OCIPAMA CELILONGISO 7
OCISUNGO 15 Yoleli Omõla Uveli wa Yehova!
Ongecelo ya Yehova yi Lomboloka Nye Kokuove?
“Kokuove kuli ongecelo yocili.”—OSA. 130:4.
OCIMÃHO CELILONGISO
Tu kũlĩhĩsa ovindekaise vimue via lomboluiwa Vembimbiliya, vi lekisa ndomo Yehova a tu ecela. Ocipama cilo, ci ka tu kuatisa oku vokiya olopandu vietu omo Yehova a tu ecela lutima wosi.
1. Momo lie ongecelo yomanu ka ya lelukilile oku yi limbuka?
“AME NDUKUECELA.” Ciwa calua oku yeva olondaka evi, ca piãla enene nda ove wa vangula, ale wa linga cimue ca sumuisa ukuene! Pole, olondaka evi vi lomboloka nye? Anga hẽ omunu wa yonguile oku popia okuti ukamba wene wamamako? Ale wa yonguile oku popia okuti ka yongola vali oku vangula catiamẽla kondaka yaco kuenda ka yongola oku ivalako ovina via pita? Ocili okuti, omanu va vangula ovina via litepa poku popia hati, nda kuecela. Kuenje ca tatama oku limbuka ongecelo yocili yomanu.
2. Embimbiliya li lombolola ndati catiamẽla kongecelo ya Yehova? (Talavo etosi pombuelo.)
2 Onjila ndomo Yehova a tu ecela ya litepa calua lonjila ndomo etu tu ecela vakuetu. Lomue o tẽla oku ecela ndomo Yehova a ecela. Ukualosamo wa popia eci catiamẽla ku Yehova hati: “Momo kokuove kuli ongecelo yocili, oco ove o kemãlisiwe.” a (Osa. 130:4) Ocili okuti, ongecelo ya Yehova “ongecelo yocili.” Momo eye lika wa kũlĩha eci ci lomboloka ongecelo. Olonjanja vimue, asonehi Vembimbiliya va kuama ondaka yimue yo Heveru yi tiamisiwila kongecelo okuti, lalimue eteke ya kuamiwile poku lombolola ndomo omanu va ecela.
3. Momo lie ongecelo ya Yehova ya litepela longecelo yomanu? (Isaya 55:6, 7)
3 Eci Yehova a ecela omunu umue, eye imũla akandu omunu waco. Lonjila eyi, omunu waco o pondola oku kuata ukamba wocili la Yehova. Tu eca olopandu ku Yehova omo okuti, o tu ecela lutima wosi.—Tanga Isaya 55:6, 7.
4. Yehova o tu kuatisa ndati oku limbuka eci ci lomboloka ongecelo yocili?
4 Nda ongecelo ya Yehova ya litepa longecelo yomanu ka va lipuile, tu kũlĩha ndati eci ci lomboloka ongecelo yocili? Yehova o talavaya lovindekaise viwa oco a tu kuatise oku kuata elomboloko ndomo eye a tu ecela. Vocipama cilo, tu konomuisa vimue pokati kavio. Ovio vi tu kuatisa oku limbuka ndomo Yehova a imũla ekandu kuenda ndomo tu tumbulula ukamba tua kuatele laye. Poku konomuisa ovindekaise viaco, tu vokiya ocisola cetu kuenda olopandu ku Isietu Yehova womboka, ukuahenda, haeye ukuakuecela volonjila via litepa.
YEHOVA IMŨLA AKANDU
5. Nye ci pondola oku pita eci Yehova a ecela akandu etu?
5 Embimbiliya olonjanja vialua li sokisa ekandu ndocilemo. Soma Daviti wa lombolola akandu aye poku popia hati: “Momo akulueya ange a ndi talisa ohali; ndocitele cimue ci lema, o-o alua okuti si tẽla oku ambata.” (Osa. 38:4) Pole, Yehova ecela akandu omanu va likekembela. (Osa. 25:18; 32:5) Ondaka yo Heveru ya pongoluiwa “ongecelo,” yi lomboloka oku “votoka” ale oku “ambata.” Yehova o sokisiwa ndulume umue wa pama upa ocilemo cimue kapepe etu loku tu cambatela.
“Wa ecela” (Osa. 32:5)
6. Vocinãla cipi Yehova a kapa akandu etu?
6 Embimbiliya li lombolola ocindekaise cikuavo ci lekisa okuti, Yehova ambata akandu etu ocipãla letu. Kosamo 103:12 ku popia hati: “Ndeci utundilo u kasi ocipãla lutakelo, haico eye a kapa akandu etu ocipãla letu.” Utundilo wekumbi kuenda utakelo, lalimue eteke kua lisangele. Eci ci lomboloka okuti, Yehova ambata akandu etu kupãla okuti lalimue eteke tu a sanga vali. Eci ci lekisa okuti Yehova o tu ecela lutima wosi kuenje eci ci tu pamisa calua!
“Ndeci utundilo u kasi ocipãla lutakelo” (Osa. 103:12)
7. Nye Embimbiliya li lombolola eci Yehova a pondola oku linga lakandu etu? (Mika 7:18, 19)
7 Ndaño okuti Yehova ambata akandu etu kupãla, anga hẽ eye o kakatela vali kakandu aco? Sio. Soma Esekiya wa popia eci catiamẽla ku Yehova hati: “Ove wa imba akandu ange osi konyima yove.” Ale ndomo ca lomboluiwa ketosi, “wopa akandu ange osi kovaso ove.” (Isa. 38:9, 17 etosi) Eci ci lomboloka okuti, Yehova inasi akandu a yuna wa likekembela kuenda ka vanji vali kakandu aco. Olondaka Esekiya a popia vi pondola oku pongoluiwavo ndoco: “Ove wa lingisa ndu okuti [ekandu liange] ka lia lingiwile.” Embimbiliya li lombolola vali etosi liaco kocindekaise cikuavo ca tukuiwa kelivulu lia Mika 7:18, 19. (Tanga.) Ovinimbu evi vi lomboloka okuti Yehova imba akandu etu kosi yokalunga. Kosimbu ocina cimue nda okuti ca kupukila kosi yokalunga, ca tĩlile calua oku ci sanga vali.
“Ove wa imba akandu ange osi konyima yove” (Isa. 38:17)
“Ove o ka imba akandu avo osi kosi yokalunga” (Mika 7:19)
8. Nye tua lilongisa toke cilo?
8 Ovindekaise evi Viembimbiliya vi lekisa ciwa okuti, eci Yehova a tu ecela imũla akandu osi okuti ka tu livetela vali evelo. Daviti wa popia hati: “Va sumũlũha vana okuti ovilinga viavo vi tomba ovihandeleko via ecelua kuenda akandu avo a tuvikiwa; wa sumũlũha omunu una okuti, Yehova ka ivaluka [vali] ekandu liaye.” (Va Rom. 4:7, 8) Ocili okuti, eyi oyo ongecelo yocili!
YEHOVA O YELISA AKANDU ETU
9. Nye Embimbiliya li lombolola oco li tu kuatise oku limbuka okuti Yehova o tu ecela lutima wosi?
9 Yehova o tukula ocindekaise cikuavo oco a tu kuatise oku sanjukila ocilumba cocisembi. Eye o yelisa akandu a vana va likekembela. Embimbiliya li popia hati ci kasi ndu okuti Yehova o sukula kuenda o yelisa akandu a vana va lueya. Eci ci lingisa okuti una wa linga ekandu o yelisua vali. (Osa. 51:7; Isa. 4:4; Yer. 33:8) Yehova o lombolola eci ci pondola oku pita poku popia hati: “Ndaño okuti akandu ene a kusuka, a ka yela ndocikokoto; ndaño a kusuka ngẽ ndonanga yohusu, a ka yela calua ndovonya a yela.” (Isa. 1:18) Ka ca lelukile oku upa etime limue li kusuka vonanga yimue. Eli olio esunga lieci Yehova a lingila ocindekaise eci, oco a lekise okuti akandu etu a pondola oku yela, loku molẽha ndu okuti ka a lingiwile.
“Ndaño okuti akandu ene a kusuka, a ka yela ndocikokoto” (Isa. 1:18)
10. Ocindekaise cipi cikuavo ci lekisa okuti Yehova wa velapo koku ecela?
10 Ndomo tua ci konomuisa vocipama ca pita, akandu etu a sokisiwa “lofuka.” (Mat. 6:12; Luka 11:4) Kuenje olonjanja viosi tu lueyela Yehova, tu kasi ndu okuti tua vokiya kofuka yetu. Ofuka tu u kuetele yalua! Pole, eci Yehova a tu ecela ci kala ndu okuti eye wa ecela olofuka viaco. Eye ka kisika oku feta akandu ana a ecela ale. Ndeci omunu umue a pondola oku sanjuka nda ofuka yaye ya eceliwa, etu tu sanjukavo calua eci Yehova a tu ecela!
“Tu ecele akandu etu” (Mat. 6:12)
11. Embimbiliya poku popia okuti akandu etu a “imũha,” ci lomboloka nye? (Ovilinga 3:19)
11 Yehova ka ecela lika olofuka vietu ale akandu, pole, eye o a imũla. (Tanga Ovilinga 3:19.) Ndocindekaise sokolola okuti umue imũla etendelo liolombongo ove wa levala poku li kuanga. Pole, handi vosi va pondola oku mola etendelo liaco va kuanga. Pole, oku imũla cimue ca litepa calua. Oco tu kuate elomboloko liaco, tu sukila oku ivaluka okuti, kosimbu poku panga otinda yimue, ca sukilile okuti yi tengiwa lovina ndeci, o carbonu, o goma kuenda ovava. Omo liaco, omunu umue losiponja yomila wa ponduile oku imũla oletala yaco. Kuenje poku “imũla” ofuka yimue, oyo ka yi molẽha vali kuenda eci ca sonehiwile, ka citava vali oku ci tanga. Ci kala ndu okuti ofuka yaco ka ya la kalako. Oku kũlĩha okuti Yehova ka ecela lika akandu etu, pole, o a imũla osi, ci vetiya calua utima wetu!—Osa. 51:9.
“Oco akandu ene a ecelue” (Ovil. 3:19)
12. Ocindekaise celende limue, ci tu longisa nye?
12 Ku Isaya 44:22 Yehova o tukula ocindekaise cikuavo oco a lombolole ndomo eye a imũla akandu etu. Eye hati: “Ndi ka takatisa akulueya ove ndelende limue kuenda akandu ove ndelende limue lia tekãva.” Eci Yehova a ecela, ci kasi ndu okuti o talavaya lelende limue oco a sitike akulueya etu okuti, lomue o pondola oku a mola vali, ndaño muẽle etu.
“Ndi ka takatisa akulueya ove ndelende limue” (Isa. 44:22)
13. Eci Yehova a ecela akandu etu nye tu sukila oku yuvula?
13 Eci hẽ ci tu longisa nye? Eci Yehova a ecela akandu etu, ka tu sukila vali oku livetela evelo otembo yosi omo liakandu tua linga. Ocisembi ca Yesu Kristu ca imũla akandu etu osi. Ci kasi ndu okuti lalimue eteke tua lingile akandu aco. Nda tu likekembela akandu etu, Yehova o ka tu ecela lutima wosi.
YEHOVA O TU TAVA VALI NDAKAMBA VAYE
Ongecelo Isietu wokilu a eca kokuetu, yi tu ecelela oku kuata ukamba uwa laye (Tala ocinimbu 14)
14. Momo lie tu kolelela kongecelo ya Yehova? (Talavo oviluvialuvia.)
14 Ongecelo yocili ya Yehova, yi tu ecelela oku kuata vali ukamba uwa laye. Eci ci tu kuatisa oku yuvula oku livetela evelo otembo yosi. Handi vali, ka tu sukila oku kuata usumba wokuti, Yehova wa tu solekela ocikumbiti omo lieci tua linga, loku talamẽla epuluvi lioku tu yambula. Eye lalimue eteke a ka ci linga. Oco hẽ, momo lie tu kolelela kueci Yehova a popia okuti o tu ecela? Yehova wa sapuila uprofeto Yeremiya hati: “Ndi ka ecela oku lueya kuavo kuenda si ka ivaluka vali ekandu liavo.” (Yer. 31:34) Upostolo Paulu poku lombolola olondaka evi, wa tukula olondaka vimuamue poku popia hati: “Si ka ivaluka vali akandu avo.” (Va Hev. 8:12) Eci hẽ ci lomboloka nye?
“Si ka ivaluka vali ekandu liavo” (Yer. 31:34)
15. Ondaka yokuti Yehova ka ivaluka vali akandu etu yi lomboloka nye?
15 Vembimbiliya ondaka oku “ivaluka” halonjanja viosiko yi tiamisiwila komunu umue ivaluka ocina cimue ca pita kosimbu. Pole, yi tiamisiwilavo komunu o kasi oku linga cimue. Ongangala yina ya valeliwile kuti konele ya Yesu ya pinga hati: “A Yesu, njivaluke eci wiñila Vusoma wove.” (Luka 23:42, 43) Ulume waco ka kaile lika oku pinga ku Yesu oco o sokolole. Etambululo Yesu a eca kulume waco lia lekisa okuti, eye wa laikele oku ko pindula. Kuenje eci Yehova a popia okuti ka ivaluka vali akandu etu, ci lomboloka okuti eye ka ka tu kangisa omo lieci tua linga. Yehova ka ka tu yambula kovaso yoloneke omo liakandu ana eye a ecela ale.
16. Embimbiliya li tu sokisa la nye?
16 Embimbiliya li tukula ocindekaise cikuavo oco ci tu kuatise oku kuata elomboloko ndomo tu liyeva omo lieyovo li tunda koku kuata ongecelo yocili. Omo liekambo lioku lipua, tua linga “apika vekandu.” Pole, omo liongecelo ya Yehova, tu kasi ndapika va ‘yovuiwa kekandu.’ (Va Rom. 6:17, 18; Esit. 1:5) Eci tu kũlĩha okuti Yehova wa tu ecela, ci tu nenela esanju lialua ndupika umue wa yovuiwa.
“Wa yovuiwi kekandu” (Va Rom. 6:18)
17. Lonjila yipi ongecelo yi sokisiwila loku sakuiwa? (Isaya 53:5)
17 Tanga Isaya 53:5. Ocindekaise ca sulako tu konomuisa, ci sokisa omunu umue o kuete uvei ka u kuete esaku. Omo liocisembi Yehova a tu ĩha pocakati Comõlaye, ci kasi ndu okuti tua sakuiwa. (1 Pet. 2:24) Kuenje ndeci ci lipita lomunu umue o kuete uvei wa kãla okuti, o sanjuka calua eci a sakuiwa kuvei waco, tu pondolavo oku sanjuka omo lioku kuata ukamba wocili la Yehova kuenda akandu etu a eceliwa omo liocisembi. Ocisembi ca ecelela okuti tu tumbulula ukamba wetu la Yehova una wa nyõliwile.
“Omo liapute aye tua kayisiwa” (Isa. 53:5)
CECI ONGECELO YA YEHOVA YI LOMBOLOKA KOKUETU
18. Nye tua lilongisila kovindekaise viatiamẽla kongecelo ya Yehova? (Talavo okakasia losapi hati: “Ndomo Yehova a tu Ecela.”)
18 Nye tua lilongisa poku konomuisa ovindekaise viatiamẽla kongecelo ya Yehova? Tua lilongisa okuti eci Yehova a ecela, ci kala ndu okuti lalimue eteke tua lingile ekandu liaco. Yehova lalimue eteke a ka patekela ovina tua linga. Omo liaco, tu pondola oku kuata ukamba wocili la Isietu wo kilu. Handi vali, ongecelo yocili, ombanjaile yimue Yehova a tu ĩha. Oyo uvangi wocisola calua kuenda ohenda ya piãla Yehova a kuetele omanu vosi ka va lipuile, momo ka tua ci sesamẽlele.—Va Rom. 3:24.
19. (a) Kovina vipi tu sukila oku eca olopandu? (Va Roma 4:8) (b) Nye tu ka konomuisa kocipama ci kuãimo?
19 Tanga Va Roma 4:8. Tu eca olopandu vialua ku Yehova, Suku ‘yongecelo yocili!’ (Osa. 130:4) Pole, nda tu yongola okuti Yehova o tu ecela, tu sukila oku linga ocina cimue ci kuete esilivilo lialua. Yesu wa popia hati: “Nda ene weceli akandu omanu va ku lueyeli, Isiene wo kilu o ka ecelavo akandu ene.” (Mat. 6:14, 15) Eci ci lekisa okuti, ci kuete esilivilo lialua oku setukula ongecelo ya Yehova. Pole, tu ci setukula ndati? Kocipama ci kuãimo tu ka lilongisa eci catiamẽla kondaka yaco.
OCISUNGO 46 Tu ku Pandula a Yehova
a Kelimi liatete lio Heveru oku tukula ondaka “ongecelo” ci lekisa okuti oyo lika ongecelo yocili, ndaño okuti kuli olonjila vikuavo viongecelo. Valua vakuakupongolola Embimbiliya, ka va kapiko etosi eli li kuete esilivilo lialua, pole, Embimbiliya li Kola Epongoluilo Lioluali Luokaliye lia kapako etosi liaco poku pongolola Osamo 130:4.
