1, 2. (a) Upange upi Yesu a velisilepo kuenda momo lie? (b) Nye tu sukila oku linga oco tu kuate onima yiwa “ndolondingupange via Suku”?

YESU KRISTU wa kala kalupindelu, noke wa fetika oku kunda. (Marko 6:3; Va Roma 15:8) Eye wa loñolohele calua koku linga ovopange aco. Eci a kala kalupindelu, wa lilongisa oku talavaya ciwa lovimalẽho viaco, oco a pange ovikuata viwa vi lingiwa lavaya. Eci a fetika oku kunda, wa talavaya lukũlĩhĩso wa longa Wovisonehua oco a kuatise omanu oku kuata ukũlĩhĩso wocili Wondaka ya Suku. (Mateo 7:28; Luka 24:32, 45) Kuenje eci Yesu a kuata 30 kanyamo, wa liwekapo upange wukalupindelu noke wa fetika upange woku kunda momo wa kũlĩhĩle okuti owo upange wa velapo. Eye wa popia okuti oku kunda olondaka viwa Viusoma wa Suku, olio esunga lieci Suku o tumĩla palo posi. (Mateo 20:28; Luka 3:23; 4:43) Yesu wa tiamisilile omuenyo waye koku kunda olondaka viwa kuenda wa yonguile okuti vakuavo va lingavo upange waco.—Mateo 9:35-38.

² Valua pokati ketu ka tuakalupindeluko, pole, vosi yetu tuakundi tu longisa omanu olondaka viwa. Upange waco wa velapo calua okuti Suku wa kongeliwamovo. Kuenje, tu  tukuiwa okuti “tulondingupange kumue la Suku.” (1 Va Korindo 3:9; 2 Va Korindo 6:4) Tu tava kolondaka viukualosamo wa popia hati: “Ohongele yolondaka viove, oyo ocili.” (Osamo 119:159, 160) Ondaka ya Yehova oyo yocili. Eli olio esunga lieci tu sukilila oku “talavaya ciwa londaka yocili” kupange woku kunda. (Tanga 2 Timoteo 2:15.) Omo liaco, tuamamiko oku loñoloha koku talavaya Lembimbiliya okuti oco ocimalẽho cetu ca velapo coku longisa omanu catiamẽla ku Yehova, ku Yesu kuenda Kusoma. Oco tu kuatisiwe oku litunda ciwa kupange woku kunda, ocisoko ca Yehova ci tu ĩha ovimalẽho vikuavo kuenje tu sukila oku kũlĩha ndomo tu talavaya lavio. Evi ovio Ovimalẽho Vietu Vioku Longisa.

3. Pi tu tiamisila ocikele cetu coku kunda kuenda elivulu Lovilinga 13:48 li tu kuatisa oku linga nye?

³ Pamue o lipula esunga lieci tu tukuila okuti, Ovimãleho Vioku Longisa, pole, ka vi tukuiwa okuti, Ovimãleho Vioku Kunda. Esunga liaco lieli okuti, oku “kunda” ku lomboloka oku sandeka esapulo limue. Pole, oku “longisa” ci lomboloka oku lombolola esapulo liaco, oco omunu a kuate elomboloko lieci a yeva kuenje o vetiyiwa oku kapako ovina a lilongisa. Omo okuti oluali lulo ndopo lu kunduiwa, tu sukila oku tiamisila utima koku songola alilongiso Embimbiliya loku longisa ocili komanu, oco va linge olondonge via Kristu. Eci ci lomboloka okuti tu sukila oku lekisa ombili koku sandiliya vosi “vakuotima wa sungulukila omuenyo ko pui” loku va kuatisa oco va vumbe Yehova.—Tanga Ovilinga 13:44-48.

4. Tu sanga ndati “vakuotima wa sungulukila omuenyo ko pui”?

⁴ Tu sanga ndati “vakuotima wa sungulukila omuenyo ko pui”? Akristão vo kocita catete, va enda oku sanga lika omanu vaco kupange woku kunda. Yesu wa va sapuila hati: “Volupale luosi ale vimbo wiñili, sandi ava va sesamẽla.” (Mateo 10:11) Etu haico tu sukilavo oku linga. Ocili okuti, omanu nda ka va lekisa onjongole, ale vakuepela kuenda ka va kapeleko Suku ka tu lavoka okuti va tava kolondaka viwa. Etu tu sandiliya omanu vakuotima wa sunguluka, vomboka haivo va yongola oku kũlĩha ocili. Poku sanda omanu tu ci sokisa leci Yesu a linga eci a kala kalupindelu. Tete eye wa sukilile oku sanga evaya liwa oco a lipange ocikuata cimue ndeci, epito, okanga, ale ovina vikuavo. Eye o kuata ovimalẽho viaco, o talavaya lavio luloño waye kuenda o linga ocikuata cimue. Cimuamue haico okuti, tete tu sanga omanu vakuotima wa sunguluka, tu kuata ovimalẽho vietu kuenje tu talavaya lavio luloño oco tu va kuatise oku linga olondonge.—Mateo 28:19, 20.

5. Nye tu sukila oku kũlĩha catiamẽla Kovimãleho vietu Vioku Longisa? Ci lombolola. (Tala ociluvialuvia kefetikilo liocipama.)

⁵ Ocimalẽho locimalẽho, ci kuete ocimãho calio. Ndeci, sokolola ovimalẽho Yesu a talavaya lavio eci a kala kalupindelu. * (Tala etosi pombuelo yemẽla.) Eye wa sukilile ovimalẽho vioku sokiya, vioku kapa ondimbukiso, vioku teta, vioku tombola, vioku sokisa avaya kuenda vioku miuhĩsa loku a kongela. Cimuamue haico kokuetu, Ocimalẽho Locimalẽho Coku Longisa, ci kuete ocimãho calio. Tu kũlĩhĩsi ndomo tu talavaya lovimalẽho viaco.

6, 7. (a) O talavaya ndati Lokokanda konumbi yetu yo internet? (b) Momo lie tu talavayela lemẽla lielaleko lioku enda kohongele?

⁶ Okokanda konumbi yetu yo internet. Okokanda kaco katito, pole, ka kuete unene walua woku sapuila omanu catiamẽla kokuetu kuenda ka lekisa onumbi yetu yo jw.org. Vonumbi yetu va pondola oku kũlĩha ovina vialua viatiamẽla kokuetu, loku pinga elilongiso Liembimbiliya. Ci soka 400.000 komanu va siata oku pinga elilongiso Liembimbiliya vocakati co jw.org kuenda olohuluwa viomanu va ci linga oloneke viosi! O pondola oku ambata otuikanda tuonumbi yetu loku tu eca komanu vosi a lisanga lavo vokuenda kueteke.

⁷ Emẽla lielaleko. Olio li popia hati: “Wa lalekiwa oco o lilongise Embimbiliya Lolombangi Via Yehova.” Li popiavo okuti ci lingiwa “kolohongele vietu” ale “lomunu oku longisa Embimbiliya.” Emẽla liaco li lombolola komanu catiamẽla kokuetu kuenda li laleka “vana va kũlĩha okuti va sukila oku lilongisa ovina via tiamẽla ku Suku,” oco tu va longise Embimbiliya. (Mateo 5:3) Tu yolela omanu vosi veya kolohongele vietu ci kale okuti, va tava ale sio. Eci veya kolohongele va limbuka okuti va sukila oku lilongisa ovina vialua viatiamẽla Kembimbiliya.

8. Momo lie ci kuetele esilivilo omanu oku enda kolohongele? Tukula ulandu umue.

⁸ Ci kuete esilivilo oku laleka omanu oku enda kolohongele. Momo lie? Momo eci veya kolohongele, va limbuka okuti Olombangi Via Yehova vi longisa ocili Cembimbiliya kuenda vi kuatisa omanu oku kũlĩha Suku, osimbu okuti atavo esanda ka va ci lingi. (Isaya 65:13) Ndeci, kanyamo a pita ohueli yimue yi tukuiwa hati Ray la Linda kofeka yo Estados Unidos, oco ya limbuka. Va tavele okuti kuli Suku kuenje va yonguile oku u kũlĩha ciwa. Va nõlapo oku kũlĩhĩsa atavo osi a sangiwa volupale luavo kuenje va sanda ovina vivali osimbu ka va nõlele oku tiamẽla ketavo limue. Catete, va yonguile oku kũlĩha ovina viatiamẽla ketavo kuenda cavali, va yonguile oku mola okuti omanu vakuetavo oku wala kuavo ku lekisa okuti va vumba Suku. Cambata anyamo, omo okuti kua kala atavo alua. Pole, ovo va sumuile calua. Lacimue va lilongisako kuenda omanu vaco va wala lonjila yimue ka ya sungulukile. Noke lioku konomuisa etavo lia sulako volupale luavo, Linda wa enda kupange kuenje Ray wa tiukila konjo. Osimbu a kala oku tiukila konjo wa mola Onjango yimue Yusoma. Wa sokolola ndoco, ‘ndiñilamo handi oco ndi tale eci ci lingiwamo.’ Kuenje co vetiya calua! Momo vosi Vonjango Yusoma va sanjuka, va lianja kuenda va wala ciwa. Ray wa tumãla kulala watete kuenje wa sola eci a lilongisa! Eci ci tu ivaluisa olondaka upostolo Paulu a tukula viomunu iya onjanja yatete kohongele kuenje o popia hati: “Suku o kasi pokati kene.” (1 Va Korindo 14:23-25) Tunde opo, Ray ovialumingu viosi enda kolohongele. Kaliye wa fetikavo oku endaenda kolohongele viosi vio vokati kosemana. Linda wa fetikavo oku endaenda kolohongele, ndaño okuti va kuata ale 70 kanyamo ovo va fetika oku lilongisa Embimbiliya kuenda va papatisiwa.

9, 10. (a) Momo lie otuikanda tua lelukila oku fetika ombangulo yimue? (b) Lombolola ndomo tu talavaya lokokanda Usoma wa Suku u Lomboloka Nye?

⁹ Otuikanda. Tu kuete eci ci soka ecelãla kotuikanda. Otuikanda tuaco tua leluka oku talavaya latuo kuenda tu eca onima yiwa poku fetika ombangulo. Tunde eci kua sandekiwa okokanda katete kunyamo wo 2013, kua pangiwa eci ci soka olohuluwa vitãlo viotuikanda. Otuikanda tuaco tuosi tua lisoka. Nda wa lilongisa oku talavaya lokokanda kamosi, ci lelukavo oku talavaya lotuikanda tuosi! O talavaya ndati lokokanda poku fetika ombangulo lomunu umue?

¹⁰ Pamue o yongola oku kuama okokanda losapi hati, Usoma wa Suku u Lomboloka Nye? Lekisa komunu epulilo li kasi kemẽla liatete kuenda u pulisa: “Usoma wa Suku u Lomboloka Nye? O pondola oku popia hati . . . “ Noke u pula okuti pokati kapulilo atatu lipi wa nõlapo. Ka ci sukila oku u sapuila nda etambululo liaye li kasi ciwa ale sio, pole, u lekisa lika okokanda ponepa: “Ceci Embimbiliya li popia,” kuenda tanga ovisonehua via tukuiwa ndeci, Daniele 2:44 kuenda Isaya 9:6. Omuenyo u ka kala ndati vemẽhi Liusoma wa Suku? Kesulilo liombangulo linga epulilo li kasi koñoño vemẽhi liokasapi hati, “Ovina Vioku Sokolola”: “Omuenyo u ka kala ndati vemẽhi Liusoma wa Suku?” O pondola oku tambulula epulilo liaco kepasu likuavo. Eci o tiukilako ivaluka okuti koñoño yokokanda ku tukula ocipama 7 combrochura Olondaka Viwa vi Tunda ku Suku!, okuti cimue pokati kovimalẽho vioku fetika elilongiso Liembimbiliya.

11. Olorevista vietu vi kuete ocimãho ce kuenda nye tu sukila oku kũlĩhĩsa catiamẽla kokuavio?

¹¹ Olorevista. Utala Wondavululi kuenda o Despertai! ovio via siata oku pongoluiwa vali enene kalimi loku sandekiwa koluali luosi! Omo okuti olorevista viaco vi tangiwa lomanu vokolofeka via litepa, olosapi viokoñoño vi pangiwa lonjila yi vetiya omanu vokolonepa viosi violuali. Tu pondola oku talavaya lavio oco tu kuatise omanu oku tiamisila utima kueci ca velapo vali komuenyo. Tete tu sukila oku kũlĩhĩsa orevista yi kuatisa omunu lomunu.

12. (a) O Despertai! yi tiamisiwila ku velie kuenda locimãho cipi? (b) Ulandu upi uwa o kuete woku talavaya locimãleho caco?

¹² O Despertai! yi tiamisiwila komanu vana va kuete ukũlĩhĩso utito, ale vana ka va kũlĩhĩle cimue catiamẽla Kembimbiliya. Citava okuti ovo ka va kũlĩhĩle alongiso Akristão, ka va kolela ketavo, ale ka va limbuka okuti Embimbiliya li va kuatisa komuenyo wavo. Ocimãho ca velapo co Despertai! oku vetiya omanu oku limbuka okuti kuli Suku. (Va Roma 1:20; Va Heveru 11:6) Handi vali, yi kuatisa omanu oku kolela okuti Embimbiliya “ondaka ya Suku.” (1 Va Tesalonike 2:13) Olo Despertai vitatu viunyamo wo 2018 vi kuete olosapi hati: “O Caminho Para a Felicidade,” “12 Segredos Para Uma Família Ser Feliz” kuenda “Como Lidar Com a Dor da Morte.”

13. (a) Utala Wondavululi wowiñi u kuete ocimãho cipi? (b) Ulandu upi uwa o kuete woku talavaya locimãleho caco?

¹³ Ocimãho ca velapo Cutala Wondavululi wowiñi, oku lombolola alongiso Embimbiliya komanu vana va sumbila Suku kuenda  Embimbiliya. Citava okuti va kuete ale ukũlĩhĩso umue wa tiamẽla Kembimbiliya, pole, ka va kuete elomboloko lia suapo lieci li longisa. (Va Roma 10:2; 1 Timoteo 2:3, 4) Olorevista vitatu Viutala Wondavululi wunyamo wo 2018, vi ka tambulula apulilo a-a: “Anga hẽ Embimbiliya li Kuete Esilivilo Koloneke Vilo?,” “Elavoko Lipi tu Kuete Catiamẽla Kovaso Yoloneke?” “Anga hẽ Suku wa ku Kapako?”

14. (a) Olovideo vipi vikuãla tu kuete Viovimãleho Vietu Vioku Longisa? (b) Ulandu upi uwa o kuete woku talavaya lolovideo viaco?

¹⁴ Olovideo. Koloneke via Yesu, ovimalẽho viukalupindelu via kala lika vioku talavaya lovaka. Pole, koloneke vilo olokalupindelu vi talavaya lovimalẽho vi likaliwa kolusu ndeci, ocimalẽho coku teta avaya, coku tombola kuenda coku miuhĩsa evaya. Cimuamue haico okuti koloneke vilo, ka tu kuete lika alivulu, tu kuetevo olovideo tu lekisa komanu. Tu kuete olovideo vikuãla pokati kovimalẽho vietu vioku longisa okuti: Momo Lie Ndi Lilongisila Embimbiliya?, Nye ci Lingiwa Velilongiso Limue Liembimbiliya?, Nye ci Lingiwa Vonjango Yusoma? kuenda Velie Olombangi Via Yehova? Olovideo viaco vitito vi pondola oku lekisiwa votembo ka yi pitãhala akukutu avali kuenda viwa poku fetika ombangulo. Olovideo vinene vi lekisiwa kepasu ku vana okuti va ecelela otembo yalua. Olovideo viaco, ovimalẽho vimue viwa momo vi vetiya omanu oku lilongisa Embimbiliya loku enda kolohongele.

15. Onima yipi yi yilila koku tala ovideo kelimi omunu a vangula? Tukula ovolandu amue.

¹⁵ Ulandu umue u lekisa okuti, manji umue ukãi wa sanga ukãi umue wa ilukila ko Mikronesia okuti o vangula elimi lio Yapese. Manji wo lekisa ovideo kelimi lio Yapese, losapi hati, Momo Lie Ndi Lilongisila Embimbiliya? Eci ovideo ya fetika oku lekisiwa, ukãi wa popia hati: “Eli elimi liange. Eci ci komõhisa! Owu upopi wo kofeka yange. O vangula muẽle elimi liange!” Noke yoku tala ovideo, ukãi wa popia ndoco, kaliye ndi ka tanga loku tala viosi vi kasi velimi liaye vi sangiwa vo jw.org. (Sokisa Lovilinga 2:8, 11.) Ulandu ukuavo wa manji umue kofeka yo Estados Unidos okuti cimumba caye o kasi kofeka yikuavo. Manji wa tuma kokuaye ovideo yimuamue velimi liaye. Cimumba wa tala ovideo noke wa tumisa kokuaye esapulo liokuti: “Onepa ya lekisa u o kasi oku viala oluali, ya ñomohisa calua. Kuenje nda pinga elilongiso Liembimbiliya.” Eci ci komõhisa momo eye o kasi kofeka yimue okuti upange wetu u kasi oku tatekiwa!

16. Lombolola ocimãho coku talavaya lolombrochura ndevi: (a) Yevelela Suku Kuenje o Kala Otembo ka yi Pui. (b) Olondaka Viwa vi Tunda ku Suku! (c) Velie va Kasi oku Linga Ocipango ca Yehova Koloneke Vilo?

¹⁶ Olombrochura. Tu longisa ndati ocili komunu umue ka tẽla oku tanga ciwa, ale ka kuete elivulu lalimue velimi liaye? O pondola oku talavaya lombrochura, Yevelela Suku Kuenje o Kala Otembo ka yi Pui. * (Tala etosi pombuelo yemẽla.) Ocimalẽho cimue ciwa coku fetika elilongiso Liembimbiliya, ombrochura losapi hati, Olondaka Viwa vi Tunda ku Suku! O pondola oku lekisa  komunu 14 kovipama vi sangiwa koñoño yombrochura loku u pula osapi a sola vali. Noke o pondola oku fetika oku lilongisa laye vocipama caco. Wa ci setekele ale poku linga apasu? Ombrochura yatatu kovimalẽho vietu vioku longisa, yeyi, Velie va Kasi Oku Linga Ocipango ca Yehova Koloneke Vilo? Ombrochura eyi ya pongiyiwila oku longisa olondonge Viembimbiliya oku kũlĩha ocisoko cetu. Oco o kũlĩhe ndomo o talavaya lombrochura yaco, tanga Ekalo Lietu Tuakristão Kuenda Oku Kunda, yosãi Yelombo wo 2017.

17. (a) Cipi ocimãho calivulu elilongiso? (b) Olondonge nye vi sukila oku amamako oku linga noke yoku papatisiwa kuenda momo lie?

¹⁷ Alivulu. Ndaño wa fetika oku songola elilongiso vombrochura lomunu umue, nda ci sukiliwa citava okuti, o sondolokela velivulu losapi hati, Embimbiliya li Pondola Oku tu Longisa Nye? Elivulu eli li kuatisa omanu oku kũlĩha ovina Embimbiliya lilongisa. Nda omunu amamako kukũlĩhĩso kuenda wa mala elivulu a fetika, o pondola oku fetika likuavo losapi hati, Kali Vocisola ca Suku. Elivulu eli li kuatisa ondonge oku kapako olonumbi Viembimbiliya komuenyo waye. Ivaluka okuti, ndaño noke yoku papatisiwa ndonge o sukila oku amamako oku longisiwa toke a malusula alivulu aco avali. Eci ci ko kuatisa oku pamisa ekolelo liaye ku Yehova kuenda oku kolela kokuaye.—Tanga Va Kolosai 2:6, 7.

18. (a) Omo okuti tu longisa ocili, elivulu lia 1 Timoteo 4:16 li tu vetiya oku linga nye kuenda onima yipi tu kuata? (b) Cipi ocimãho cetu poku talavaya Lovimalẽho vietu Vioku Longisa?

¹⁸ Omo okuti tu Lombangi Via Yehova, tu kuete ocikele coku longisa omanu ‘esapulo liocili liolondaka viwa,’ vi va tuala komuenyo ko pui. (Va Kolosai 1:5; Tanga 1 Timoteo 4:16.) Oco ci tu kuatise oku ci linga, tu kuete Ovimalẽho viosi tu sukila Vioku Longisa. (Tanga okakasia hati, “Ovimalẽho vietu Vioku Longisa.”) Tu talavayi ciwa lovimalẽho viaco. Omunu lomunu o nõla ocimalẽho a pondola oku kuama vepuluvi a yongola. Pole, ivaluka okuti ocimãho cetu a kuecako ño alivulu kuenda ka tu eci alivulu komanu ka va lekisa onjongole kesapulo liusoma. Ocimãho cetu oku longisa omanu va sunguluka, vomboka okuti va yongola oku kũlĩha Suku haivo “vakuotima wa sungulukila omuenyo ko pui,” oco va linge olondonge.—Ovilinga 13:48; Mateo 28:19, 20.