1-3. (a) Tu liyeva ndati poku kũlĩha ocili Cembimbiliya? Ci lombolola. (Tala ociluvialuvia kefetikilo liocipama.) (b) Nye tu lilongisa vocipama cilo?

KOLONEKE vilo ca siata calua omanu oku landa cimue vovenda kuenje noke va ci tiula. Handi vali, eci omunu a landa cimue lekuatiso lio Internet citava okuti va ci tiulavo. Pamue ocina caco va landa ka ci kasi ndomo va yonguile, ale ci kuete ocitangi cimue. Kuenje ovo va nõlapo oku ci piñaiya locina cikuavo ale va pinga oku va tiuwila olombongo viavo.

² Etu lalimue eteke tu ci linga locili Cembimbiliya. Omo okuti ocili Cembimbiliya tua ci “landa,” lalimue eteke tu ci ‘landisa,’ ci lomboloka okuti lalimue eteke ka tu yongola oku ci siapo. (Tanga Olosapo 23:23; 1 Timoteo 2:4) Ndomo tua konomuisa vocipama ca pita, oco tu lilongise ocili tua talavaya ciwa lotembo yetu. Handi vali, pamue tua siapo upange wa kemala weca olombongo vialua. Tua pongolola ukamba tu kuete la vakuetu, ovisimĩlo lovilinga vietu, ale tua liwekapo oku panga onepa kovihilahila kuenda kovituwa  vina ka vi sanjuisa Yehova. Pole, tua kolela okuti pokati kovina tua sia ka pali eci ca velapo okuti asumũlũho tu kuete omo lioku kũlĩha ocili a sule.

³ Yesu wa tukula olusapo luatiamẽla kulume ongende ukualomĩlu o sandiliya olomota viondongo. Eci ulume a sanga omota yimue yondongo ya tĩla calua, vepuluvi liaco haico a landisa ovina viosi a kuata kuenje wa yi landa. Omota yaco ya lombolokele ocili catiamẽla Kusoma wa Suku. Lonjila eyi, Yesu wa lekisa ndomo ocili ci kuete esilivilo ku vana va ci sanda. (Mateo 13:45, 46) Eci tua fetika oku lilongisa ocili, okuti ocili Cusoma wa Suku kuenda ovina viosi viwa vi sangiwa Vembimbiliya, tua siapovo ovina viosi ka vi kuete esilivilo oco tu ci kuate. Nda tua amamako oku velisapo ocili lalimue eteke ka tu ci sipo. Pole, ci sumuisa oku kũlĩha okuti afendeli vamue va Suku ka va velisapo ocili kuenje va ci siapo. Lalimue eteke ka tu ka ci lingi! Tu sukila oku kapako olonumbi Viembimbiliya ‘loku endela vocili.’ (Tanga 3 Yoano 2-4.) Eci ci lomboloka oku pitisa kovaso ocili, loku ci kapako komuenyo wetu. Oco hẽ, momo lie omunu a ‘landisila’ ocili ale oku ci siapo kuenda ndamupi? Ekolelo lipi tu kuete okuti lalimue eteke tu ka ci linga? Kuenda tu amamako ndati “oku endela vocili”?

4. Momo lie omanu vamue kotembo ya Yesu va silapo oku endela vocili?

⁴ Koloneke via Yesu vana va tavele tete kocili ka vameleko oku endela vocili. Yesu noke lioku linga ocikomo loku tekula owiñi walua, owiñi waco wo kuama toke konele yikuavo yo Kalunga ko Galilea. Noke Yesu wa vangula cimue ca va saluisa hati: “Ka vu moli omuenyo nda ka wa lili etimba lia Mõlomunu loku nyua osonde yaye.” Ovo nda va pinga elomboluilo ku Yesu, pole, ka va ci lingile kuenje va popia vati: “Ondaka eyi ya kãla; helie o tẽla oku yi yevelela?” Omo liaco, “valua pokati kolondonge viaye via tiukila kovina via siala konyima, ka va endaile vali laye.”—Yoano 6:53-66.

5, 6. (a) Koloneke vilo, momo lie vamue va silapo ocili? (b) Omunu umue o pondola oku yapuka ndati vocili?

⁵ Koloneke vilo, ci sumuisa omo okuti vamue locipango va siapo ocili. Momo lie? Vamue va ci siapo omo ka va yongola oku tava kelomboloko liokaliye liocinimbu cimue Cembimbiliya, ale manji umue wa vangula, ale wa linga cimue ca va sumuisa. Vakuavo ka va sole eci manji umue a va ĩha elungulo limue li tunda Vembimbiliya, ale va kuete ocitangi cinene la manji umue vekongelo. Handi vali vakuavo va kuamaile alongiso esanda olonanguluke kuenda omanu vana va tu lundila. A-a amue pokati kasunga a siata oku lingisa vamue oku siapo Yehova, lekongelo. (Va Heveru 3:12-14) Ovo va sukilile oku kolela ku Yesu ndeci Petulu a linga! Eci vamue pokati kowiñi va sumuile omo liolondaka via Yesu, Yesu wa pula ovapostolo vaye nda ovo va yonguilevo oku enda. Petulu wa tambulula hati: “A Ñala, kulie tu enda? Ove, ove o kasi lolondaka viomuenyo ko pui.”—Yoano 6:67-69.

 ⁶ Vamue kamue kamue, va siapo ocili okuti ka va ci limbuka. Omunu una o siapo ocili kamue kamue, o sokisiwa locimbaluku okuti kamue kamue yi yapukila konele yikuavo. Embimbiliya li tu lungula okuti tu sukila oku kuata utate okuti “lalimue eteke tu yapuisiwa.” (Va Heveru 2:1) Olonjanja vimue, omunu wa yapuka vocili, ka ci lomboloka okuti ocili wa ci siapo. Pole, ecelela okuti ukamba a kuetele Yehova uhongua kuenje vokuenda kuotembo o u pumba. Tu kolela ndati okuti ocitangi caco ka ci ka pita letu?

7. Nye ci tu kuatisa oku likala oku landisa ocili?

⁷ Oco tu amameko oku endela vocili, tu sukila oku tava loku pokola kovina viosi Yehova a popia. Tu sukila oku tenda ocili okuti oco ocina ca velapo komuenyo wetu kuenda oku kapako olonumbi Viembimbiliya kovina viosi tu linga. Vohutililo Soma Daviti a linga wa likuminya ku Yehova hati: “Ngendaenda locili cove.” (Osamo 86:11) Daviti wa nõlelepo oku amamako oku endela vocili, etu tu sukilavo oku ci linga. Nda ka tua ci lingile, tu fetika oku sokolola kovina tua sia ale, loku tiukila vali kovina viaco. Pole, ka tu pondola oku nõla ocili Cembimbiliya tu tava leci ka tu tava. Tu sukila oku endela ‘vocili cosi.’ (Yoano 16:13) Vocipama ca pita, tua lilongisa ovina vitãlo tua sukila oku siapo omo lioku lilongisa ocili loku ci kapako. Kaliye tu lilongisa ndomo tu kolela okuti lalimue eteke tu tiukila kovina tua sia ale.—Mateo 6:19.

8. Onjila ndomo Ukristão a talavaya lotembo cu kokela ndati oku yanduluka vocili? Tukula ulandu umue.

⁸ Otembo. Oco tu kolele okuti lalimue eteke tu yanduluka vocili, tu sukila oku amamako oku lekisa olondunge poku talavaya lotembo. Nda ka tua kuatele utate, tu pondola oku pesela otembo yalua kolomapalo, kovitalukilo, vo Internet ale oku tala o televisãu. Ndaño okuti ovina viaco havĩviko, pole, tu pondola oku pesela otembo yina nda tua eca koku lilongisa kuenda kupange woku kunda. Eci oco ca pita la Emma. * (Tala etosi pombuelo yemẽla.) Tunde vutila wa solaile otuvalo loku ñuala ñuala latuo olonjanja viosi. Pole, eye wa fetika oku livetela evelo omo liotembo yalua a kala oku pesila kovina viaco kuenje wa nõlapo oku talavaya ciwa lotembo yaye. Emma wa setukula ocituwa ca Cory Wells, okuti manji umue wa lingaile olomapalo vioku yoloka lotuvalo vocila cimue. * (Tala etosi pombuelo yemẽla.) Emma kaliye otembo yaye o yi pesila kupange wa Yehova, o kuete otembo yalua yoku kala lepata kuenda akamba vana va  vumba Yehova. Eye wa limbuka okuti ukamba a kuetele Suku wa pama kuenda o yevite esanju lioku kũlĩha okuti o kasi oku lekisa olondunge poku talavaya ciwa lotembo.

9. Ukuasi u pondola oku kala ndati ndocina ca velapo komuenyo wetu?

⁹ Ovokuasi. Oco tu amameko oku endela vocili, ka tu ka eceleli okuti ovokuasi a kala ocina ca velapo komuenyo wetu. Eci tua lilongisa ocili tua limbuka okuti oku vumba Yehova ca velapo okuti ovokuasi a sule kuenda tua kuata esanju lioku siapo ovina viaco omo lioku lilongisa ocili. Pole, osimbu otembo yi pita, tu mola okuti omanu valua va kasi oku landa olotelefone lolotablet viokaliye kuenda ovina vikuavo. Tu fetika oku liyeva ndu okuti tu kasi oku pumba. Kuenje ka tu sanjukila vali ovina tu kuete kuenda tu tiamisila utima koku kuata ukuasi okuti kupange wa Yehova sio. Ci tu ivaluisa eci ca pita la Dema. Eye wa sola calua “oluali lulo” kuenje wa siapo ocikele a kuata kumue lupostolo Paulu. (2 Timoteo 4:10) Citava okuti Dema wa solele calua ukuasi okuti ocisola caye ku Suku ci sule. Ale citava okuti ka yonguile oku linga alikolisilo oku talavaya kumue la Paulu. Nye tu lilongisilako? Pamue kosimbu tua solaile calua ukuasi. Nda ka tua lungukile ocisola caco ci pondola oku tiuka vali kuenje ci livokiya noke ocisola tu kuetele ocili cimuha.

10. Akamba vapi tu sukila oku yuvula?

¹⁰ Ukamba tu kuete la vakuetu. Oco tu amameko oku endela vocili, ka tu ka eceleli okuti vana ka va vumbi Yehova va tu yapuisa. Eci tua lilongisa ocili, ukamba tua kuatele la vana okuti Halombangiko Via Yehova kuenda epata wa tepuluka. Citava okuti vamue va sumbila etavo lietu, pole, va li suvuka. (1 Petulu 4:4) Ocili okuti tu likolisilako oku kapako epata lietu loku va sola. Pole, ka tu lueya olonumbi via Yehova oco tu sanjuise epata. Ndomo 1 Va Korindo 15:33 ci lekisa, akamba tu sola vali calua te vana va sole Yehova.

11. Tu pondola oku yuvula ndati ovisimĩlo vĩvi kuenda ovituwa?

¹¹ Ovisimĩlo lovilinga vĩvi. Oco tu endele vocili, tu sukila oku kala omanu va kola, ale va yela, kovaso a Yehova. (Isaya 35:8; Tanga 1 Petulu 1:14-16.) Eci tua lilongisa ocili, tua linga apongoloko oco tu kuame olonumbi Viembimbiliya. Vamue va sukila oku linga apongoloko anene. Pole, handi tu sukila oku kuata utate oco ekalo lietu liwa ka li ka pongoluiwe lovituwa vĩvi. Nye ci pondola oku tu kuatisa oku tamãlala keyonjo limue lioku linga evĩho? Ivaluka eci Yehova a tu ĩha oco tu kale omanu va kola. Eye wa eca omuenyo Womõlaye o soliwe, Yesu Kristu! (1 Petulu 1:18, 19) Oco tu amameko oku yela kovaso a Yehova, tu sukila oku ivaluka esilivilo liocilumba cocisembi ca Yesu.

12, 13. (a) Momo lie tu tendela ovipito violuali ndeci Yehova a vi tenda? (b) Nye tu konomuisa vocipama cilo?

¹² Ovihilahila kuenda ovituwa ka vi sanjuisa Suku. Epata lietu, vana tu talavaya lavo kuenda vana tu tangela kumosi, pamue va tu laleka oku kala lavo kovipito viavo. Nye ci pondola oku tu kuatisa oku yuvula ovihilahila kuenda ovipito vina okuti ka vi sanjuisa Yehova? Tu sukila  oku kũlĩha esunga lieci Yehova ka sanjukila ovina viaco. Tu pondola oku linga akonomuiso valivulu etu oco tu kũlĩhĩse ono yovipito viaco. Eci tu sokolola Kovisonehua esunga lieci ka tu lingila ovipito viaco, tu limbuka okuti tu kasi oku linga “ovina vi sanjuisa Ñala.” (Va Efeso 5:10) Nda tua kolela Yehova Londaka yaye, ka tu ka kuatela usumba omanu.—Olosapo 29:25.

¹³ Tu yongola oku endela vocili otembo yosi. Nye ci tu kuatisa oku nõlapo oku endela vocili otembo yosi? Vocipama cilo tu konomuisa ovina vitatu tu sukila oku linga.

14. (a) Oku tanga Embimbiliya ci tu kuatisa ndati oku yuvula oku yanduluka vocili? (b) Momo lie tu sukilila olondunge, lalungulo, luloño?

¹⁴ Catete, amamako oku tanga Embimbiliya loku sokolola lutate kovina o lilongisa. Olonjanja viosi sokiya ciwa otembo yoku ci linga. Osimbu amamako oku tanga, ocisola o kuetele ocili ci livokiya kuenje onjongole yove yoku endela vocili yi pama okuti ku yandulukamo. Elivulu liolosapo 23:23 li tu sapuila oku “landa esunga [ale, ocili]” loku landavo “olondunge lalungulo luloño.” Pole oku kũlĩha ño ocili Cembimbiliya ka ci tẽla. Tu sukila oku ci kapako komuenyo wetu. Eci tu loñoloha, tu fetika oku sokisa ovina tua lilongisa lovina tua kũlĩha ale. Olondunge vi tu vetiya oku kapako ovina tua kũlĩha. Olonjanja vimue ocili ci tu lungula poku tu lekisa apongoloko tu sukila oku linga. Tu sukila oku tava lonjanga kepindiso liaco, lina Embimbiliya li popia okuti lia velapo opalata.—Olosapo 8:10.

15. Ocili ci tu teyuila ndati nduvia?

¹⁵ Cavali, tu sukila oku likolisilako oku kapako ocili komuenyo wetu oloneke viosi. Embimbiliya li sokisa ocili luvia wesualali. (Va Efeso 6:14) Kosimbu, uvia wesualali wa enda oku u kuatisa kuenda oku u teyuila kuyaki, owo wa sukilile okuti witikiwa ciwa. Nda owo wa nyelela ka u kuatisa. Ocili ci teyuila ndati nduvia? Nda otembo yosi tua kakatela vocili, oco ci ka tu teyuila kovina vĩvi kuenda ci ka tu kuatisa oku nõla onjila yiwa tu kuama. Eci tu kuata ovitangi vinene, ale oku setekiwa oku linga ovina vĩvi, ocili Cembimbiliya ci ka tu kuatisa oku kakatela koku linga eci ciwa. Ndeci esualali ka li pondola oku enda kuyaki, okuti ka walele uvia, etu lalimue eteke ka tu kasipovo ocili. Tu sukilavo oku likũlĩhĩsa nda tu kasi oku kapako ocili Cembimbiliya komuenyo wetu. Esualali lia ponduilevo oku ambata osipata vuvia  waye. Tu konomuisi ndomo tu pondola oku ci lingavo.

16. Oku longisa ocili ci tu kuatisa ndati oku endela vocili?

¹⁶ Catatu, likolisilako oku longisa ocili Cembimbiliya ku vakuene. Embimbiliya li sokisiwa losipata. Ndeci esualali liwa li sukila oku someha ciwa osipata yaye, etu tu sukilavo oku kuata ocituwa ciwa coku tanga ondaka ya Suku. (Va Efeso 6:17) Vosi yetu tu yongola oku kala alongisi vawa, poku “talavaya ciwa londaka yocili.” (2 Timoteo 2:15) Eci tu talavaya Lembimbiliya poku longisa vakuetu, tu kũlĩha kuenda tu sola calua ocili. Kuenje tu ka amamako oku endela vocili.

17. Momo lie ocili ci kuetele esilivilo kokuove?

¹⁷ Ocili ombanjaile yimue ya velapo ya tunda ku Yehova. Eci cecelela okuti tu kuata ukamba uwa la Isietu wokilu. Momo oco ocina ca velapo vali tu pondola oku kuata. Yehova wa siata ale oku tu longisa ovina vialua, pole, handi kuli vali ovina vikuavo! Eye wa likuminya o ku tu longisa otembo ka yi pui. Omo liaco, velisapo ocili ndeci nda wa velisapo omota yondongo. Amamako oku ‘landa ocili kuenda lalimue eteke ku ka ci landise.’ Kuenje ndeci Daviti a linga, ove o ka tẽlisa ohuminyo eyi ku Yehova yokuti: “Ngendaenda locili cove.”—Osamo 86:11.