1. Nye Yehova a tu yonguila?

 OCINA cimue ci sanjuisa vali calua kohueli yimue oku citiwa kuoñaña yavo. Ndaño okuti olonjali vi sanjukila calua oñaña yavo, pole, ovio ka vi yongola okuti oyo yamamako oku kala oñaña. Ocili okuti, ovio nda vi kuata esakalalo lialua nda oñaña yavo ka yi kasi oku kula. Cimuamue haico ci pondola oku pita letu. Yehova o sanjuka calua eci tu fetika oku lilongisa catiamẽla kokuaye. Pole, Eye ka yongola okuti tu amamako oku kala omãla konepa yespiritu. (1 Va Kor 3:1) Eye o tu vetiya oku kala akulu konepa yespiritu.—1 Va Kor. 14:20.

2. Apulilo api tu konomuisa vocipama cilo?

² Nye ci lomboloka oku kula konepa yespiritu? Nye tu sukila oku linga oco tu kule konepa yespiritu? Oku lilongisa ondongosi ocili Cembimbiliya ci tu kuatisa ndati oku pamisa ukamba wetu la Yehova? Tu yuvula ndati oku likolela calua etu muẽle? Vocipama cilo, tu konomuisa atambululo kapulilo a-a.

NYE CI LOMBOLOKA OKU KULA KONEPA YESPIRITU?

3. Nye ci Lomboloka oku kala Ukristão umue wapama konepa yespiritu?

³ Vembimbiliya ondaka oku “kula” kelimi lio Helasi yi lomboloka “oku pama,” “oku lipua” kuenda “oku pua etondelo.” a (1 Va Kor. 2:6, etosi.) Etu tu pondola oku kula konepa yespiritu, poku amamako oku pamisa ukamba wetu la Yehova. Ndaño tu li tenda okuti tua eca ale ananga amue, lalimue eteke ka tu ka liwekipo oku kula konepa yespiritu. (1 Tim. 4:15) Vosi yetu, oku kongelamo amalẽhe, tu pondola oku kula konepa yespiritu. Tu kũlĩha ndati okuti tua kula konepa yespiritu?

4. Nye ci situlula okuti, Ukristão umue wa kula konepa yespiritu?

⁴ Ukristão umue wa kula konepa yespiritu, omunu una  ambata omuenyo umue u likuata lolonumbi viosi via Suku. Ocili okuti, omo liekambo lietu lioku lipua, Ukristão waco o ka lueya. Pole, ndaño ndoco, eye handi o likolisilako oku sokolola kuenda oku linga ovina ndomo ci likuata locipango ca Suku. Omo okuti eye wa wala omunu wokaliye, olonjanja viosi Ukristão waco o likolisilako oku kuata elomboloko liovisimĩlo via Yehova. (Va Efe. 4:22-24) Eye wa lilongisa oku nõla olonjila viwa, poku sokolola kovihandeleko kuenda olonumbi via Yehova. Omo liaco, eye ka sukila ulala umue wolonumbi viatiamẽla konjila ndomo ambata omuenyo waye. Eci eye a nõla onjila yimue, o likolisilako oku tẽlisa ovina eye a sokiya.—1 Va Kor. 9:26, 27.

5. Nye ci pondola oku li pita Lukristão una okuti ka kulile konepa yespiritu? (Va Efeso 4:14, 15)

⁵ Ukristão umue okuti, ka kulile konepa yespiritu ci leluka calua oku yapuisiwa “latutu” kuenda ‘lovisimĩlo viuhembi’ vina via luvikiyiwa lolonanguluke. b (Tanga Va Efeso 4:14, 15.) Omunu waco o pondola oku kuatela vakuavo esepa, oku lihoyisa lavo, ale oku tema lonjanga.—1 Va Kor. 3:3.

6. Momo lie tu sokisila oku kula kuetu konepa yespiritu loku kula kuomõla umue? (Talavo ociluvialuvia.)

⁶ Ndomo tua ci konomuisa ale, Ovisonehua vi sokisa oku kula kuomunu umue konepa yespiritu, loku kula konepa yo ketimba. Kuli ovina vialua okuti omõla ka vi kũlĩhĩle, omo liaco, o sukila ekuatiso liomunu umue ukulu oco o teyuile loku u songuila. Ndocindekaise, ina umue o pinga komõlaye ukãi oco o kuate peka osimbu va tẽha etapalo limue. Osimbu omõla a kula ina ecelela okuti, eye o tẽha etapalo likaliaye, pole, u wivaluisa oco a vanje kolonele nda ku kasi oku iya ocendelo cimue. Kuenje eci omõla a kula, o ka tẽla ndomo eye muẽle a yuvula ohele yaco. Ndeci omãla vatito va sukila ekuatiso liakulu oco va yuvule ohele yimue, Akristão vana okuti ka va kulile konepa yespiritu, va sukilavo ekuatiso Liakristão va kula konepa yespiritu, oco va yuvule ohele yosi yi nyõla ukamba wavo la Yehova kuenda oku nõla lolondunge onjila va kuama. Pole, eci Ukristão umue wa kula konepa yespiritu a sukila oku nõla onjila yimue, eye o sokolola lutate kueci Embimbiliya li popia, oco a kuate  elomboloko liovisimĩlo via Yehova kuenje o linga ovina via sunguluka.

7. Akristão vana va kula konepa yespiritu va sukila hẽ ekuatiso lia vamanji vakuavo?

⁷ Anga hẽ eci ci lomboloka okuti, Ukristão wa kula konepa yespiritu ka sukila ekuatiso liomunu umue? Hacoko. Eye o sukilavo oku pinga ekuatiso. Pole, omunu umue o kasi oku kula konepa yespiritu, citava okuti o pinga ku vakuavo oco vo sapuile ovina a sukila oku linga, ale vo nõlelako onjila yimue a sukila oku kuama. Ukristão una wa kula konepa yespiritu wa litepa, momo osimbu ka nõlele onjila yimue, o sanda ekuatiso ku vamanji vakuavo va loñoloha, oco vo kuatise oku nõla lolondunge olonjila a yongola oku kuama, okuti cu kuatisa oku ‘ambata ocitele caye muẽle.’—Va Gal. 6:5.

8. Volonjila vipi Akristão va kula konepa yespiritu va litepa omunu lukuavo?

⁸ Ndeci omanu va litepa ketimba, cimuamue haico okuti Akristão vana va pama konepa yespiritu, va litepavo poku kuata ovituwa vimue ndeci, olondunge, utõi, oku kala ukuacali kuenda ukuahenda. Handi vali, ndaño okuti Akristão vavali va pondola oku nõla olonjila via litepa, pole viosi vi sukila oku kuata elitokeko lolonumbi Viembimbiliya. Eci ci pondola oku lipita eci Akristão va nõla onjila yimue ndomo ci likuata lowanji wavo woku sokolola. Eli olio esunga lieci okuti, ovo va yuvula oku pisa omunu ukuavo omo lionjila a nõlapo. Pole, va tiamisila utima wavo koku li kuata omunga.—Va Rom. 14:10; 1 Va Kor. 1:10.

NYE TU SUKILA OKU LINGA OCO TU KULE KONEPA YESPIRITU?

9. Lombolola ndomo tu pondola oku kula konepa yespiritu?

⁹ Ocili okuti, tu pondola oku kula konepa yo ketimba kuenda ku tunga, pole, lomue o pondola oku kula konepa yespiritu okuti ka sukila oku linga elikolisilo. Ndeci, vamanji ko Korindo va tava kolondaka viwa, va papatisiwa, va tambula espiritu sandu kuenda va kuatisiwa lelongiso liupostolo Paulu. (Ovil. 18:8-11) Pole, noke lianyamo amue tunde eci vamanji vaco va papatisiwa, valua pokati kavo handi va honguele konepa yespiritu. (1 Va Kor. 3:2) Nye tu sukila oku linga oco ombili yetu ka yi ka tepuluke konepa yespiritu?

10. ye tu sukila oku linga oco tu kule konepa yespiritu? (Yuda 20)

¹⁰ Oco tu kule konepa yespiritu, tu sukila oku litumbikila onjongole yaco. Vana va ‘kamba olondunge’ okuti va nõlapo oku amamako oku kala ndoloñaña, ka va ka tẽla oku kula konepa yespiritu. (Olosap. 1:22) Ka tu yongola oku kala ndomãla vana okuti va kula, pole, handi va tamba kolonjila olonjali viavo vi va nõlelako. Etu tu sukila oku litumbikila ocikele coku kula kuetu muẽle konepa yespiritu. (Tanga Yuda 20.) Nda okuti o kasi oku likolisilako oco o kule konepa yespiritu, likutilila ku Yehova oco eye a ku ĩhe “onjongole longusu yoku linga ovina viosi eye a sole.”—Va Fil. 2:13.

11. Nye Yehova a tu ĩha oco ci tu kuatise oku kula konepa yespiritu? (Va Efeso 4:11-13)

¹¹ Yehova lalimue eteke a lavokaile etu oku kula konepa yespiritu okuti, ka tu kuatisiwa la vakuetu. Eye wa tu ĩha angombo kuenda alongisi oco va tu kuatise oku “kala akulu vendamba, loku amela ku Kristu volonjila via litepa.” (Tanga Va Efeso 4:11-13.) Yehova o tu ĩhavo espiritu sandu oco li tu kuatise oku kuata “ovisimĩlo via Kristu.” (1 Va Kor. 2:14-16) Handi vali, Suku wa tu ĩha Avanjeliu akuãla, ana a lekisa kokuetu ndomo Yesu a enda oku sokolola, oku vangula kuenda ovituwa a lekisa kupange woku kunda palo posi. Poku setukula ovisimĩlo kuenda ovilinga via Yesu, ove o  pondola oku tẽlisa ocimãho cove coku kula konepa yespiritu.

THE ROLE OF SOLID SPIRITUAL FOOD

12. ‘Alongiso api atete atiamẽla ku Kristu?’

¹² Oco tu kule konepa yespiritu, ka tu sukila lika oku kũlĩha “alongiso atete atiamẽla ku Kristu.” Valongiso aco atete, mua kongela, elikekembelo, ekolelo, epapatiso kuenda epinduko. (Va Hev. 6:1, 2) A-a, amue pokati kalongiso Akristão vosi va tava. Eli olio esunga lieci upostolo Petulu a tukuila ovina viaco eci a kundila omanu ko Pendekoste. (Ovil. 2:32-35, 38) Pole, tu sukila oku tava kalongiso aco atete, oco tu kale olondonge via Kristu. Ndeci, Paulu wa lungula hati, omunu wosi ka tava kelongiso liepinduko o kasi oku likala oku linga ondonge ya Kristu. (1 Va Kor. 15:12-14) Omo liaco, ka tu ka sanjukili lika oku kuata ukũlĩhĩso u sulemo wocili.

13. Nye tu sukila oku linga oco tu kuatisiwe lokulia kua kõla kuespiritu kua tukuiwa ku Va Heveru 5:14? (Talavo ociluvialuvia.)

¹³ Ca litepa lalongiso atete ceci okuti, vokulia kua kõla kuespiritu, ka mua kongelele lika ovihandeleko via Yehova, mua kongelavo olonumbi vina vi tu kuatisa oku kuata elomboloko liovisimĩlo viaye. Oco tu kuatisiwe lokulia kuaco, tu sukila oku lilongisa Embimbiliya, oku sokolola ovina tua tanga kuenda oku likolisilako oku kapako ovina tua lilongisa. Poku ci linga, tu li pindisa etu muẽle oku nõla olonjila vi sanjuisa Yehova. c—Tanga Va Heveru 5:14.

14. Paulu wa kuatisa ndati Akristão va Korindo oku kula konepa yespiritu?

¹⁴ Akristão vana ka va kulile konepa yespiritu, va siata oku kuata ovitangi poku nõla olonjila via sunguluka, eci ka kuli onumbi yimue Yembimbiliya ya teta onimbu. Nda ka kuli ocihandeleko cimue Cembimbiliya vamue va sima okuti va pondola oku linga eci va seya. Vakuavo va pinga okuti, ku tumbikiwa ocihandeleko cimue ndaño ka ci sukiliwa. Ndeci, citava okuti, Akristão vo ko Korindo va pinga ku Paulu oco a tumbike ocihandeleko nda ovo va ponduile oku lia ovikulia vina via lumbiwa koviteka. Pole, Paulu ka va sapuilile eci va sukilile oku linga, eye wa lekisa kokuavo okuti omunu lomunu pokati kavo wa kuatele  “elianjo lioku li nõlela” ndomo owanji wutima waye u wecelela. Eye wa tukula olonumbi vimue Viembimbiliya via ponduile oku va kuatisa oku nõla onjila yimue ka yi va kokela oku kuata eko kuenda oku kokela ocilondokua vakuavo. (1 Va Kor. 8:4, 7-9) Lonjila eyi, Paulu wa kala oku longisa va Korindo oku kula konepa yespiritu kuenda oku va longisa oku talavaya Lovisonehua poku nõla olonjila vakuama okuti ka vi tambi kovisimĩlo viomanu vakuavo, ale oku sanda oku va tumbikila ovihandeleko.

15. Paulu wa kuatisa ndati Akristão va Heveru oku kula konepa yespiritu?

¹⁵ Tu lilongisa ocina cimue ci kuete esilivilo, kueci Paulu a sonehela Akristão Va Heveru. Vamue va ecelela okuti ukamba wavo la Yehova u liwekapo oku kula. Ovo handi va ‘sukilile asenjele okuti, okulia kua kõla [kuespiritu] hakoko.’ (Va Hev. 5:12) Ovo ka va kaile oku kapako ocili ca kala oku situluiwa kokuavo, loku tava ovina viokaliye Yehova a kala oku va longisa pocakati cekongelo. (Olosap. 4:18) Ndeci, va Yudea valua handi va kala oku kuama Ocihandeleko ca eciwile ku Mose, ndaño okuti papitile ale 30 kanyamo tunde eci ocilumba ca Kristu ca imula ocihandeleko caco. (Va Rom. 10:4; Tito 1:10) Ocili okuti, otembo yi soka 30 kanyamo ya ecelela Akristão, oku limbuka okuti, ka va sukilile vali oku kuama ocihandeleko caco! Paulu kaliye wa kala oku va kuatisa oku tava kocili cimue condongosi, cina eye a kala oku va longisa. Ukanda eye a va sonehela, wa va kuatisa oku limbuka okuti onjila yokaliye yefendelo Yehova a tumbika pocakati ca Yesu, oyo ya velelepo. Wa va kuatisavo oku kuata utõi woku amamako oku kunda, ndaño lelambalalo lia va Yudea.—Va Hev. 10:19-23.

AVOID BEING OVERCONFIDENT

16. Nye tu sukila oku linga oco tu amameko oku kula konepa yespiritu?

¹⁶ Tu sukila oku likolisilako oco tu amameko oku kula konepa yespiritu. Omo liaco, tu kuati utate oco ka tu ka simi okuti tua kula ale konepa yespiritu, okuti ka tu sukila vali oku amamako oku pamisa ukamba wetu la Yehova. (1 Va Kor. 10:12) Tu sukilavo oku ‘amamako oku li seteka’ etu muẽle, oco tu kuate ekolelo nda tu kasi oku amamako oku kula konepa yespiritu.—2 Va Kor. 13:5.

17. Ukanda Paulu a sonehela va Kolosai u situlula ndati esukila lioku amamako oku kula konepa yespiritu?

 ¹⁷ Ukanda Paulu a sonehela va Kolosai, u situlula okuti tu sukila oku amamako oku kula konepa yespiritu. Ndaño okuti va Kolosai va kala ale Akristão va kula konepa yespiritu, Paulu wa va lungula oco va kuate utate okuti ka va yapuisiwa lovisimĩlo violuali. (Va Kol. 2:6-10) Kuenje Epafra una okuti wa kũlĩhĩle ciwa vamanji vekongelo, wa enda oku va likutilililako okuti, va “talama ngõ” ale oku kula konepa yespiritu. (Va Kol. 4:12) Lipi etosi? Paulu kumue la Epafra va limbuka okuti, oco omunu umue amameko oku kula konepa yespiritu, o sukila oku linga alikolisilo kuenda oku tava kekuatiso lia Yehova. Ovo va yonguile okuti va Kolosai vamamako oku kula, ale oku kala akulu vendamba konepa yespiritu ndaño lovitangi va ponduile oku liyaka lavio.

18. Nye ci pondola oku lipita Lukristão umue wa kula konepa yespiritu? (Talavo ociluvialuvia.)

¹⁸ Paulu wa lungula va Heveru okuti, nda Ukristão umue wa kula konepa yespiritu ka kuatele utate, o pondola oku pumba ukamba waye la Yehova otembo ka yi pui. Nda okuti Ukristão waco, o likala oku pokola kolonumbi via Yehova, ukamba waye la Yehova u nyõleha, toke muẽle ka pondola vali oku likekembela kuenda oku tambula ongecelo ya Suku. Ci sanjuisa ceci okuti, Akristão va Heveru ka va sangiwile vekalo liaco. (Va Hev. 6:4-9) Oco hẽ koloneke vilo, nye ci popiwa ku vana va liamũha lekongelo ale vana va tundisiwa, pole, noke va likekembela? Nda ovo va likekembela lutima wosi va ka lekisa okuti, ka va tuwile ndomanu vana Paulu a tukula okuti va laikele oku pumba ukamba wavo la Yehova otembo ka yi pui. Pole, eci ovo va tiuka ku Yehova va ka sukila ekuatiso liaye. (Esek. 34:15, 16) Omo liaco, akulu vekongelo va sukila oku pinga kumanji umue wa kula konepa yespiritu, oco eye a kuatise manji o sangiwa vekalo liaco oku kuata vali ukamba wa pama la Yehova.

19. Ocimãho cipi tu sukila oku kuata?

¹⁹ Nda o kasi oku likolisilako oku kula konepa yespiritu, o pondola oku tẽlisa ocimãho cove! Amamako oku lilongisa ondongosi ocili Cembimbiliya loku kapako ovisimĩlo via Yehova. Nda okuti ove wa kula ale konepa yespiritu, likolisilako oku amamako oku ci linga cilo kuenda otembo ka yi pui.