1, 2. Onjila yipi Eliapu lia kuama oco a nyõle ekalo liomanu?

OVINA vimue via pangiwa lomunu ndeci otelefone, ocinyi, ekãlu kuenda onjilela, via siata oku leluisa ekalo liomanu. Ovina vikuavo ndeci ovota, olomina, akaya, latenda ana a tukuiwa hati, bomba atomica, via siata oku koka ohele komanu. Pole, kuli ocina cikuavo ci kasi osimbu okuti, ca siata oku nyõla calua ekalo liomanu. Ocina caco nye? Uhembi! Uhembi oku popia cina tua kũlĩha okuti haciliko locimãho coku yapuisa omunu umue. Helie wa vangula uhembi watete? Eliapu! Yesu Kristu wo tukula hati, “isia yuhembi.” (Tanga Yoano 8:44.) Otembo yipi a vangula uhembi watete?

² Tunde eci a ci linga vocumbo Cedene pa pita ale olohuluwa vianyamo. Adama la Eva va kuata ekalo liwa Vocumbo ceposo cina Yehova a va pongiyila. Suku wa va sapuilile okuti, nda va lia ‘kuti woku kulĩhĩsa eci ciwa leci cĩvi,’ va fa. Satana wa ci kũlĩhĩlevo kuenje vocakati conyõha wa sapuila Eva hati: “Mbu, okufa ka vu fi.” Owu owo uhembi watete. Satana wa popiavo hati: “Suku wa kũlĩha okuti eteke vu  liako, ovaso ene haico a letuluka kuenje vu linga nda Suku, vu kũlĩha eci ciwa leci cĩvi.”—Efetikilo 2:15-17; 3:1-5.

3. Nye ci lekisa okuti uhembi wa Satana wa kuata ocimãho coku nyõla kuenda nye ceyililako?

³ Uhembi wa Satana wa kuata ocimãho coku nyõla, momo wa kũlĩhĩle okuti nda Eva wa tava kokuaye loku lia epako, o fa. Kuenje eci oco muẽle ca pita. Adama la Eva va sinĩla ocihandeleko ca Yehova noke va fa. (Efetikilo 3:6; 5:5) Handi vali, omo liekandu lia Adama oku “fa kua li sanduila komanu vosi.” Ocili okuti oku fa “kua viala ndosoma . . . , ndaño ku vana ka va lingile ekandu ndeli lia Adama.” (Va Roma 5:12, 14) Eli olio esunga liokuti ka tua lipuile kuenda ka tu kuete handi omuenyo ko pui ndeci Suku a yonguile. Pole, tu kala lika komuenyo ci soka ‘70 ale 80 kanyamo mekonda liongusu,’ kuenda komuenyo wetu “upange lika, lesumuo.” (Osamo 90:10) Cosi eci ceyilila omo liuhembi wa Satana!

4. (a) Apulilo api tu sukila oku konomuisa? (b) Ndomo Osamo 15:1, 2 ya lombolola, helie o kala ekamba lia Yehova?

⁴ Yesu wa popia eci catiamẽla ku Satana hati: Eye “ka pandikisile vocili, momo ocili ka ci kasi vokuaye.” Satana ka pongolekele. O kasi oku amamako “oku yapuisa oluali luosi” luhembi waye. (Esituluilo 12:9) Pole, etu ka tu yongola oku yapuisiwa la Satana. Omo liaco, tu sukila oku kũlĩhĩsa apulilo atatu a kuete esilivilo. Koloneke vilo Satana o kemba ndati omanu? Momo lie omanu va kembela? Tu vangula ndati ocili otembo yosi oco ka tu ka pumbe ukamba tu kuetele Yehova ndeci Adama la Eva va pumba?—Tanga Osamo 15:1, 2.

5. Satana koloneke vilo wa siata oku yapuisa ndati omanu?

⁵ Tu pondola oku yuvula oku kembiwa la Satana. Upostolo Paulu wa popia hati: “Ka tu kasi lonumbi yatutu aye.” (2 Va Korindo 2:11; etosi). Tua kũlĩha okuti Satana eye wa viala oluali luosi, oku kongelamo atavo esanda, olombiali violuali kuenda asongui vakualomĩlu. (1 Yoano 5:19) Ka ci komõhisa okuti Satana kumue lolondele va vetiya omanu va kemãla oku “vangula uhembi.” (1 Timoteo 4:1, 2) Ndeci, vamue vakualomĩlu, nda omĩlu yavo yi panga lãvi omanu, va imba oluiya luhembi oco va vetiye omamu oku landa.

6, 7. (a) Momo lie ka ca sungulukile asongui vetavo oku vangula uhembi? (b) Alongiso api esanda wa yevele ale kasongui vetavo?

⁶ Ka ca sungulukile asongui vetavo oku vangula uhembi. Momo lie? Momo nda umue o tava kalongiso esanda kuenda kovina Suku a nyale, omunu waco o pumba omuenyo ko pui. (Hosea 4:9) Yesu wa kũlĩhĩle okuti asongui vatavo vo koloneke viaye va enda oku kemba omanu. Eye wa va sapuila hati: “Ene avakuavisonehua la va Fariseo, ngongo yene, wakuambambe! vu yoka okalunga lofeka oco vu linge omongoloke kuenda eci omunu a linga omongoloke, vu u lingisa omunu o sesamẽla oku nyõliwa Vongehena,” okuti ci lomboloka enyõleho ka li pui. (Mateo 23:15, etosi) Yesu wa popia okuti, asongui vaco vetavo esanda, va lisoka la isiavo Eliapu, okuti “omondi.”—Yoano 8:44.

 ⁷ Koloneke vilo kulivo asongui valua vetavo esanda. Ovo va kũlĩhĩwa okuti, angombo, olopatele, alongisi, asongui kuenda olonduko vikuavo. Ndeci ca linga va Fariseo, ovo ka va longisa ocili Condaka ya Suku, pole, va “pongolola ocili ca Suku uhembi.” (Va Roma 1:18, 25) Amue pokati kovohembi avo vava: “Nda wa yovuiwa ale, wa yovuiwa otembo yosi,” omunu o kuete ocilelembia ka ci fi, eci a fa o molẽhela vetimba likuavo, Suku o tava ekalo liulume o lipekela lulume kuenda olohuela viomanu vakuavimatamata vimuamue.

8. Uhembi upi olombiali violuali vi laika oku sandeka, pole, ocituwa cipi tu sukila oku lekisa?

⁸ Asongui vopulitika va siatavo oku kemba oco va yapuise omanu. Amue pokati kovohembi olombiali violuali vi laika oku sandeka, vava: “Tu kuete ombembua kuenda tua kolapo!” Pole, “enyõleho liya kokuavo vocipikipiki.” Etu ka tu ka tava oku yapuisiwa lovohembi olombiali. Ovo va ka kemba momo ka va ka lekisa komanu okuti oluali lu kasi kohele. Etu tua ‘kũlĩha ciwa okuti eteke lia Yehova liya ndocimunu kuteke.’—1 Va Tesalonike 5:1-4.

9, 10. (a) Momo lie omanu va kembela kuenda ovitangi vipi vi yililako? (b) Nye tu sukila oku ivaluka catiamẽla ku Yehova?

⁹ Koloneke vilo, omanu va kemãla havoko lika va siata oku kemba. Ocipama cimue ca lomboluiwa la Y. Bhattacharjee losapi hati: “Esunga Lieci tu Kembela,” ca popia okuti, “uhembi weya oku kũlĩhĩwa ndocina cimue ciwa komanu.” Handi vali, omanu va kuete ocisimĩlo cokuti oku kemba hacĩviko. Olonjanja vialua omanu va kemba oco va liteyuile kelinga limue lĩvi, ale kekandu limue linene. Ovo va kembavo oco va nganyale olombongo, ale oku likuatisa konepa yikuavo. Ocipama caco ca popia vali hati, omanu vamue ka va kuete ohele yoku kemba “akombe, omanu va talavayela kumosi, akamba kuenda epata.”

¹⁰ Omo liovohembi aco nye ci yililako? Omanu ka va likolela vali pokati kuenda ukamba u nyõleha. Sokolola esumuo ulume a pondola oku kuata nda wa limbuka okuti ukãi waye wo pakula kuenje wo kemba poku seleke elinga liaye. Sokololavo kulume umue okuti konjo o tata lãvi ukãi lomãla, cikale lolondaka viungangala, ale poku va tipula. Pole, eci a kasi pokati komanu o likembisa ndu okuti wa va kapako kuenda o va sole. Omanu vaco va pondola oku kemba lika omanu vakuavo, pole, tu ivaluki okuti ka va pondola oku kemba Yehova. Embimbiliya li popia okuti, “ovina viosi kokuaye via situluiwa kuenda vi letiwe laye.”—Va Heveru 4:13.

11. Ongangu yĩvi ya Ananiya la Safira, yi tu longisa nye? (Tala ociluvialuvia kefetikilo liocipama.)

¹¹ Vembimbiliya tu sangamo ulandu wohueli yimue Akristão okuti ya yapuisiwa la Satana poku kemba Suku. Ananiya, la  Safira va seteka oku kemba ovapostolo. Ovo va landisa onepa yimue yepia liavo kuenje va eca onepa yimue yolombongo kovapostolo. Ananiya, la Safira va yonguile oku komõhisa vamanji vakuavo vekongelo kuenje va sapuila ovapostolo okuti olombongo viosi va vieca. Pole, Yehova wa kũlĩhĩle okuti ovo va kala oku kemba kuenje wa va ponda.—Ovilinga 5:1-10.

12. Nye ci ka pita la vana va kemba locimãho coku yapuisa okuti ka va likekembela kuenda momo lie?

¹² Yehova o tenda ndati omanu va kuete ocituwa coku kemba? Vosi va kuete ocituwa coku kemba locimãho coku yapuisa okuti ka va yongola oku likekembela, va ka kuata onima yavo “vociva ci taima lulienge,” ndeci ci ka pita la Satana. Ci lomboloka okuti va ka kunduiwa. (Esituluilo 20:10; 21:8; Osamo 5:6) Momo lie? Momo Yehova o tenda vosi va kuete ocituwa coku kemba lonjila yimuamue la “vana okuti ovilinga viavo via vĩha kovaso a Suku.”—Esituluilo 22:15, etosi.

13. Nye tua kũlĩha catiamẽla ku Yehova kuenda ci tu vetiya oku linga nye?

¹³ Tua kũlĩha okuti Yehova “hamunuko okuti o kemba” kuenda “ka citava okuti Suku o kemba.” (Atendelo 23:19; Va Heveru 6:18) ‘Yehova o suvuka . . . elimi liuhembi.’ (Olosapo 6:16, 17) Nda tu yongola oku u sanjuisa, tu sukila oku vangula ocili. Omo liaco, ka tu “ka likembi omunu lukuavo” puãi tu “popi ocili.”—Va Kolosai 3:9.

14. (a) Nye ci tepisa Akristão vocili lasongui vetavo esanda? (b) Lombolola onumbi yi sangiwa kelivulu lia Luka 6:45.

¹⁴ Kolonepa vipi Akristão vocili va litepa latavo esanda? Etu ‘popia ocili.’ (Tanga  Sakariya 8:16, 17.) Paulu hati: “Tu imba uvangi wokuti tulondingupange via Suku . . . koku vangula ocili.” (2 Va Korindo 6:4, 7) Handi vali, Yesu wa popia hati, omanu va vangula “eci ci kasi vutima.” (Luka 6:45) Ci lomboloka okuti omunu ukuacili olonjanja viosi o vangula ocili. Eye o popia ocili kakombe, komanu va talavayela kumosi, kakamba kuenda kepata. Tu kũlĩhĩsi ovolandu amue a lekisa okuti tu kasi oku likolisilako oku kala vakuacili kovina viosi.

15. (a) Momo lie ka ca sungulukilile oku ambata olonjila vivali? (b) Nye ci kuatisa amalẽhe oku tamãlala layonjo a vakuavo kosikola? (Tala etosi pombuelo yemẽla.)

¹⁵ Nda ove umalẽhe, pamue o yongola okuti o taviwa la vana vu tangela kumosi. Omo lionjongole yaco yoku taviwa, amalẽhe vamue va kasi oku ambata olonjila vivali. Kuenje eci va kasi lepata kuenda ekongelo va lilekisa ndu okuti va kasi ciwa konepa yespiritu, pole, eci va kasi lomanu vana ka va fendela Yehova, ale vo internet, va lekisa ovituwa violuali. Va fetika oku vangula upopi ka wa sungulukile, oku wala lãvi, oku yeva ovisikilo vĩvi, oku kolua, oku sipa eliamba, oku namulãla vuyombeki, ale ovina vikuavo vĩvi. Ovo va kasi oku kemba olonjali viavo, vamanji vekongelo kuenda Yehova. (Osamo 26:4, 5) Eci tu popia okuti tua sumbila Yehova, pole, tu linga ovina a suvuka, eye wa ci kũlĩha. (Marko 7:6) Ci kuete esilivilo oku kapako olusapo luokuti: “Utima wove ka u ka livele olonjila violondingakandu. Kuamelela vusumba wa Yehova otembo yosi.”—Olosapo 23:17. * (Tala etosi pombuelo yemẽla.)

16. Tu tambulula ndati apulilo a sonehiwa vukanda wepingilo woku litumbika kupange wotembo yosi?

¹⁶ Nda o yongola oku kala ukundi wavelapo ale oku iñila kupange wakundi votembo yosi ndeci ko Betele, o sukila oku soneha ukanda wepingilo. Ci kuete esilivilo oku kala ukuacili poku soneha atambululo atiamẽla kuhayele, kovina o sole kuenda ovituwa viove. (Va Heveru 13:18) Nye o sukila oku linga nda wa linga cimue Yehova a nyãle, ale cimue okuti owanji utima wove u ku vetela evelo, pole, kua ci popele kakulu vekongelo? Pinga ekuatiso kokuavo oco o vumbe Yehova lutima wa yela.—Va Roma 9:1; Va Galatia 6:1.

17. Tu tambulula ndati eci vana va tu lambalala va tu pula catiamẽla ku vamanji vakuavo?

¹⁷ Nye o sukila oku linga nda upange wetu woku kunda wa fetika oku tatekiwa  posongo o kasi kuenda wa kuatiwa lolosipayu kuenje va ku linga apulilo atiamẽla ku vamanji vakuavo? Anga hẽ o popia cosi wa kũlĩha? Nye Yesu a linga eci guluvulu yo ko Roma o pula? Yesu wa kapeleko onumbi Yembimbiliya yokuti, kuli “eteke lioku ũha, kuenda eteke lioku popia” kuenje ka popele cimue! (Ukundi 3:1, 7; Mateo 27:11-14) Nda tua pita locitangi cimuamue, tu sukila oku lunguka kuenda oku kuata utate oco ka tu ka kape vamanji kohele.—Olosapo 10:19; 11:12.

18. Nye tu linga nda ukulu umue wekongelo wa tu pula catiamẽla ku manji umue?

¹⁸ Nye o linga nda manji umue vekongelo wa linga ekandu limue, pole, ove wa ci kũlĩha? Akulu vekongelo va kuete ocikele coku yelisa ekongelo kuenje citava okuti, va ku pula eci catiamẽla kocitangi caco. Nye o linga nda omunu waco ekamba, ale epata? Embimbiliya hati: “Ukuakupopia ocili imba uvangi wesunga.” (Olosapo 12:17; 21:28) Ove o sukila oku popia ocili cosi, okuti ku limbika cimue. Akulu vekongelo va kuete omoko yoku kũlĩha ovina viosi via kongelamo, oco ci leluke kokuavo oku kuatisa omunu waco oku kuata vali ukamba la Yehova.—Tiago 5:14, 15.

19. Nye tu ka lilongisa vocipama cikuavo?

¹⁹ Daviti wa likutilila ku Yehova hati: “Ove o yongola esunga liovutima.” (Osamo 51:6) Daviti wa kũlĩhĩle okuti ca velapo ceci tua tuwa vutima. Olonjanja viosi, Ukristão wocili o ‘popia ocili omunu lukuavo.’ Onjila yikuavo yi lekisa okuti tua litepa latavo akuavo yeyi okuti tu longisa ocili ci tunda Vembimbiliya. Vocipama cikuavo tu ka lilongisa ndomo tu ci linga kupange woku kunda.