Ndaño ka ca li pitile love, pamue wa muile ale okuti, ca pita lomanu vakuavo. Koloneke vilo, ca siata calua omanu oku tata lãvi vakuavo omo lionjila ndomo va tuwa. Olonepele viakova lovina vikuavo, via siata calua. Omo liaco, olofeka vialua vi kasi oku tumbika ovihandeleko vi pisa ungangala kuenda esuvu.

Ocili okuti, vana va suvukiwa, va lekisavo esuvu lialua ku vakuavo. Olonjanja vialua ovo va yongola oku fetuluinya kuenje esuvu li amamako.

Citava okuti wa talisiwile ale ohali omo liocame kuenda oku sanumuiwa. Ale pamue, wa tendiwile ale lonjila ka ya sungulukile, ale oku saluisiwa. Pole, esuvu li pondola oku koka ovina vialua. Li koka ovilinga vĩvi kuenda viungangala, ndeci, oku nyõla ovina viamale, oku putula, umondi kuenda vikuavo.

O revista yilo, yi ka lekisa ndomo ku yuliwa esuvu loku tambulula apulilo a kuãimo ndeci:

• Momo lie ku kasilili esuvu lialua?

• Tu pondola oku malako ndati esuvu?

• Anga hẽ eteke limue esuvu ka li ka kalako vali?