OSAPI YO KOÑOÑO | OVE HẼ O KA TAVA OMBANJAILE YA VELAPO YA SUKU?
O Lekisa Ndati Olopandu Viove Omo Liombanjaile ya Velapo ya Suku?
“Momo ocisola ca Kristu ci tu vetiya . . . Kuenje eye wa fila vosi oco okuti vana va kasi lomuenyo ka va lisanjuisa ovo muẽle, te oku sanjuisa una wa va fila kuenje wa pinduiwa.”
OMBANJAILE yaco yi komõhisa, yi tu vetiya oku eca olopandu. Yesu wa lekisa ulandu waco noke yoku sakula alume ekũi va kala luveyi umue okuti kotembo yaco ka wa kuatele ovihemba. Umue pokati kalume ekũi, ‘wa tiuka wa kaluka loku sivaya Suku.’ Yesu wo pula hati: “Hekũiko va yelisiwa? Vakuene ecea, va kasi pi?” (Luka 17:12-17) Nye tu lilongisako? Tu lilongisa okuti ca leluka oku ivalako ovina viwa vakuetu va tu lingila!
Ocisembi ka ci sokisiwa lombanjaile yikuavo. Ombanjaile yimue ya velapo ya eciwa tunde kosimbu. O pondola oku eca ndati olopandu ku Suku omo liovina a siata oku ku lingila?
-
Enju oco kũlĩhe Ukuakueca. Ocisembi ka ceci omuenyo ko pui komanu vocipikipiki. Pole, Yesu vohutililo wa sapuila Suku hati: “Omuenyo ko pui u lomboloka okuti ovo va ku kũlĩha okuti ove lika wu Suku yocili kuenda una ove wa tuma, Yesu Kristu.” (Yoano 17:3) Nda omunu wa ku sapuila okuti ulume umue wa popela omuenyo wove eci wa kala omõla, nda ka ca vokiyile hẽ onjongole yove yoku lilongisa catiamẽla kulume waco, kuenda oku kũlĩha esunga lieci eye a ku popelela? Omo okuti, Yehova Suku eye wa eca ocisembi coku popela omuenyo, eye ka yongola lika okuti u kũlĩha pole, o yongolavo okuti ove wiya loku linga ukamba laye. Embimbiliya li tu vetiya hati: “Amẽli ku Suku kuenje eye amẽla kokuene.”
—Tiago 4:8. -
Kolela kocisembi. “Wosi o kolela Mõla o kuete omuenyo ko pui.” (Yoano 3:36) Nye ci lomboloka oku lekisa ekolelo? Oku lekisa ekolelo kocisembi mua kongela oku ci lekisila kovilinga. (Tiago 2:17) Ovilinga vi pi? Ombanjaile yimue yi linga yove, eci o yi sandiliya kuenda oku yi tava. Omo liaco, o sukila oku sandiliya kuenda oku tava ocisembi. Ndamupi? Lilongisa eci Suku a yongola okuti oco o linga kuenda ci kapako komuenyo wove. * Likutilila ku Suku oco a kuecele loku kuata utima wa yela. Tu amẽli ku Suku lekolelo liokuti ocisembi ci tu ĩha elavoko lioku kuata ombembua kovaso yoloneke, oku kolapo, kuenda ekalo liwa komanu vosi va lekisa ekolelo!
—Va Heveru 11:1. -
Kuende konjivaluko yolofa via Yesu. Yesu wa fetika ocipito ci lingiwa onjanja yimosi vunyamo oco a tu ivaluise ombanjaile yocisembi. Catiamẽla kocipito caco, eye wa popia hati: “Ci lingaili onjivaluko yange.” (Luka 22:19) Olombangi Via Yehova vi ka sambiliya ocipito colofa via Yesu Vovali, 11 ya Kupupu, wo 2017, noke yoku iñila kuekumbi. Vulandu wohongele u kuamiwa vokuenda kuowola yimosi, mua kongela ohundo yi lombolola elomboloko liolofa via Yesu kuenda ekuatiso tu tambula cilo kuenda kovaso yoloneke. Ulima wa pita, ci soka 20 kolohuluwa viomanu voluali via endele kocipito Conjivaluko. Tu ku laleka oco o likongele kokuetu koku eca olopandu omo liombanjaile ya velapo ya Suku.
^ tini. 7 Onjila ya velapo yoku kũlĩha Suku kuenda oku linga ukamba laye, oku lilongisa Ondaka yaye, Embimbiliya. Lilongisa ndomo o pondola oku ci linga poku pinga Kolombangi via Yehova ale poku yiñila vonumbi yetu yo internet, www.pr418.com.
Ove o ka ci Sola
KOKUETU
Onjivaluko Yolofa Via Yesu
Olombangi Via Yehova vi ku laleka oku enda Kocipito Conjivaluko Yolofa via Yesu ci ka lingiwa keteke 12 ya Kupupu, 2025.
ONJIVALUKO
Ocipito Conjivaluko Violofa Via Yesu
Tu ku laleka oco o kale letu kocipito conjivaluko violofa via Yesu oco o mole ndomo eye a va handelekele. Lilongisa ndomo omuenyo wa Yesu kuenda olofa viaye vi ku kuatisa.
