Olondaka viwa Viusoma wa Suku vi kasi oku kundiwa voluali luosi, ndomo Yesu a ci popele. (Mateo 24:14) Embimbiliya kelivulu lia Daniele li popia okuti, Usoma waco uviali wa Suku. Vocipama 2 celivulu liaco, mu sangiwa ocitumasuku cimue catiamẽla koku tumbikiwa kuenda koku nyõliwa kuolofeka vimue via pama, tunde ko Bavulono yosimbu toke koloneke vilo. Elivulu lia Daniele 2:44, li lekisa eci ci ka pita kovaso yoloneke:

“Suku yokilu o katula usoma, kuenje ka u nyolẽha, ka u tambuiwa lomanu vofeka yiñi; puãi owo u nyõla loku lia ovosoma aco osi, haiwo u kala muẽle hũ oloneke ka vi pui.”

Ocitumasuku eci Cembimbiliya kuenda vikuavo, vi lekisa okuti Usoma wa Suku u ka piñainya ovosoma osi omanu. Noke u ka nena ekalo liwa kuenda ombembua pokati komanu vongongo. Omuenyo u ka kala ndati vemẽhi Liusoma waco? Tu Kũlĩhĩsi olohuminyo vimue via Suku vi ka tẽlisiwa.

• KA KU KALA VALI UYAKI

  Osamo 46:9: “[Suku] imola ovita toke kesukiyo liongongo. O teya ohonji. O teta pokati onjelia. O yoka akãlu vondalu.”

  Sokolola ndomo oluali nda lu kasi nda okuti ukũlĩhĩso kuenda olombongo va siata oku panga lavio ovita va talavayele lavio oco vi kuatise omanu, okuti ka va pondiwa! Usoma wa Suku, oco u ka linga.

• OVOVEI KA A KALAKO VALI

  Isaya 33:24: “Layimue onungi yi popia yiti, ‘Ndi vela.’”

  Sokolola oku kala voluali lumue okuti lomue vali o ka tala ohali omo liuvei wovutima, omo liokaser, omalaria ale uvei ukuavo. Lomue o ka sukila vali ovihemba ale olosipitali. Omanu vosi va ka kuata uhayele wa lipua.

• KA KU KA KALA VALI ONJALA

  Osamo 72:16: “Vofeka mu kale olomema via lua. Vi hunge hunge kilu liolomunda.”

  Ongongo yi ka ima okulia kualua kuenda vosi va ka kuata okulia. Ka ku kala vali onjala kuenda ehonguo omo liekambo liokulia.

• EVALO, OHALI KUENDA OKU FA KA VI KALAKO VALI

  Esituluilo 21:4: “[Suku] o puenya asuelẽla osi vovaso avo, oku fa ka ku kalako vali, ndaño oku lila loku liyula lupongo ka vi ka kalako vali. Ovina viatete via pita.”

   Eci ci lomboloka okuti omuenyo u ka li pua kuenda ka u kuata esulilo. Ongongo yi ka kala ocumbo celau! Eci oco ululiki wetu Yehova Suku a likuminya.

Anga hẽ ohuminyo eyi yocili? Omanu valua va sima okuti olohuminyo Viembimbiliya vi komohĩsa. Pole, omo liasunga alua, komanu vamue ka ca lelukile oku tava kocisimĩlo coku kala otembo ka yi pui. Eci ka ci komohĩsa, momo lomue handi wa kuatele omuenyo waco kuenje o tu lomboluilako.

Omanu vosi va siata oku lueya kuenda va fa. Handi vali, omo liohali kuenda ovitangi omanu va siata oku liyaka lavio, va sima okuti oco omuenyo u kasi. Pole, hawoko omuenyo ululiki wetu Yehova Suku, a tu yonguilile.

Oco tu kuatisiwe oku kolela okuti Suku o ka tẽlisa ovina viosi a likuminya, eye wa popia ndoco catiamẽla kolohuminyo viaco: “Ka yi tiukila ño kokuange, puãi yi linga ndeci nda panga oku tẽlĩsa, leci nda yi tumĩla.”—Isaya. 55:11.

Embimbiliya li popia okuti Yehova Suku “lalimue eteke a kemba.” (Tito 1:2) Eye wa likuminya ovina vialua vi komohĩsa a ka linga kovaso yoloneke. Omo liaco, ca sunguluka oku talama loku sokolola ndoco: Anga hẽ omanu va pondola oku kala otembo ka yi pui Vocumbo Celau palo posi? Nye tu sukila oku linga oco tu mole oku tẽlisiwa kuohuminyo ya Suku? Kamẽla a kuãimo yorevista yilo, o ka sangamo atambululo apulilo a lingiwa ndeti.