Ceci Ciwa Leci Cĩvi: Onjila Yimue o Sukila Oku Nõla
Olonumbi tu nõlapo oku kuama, ovio vi ka lekisa nda tu ka kuata esanju ale sio. Yehova Suku wa ci kũlĩha. Eli olio esunga a yonguila okuti, tu kapako olonumbi viaye viatiamẽla kueci ciwa leci cĩvi.
Yehova o yongola okuti tu kuata ombembua kuenda esanju komuenyo.
“Ame ndi Yehova, ndi Suku yove, Una o ku longisa eci ci ku kuatisa, Una o ku songuila vonjila o sukila oku endela. Nda ove wa yevelile kovihandeleko viange! Ombembua yove nda ya kala ndolui kuenda esunga liove nda lia kala ndakimba okalunga.”—Isaya 48:17, 18.
Omo okuti Suku eye Ululiki wetu, eye wa kũlĩha onjila ya velapo tu pondola oku ambata omuenyo wetu. Eye o tu vetiya oku kapako ovina eye a tenda okuti viwa, momo ci ka tu kuatisa. Eci tu kapako olonumbi via Suku, ka tu sukila oku sakalala nda tu kasi oku nõla onjila yiwa. Tu ka kuata onima yiwa kolonjila tu nõla kuenda vi ka tu nenela ombembua lesanju.
Yehova ka tu pingi oku linga eci ka tu tẽla.
“Ocihandeleko eci ñasi oku ku handeleka etaili, ka ca tĩlile kokuove kuenda ca leluka oku ci tẽlisa.”—Esinumuĩlo 30:11.
Citava okuti tu sukila oku linga apongoloko kovisimĩlo kuenda kovituwa vietu, oco vi li kuate lolonumbi via Suku. Pole, Yehova ka tu pingi eci ka tu tẽla momo, eye Ululiki wetu kuenda wa kũlĩha ovina tu pondola oku linga. Osimbu tu kũlĩha ciwa Yehova, tu ka limbuka okuti, “ovihandeleko viaye ka vi lemi.”—1 Yoano 5:3.
Yehova wa likuminya oku kuatisa vana va kapako olonumbi viaye.
“Momo ame ndi Yehova Suku yove, ndi kuata eka liove liondio, Una o popia kokuove hati: ‘Ku ka kuate usumba ndu ku kuatisa.’”—Isaya 41:13.
Etu tu pondola oku kapako komuenyo wetu olonumbi via Suku viatiamẽla kueci ciwa leci cĩvi momo, eye o ka tu kuatisa oku ci linga. Pocakati Condaka yaye Embimbiliya, eye o tu pamisa kuenda o tu ĩha elavoko.
Omanu valua voluali luosi va limbuka okuti, ekalo liomuenyo wavo li pongoloka eci va fetika oku kapako ovina Embimbiliya li popia. Nye o sima catiamẽla koku lilongisa alungulo akuavo a sangiwa Vembimbiliya? O pondola oku fetika oku ci linga poku tanga ombrochura losapi hati: Sanjukili Omuenyo Otembo ka yi Pui! yi sangiwa vo jw.org, o pondolavo oku yi tapa ocali. Oyo yi kuete ovipama vitatu:
-
Embimbiliya li Pondola Oku ku Kuatisa Ndati?
-
Embimbiliya li tu Ĩha Elavoko
-
Ove hẽ o Pondola Oku Kolela Kembimbiliya?
Osimbu o lilongisa Ondaka ya Suku Embimbiliya, o ka limbuka okuti alungulo a sangiwamo handi a kuete esilivilo kuenda ‘olonjanja viosi a koleliwa, cilo kuenda otembo ka yi pui.’ (Olosamo 111:8) Oku kapako olonumbi Viembimbiliya viatiamẽla kueci ciwa leci cĩvi, oyo onjila ya velapo yoku ambata omuenyo wetu. Pole, Suku ka tu kisika oku ci linga. (Esinumuĩlo 30:19, 20; Yehosua 24:15) Eyi onjila yimue ove muẽle o sukila oku nõla.
