Omanu valua va tava okuti kuli ovina viwa levi vĩvi. Ndeci valua va sima okuti ca sunguluka oku lekisa ovituwa ndeci ohenda, oku kapako vakuavo kuenda esunga. Va tavavo okuti ka ca sungulukile oku ponda kuenda oku putula. Pole, catiamẽla kovina vikuavo ndeci oku lipekela, oku kala ukuacili kuenda oku tekula omãla, omanu valua va sima okuti ka ci sukila oku nõla eci ciwa leci cĩvi. Komanu vaco, olonjila viosi va nõla vi taviwa. Olonjanja vialua omanu va nõla ovo muẽle olonjila va yongola oku kuama ale va pinga ekuatiso komanu vakuavo. Anga hẽ eyi oyo onjila yiwa yoku nõla olonjila tu yongola oku kuama?

Olonjanja vialua etu tu nõla olonjila vietu poku kuama ovisimĩlo vietu muẽle, ale poku kuama owanji wutima wetu catiamẽla kueci ciwa leci cĩvi. (Va Roma 2:14, 15) Ndaño muẽle omãla vatito, va pondola oku limbuka etepiso li kasi pokati kovituwa via sunguluka levi ka via sungulukile kuenda va pondola oku livetela evelo. Vokuenda kuotembo owanji wutima wetu u pongoluiwa lovituwa tu lilongisa lepata lietu, la vana tu tangela kumosi, alongisi vetu vo kosikola, vana tu lisungue lavo, etavo kuenda ovituwa vio pocitumãlo. Eci tu nõla onjila yimue tu kuama, owanji wutima wetu u tu sapuila nda tua nõla onjila yi likuata lovina tua lilongisa ale sio.

Owanji wutima wetu u pondola oku tu vetiya oku kapako vakuetu, oku lekisa olopandu, esunga kuenda oku va tata lohenda. Owo u pondolavo oku tu tateka oku linga ovina vi sumuisa omanu vana tu sole ale vina vi tu nenela esumuo, osõi kuenda oku livetela evelo.

Anga hẽ ovisimĩlo vietu olonjanja viosi vi tu songuila vonjila ya sunguluka? Ulume umue o tukuiwa Garrick wa popia hati: “Eci nda kala umalẽhe, nda enda oku li nõlela ame muẽle eci ciwa leci cĩvi, pole, vokuenda kuotembo nda limbuka okuti oku ci linga ka ceci onima yiwa.” Eye wamisako hati: “Ekalo liaco liomuenyo, lia ngambata koku linga ovina vĩvi ndeci evĩho liukahonga, oku nyua olodroga, uholua kuenda ungangala.”

Poku nõla olonjila tu yongola oku kuama, ka tu kapiko lika ovisimĩlo vietu pole tu kapakovo ovisimĩlo viomanu vakuavo. Poku ci linga, tu pondola oku kuatisiwa lovoloño kuenda olondunge viavo. Eci tu linga ovina vakuepata lietu, akamba kuenda omanu tu lisungue lavo va sima okuti oco ca sunguluka, ovo va tu tata lesumbilo.

Anga hẽ ovisimĩlo viomanu vakuavo olonjanja viosi vi tu songuila vonjila ya sunguluka? Kũlĩhĩsa ulandu wa Priscila okuti, eci a kala umalẽhe wambatele omuenyo umue ndowu wakamba vaye kuenda wa enda oku linga evĩho liukahonga. Pole, eye wa limbuka okuti oku linga ovina omanu va sima okuti viwa, ka ca kaile oku u nenela esanju. Eye wa popia hati: “Oku linga ovina vimuamue vakuavo va linga ka ca kaile oku ndi kuatisa. Ca ndi kokela oku linga ovina viuveke havio vi koka ohele.”

Poku nõla pokati keci ciwa leci cĩvi, ci kuete esilivilo oku kapako ovisimĩlo vietu kuenda viomanu vakuavo. Pole oku ci linga, halonjanja viosiko ceca onima yiwa. Olonjanja vimue, omo okuti ka tu limbuka ohele yi tunda kolonjila tua nõla, tu li kokela ovitangi etu muẽle kuenda komanu vakuavo. (Olosapo 14:12) Ka tu pondola oku kolela okuti, ovisimĩlo vietu kuenda viomanu vakuavo olonjanja viosi vi ka tu kuatisa kuenda ka tu ka sukila oku linga apongoloko. Momo, ovituwa vina okuti kosimbu via tendiwile okuti vĩvi, cilo vi tendiwa okuti viwa kuenda vina okuti via enda oku taviwa, cilo ka vi taviwa vali.

Anga hẽ kuli ocina cimue ca velapo ci tu songuila koku nõla olonjila viwa? Kuli hẽ ovituwa tu pondola oku kuama okuti, ka tu kuata usumba woku livela kovaso yoloneke?

Ci sanjuisa oku kũlĩha okuti, kuli ono yimue ya koleliwa okuti lalimue eteke yi pongoloka, yina ya sokiyiwila oku tu kuatisa oku nõla pokati keci ciwa leci cĩvi. Ocipama ci kuãimo, ci ka lekisa okuti, ono yaco yi pondola oku kuatisa omanu vosi kuenda kovitumãlo viosi va sangiwa.