu waco o sole ovina viatiamẽla kuloño, tukula ulandu u sangiwa Vembimbiliya u lombolola ovina viatiamẽla kuloño okuti via suapo. Nda eye o sole ovolandu, o sukila oku u lomboluila ovolandu a sangiwa velivulu lia sapulo kuenda lekisa kokuaye ndomo Embimbiliya li lombolola catiamẽla kesapulo liaco  osimbu handi ka lia tẽlisiwile. Omanu vakuavo va ka lekisa lika onjongole yoku yevelela kokuove, nda wa lekisa kokuavo elomboluilo limue Liembimbiliya li pondola oku pongolola ekalo liomuenyo wavo, ndeci elungulo li sangiwa vohundo Yesu a lingila komunda.

¹⁶ Ivaluka okuti ocimãho cetu hakulihoyako lomanu. Tu yongola okuti ovo va kuata esanju poku sapela letu kuenda va lilongisa Embimbiliya. Poku linga epulilo limue komunu lekisa esumbilo kuenda yevelela lutate. Eci o vangula catiamẽla kovina o tava komunu umue lekisa esumbilo capiãla enene nda omunu o kasi oku vangula laye ukulu. Sumbila omanu, oco ovo va ku sumbilevo. Nda wa ci linga, ovo va ka komõha calua poku mola okuti, o kasi oku va longisa ovina o tava ndaño okuti umalẽhe. Omo liaco, nda omunu umue o yongola oku lihoya love ale oku ku popia lãvi yuvula oku tambulula omunu waco.​—Olosapo 26:4.

17, 18. (a) O pondola oku kuatisiwa ndati Lembimbiliya oco o pamise ekolelo liove? (b) Epulilo lipi tu ka konomuisa vocipama cikuãimo?

¹⁷ Ndaño okuti tu kuete ale ukũlĩhĩso Wembimbiliya, pole tu sukila oku amamako oku pamisa ekolelo lietu. Tu sukila oku amamako oku linga akonomuiso atiamẽla kovina via longa Viembimbiliya, okuti ci sokisiwa loku sanda ukuasi wa selekiwa. (Olosapo 2:3-6) Onjila yimue yoku pamisa ekolelo lietu, oku tanga Embimbiliya liosi. O pondola oku li tanga vokuenda kunyamo umosi. Eci oco ca kuatisa manji umue ukuakunyula akongelo oku pamisa ukamba waye la Yehova eci a kala umalẽhe. Eye wa popia hati: “Ocina cimue ca ñuatisa oku kolela okuti Embimbiliya Ondaka ya Suku, oku li tanga. Ovolandu nda lilongisa osimbu nda kala umalẽhe a ndi kuatisa calua.” O sukilavo oku talavaya lovimalẽho vioku konomuisa kelimi liove oco vi ku kuatise oku kuata elomboloko liovina o tanga. O pondola oku talavaya lo DVD Watchtower Library, lo Watchtower ONLINE LIBRARY, lo Watch Tower Publications Index, kuenda Elivulu Lioku Konomuisa Liolombangi Via Yehova.

¹⁸ Ene alonjali, longisi omãla vene ovina viatiamẽla ku Yehova. U pondola oku va kuatisa ndati oco va pamise ekolelo liavo ku Yehova? Ocipama cikuãimo ci ka lombolola olonjila vimue u sukila oku kuama.