Roberta wa popia hati: “Nda enda oku sakalala calua omo lioku sokolola ovina vimue ka via pitile handi okuti, pamue hacoko ci ka pita.” Ovinimbu vipi Viembimbiliya vio kuatisa? Cimue pokati kavio Mateo 6:​34, kuna tu tanga tuti: “Ko ka sakalali leteke likuavo, momo eteke liya li kuete esakalalo liayo. Eteke leteke li kuete ohali yalio.” Roberta wa popia okuti, olondaka via Yesu vio kuatisa oku liwekapo oku sakalala calua lovina vi ka pita hẽla. Eye wamisako hati: “Nda kuatele ale ovitangi vialua, sia sukilile oku vokiyako vali asakalalo viovina ka via pitile handi okuti, pamue ka vi ka pita.”

Yasmine wa ecelelavo oku yuliwa lesakalalo. Eye wa popia hati: “Oloneke vimue nda enda oku lila kuenda kovoteke amue sia kuataile otulo. Nda limbuka okuti ovisimĩlo vĩvi via fetika oku ndi kopisa.” Ocisonehua cipi co kuatisa? Eye wa tukula 1 Petulu 5:​7, ku popia okuti: “Yeki ku [Suku] ovilemo viene viosi, momo eye o vu tati.” Yasmine wa popia hati: “Osimbu nda enda oku likutilila ku Yehova, eye wa tambulula olohutililo viange. Nda liyeva ndu okuti ocilemo cimue cinene, ca tunda kapepe ange. Ovisimĩlo viange vĩvi, olonjanja vimue viya vali kutima, pole, cilo nda kũlĩha ndomo ndi liyaka lavio.”

Ufeko umue o tukuiwa hati Isabella wa popia hati: “Nda simĩle okuti ocituwa coku lipañela co vepata, momo isiange wa kuatavo ocituwa caco. Nda enda oku velisapo epuyuko loku tala o Televisãu okuti ovopange a kuete esilivilo a siala konyima. Ocituwa caco ka ca sungulukile momo ci vokiya esakalalo kuenda ci koka okuti omunu ka lingi upange uwa.” Onumbi yimue yo kuatisa oku sokolola, ukanda 2 Timoteo 2:​15, ku popia hati: “Likolisilako oku lilekisa okuti wa taviwa la Suku, ndondingupange ka yi kuete lacimue cu kutisa osõi.” Isabella wa popia hati: “Si yongola okuti Yehova o kutisua osõi lupange wange omo lioku lipañela kuange.” Eye vokuenda kuotembo wa siapo ocituwa caco.

Kate wa popiavo hati: “Eci va enda oku nyiha upange nda kuatele ocituwa coku linga ovina kelivala lia sulako. Ca enda oku ndi kokela oku lila, oku pumba otulo kuenda oku sakalala. Eci ka ca ndingaile ciwa.” Kate wa sanga ekuatiso kelivulu Liolosapo 13:​16, kuna ku popia hati: “Ukuotate o lekisa olondunge kovina viosi a linga. Eveke li litambaila lowova waye [ale ahuku].” Eye wa lombolola ndomo oku sokolola kocisonehua eci, co longisa poku popia hati: “Ci kuete esilivilo oku kuata olondunge kuenda oku sokiya selo ovina. Cilo ndi kuete esokiyo liwa okuti, ndi soneha ovopange ndi ka linga noke, kuenje eci ci ñuatisa oku tẽlisa ovopange osi okuti, si talamẽla toke kelivala lia sulako.”

Karen wa popia hati: “Ulume wange wa tepa olohuela vietu kuenje wa ndi sia lomãla vakuãla.” Ocisonehua cipi Cembimbiliya co kuatisa? Olosapo 17:​17, kuna tu tanga okuti: “Ekamba [liocili] li sola olonjanja viosi, kuenje li linga manjove koloneke viohali.” Kirsten wa sanda ekuatiso komanu vakuavo va vumba Yehova. Ekuatiso lipi a tambula? “Akamba vange va ndi kuatisa volonjila viñi viñi! Vamue va sia okulia kuenda olonelẽho pepito liange. Olonjanja vitatu vamanji vamue va ndi kuatisa kumue lomãla vange oku tunda vonjo yimue oku ilukila vonjo yikuavo. Ukuavo wa ñuatisa oku sanga upange woku sanda eteku. Akamba vange va ñuataisa vapuluvi osi.”

Cláudia una wa tukuiwa ale, wa liyakavo lulika eci a pumba ovina vialua. Eye ivaluka ndoco: “Nda kala ndu okuti ñasi oku tala ofilme yimue okuti omanu vosi va sanjuka haivo va kuete ekalo liwa. Pole, ame sia kaile vofilme yaco.” Ocisonehua cimue co kuatisa Osamo 68:​6, yiti: ‘Suku o muisa ukuopongo onjo.’ Eye wa lombolola hati: “Nda kũlĩhĩle okuti ondaka onjo ya tukuiwa vocisonehua eci ka yi lomboloka muẽle ocitumãlo coku kala. Pole, nda kuata elomboloko liokuti onjo konepa yespiritu okuti, ocitumãlo cimue ca koka, cecelela oku likuata omunga lomanu vakuavo va sole Yehova. Pole, nda kũlĩhĩle okuti sia ponduile oku kuata ukamba lomanu vakuavo nda tete sia kuatele ukamba wocili la Yehova. Eci co kuatisa, Osamo 37:​4, ku popia hati: ‘Sanjukila Yehova, kuenje eye o ku iha evi vi yongola utima wove.’ ”

Eye wa malusula lolondaka viokuti: “Nda limbuka okuti nda sukilile oku pamisa vali ukamba wange la Yehova. Eye Ekamba lia velapo tu pondola oku kuata. Kuenje nda soneha ulala umue wovopange nda yonguile oku linga lomanu vana va solevo Yehova. Nda lilongisa oku velisapo ovituwa viavo viwa okuti, si kapiko akulueya avo.”

Ocili okuti, akamba vetu va vumba Suku handi ka va lipuile. Olombangi Via Yehova via siatavo oku liyaka lovitangi ndeci omanu vakuavo. Pole, Embimbiliya li tu longisa okuti tu sukila oku kuatisa vakuetu kapuluvi osi. Ca sunguka oku linga ukamba lomanu vaco. Anga hẽ koloneke vilo Embimbiliya li tu kuatisavo kovitangi vina ka vi pondola oku potoluiwa cilo ndeci, ovovei ana ka a kuete esaku kuenda oku fisa umue?