1. Akundi vamue va siata oku liyeva ndati, poku kundila vana ka va kũlĩhĩle? (Talavo ociluvialuvia)

 NDAFENDELI va Yehova, tua siata oku kundila omanu, momo tu sole Isietu wo kilu kuenda tu yongola oku kuatisa omanu oco vo kũlĩhe. Akundi valua va sole upange woku kunda. Pole, ku vamue ka ca lelukile oku kuata esanju kupange waco. Momo lie? Momo vamue vakuasõi kuenda va litenda ndu okuti halongisiko vawa. Vamue va kuete ohele yokuti omanu va ka va temẽla poku sapela lavo. Handi vali, vakuavo va longisiwa oku yuvula oku lihoyisa. Omo liaco, ndaño okuti ovo va sole Yehova, olonjanja vimue ka ci leluka ku vamanji vaco oku sapela lomanu vana ovo ka va kũlĩhĩle kupange woku kunda. Pole, ndaño lovitangi viaco, omo lioku kũlĩha okuti upange waco u kuete esilivilo, ovo va likolisilako oku panga onepa kupange woku kunda. Ocili okuti Yehova wa va sanjukila calua!

2. Nda okuti ku kuate esanju kupange woku kunda, momo lie ku sukilila oku sumua?

² Anga hẽ wa siata oku likolisilako calua oco o sange esanju kupange woku kunda ndaño lovitangi viaco? Nda oco ku ka sumue. Ohele o kuete, yi lekisa okuti, wumunu umue embombe kuenda ku yongola oku tiamisila esivayo kokuove. Handi vali, oyo yi lekisavo okuti ove ku yongola oku lihoyisa lomanu. Lomue o yongola oku sumuisa vakuavo ca piãla enene eci tu kasi oku likolisilako oku lingila eci ciwa komanu. Isiove wo kilu wa kũlĩha ciwa ndomo o liyevite kuenda o yongola oku ku kuatisa. (Isa. 41:13) Vocipama cilo, tu konomuisa olonumbi vitãlo, vi ka tu kuatisa ndomo tu liyaka lovisimĩlo viaco kuenda  ndomo tu kuata esanju kupange woku kunda.

ECELELA OKUTI ONDAKA YA SUKU YI KU PAMISA

3. Nye ca kuatisa uprofeto Yeremiya oku kundila omanu?

³ Tunde kosimbu esapulo lia Suku lia siata oku kuatisa afendeli vaye oku tẽlisa ovikele vina ka via lelukile. Tu konomuisi ulandu wuprofeto Yeremiya. Eye wa yeva esakalalo lialua eci Yehova o kundika ocikele coku kunda. Yeremiya wa popia hati: “Ame si ci tẽla oku vangula, momo ame ndimõla waño.” (Yer. 1:6) Nye co kuatisa oku kuata utõi woku kunda? Olondaka Yehova o sapuila vio pamisa. Toke muẽle Yeremiya wa popia hati: “Ondaka yaye ya linga ndondalu yi taima ya kakatela vakepa ange, kuenda ame nda kava omo lioku yi kuata.” (Yer. 20:8, 9) Ndaño okuti ocikanjo ca Yeremiya ka ca lelukile, pole, esapulo lio kundikiwile, lio wĩha ongusu eye a sukilile oco a tẽlise ocikele caco.

4. Nye ci pondola oku li pita letu eci tu tanga Ondaka ya Suku loku yi sokolola? (Va Kolosai 1:9, 10)

⁴ Akristão va siata oku kuata ongusu va sukila poku kuatisiwa Londaka ya Yehova yi sangiwa Vembimbiliya. Upostolo Paulu, poku sonehela ekongelo lio ko Kolosai wa popia hati: Ukũlĩhĩso wa suapo wa laikele oku vetiya vamanji oku ‘endaenda ndeci ca sesamẽla ku Yehova’ osimbu ovo va kala oku amamako “oku ima epako kupange wosi uwa.” (Tanga Va Kolosai 1:9, 10.) Vupange waco, mua kongelele oku kunda olondaka viwa. Omo liaco, eci tu tanga Ondaka ya Suku kuenda oku sokolola kokuayo, ekolelo lietu ku Yehova li pamisiwa kuenda tu kuata elomboloko lia suapo lieci tu kundila esapulo Liusoma.

5. Nye tu sukila oku linga oco tu kuatisiwe poku tanga kuenda oku lilongisa Embimbiliya?

⁵ Oco tu kuatisiwe Londaka ya Suku, poku tanga loku lilongisa Embimbiliya kuenda oku sokolola kokualio, tu sukila oku yuvula oku ci linga lonjanga. Tu sukilavo oku sokiya otembo ya sesamẽla. Nda poku tanga ocisonehua cimue wa limbuka okuti ocinimbu caco ka ca ku lombolokele, ku ka ci tẽhe. Likolisilako oku kũlĩha ovina vikuavo viatiamẽla kocinimbu caco, poku talavaya lo Índice das Publicações da Torre de Vigia ale Elivulu Lioku Konomuisa Liolombangi Via Yehova. Nda wa sanda otembo yoku lilongisa, o ka pamisa ekolelo liove kueci Embimbiliya li popia. (1 Va Tes. 5:21) Kuenje o ka vetiyiwa oku sanjukila oku sapuilako vakuene ovina wa lilongisa.

 LIPONGIYILA CIWA UPANGE WOKU KUNDA

6. Momo lie tu sukilila oku lipongiyila ciwa upange woku kunda?

⁶ Eci o lipongiyila ciwa upange woku kunda ci ku kuatisa oku yuvula esakalalo poku sapela lomanu. Yesu wa kuatisa olondonge viaye oku lipongiya, osimbu eye ka va tumile kupange woku kunda. (Luka 10:1-11) Omo okuti olondonge via kapeleko ovina Yesu a va longisa, via kuata esanju lialua poku tẽlisa upange woku kunda.—Luka 10:17.

7. Tu lipongiyila ndati upange woku kunda? (Talavo ociluvialuvia)

⁷ Tu lipongiyila ndati upange woku kunda? Tu ci linga poku sokolola ndomo tu ka situlula ocili lonjila yimue ya sunguluka, haiyo ya leluka volondaka vietu muẽle. Ci kuetevo esilivilo oku sokolola kolonjila ndomo omanu vocikanjo va ka tu tambulula kuenda ndomo tu ka sapela lavo. Omo liaco, eci tu sapela lomanu, tu sukila oku tulumũha, oku memenako kuenda oku lekisa ukamba.

8. Lonjila yipi Akristão va sokisiwa lolombia viotuma via tukuiwa vocindekaise cupostolo Paulu?

⁸ Upostolo Paulu poku sokisa ocikele cetu coku kunda wa popia hati: “Tu kuete ukuasi owu volombia viotuma.” (2 Va Kor. 4:7) Ukuasi waco nye? Upange woku kunda esapulo Liusoma, lina li popela ovimuenyo viomanu. (2 Va Kor. 4:1) Olombia viaco viotuma vi lomboloka nye? Vi lomboloka Afendeli va Yehova va siata oku sandeka olondaka viwa komanu. Koloneke via Paulu, vakualomĩlu va enda oku talavaya lolombia viotuma, oco vambatelemo ovina vi kuete esilivilo ndeci, oku lia, ovinyu kuenda olombongo. Cimuamue haico okuti, Yehova wa tu kundika ocikele coku kunda esapulo liolondaka viwa. Lekuatiso liaye tu pondola oku kuata unene tu sukila oco tu amameko oku tẽlisa ocikele caco.

LIKUTILILA OKU PINGA UTÕI

9. Tu pondola oku yula ndati usumba tu kuetele omanu? (Talavo ociluvialuvia.)

⁹ Olonjanja vimue tu pondola oku kuatela usumba omanu. Tu yula ndati ocitangi caco. Kũlĩhĩsa ohutililo ovapostolo va linga eci va handelekiwa oku liwekapo oku kunda. Ovo ka va ecelelele okuti va yuliwa lusumba, pole, va likutilila ku Yehova oco a va kuatise oku kuata “utõi woku amamako oku popia ondaka  [yaye.]” Yehova lonjanga yalua wa tambulula ohutililo yavo. (Ovil. 4:18, 29, 31) Nda okuti usumba womunu u tu kokelavo esakalalo kupange woku kunda, tu sukila oku likutilila oku pinga ekuatiso ku Yehova. Pinga ku Yehova oco a ku kuatise oku pamisa ocisola o kuetele omanu, oco o yule usumba woku va kundila olondaka viwa.

10. Yehova o tu kuatisa ndati oku tẽlisa ocikele cetu coku kala Olombangi viaye? (Isaya 43:10-12)

¹⁰ Yehova wa tu nõla oco tu kale Olombangi viaye kuenda wa tu likuminya oku tu kuatisa poku tu ĩha utõi. (Tanga Isaya 43:10-12.) Tu konomuisi olonjila vikuãla vi lekisa ndomo eye a siata oku ci linga. Yatete, Yesu olonjanja viosi o kasi letu eci tu kunda olondaka viwa. (Mat. 28:18-20) Yavali, Yehova wa nõla ovangelo oco va tu kuatise. (Esit. 14:6) Yatatu, Yehova wa tu ĩha espiritu sandu liaye oco li tu kuatise oku ivaluka ovina tua lilongisa. (Yoa. 14:25, 26) Yakuãla, Yehova wa tu ĩha vamanji oco va tu kuatise. Lekuatiso lia Yehova kuenda liongongela ya vamanji vakuacisola, tu kuete ovina tu sukila oco tu amameko lutõi kuenda oku kunda.

KALA UKUESUNGULUKO KUENDA KAPAKO EKALO LIOMANU

11. Nye tu sukila oku linga oco tu sange omanu valua eci tu kasi kupange woku kunda? (Talavo ociluvialuvia.)

¹¹ Eci o kasi kupange woku kunda wa siata hẽ oku yeva esumuo nda kolonjo vialua o pita ku sangiko omanu? Nda oco, lipula ndoco: ‘Epuluvi lipi omanu va sangiwa kolonjo vocikanjo cange?’ (Ovil. 16:13) Velivala lilo, va enda hẽ kupange ale va kasi povitanda? Anga hẽ o pondola oku sanga omanu valua poku kundila volokololo? Manji umue o tukuiwa Joshua wa popia hati: “Nda sanga apuluvi oku kunda osimbu ngenda povitanda kuenda kovitumãlo kuli omanu valua.” Eye kumue lukãi waye Bridget, va enda oku sanga vali omanu kolonjo poku va tieñela koñolosi kuenda Kovialumingu kekumbi.—Va Efe. 5:15, 16.

12. Tu limbuka ndati ovina omanu va tava levi vi va sakalaisa?

¹² Nda kefetikilo liombangulo wa limbuka okuti omunu o kasi oku sapela laye ka kuete onjongole yoku yevelela esapulo wo nenela, seteka oku limbuka ovina eye atava ale ceci cu sakalaisa. Manji Joshua kumue lukãi waye  Bridget, va siata oku linga epulilo li sangiwa koñoño yokokanda eci va sapela lomanu. Ndeci, poku talavaya lokokanda losapi hati: O Tenda Ndati Embimbiliya? ovo va popia ndoco: “Omanu vamue va tenda okuti Embimbiliya elivulu limue lia tunda ku Suku, pole, vakuavo sio. Cipi ocisimĩlo cove?” Eci ca siata oku eca onima yiwa poku fetika ombangulo.

13. Momo lie tu ponduila oku kuata onima yiwa kupange woku kunda ndaño ceci omanu ka va tu yevelela? (Olosapo 27:11)

¹³ Onima tu pondola oku kuata kupange woku kunda, ka ya tambele nda omanu va tu yevelela ale sio. Momo lie? Momo tu kasi oku tẽlisa ovina Yehova lomõlaye Yesu va tu yonguila okuti, oku eca uvangi. (Ovil. 10:42) Omo liaco, ndaño ceci ka tu sangi omunu umue tu sapela laye, ale ceci esapulo lietu ka litaviwa, lopo tu pondola oku kuata esanju momo tua kũlĩha okuti, tu kasi oku sanjuisa Isietu wo kilu. —Tanga Olosapo 27:11.

14. Momo lie tu kuatela esanju nda manji umue wa sanga omunu umue o lekisa onjongole vocikanjo?

¹⁴ Tu pondolavo oku kuata esanju eci vamanji vakuavo va sanga omunu umue o lekisa onjongole vocikanjo. Utala umue Wondavululi wa sokisa upange wetu loku sanda omõla umue wa nyelela. Omanu valua va lieca olumue koku sanda omõlaco poku enda kocitumãlo locitumãlo. Eci omõla a sangiwa, omanu vosi vana va panga onepa kupange woku sandiliya va pondola oku kuata esanju. Cimuamue haico okuti, vosi vekongelo va pondola oku kuatisa kupange woku linga olondonge viokaliye via Yesu. Tu yongola okuti vosi vekongelo va kuatisa kupange woku kundila omanu vosi vocikanjo cetu kuenda oku sanjuka eci omunu a fetika oku endaenda kolohongele.

TIAMISILA UTIMA KOCISOLA O KUETELE YEHOVA KUENDA OMANU

15. Oku kapako olondaka vi sangiwa ku Mateo 22:37-39 ci tu kuatisa ndati oku vokiya esanju lietu kupange woku kunda? (Talavo ociluvialuvia )

¹⁵ Tu pondola oku vokiya esanju lietu kupange woku kunda poku tiamisila utima kocisola tu kuetele Yehova kuenda omanu. (Tanga Mateo 22:37-39.) Sokolola esanju Yehova a pondola oku kuata, poku tu mola oku tẽlisa upange waye kuenda esanju omanu va yeva eci va fetika oku lilongisa Embimbiliya! Sokololavo okuti, vana va yevelela esapulo tu va kundila haivo va nõlapo oku vumba Yehova,  va pondola oku kala komuenyo otembo ka yi pui.—Yoa. 6:40; 1 Tim. 4:16.

16. Tu kuata ndati esanju kupange woku kunda ndaño ceci ekalo lietu ka li tu ecelela oku tunda konjo yetu? Tukula ulandu umue.

¹⁶ Anga hẽ ku pondola oku tunda konjo yove oco o ka kunde omo liesunga limue? Nda oco, tiamisila utima kovina o pondola oku linga oco o lekise ocisola cove ku Yehova kuenda komanu. Vokuenda kuefengi lio KOVID-19, manji Samuel kumue lukãi waye Dania ka va ponduile oku tunda konjo yavo oco va ka kunde. Ndaño locitangi caco, olonjanja viosi ovo va enda oku eca uvangi pocakati co telefone, oku soneha ovikanda kuenda oku songola alilongiso Embimbiliya pocakati co Zoom. Manji Samuel wa kundilavo omanu a enda oku lisanga lavo kosipitali kuna eye a kala oku tatiwa omo liuvei wo kanser. Eye wa popia hati: “Eci tu liyaka locitangi cimue tu yeva esakalalo, ekavo, toke muẽle ekolelo lietu li pondola oku setekiwa. Kuenje ocina cimue tu sukila, oku sanga esanju kupange tu lingila Yehova.” Handi vali, vokuenda kuovitangi viaco, ukãi wange Dania wa vela eci ci soka olosãi vitatu. Noke eye wa sukilile oku endela komangu yalola vokuenda kuolosãi epandu. Manji Dania wa popia hati: “Nda likolisilako oku linga ovina viosi via kala vepondolo liange. Nda tẽla oku kundila ocifulumela cimue ca ndi nyula kuenda nda kundilavo vakuopange woku nena ovina kolonjo. Nda kundilavo ukãi umue wa talavaya kombutika yimue yuhayele pocakati co telefone. Ndaño okuti ekalo lia manji Samuel kumue lukãi waye ka lia va ecelelele vali oku linga ovina vialua ndeci kosimbu, pole, ovo va linga ovina via kala vepondolo liavo kuenda va kuata esanju lialua.

17. O kuatisiwa ndati poku kapako olonumbi tua konomuisa vocipama cilo?

¹⁷ Likolisilako oku kapako olonumbi vitãlo tua konomuisa vocipama cilo. Onumbi lonumbi tua konomuisa, yi sokisiwa locitenga cimue ci kapiwa vokulia. Nda ovitenga viaco viosi via likuata ciwa, onima yiyililako yeyi yokuti oku lia ku ka pepa calua. Cimuamue haico okuti, eci tu kapako olonumbi viosi tua konomuisa vocipama cilo, tu ka tẽla oku yula ovisimĩlo ka via sungulukile kuenje tu ka sanga esanju kupange woku kunda.