1-2. Lonjila yipi ekalo liomanu lia lisokela leli liumalẽhe wa tukuiwa kocinimbu 1?

 SOKOLOLA okuti, umalẽhe umue wa tekuiwa lolonjali vina okuti, olohuasi. Pole, eteke limue ku pita ocilunga cimue ci ponda olonjali viaye. Eye o sumua calua omo liocilunga caco. Noke ku pita ocina cimue ci sumuisa vali calua umalẽhe waco. Eye o limbuka okuti olonjali viaye via pesela olombongo viosi via kuatele kuenda via sia olofuka vialua. Kaliye sokolola okuti, eye ka pondola oku piñala ukuasi wa siwa, pole, o sukila oku feta olofuka viosi olonjali viaye via sia kuenda oku liyaka locitangi coku taniwa olofuka lomanu vana olonjali via levalele. Olofuka viaco vialua calua okuti, lalimue eteke eye a ka tẽla oku vi feta.

² Cimuamue haico okuti, ekalo lietu lia lisoka leli liumalẽhe waco. Olonjali vietu Adama la Eva va lipuile kuenda va kala vocumbo cimue ca posokele calua. (Efet. 1:27; 2:​7-9) Ovo va ponduile oku kala komuenyo lesanju otembo ka yi pui. Pole, vocipikipiki ovina viosi via pongoloka. Ovo va pumba ocitumãlo cavo ca posokele calua kuenda elavoko lioku kala otembo ka yi pui. Oco hẽ ocipiñalo cipi ovo va sia komãla vavo? Embimbiliya hati: “Ekandu lia iñila voluali omo liomunu umosi [Adama] kuenda oku fa omo liekandu kuenje oku fa, kua li sanduila komanu vosi, momo vosi va linga ekandu.” (Va Rom. 5:12) Ocipiñalo Adama a tu sila ekandu kuenda olofa. Ekandu tua piñala li kasi ndofuka yimue yinene okuti, lomue pokati ketu o tẽla oku yi feta.—Osa. 49:8.

3. Momo lie akandu etu a sokisiwila “lolofuka?”

 ³ Yesu wa sokisa akandu “lolofuka.” (Mat. 6:12; Luka 11:4) Eci tu lueya ci kasi ndofuka yimue tu kuetele Yehova. Kuenje tu sukila oku feta ondando yofuka yaco. Nda ka tua fetele ofuka yaco, tu yovuiwa lika kofuka yaco eci tu fa.—Va Rom. 6:​7, 23.

4. (a) Nda okuti ka tua kuatele ekuatiso, nye nda ca lipita lomanu vosi vakuakandu? (Osamo 49:​7-9) (b) Vembimbiliya ondaka “ekandu” yi lomboloka nye? (Tala okakasia losapi hati, “ Ekandu.”)

⁴ Anga hẽ ci tẽliwa oku yovola ovina viosi Adama la Eva va pumba? Longusu yetu muẽle ka ci tẽliwa. (Tanga Osamo 49:​7-9.) Nda okuti etu ka tua kuatele ekuatiso, nda ka tua kuatelevo elavoko lioku kala komuenyo kovaso yoloneke, ale oku pinduiwa. Ocili okuti, olofa vietu nda via kala ndevi viovinyama.—Uku. 3:19; 2 Pet. 2:12.

5. Isietu ukuacisola wa tu kuatisa ndati oku feta ofuka tua piñala kekandu? (Talavo koñoño.)

⁵ Sokolola kocindekaise cumalẽhe wa tukuiwa kefetikilo liocipama. Eye nda wa liyeva ndati nda ulume umue ohuasi wa liecele olumue oco a fete olofuka viaye viosi? Ocili okuti, umalẽhe nda wa yeva esanju lialua kuenda nda wa tava ombanjaile yaco yohenda. Cimuamue haico okuti, Isietu ukuacisola Yehova wa tu ĩha ombanjaile yimue ya tẽla oku feta olofuka tua piñala omo liekandu lia Adama. Yesu wa lombolola ombanjaile yaco ndoco: “Omo Suku a sola calua oluali, wa eca Omõlaye wongunga okuti, wosi o kolela kokuaye ka nyõliwa, pole, o kuata omuenyo ko pui.” (Yoa. 3:16) Handi vali, ombanjaile yaco yi tu ecelelavo oku kuata ukamba uwa la Yehova.

6. Olondaka vipi via tukuiwa Vembimbiliya tu ka konomuisa vocipama cilo kuenda momo lie?

⁶ Tu kuatisiwa ndati lombanjaile yaco yi komõhisa Yehova a tu ĩha oco a ecele “akandu” etu? Embimbiliya lieca etambululo liepulilo eli poku tukula olondaka ndeci, oku linalisa, oku tuvika akandu, ocilumba coku kuata ombembua la Suku, ocisembi, ondando yocisembi kuenda oku tendiwa ndukuesunga. Vocipama cilo, tu konomuisa elomboloko liondaka londaka. Poku sokolola kalomboluilo aco kuenda kueci Yehova a tu lingila oco a tu ecele, olopandu vietu kokuaye vi livokiya.

YEHOVA O YONGOLA OKUTI TU KALA AKAMBA VAYE

7. (a) Nye Adama la Eva va pumba? (b) Omo okuti tu citumbulukila ca Adama la Eva nye tu sukila? (Va Roma 5:​10, 11)

⁷ Adama la Eva va li pumbisa oku kala komuenyo otembo ka yi pui kuenda va nyõla ukamba wavo uwa la Yehova. Osimbu Adama la Eva ka va lueyele va pangele onepa kepata  lia Suku. (Luka 3:38) Pole, eci ovo va sinĩla Yehova va tundisiwa vepata liaye, osimbu handi ka va kuatele omãla. (Efet. 3:​23, 24; 4:1) Omo okuti tucitumbulukila ca Adama, tu sukila oku linalisa la Yehova. (Tanga Va Roma 5:​10, 11.) Volondaka vikuavo tu sukila oku kuata ukamba wocili laye. Ondaka yo Helasi ya pongoluiwa okuti oku “linalisa” yi pondola oku lomboloka “oku kala ekamba liunyãli umue.” Pole, ci komõhisa ceci okuti Yehova eye wa nõlapo tete oku linga ukamba letu. Ndamupi?

SUKU WA ECELELA OKUTI TU KALA AKAMBA VAYE

8. Nye ci lomboloka (a) oku tuvika akandu? (b) Ocilumba coku kuata ombembua la Suku?

⁸ Esokiyo lioku tuvika akandu, eliangiliyo limue Yehova a linga, oco okuti omanu ka va lipuile va kuata ukamba uwa laye. Oku tuvika akandu ci lomboloka oku eca ocina cimue ca lisoka londando yimuamue. Lonjila eyi Yehova wa ecelela okuti ku tumbuluiwa cina Adama a pumba poku eca ocina cimue ca lisoka. Ovisonehua vio Helasi vi tukula ondaka yimue yi kuete elomboloko lia lisetahãla loku “tuvika akandu,” okuti ocilumba coku kuata ombembua la Suku. (Va Rom. 3:25) Ocilumba coku kuata ombembua la Suku ci ecelela okuti, omunu o kuata ukamba uwa la Suku.

9. Nye Yehova a linga oco akandu a va Isareli a eceliwe?

⁹ Yehova wa ecelela okuti akandu a va Isareli a ecelua kuenda va kuata ukamba uwa laye. Unyamo lunyamo va Isareli, va enda oku linga ocipito coku Tuvika Akandu. Veteke liaco ocitunda cinene ca enda oku eca ovilumba viovinyama vonduko yomanu. Pole, eci va Isareli vana va likekembela va ecaile ovilumba Yehova a va kisakaile, ovo va enda oku kolela okuti Yehova wa ecela akandu avo. (Va Hev. 10:​1-4) Handi vali, ovilumba ovo va enda oku eca Keteke Lioku Tuvika Akandu kuenda kapuluvi akuavo, via kuatisa va Isareli oku limbuka okuti va kala vakuakandu kuenda va sukilile vali ovina vikuavo oco va tuvike akandu avo.

10. Nye Yehova a linga oco akandu omanu a eceliwe otembo ka yi pui?

¹⁰ Nye Yehova a linga oco akandu omanu a eceliwe otembo ka yi pui? Eye wa linga esokiyo liokuti Omõlaye o soliwe Yesu, ‘eciwavo onjanja yimosi lika oco ambate akandu omanu valua.’ (Va Hev. 9:28) Yesu wa “eca omuenyo waye ndocisembi coku yovola omanu valua.” (Mat. 20:28) Ocisembi ci lomboloka nye?

OCILUMBA CA YESU CA FETA ONDANDO

11. (a) Ndomo ca lomboluiwa Vembimbiliya, ocisembi ci lomboloka nye? (b) Helie lika wa ponduile oku feta ocisembi?

¹¹ Embimbiliya li popia okuti, Yehova wa sokiya ofeto yocisembi, oco akandu etu a ecelue kuenda oku kuata ukamba uwa laye. a Oco hẽ yipi nda ya kala ondando yocisembi ca sukiliwile oco ku tumbuluiwe eci Adama a pumba? Ivaluka okuti, Adama la Eva, va pumba omuenyo wa lipua kuenda elavoko lioku kala otembo ka yi pui. Omo liaco, ondando yocisembi ya sukilile oku kuata esilivilo limuamue leyi ya pumbiwa. (1 Tim. 2:6) Ondando yaco ya sukilile lika oku fetiwa lulume umue ukulu okuti, (1) wa lipua; (2)  wa ponduile oku kala otembo ka yi pui palo posi kuenda (3) wa likapeleleko oku eca kokuetu omuenyo waye ndocilumba. Lonjila eyi, oco lika omuenyo womunu waco wa ponduile oku feta, omuenyo una wa pumbiwa.

12. Momo lie Yesu eye lika wa ponduile oku feta ondando yocisembi?

 ¹² Momo lie Yesu a ponduilile oku feta ocisembi? Kũlĩhĩsa asunga atatu. (1) Eye wa lipuile kuenda ka lingile ekandu lalimue. (1 Pet. 2:22) (2) Wa kuatele epondolo lioku kala otembo ka yi pui palo posi. (3) Eye wa nõlelepo oku fa loku eca omuenyo waye kokuetu. (Va Hev. 10:​9, 10) Yesu wa kala ulume umue wa lipuile, ndeci ca kala ulume watete Adama osimbu ka lingile ekandu. (1 Va Kor. 15:45) Omo okuti Yesu wa tu fila, eye wa ponduile oku feta ondando ya sukiliwile, oco ku piñainyiwe eci Adama a pumba. (Va Rom. 5:19) Yesu weya oku kala “Adama wa sulako.” Kuenje ka ci sukila vali omunu ukuavo wa lipua oku iya, oco a fete eci Adama a pumba. Momo Yesu wa fa “onjanja yimosi lika.”—Va Hev. 7:27; 10:12.

13. Etepiso lipi li kasi pokati koku tuvika akandu kuenda kesokiyo liocisembi?

¹³ Oco hẽ etepiso lipi li kasi pokati koku tuvika akandu kuenda kesokiyo liocisembi? Oku tuvika akandu onjila yimue Suku a kuama oco tu kuate ukamba laye. Ocisembi ondando ya fetiwa oco ku tuvikiwe akandu omanu ka va lipuile. Ondado yaco ya lombolokele osonde ya Yesu yina ya pesiwila omo lietu.—Va Efe. 1:7; Va Hev. 9:14.

YEHOVA WA TU YOVOLA KEKANDU KUENDA KOLOFA, LOKU TU TENDA NDA VAKUESUNGA

14. Nye tu konomuisa cilo, kuenda momo lie?

¹⁴ Tu kuatisiwa ndati lovina Yehova a tu lingila? Oco tu tambulule epulilo eli, tu konomuisa eci ci lomboloka olondaka vivali via tukuiwa Vembimbiliya, vi tu kuatisa oku kuata elomboloko ndomo tu kuatisiwa longecelo ya Yehova. Olondaka viaco vi molẽha ndu okuti vi kuete elomboloko limuamue, pole, ondaka londaka yeca elomboloko lia litepa lieci Yehova a linga oco a tu ecele.

15-16. (a) Vembimbiliya nye ci lomboloka ondaka “ondando yocisembi”? (b) Tu liyeva ndati poku kũlĩha okuti tua yovuiwa kekandu kuenda kolofa?

¹⁵ Vembimbiliya ondaka ondando yocisembi, yi lomboloka eyovo tua kuata omo liofeto yoku popeliwa. Upostolo Petulu wa lombolola eci catiamẽla keyovo liaco. Eye hati: “Wa kũlĩhi okuti, halovinako vi nyõleha ndeci opalata, ale ulu, [etosi, ale “kovihilahila”] wa yovuiwi kekalo liene lĩvi liomuenyo wa piñali ku vakukululu yene. Pole, wa yovuiwi losonde ya tĩla ya Kristu okuti, ndeyi yokameme ka ka kuete etime haiko ka pua etondelo.”—1 Pet. 1:​18, 19.

¹⁶ Tu eca olopandu omo liocilumba cocisembi, momo tua yovuiwa kekandu, kolofa kuenda kohali yosi ovio vi koka. (Va Rom. 5:21) Ka kuli atatahãi okuti tu kuete ofuka yimue yinene ku Yehova la Yesu, omo lioku tu yovola losonde ya lipua ale lomuenyo wa Yesu.—1 Va Kor. 15:22.

17-18. (a) Nye ci lomboloka oku tendiwa nda vakuesunga? (b) Tu kuatisiwa ndati poku tendiwa nda vakuesunga?

¹⁷ Embimbiliya li popia hati afendeli va Yehova va tendiwa okuti vakuesunga. Eci ci lomboloka okuti, Yehova ka tu kisika oco tu fete akandu tua linga. Pole, eci ka ci lomboloka okuti Yehova ka kapeleko olonumbi viaye viesunga. Eye ka tu tendi nda vakuesunga omo tu ci sesamẽla kuenda eye ka sanjukilavo akandu. Yehova wa likapelako oku ecela akandu etu, nda tua lekisa ekolelo kocisembi ca fetiwa la Yesu.—Va Rom. 3:24; Va Gal. 2:16.

¹⁸ Eci hẽ ci lomboloka nye komunu lomunu pokati ketu? Vana va nõliwa oco va ka viale la Yesu kilu, va tendiwa ndomãla va Suku vakuesunga. (Tito 3:7; 1 Yoa. 3:1) Akandu avo a eceliwa. Ci kasi ndu okuti ka va la linga ekandu kuenje va nõliwa oku kala Kusoma. (Va Rom. 8:​1, 2, 30) Vana va kuete elavoko lioku  ka kala palo posi otembo ka yi pui, va tendiwa okuti vakuesunga haivo akamba va Suku kuenda akandu avo a ecelua. (Tia. 2:​21-23) Owiñi wakahandangala una u ka puluka ko Harmagedo, va kuete elavoko liokuti lalimue eteke va ka fa vali. (Yoa. 11:26) “Vakuesunga,” “lava havakuesungako” okuti va kasi oku pekela kolofa, va kuete elavoko lioku ka pinduiwa. (Ovil. 24:15; Yoa. 5:​28, 29) Vokuenda kuotembo, afendeli vosi va Yehova vana va ka kala palo posi okuti vakuepokolo, va ka “kuata eyovo liulamba womãla va Suku.” (Va Rom. 8:21) Hesanjukuolio tu kuete poku sokolola kotembo tu ka kala omãla va lipua va Isietu, Yehova!

19. Ekalo lietu lia pongoloka ndati? (Talavo okakasia losapi hati: “ Ceci ci Lomboloka Kokuetu.”)

¹⁹ Ocili okuti, ekalo lietu li sokisiwa leli liumalẽhe wa tukuiwa vocindekaise kefetikilo liocipama cilo okuti, wa pesela cosi kuenda wa kuata ofuka yalua okuti lalimue eteke nda a tẽla oku yi feta. Pole, tu pandula Yehova omo a tu ĩha ekuatiso. Ekalo lietu lia pongoloka, omo liesokiyo lioku tuvika akandu kuenda liocisembi. Ekolelo tu kuetele Yesu Kristu, li tu ecelela oku yovuiwa kekandu kuenda kolofa. Akandu etu a pondolavo oku eceliwa kuenda eci Yehova a ci linga ci kala ndu okuti ka kua la lingiwa ekandu. Handi vali, ca velapo ceci okuti, cilo tu pondola oku kuata ukamba la Isietu ukuacisola, Yehova.

20. Nye tu ka konomuisa vocipama ci kuãimo?

²⁰ Tu eca olopandu vialua ku Yehova kuenda ku Yesu, eci tu sokolola kovina viosi va tu lingila. (2 Va Kor. 5:15) Nda ka ca kaile lekuatiso liavo, nda lalimue eteke tua kuatele elavoko! Oco hẽ, nye ci lomboloka ongecelo ya Yehova komunu lomunu pokati ketu? Tu ka ci konomuisa vocipama ci kuãimo.