Kefetikilo Liutala ulo Wondavululi, tua lombolola ulandu watiamẽla ku Creso una wa kembiwa locitunda co ko Delfos kuenje wa yuliwa kuyaki a linga la soma yo ko Persia. Vembimbiliya mu sangiwavo ocitumasuku cimue ci komõhisa catiamẽla ko soma yo ko Persia okuti, olonepa viosi viocitumasuku caco via tẽlisiwa.

Eci kua kambele 200 kanyamo osimbu soma yo ko Persia ka citiwile, uprofeto Isaya u Heveru wa tukula onduko ya soma Kuro kuenda wa lombolola ndomo eye a laikele oku yula olupale luo Bavulono.

Isaya 44:​24, 27, 28: “Yehova eci a popia, ceci, hati, . . . ‘Haime mopia lokalunga siti, “Kukuta. Nakatisa olondui viove.” Ame muẽle nukula Kuro siti, “Eye ungombo wange, o lemulula ocipango cange cosi.” Nukula Yerusalãi siti, “Yi tungiwa.” Mopia lonembele siti, “Ociseveto cove ci sevetiwa.” ’ ”

Ndomo ca lomboluiwa la Heródoto ulume umue ukuovolandu wo kofeka yo Helasi, olohoka via Kuro via yapula ovava Olui Ferati, luna lua pitile pokati kolupale luo Bavulono. Kuenje ovava a tepuluka. Esokiyo Kuro a linga lia ecelela okuti olohoka viaye vi iñila volupale poku yoka olui. Kuro noke yoku tambula olupale, wa yovola va Yudea va kala kumandekua ko Bavulono kuenda wa ecelela okuti ovo va tiukila oco va tumbulule o Yerusalãi okuti tunde eci ya nyõliwa pa pitile ale 70 kanyamo.

Isaya 45:1: “Yehova wa popia lombuavekua yaye Kuro. Kuro eye una ndo kuata peka liondio okuti o yula olofeka loku itula olombunda violosoma okuti apito o yuluilua lolombundi ka vi yiliwa.”

Olohoka vio ko Persia via iñila vo Bavulono poku pita polombundi violupale okuti via sialele upulule. Va Bavulono nda va kũlĩhĩle esokiyo lia Kuro, ovo nda va yika apito osi a kala kohulo yolui. Pole, ovo ka va ci lingile kuenda olupale ka lua kuatele eteyuilo.

Eci cimue pokati kovitumasuku vialua Viembimbiliya okuti, olonepa viosi viocitumasuku caco via tẽlisiwa. a Omanu valua va kuete ocituwa coku tahã, va siata oku popia okuti, esapulo liaco li tunda kolosuku viavo viesanda, pole, ovitumasuku Viembimbiliya vi tunda ku Una wa popia hati: “Tunde kefetikilo ndukuakusapula ovina ka via lingiwile handi.”​—⁠Isaya 46:⁠10.

Yehova Suku yocili eye lika o pondola oku popia olondaka evi. Ocili okuti, onduko yaye yi lomboloka okuti,  “Eye o Linga Eci a Panga Oku Linga.” Onduko yaco yi lekisa okuti eye wa kũlĩha eci ci keya kovaso yoloneke, loku pongolola ovina ndomo ci likuata locipango caye. Eci ci tu vetiya oku kolela okuti eye o ka tẽlisa olohuminyo viaye viosi.

Ove hẽ o yongola oku kũlĩha eci ovitumasuku Viembimbiliya vi popia catiamẽla koloneke vietu? Pa pita ale 2.000 kanyamo tunde eci Embimbiliya lia popia okuti, “koloneke via sulako kuiya ohali yalua.” Oloneke via sulako vie? Ka ci lekisa okuti, oloneke via sulako viongongo ale viomanu. Pole, oloneke via sulako viuyaki, vielambalalo kuenda viohali omanu va siata oku liyaka layo vokuenda kuanyamo alua. Tu kũlĩhĩsi ovitumasuku vimue vi lekisa okuti tu kasi “koloneke via sulako.”

2 Timoteo 3:​1-5: “Koloneke via sulako . . . omanu va linga vakuakulisola ovo muẽle, vakuakusola olombongo, vakuakulipanda, vakuakulivelisapo, vakuakupembula, vakuakusinila olonjali, vakualutukãi, havakuaciliko, ka va kuete ocisola la vangadiavo, vakuamanya, vakualundi, ka va tẽla oku likandangiya, olongangala, ka va sole eci ciwa, olomakuli, vakualonamalala, vakuepela, vakuakusola ayele okuti Suku ci sule, va lilekisa ndu okuti va sumbila Suku, pole, va likala unene waye vomuenyo wavo.”

O tava hẽ okuti, koloneke vilo ovituwa evi via siata oku livokiya pokati komanu? Wa limbuka hẽ okuti, tu kasi pokati komanu va lisole ovo muẽle, vakuakusola olombongo haivo vakuakulipanda? Wa limbuka ale ndomo omanu va kisika vakuavo loku kakatela lika kovina va yongola oku linga? Ocili okuti, ove wa muile ale ndomo omãla va siata oku sinĩla olonjali viavo. Omanu valua va sole vali ayele okuti Suku ci sule. Kuenje ovina evi vi kasi oku livokiya eteke leteke.

Mateo 24:​6, 7: “Vu yeva ovita kuenda asapulo ovita. . . . Ofeka yi katukila ofeka kuenda usoma u katukila usoma.”

Omanu va siata oku popia okuti, tunde kunyamo wo 1914, etendelo liomanu va fa kovoyaki li pitahãla 100 colohuluwa viomanu. Etendelo eli lia pitahãla etendelo liomanu va kasi kolofeka vialua. Sokolola ndomo omanu va lila calua loku sumua kuenda oku tala ohali omo liovoyaki aco. Anga hẽ omanu va lilongisako cimue kuenda va malako ovoyaki aco?

Mateo 24:7: “Ku kala onjala.”

Ocipama cimue Coku Eca Okulia Voluali Luosi ca popia ndoco: “Voluali lumue okuti mua siata oku ima okulia kualua oco ku tekule ci soka 815 kolohuluwa viomanu, pokati komanu ecea omunu umosi o lala lala onjala. Handi vali, pokati komanu vatatu,umosi o vela omo liekambo liokulia.” Ulandu u lekisa okuti, unyamo lunyamo ci soka olohuluwa 3 viomãla, va fa lonjala.

Luka 21:11: “Ku kala ovilemawe.”

Unyamo lunyamo, kua siata oku pita 50.000 kovilemawe. Ci soka 100 kovilemawe via siata oku nyõla olosapalalo vialua kuenda onjanja yimosi vunyamo ku pita ocilemawe cimue cinene. Kua lingiwa ekonomuiso limue lia lekisa okuti, kunyamo wo 1975 kuenda wo 2000, ovilemawe via ponda eci ci soka 471 kolohulukãi viomanu.

Mateo 24:14: “Olondaka evi viwa Viusoma vi kundilua koluali luosi ha vi lingi uvangi kolofeka viosi, oco esulilo liya noke.”

Ci pitahãla olohuluwa ecelãla Violombangi Via Yehova, vi kasi oku kunda olondaka viwa Viusoma wa Suku koluali luosi kueci ci soka 240 kolofeka. Ovio vi kasi oku kunda olondaka viwa valupale anene, kovaimbo a kasi kupãla kuenda vovisenge lo kolomunda. Ocitumasuku ci lekisa okuti eci Suku a ka popia okuti, upange waco wa tẽlisiwa, “esulilo liya.” Eci ci lomboloka nye? Ci lomboloka okuti, uviali womanu u ka sulila kuenje kuiya uviali Wusoma wa Suku. Olohuminyo vipi vi ka tẽlisiwa vemehi Liusoma wa Suku? Amamako oku tanga orevista yilo oco o ci limbuke.