1, 2. Ocikele cipi cinene Yehosua a tambula noke yolofa via Mose?

YEHOVA wa sapuila Yehosua hati: “Ukuenje wange Mose wa fa. Oco kaliye katuka, yoka olui olu Yordão, ove kumue lomanu ava vosi, ha vu iñila vofeka ngeca ku va Isareli.” (Yehosua 1:1, 2) Ku Yehosua eli lia kala epongoloko limue linene, momo wa kala oñuatisi ya Mose ci panda 40 kanyamo!

² Mose wa songuila va Isareli vokuenda kuotembo yalua, pole, kaliye Yehosua wa laikele oku va songuila. Citava okuti eye wa lipula nda omanu va ka tava okuti o kala usongui wavo. (Esinumuĩlo 34:8, 10-12) Elivulu limue poku tukula elivulu lia Yehosua 1:1, 2, lia lombolola okuti, ocina cimue ca tĩla calua haico ci koka ohele kofeka yimue, ceci usongui umue a piñanya ukuavo, cikale kosimbu ale koloneke vilo.

3, 4. Suku wa sumũlũisa ndati Yehosua omo lioku kolela kokuaye kuenda epulilo lipi tu sukila oku linga?

³ Yehosua wa kuata esunga lioku sakalala. Pole, eye wa kolelele  Yehova kuenje lonjanga wa kuama olonumbi vo wĩha. (Yehosua 1:9-11) Suku wa sumũlũisa Yehosua omo lioku kolela kokuaye kuenje eye wa tuma ungelo umue oku songuila Yehosua kumue la va Isareli. Ungelo waco citava okuti wa kala Ndaka, Omõla uveli wa Suku.—Etundilo 23:20-23; Yoano 1:1.

⁴ Yehova wa kuatisa va Isareli oku tava kapongoloko omo lioku kuata usongui wokaliye, Yehosua. Koloneke vilo, kulivo apongoloko alua a kasi oku lingiwa. Citava okuti tu lipula ndoco: ‘Osimbu ocisoko ca Suku camamako oku kula, tu kuete hẽ asunga awa oku kolela Kusongui wetu, Yesu? (Tanga Mateo 23:10.) Oco tu tambulule epulilo eli, tu sukila oku konomuisa ndomo Yehova a songuila afendeli vaye kosimbu, eci kua kala apongoloko.

5. Ocina cipi ci komõhisa Yehosua a mola ocipepi lo Yeriko? (Tala ociluvialuvia kefetikilo liocipama.)

⁵ Va Isareli noke yoku yoka olui Yordão, Yehosua wa mola ocina cimue ci komõhisa. Ocipepi lolupale luo Yeriko eye wa sanga ulume umue wa kala losipata. Yehosua wa pula ulume waco hati: “Ove hẽ, wuwetu, ale otiamẽla kovanyali vetu?” Yehosua wa komõha eci ulume a popia hati, “ame kesongo kolohoka via Yehova,” okuti ungelo umue wa liangiliyilile oku teyuila afendeli va Suku. (Tanga Yehosua 5:13-15.) Suku wa tuma ungelo oku vangula la Yehosua, pole, ocisonehua eci ci lekisa okuti olondaka viaco via Yehova. Citava okuti kolonjanja vikuavo Suku wa enda oku tuma ungelo waco oco a popie ovina Suku a yongola.—Etundilo 3:2-4; Yehosua 4:1, 15; 5:2, 9; Ovilinga 7:38; Va Galatia 3:19.

6-8. (a) Momo lie olonumbi vimue ungelo a eca via kala ndu okuti ka via sungulukile? (b) Tua kũlĩha ndati okuti olonumbi viaco via sungulukile kuenda vieya votembo ya sokiyiwa? (Tangavo etosi pombuelo yemẽla.)

⁶ Ungelo wa sapuila Yehosua eci a sukilile oku linga oco o Yeriko yi tambuiwe. Kefetikilo olonumbi viaco via molẽha ndu okuti ka via sungulukile. Ungelo wa tuma Yehosua oku sevisa evamba asualali vosi. Eci ca lombolokele okuti oloneke vimue ka va yaki. Anga hẽ eli lia kala epuluvi liwa lioku sevisa evamba asualali vaco?—Efetikilo 34:24, 25; Yehosua 5:2, 8.

⁷ Citava okuti asualali va pula ndoco, ‘Tu teyuila ndati apata etu eci ovanyali veya pocilombo cetu?’ Pole, kua pita ocina cimue ci komõhisa! Alume vo ko Yeriko va kuata usumba kuenje ka va yakele la va Isareli. Tu tanga ndoco: “Yeriko puãi ya liyikila sito va Isareli posamua lovokati. Lomue wa tunda, lomue wa iñila.” (Yehosua 6:1) Eci citava okuti ca vetiya va Isareli oku kolela calua konumbi ya Suku!

⁸ Ungelo wa sapuila Yehosua okuti va Isareli ka va ka yake lo Yeriko. Pole, ovo va sukilile oku ñuala olupale onjanja yimosi veteke toke oloneke epandu kuenje keteke liepanduvali va sukilile oku ñuala olonjanja epandu vali. Kasualali, eci ca molẽha nduveke. Citava okuti va sokolola ndoco, ‘Tu kasi oku pesela otembo kuenda ongusu!’ Pole, usongui wa va Isareli una ka letiwe lovaso, wa kũlĩhĩle ciwa eci a kala oku  linga! Oku kuama olonumbi viaye ca pamisa ekolelo lia va Isareli kuenje ovo ka va sukilile oku yaka lasualali vo ko Yeriko.—Yehosua 6:2-5; Va Heveru 11:30. * (Tanga etosi pombuelo yemẽla.)

9. Momo lie tu kuamẽla olonumbi tu tambula vocisoko ca Yehova? Ci lombolola.

⁹ Nye tu lilongisila kulandu owu? Olonjanja vimue ocisoko ca Yehova ceca olonumbi viokaliye vioku linga cimue kuenje pamue ka tu kuata elomboloko liaco. Ndeci, pamue tua simãile okuti oku talavaya lolo tablet kelilongiso liopokolika, koku kunda kuenda kolohongele ka ca sungulukile. Pole, kaliye tu lete esilivilo lioku talavaya lavio nda citava. Eci tu mola onima yiwa yi tunda kapongoloko aco, ekolelo lietu li pama kuenda omunga tu kuete la vamanji yi livokiya.

10. Helie wa songuila ohongele yosungu yakulu ko Yerusalãi catiamẽla koku seviwa evamba?

¹⁰ Noke lioku pita 13 kanyamo ulume umue ukualofeka ka seviwile evamba, Korneliu, wa linga Ukristão, pole, Akristão vamue va Yudea va popia okuti o sukila oku seviwa evamba. (Ovilinga 15:1, 2) Vamanji kolupale luo Antiokea va kala oku lihoyisa catiamẽla kocitangi caco. Kuenje akulu va sokiya oku tuma Paulu ko Yerusalãi kosungu yakulu oku konomuisa ondaka yaco. Pole, helie wa linga eliangiliyo  liaco oco eye a ende? Paulu wa lombolola hati: “Nda lamanelako omo liesituluilo lia tunda kilu.” Ocili okuti Kristu eye wa kala oku va songuila oco ocitangi caco ci potoluiwe losungu yakulu.—Va Galatia 2:1-3.

11. (a) Nye handi Akristão vamue va Yudea va simĩle catiamẽla kevamba? (b) Paulu wa lekisa ndati okuti wa kuatisa lumbombe akulu ko Yerusalãi? (Tala etosi pombuelo yemẽla.)

¹¹ Kristu vocakati cosungu yakulu, wa lekisa okuti vakualofeka ka va sukila oku seviwa evamba. (Ovilinga 15:19, 20) Noke lianyamo amue Akristão valua vamamako oku sevisa evamba komãla vavo. Noke akulu ko Yerusalãi va yeva okuti omanu va kala oku popia okuti Paulu ka kasi oku sumbila Ovihandeleko via eciwile ku Mose. Kuenje akulu va pinga ku Paulu oco a linge cimue ci lekisa okuti wa sumbila Ovihandeleko. * (Tanga etosi pomuelo yemẽla.) (Ovilinga 21:20-26) Ovo vo sapuila oco eye ambate alume vakuãla konembele oco omanu va limbuke okuti Paulu wa sumbila Ovihandeleko. Paulu nda wa popia okuti ‘Eci ka ci sukiliwa! Momo lie vu yonguila okuti ndi ci linga? Akristão va Yudea okuti ka va kuete elomboloko liaco, ovo va kasi locitangi.’ Paulu wa kuata elomboloko liokuti akulu va yonguile okuti Akristão vosi va likuata omunga, omo liaco lumbombe wa kuama olonumbi. Kuenje pamue tu lipula esunga lieci Yesu a ecelela okuti ocitangi coku seviwa evamba camamako otembo yalua, ndaño okuti Ovihadeleko via eciwile ku Mose via sulila eci Yesu a fa.—Va Kolosai 2:13, 14.

12. Momo lie Kristu a ecelela okuti pa pita otembo oco a tetulule ocitangi cevamba?

¹² Cambata otembo oku tava kepongoloko liokaliye. Akristão vamue va Yudea va sukilile otembo yalua oco va limbuke okuti ka va kasi vali vemẽhi Liovihandeleko. (Yoano 16:12) Ovo va vetiyiwa oku sima okuti oku seviwa evamba ondimbukiso yukamba ulikasi la Suku. (Efetikilo 17:9-12) Vakuavo va kuata usumba woku lambalaliwa la va Yudea vakuavo omo lioku nõlapo oku litepa. (Va Galatia 6:12) Pole, vokuenda kuotembo, Kristu wa eca olonumbi vikuavo vovikanda vocati co vapostolo.—Va Roma 2:28, 29; Va Galatia 3:23-25.

13. Nye ci pondola oku tu kuatisa oku tava konjila ndomo Kristu a tu songuila?

¹³ Kristu toke cilo, eye usongui wekongelo Liakristão. Nda ocisoko ci linga epongoloko limue okuti ku kuete elomboloko liaco, sokolola ndomo Kristu a songola afendeli va Suku kosimbu. Tunde koloneke via Yehosua, ale viovapostolo Kristu olonjanja viosi eca olonumbi via sunguluka,  oco vi teyuile afendeli va Suku, loku pamisa ekolelo liavo kuenda oku va kuatisa oku li kuata omunga.—Va Heveru 13:8.

14-16. Onjila ndomo “ukuenje wa kolelua haeye wa lunguka” a songola, yi lekisa ndati okuti Kristu o yongola oku tu kuatisa oco tu pame kekolelo?

¹⁴ Koloneke vilo, “ukuenje wa kolelua haeye wa lunguka” o tu ĩha olonumbi tu sukila votembo ya sokiyiwa. (Mateo 24:45) Olonumbi viaco vi lekisa okuti Yesu wa tu kapako. Marc, o kuete omãla vakuãla wa popia hati: “Satana o seteka oku honguisa ekongelo poku kokela ovitangi apata. Kaliye levetiyo lioku kuata efendelo liepata olosemana viosi, onumbi yeyi yokuti, a songui vepata va sukila oku teyuila apata avo!”

¹⁵ Eci tu limbuka ndomo Kristu a tu songuila, tu kuata elomboloko liokuti o yongola oku tu kuatisa oco tuamameko oku pama kekolelo. Ukulu umue wekongelo o tukuiwa Patrick wa popia hati: “Kefetikilo vamanji vamue va sumuile omo lioku liongolola kovimunga vitito kupange woku kunda kesulilo liosemana.” Pole, wa lombolola hati, epongoloko eli li lekisa okuti Yesu wa kapako omunu lomunu vekongelo. Vamanji vamue okuti va kuete osõi, ale vana ka va tundaile olonjanja vialua kupange woku kunda, kaliye va liyevite okuti va kapiwako kuenda va kuete esilivilo. Kuenje eci ca siata oku pamisa ekolelo liavo.

¹⁶ Kristu o tu kuatisavo oku tiamisila utima kupange woku kunda okuti owo wa velapo u kasi oku lingiwa koluali luosi. (Tanga Marko 13:10.) Manji André, okuti ndopo a linga ukulu wekongelo, o kasi oku likolisilako oku kuama olonumbi viocisoko ca Yehova. Eye wa popia hati: “Oku tepuluiwa kuomanu ko Betele ku tu ivaluisa otembo yonjanga tu kasi kuenda esilivilo  lioku pesila ongusu yetu kupange woku kunda.”

17, 18. Momo lie tu sukilila oku tiamisila utima konjila ndomo tu kuatisiwa lapongoloko o kaliye?

¹⁷ Onumbi tu tambula ku Yesu Kristu, Soma yetu, yi tu kuatisa cilo kuenda kovaso yoloneke. Sokolola ndomo wa siata oku kuatisiwa omo liapongoloko okaliye. Vokuenda kuefendelo liepata, sanda oku lombolola ndomo apongoloko kolohongele kuenda kupange woku kunda a siata oku kuatisa epata liove.

¹⁸ Nda tua ivaluka okuti oku kuama olonumbi viocisoko ca Yehova ci tu nenela asumũlũho alua, ci ka leluka oku vi kuama loku vi sanjukila. Ndeci, tua sanjuka omo lioku talavaya ciwa lolombongo. Momo tu kasi oku kuama uloño wokaliye uleluisa upange kuenje eci ci tu kuatisa oku kundila omanu valua olondaka viwa. Tu pondola hẽ oku tanga alivulu etu votablet ale vocimalẽho cikuavo? Eyi onjila yimue yoku kuatisa Kristu, una o yongola okuti tu talavaya ciwa lovimalẽho viocisoko.

19. Momo lie tu sukilila oku kuatisa Kristu koku songola?

¹⁹ Eci tu kuatisa Kristu koku songola, tu kuatisavo vamanjetu oku pama kekolelo loku li kuata omunga. Manji André wa popia eci catiamẽla kapongoloko apita kapata o Betele voluali luosi hati: “Ocituwa ciwa ca lekisiwa lepata lio Betele koku tava apongoloko aco ca vokiya ekolelo liange kuenda esumbilo. Ovo vakuãi ekãlu lia Yehova, poku sanjukila ovikele viosi va tambula.”

20, 21. (a) Momo lie tu kolelela Kristu Usongui wetu? (b) Epulilo lipi tu ka konomuisa vocipama cikuavo?

²⁰ Ndopo usongui wetu, Yesu Kristu, o ka “tẽlisa oku yula kuaye” kuenda o ka ‘longisa evi vi lingisa usumba.’ (Esituluilo 6:2; Osamo 45:4) Ndaño cilo, eye o kasi oku tu pongiyila omuenyo voluali luokaliye kuenda upange tu ka linga eci tu ka longisa ava va kapinduiwa, loku kuatisa oku pongolola ongongo oco yi kale ocumbo celau.

²¹ Osimbu tu kolela Kusongui wetu haeye Soma ndaño lovitangi, eye o ka tu songuila oku iñila voluali luokaliye. (Tanga Osamo 46:1-3.) Koloneke vilo, apongoloko a pondola oku tu kokela esumuo, ca piãla enene nda ka tua kapeleleko. Eci ku pita apongoloko aco, tu amamako ndati oku kala lombembua yovutima loku kolela Yehova? Tu ka tambulula epulilo eli vocipama cikuavo.