1, 2. Osimbu tu amamako oku kula kespiritu, nye tu lilongisa? Tukula ocindekaise cimue.

SOKOLOLA okuti omunu umue eca ombanjaile komõla umue utito. Olonjali viaye viu sapuila oco a ece “Olopandu.” Omõla o ci linga, momo olonjali viaye vio sapuila oco a ci linge. Pole, eci omõla a kula, o ka kuata elomboloko lieci olonjali viaye via velisililepo oku kala ukualopandu eci umue a ku lingila cimue ciwa. Omo liaco, omõla o vetiyiwa oku eca olopandu momo wa lilongisa oku kala ukualopandu.

² Cimuamue haico ci pita letu. Eci tu fetika oku lilongisa ocili, tu lilongisavo okuti ci kuete esilivilo oku pokola kolonumbi via Yehova. Pole, osimbu tu amamako oku kula kespiritu, tu lilongisa ovina vialua viatiamẽla kovisimĩlo via Yehova vieci a sole, leci a suvuka kuenda ndomo a vi tenda. Eci tu ecelela okuti ovisimĩlo via Yehova vi songuila onjila tu yongola oku nõla kuenda ovilinga vietu tu ka lekisa okuti tu kasi oku setukula ovisimĩlo viaye.

3. Momo lie ca tĩlila oku kuata ovisimĩlo ndevi via Yehova?

 ³ Ndaño tu sanjukila oku lilongisa oku kuata ovisimĩlo ndevi via Yehova, pamue ci tĩla calua oku u setukula, momo ka tua li puile. Ndeci, tua kũlĩha ndomo Yehova a tenda catiamẽla koku liyelisa kovituwa, ukuasi, upange woku kunda, oku kapiwa osonde kuenda ovina vikuavo. Olonjanja vialua ci tĩla calua kokuetu oku kuata elomboloko lieci Yehova a tendela ovina viaco lonjila eyi. Omo liaco, tu amamako ndati oku lilongisa oku kuata ovisimĩlo ndevi via Yehova? Ci tu kuatisa ndati oku linga ovina via sunguluka cilo kuenda kovaso yoloneke?

4. Nye tu sukila oku linga oco tu pongolole ovisimĩlo vietu?

⁴ Tanga Va Roma 12:2. Vocinimbu eci upostolo Paulu wa lekisa okuti tu sukila oku lilongisa oku kuata ovisimĩlo ndevi via Yehova. Eye wa popia okuti tu sukila oku liwekapo oku ‘setukula ovituwa violuali lulo.’ Ndomo ocipama ca pita ca lekisa, tu sukila oku yuvula ovisimĩlo kuenda ovituwa violuali. Paulu wa popiavo okuti tu sukila oku pongolola ovisimĩlo vietu. Oco tu ci linge, tu sukila oku lilongisa Embimbiliya, oku kuata elomboloko liovisimĩlo via Yehova, oku vi sokolola kuenda oku likolisilako oku kuata ovisimĩlo ndevi viaye.

5. Lombolola etepiso li kasi pokati koku tanga loku lilongisa.

⁵ Oku lilongisa ka ku lomboloka oku tanga ño lonjanga ulandu umue, ale oku taya lika atambululo ocipama cimue. Eci tu lilongisa tu sokolola eci ulandu waco u tu longisa catiamẽla ku Yehova kuenda ndomo eye a tenda ovina. Tu sukila oku likosilako oku kuata elomboloko lieci Yehova a tu sapuila oku linga cimue, loku yuvula oku linga cikuavo. Tu sukilavo oku sokolola koku linga apongoloko kekalo lietu kuenda kovisimĩlo vietu. Pole, pamue ci tĩla oku sokolola atosi osi tu lilongisa. Omo liaco, olonjanja viosi o lilongisa, sanda otembo yoku sokolola kovina wa tanga.—Osamo 119:97; 1 Timoteo 4:15.

6. Nye ci pita letu nda tu sokolola Kondaka ya Suku?

⁶ Osimbu tu sokolola kovina tua tanga Vondaka ya Suku, pamue tu limbuka ocina cimue ci kuete esilivilo. Etu tu “limbuka,” loku tava okuti ovisimĩlo via Yehova via lipua. Tu kuata elomboloko ndomo Yehova a tenda ovina, loku tendavo ovina lonjila yimuamue. Kuenje tu siapo ovisimĩlo viosimbu, tu kakatela kovisimĩlo viokaliye. Noke, kamue kamue tu kuata ovisimĩlo ndevi via Yehova.

7, 8. (a) Yehova o tenda ndati ukuasi? (Tala oviluvialuvia kefetikilo liocipama.) (b) Nda tua tenda ukuasi ndeci Yehova a u tenda, nye tu ka velisapo?

⁷ Ovisimĩlo vietu ka vi limbukiwila kovilinga vietu. (Marko 7:21-23; Tiago 2:17) Tu kũlĩhĩsi ovolandu amue a lekisa ndomo tu ci linga. Ulandu watete watiamẽla koku citiwa kua Yesu, u lekisa ndomo Yehova a tenda ovokuasi. Yehova wa nõla Yosefe la Maria, oco va tate Omõlaye ndaño okuti va kala olohukũi. (Ovisila 12:8; Luka 2:24) Eci Yesu a citiwa, Maria “wo langeka  vocimanga, momo ka kua kale olohondo oco va sikĩlemo.” (Luka 2:7) Yehova nda wa panga okuti omõlaye o citiwila pocitumãlo cimue ciwa. Pole, eye wa yonguile okuti Yesu o tatiwa lepata limue lipitisa kovaso efendelo lia Suku. Eci oco ca velelepo ku Yehova.

⁸ Ulandu woku citiwa kua Yesu, u tu longisa ndomo Yehova a tenda ovokuasi. Olonjali vimue vi yongola okuti omãla vavo va tiamisila lika utima kukuasi, ndaño va kũlĩha okuti ci nyõla ukamba wavo la Yehova. Pole, Yehova o tenda ukamba tu kuete laye ndocina cimue ca velapo vali. Ove hẽ o tava konjila ndomo Yehova a tenda ukuasi? Nye ovilinga viove vi situlula?—Tanga Va Heveru 13:5.

9, 10. Tu lekisa ndati okuti tu tenda oku kokela ocilondokua vakuetu ndeci Yehova a ci tenda?

⁹ Ulandu ukuavo, u lekisa ndomo Yehova a tenda omunu una o kokela vakuavo ocilondokua, ale o va lingisa ekandu, pamue oku liwekapo oku vumba Yehova. Yesu wa popia hati: “Una o kapela ocilondokua umue pokati kava vatito okuti va ñolela, hĩse nda o kapiwa ewe liombambo posingo yaye lina li ñualisiwa locimbulu, loku imbiwa vokalunga.” (Marko 9:42) Olondaka evi vi kola calua! Kuenje tua kũlĩha okuti Yesu wa lisoka la Isiaye kovisimĩlo. Handi vali, tua kũlĩha okuti Yehova ka sanjuka eci umue a kokela ocilondokua umue pokati kolondonge via Yesu.—Yoano 14:9.

¹⁰ Anga hẽ oku kokela ocilondokua vakuetu tu kasi oku ci tenda ndeci Yehova la Yesu va ci tenda? Nye ovilinga vietu vi lekisa? Ndeci, pamue tu liposuisa lonjila yimue tu sole. Pole, nye tu linga nda okuti uwalo tua nõla u kokela ocilondokua vakuetu vekongelo, ale oku koka ovisimĩlo viukahonga? Anga hẽ ocisola tu kuetele vamanjetu ci tu vetiya oku yuvula uwalo waco?—1 Timoteo 2:9, 10.

11, 12. Tu li teyuila ndati nda tua suvuka ovina Yehova a suvuka kuenda oku kuata ocituwa coku likandangiya?

¹¹ Ulandu watatu wowu: Yehova wa suvuka evĩho. (Isaya 61:8) Ocili, Yehova wa kũlĩha okuti olonjanja vimue ci tĩla kokuetu oku linga esunga, momo ka tua lipuile. Pole, eye o yongola okuti tu suvuka evĩho. (Tanga Osamo 97:10.) Nda tua sokolola esunga lieci Yehova a suvukila evĩho, ci ka tu kuatisa oku u setukula kuenda ci ka tu ĩha ongusu yoku tamãlala kovina viosi vĩvi.

¹² Nda tua lilongisa oku suvuka ovina vĩvi, ci ka tu kuatisa oku limbuka ovina vikuavo ka via sungulukile ndaño okuti Embimbiliya ka li tukula ovina viaco. Ndeci, kuli olomiluko vimue okuti vi koka oloñeyi vina vi vetiya ukahonga okuti via siata calua koloneke vilo. Omanu vamue va sima okuti hacimosiko loku linga  ukahonga kuenje va sima okuti hacĩviko. * (Tala etosi pombuelo yemẽla.) Oco hẽ Yehova o liyeva ndati? Ivaluka okuti Yehova wa suvuka ovina viosi vĩvi. Cilo tu sukila oku siapo ovina viosi vĩvi poku kuata ocituwa coku likandangiya kuenda oku suvuka ovina Yehova a suvuka.—Va Roma 12:9.

13. Momo lie oku tenda ovina ndeci Yehova a vi tenda ci tu kuatisa oku nõla lolondunge onjila tu kuama kovaso yoloneke?

¹³ Poku lilongisa, tu sukila oku sokolola ndomo Yehova a tenda ovina, momo ci tu kuatisa oku lipongiya oco tu nõle lolondunge onjila tu kuama. Kuenje nda tua sangiwa locitangi cimue okuti tu sukila oku nõla lonjanga onjila tu kuama, ka tu ka kuatiwa ocipikipiki. (Olosapo 22:3) Tu konomuisi ovolandu amue a sangiwa Vembimbiliya.

14. Nye tu lilongisa ketambululo Yosefe a eca kukãi wa Potifara?

¹⁴ Eci ukãi wa Potifara a seteka oku yonja Yosefe, vonjanja yaco haico Yosefe a likala. Ocili okuti, Yosefe wa sokolola ndomo Yehova a tenda olohuela. (Tanga Efetikilo 39:8, 9.) Yosefe wa sapuila ukãi wa Potifara hati: “Oco ame ndinga ndati evĩho eli, hã si kuata ekandu ku Suku?” Eci ci lomboloka okuti eye wa setukula ovisimĩlo via Suku. Nye ci popiwa kokuetu? Nye tu sukila oku linga nda umue tu talavaya laye o tu lingila ocitiokoso? Ale, nye tu linga nda umue o tu tumisa esapulo limue votelefone ale o ciluvialuvia cimue ci lekisa umbondo? * (Tala etosi pombuelo yemẽla.) Ci leluka oku kala ukuacili ku Yehova nda tu kuete ocituwa coku lilongisa kuenda oku tava kovisimĩlo viaye viatiamẽla kocitangi cimue loku nõla onjila tu kuama.

15. Tu amamako ndati oku kakatela ku Yehova ndeci ca linga amalẽhe vatatu va Heveru?

¹⁵ Tu konomuisivo ulandu wamalẽhe vatatu va Heveru okuti, Sadrake, Mesake kuenda Aved–Nego. Eci Soma Nevukandesa a va handeleka oco va fendele ociñumañuma culu eye a panga, ovo va likala. Etambululo va eca ku soma lia lekisa okuti ovo va lipongiyile ale kovina via laikele oku pita nda vamamako oku kakatela ku Yehova. (Etundilo 20:4, 5; Daniele 3:4-6, 12, 16-18) Nye ci popiwa koloneke vilo? Nye tu linga nda cime cetu o tu pinga olombongo oco vi kuatise kocipito cimue ci kuete elitokeko letavo liesanda? Ka tu ka talameli toke eci epuluvi liaco li pitila, pole tu sukila oku sokolola cilo ndomo Yehova a tenda ocina caco. Kuenje nda tua sangiwa vekalo liaco, ci ka leluka kokuetu oku linga, ale oku popia ovina via sunguluka, ndeci ca linga amalẽhe vatatu va Heveru.

16. Oku kuata elomboloko liwa liovisimĩlo via Yehova, ci tu kuatisa ndati oku lipongiyila oku vela ku tu sanga ocipikipiki?

 ¹⁶ Oku sokolola kovisimĩlo via Yehova ci tu kuatisavo oku kala ukuacili kokuaye eci tu sangiwa locitangi cuhayele ci kisika oku kapiwa osonde. Etu tua nõlapo oku likala oku kapiwa olonepa vikuãla viosonde. (Ovilinga 15:28, 29) Pole, kuli olonjila vikuavo vioku sakuiwa losonde okuti Ukristão eye o nõla onjila a kuama ndomo ci likuata lonumbi Yembimbiliya. Ci lingiwa vepuluvi lipi? Anga hẽ ceci tu sangiwa kosipitali, pamue tu kasi levalo okuti ci tu kisika oku nõla lonjanga onjila tu kuama? Sio. Yilo oyo otembo yoku soneha ocicapa coku liteyuila oku sakuiwa losonde ci lombolola onjila ndomo tu yongola oku sakuiwa loku sapuilako ndotolo o laika oku tu tata. * (Tala etosi pombuelo yemẽla.)

17-19. Momo lie ci kuetele esilivilo oku kũlĩha ovisimĩlo via Yehova cilo? Ci Lombolola.

¹⁷ Sokolola ketambululo lia Yesu eci Petulu o sapuila hati: “A Ñala, likuatela ohenda.” Citava okuti Yesu wa sokolola kovina Suku o tumile oku linga kuenda kovitumasuku viatiamẽla komuenyo waye lolofa viaye palo posi. Oku sokolola kovina viaco co kuatisa oku kolela ku Yehova loku eca omuenyo waye ndocilumba ku vosi.—Tanga Mateo 16:21-23.

¹⁸ Koloneke vilo, Yehova o yongola okuti tu kala akamba vaye loku likolisilako oku kunda olondaka viwa. (Mateo 6:33; 28:19, 20; Tiago 4:8) Pole, omanu vamue locimãho coku tu kuatisa, va ci linga lonjila yimue ka ya sungulukile ndeci Petulu a linga ku Yesu. Ndeci, cime cove pamue o ku ĩha olombongo vialua, pole, wa kũlĩha okuti o sukila oku talavaya olowola vialua kuenda ci tepulula otembo yove yoku enda kohongele ale kupange woku kunda. Ale, pamue kosikola yove alongisi va ku  ĩha epuluvi lioku ka tangela kofeka yikuavo. Nda ca lipita love nye o linga? Anga hẽ osimbu kua nõlele onjila o kuama o likutilila, o linga akonomuiso, o sapela lepata liove, ale lakulu vekongelo? Ci kuete esilivilo oku kũlĩha cilo ndomo Yehova a tenda ovina viaco kuenda oku u setukula. Nda eteke limue ca lipita love, ka ci ka tĩla oku ci yula. Ove o limbuka eci o sukila oku linga momo wa nõlapo oku tiamisila utima kupange wa Yehova.

¹⁹ O pondolavo oku sokolola kovitangi vikuavo viya ocipikipiki okuti vi seteka ekolelo liove ku Yehova. Ocili okuti, ka tu kuete ndomo tu li pongiyila ovitangi viosi tu pita lavio. Pole, nda tu pesila otembo kelilongiso liopokolika loku sokolola kovisimĩlo via Yehova, ci leluka oku ivaluka ovina tua lilongisa kuenda oku kũlĩha ndomo tu vi kapako. Eci o lilongisa likolisilako oku tenda ovina ndomo Yehova a vi tenda kuenda oku u setukula, loku sokolola ndomo ci ka tu kuatisa oku nõla onjila yiwa.

20, 21. (a) Elianjo lipi tu ka kuata voluali luokaliye? (b) Esumũlũho lipi tu pondola oku kuata cilo?

²⁰ Vosi yetu tu lavoka lesanju okuiya kuoluali luokaliye. Valua pokati ketu va lavoka oku kala voluali luokaliye otembo ka yi pui. Vemẽhi Liusoma wa Suku ohali kuenda evalo liosi voluali vi ka pua. Kuenje handi tu ka amamako oku kuata elianjo lioku nõla onjila tu yongola.

²¹ Pole, eci ka ci lomboloka okuti elianjo lietu ka li ka kuata ongave. Vakuesunga va ka kuama ovihandeleko via Yehova kuenda ovisimĩlo viaye. Kuenje eci ci ka va nenela esanju lialua kuenda ombembua. (Osamo 37:11) Osimbu otembo yaco ka yeyile handi, cilo tu kuete esumũlũho lioku setukula ovisimĩlo via Yehova.