Eci ombiali ya Suku yi ka viala omanu vosi, ongongo yi ka kala ocitumãlo cimue ca posoka muna omanu va ka kala pamosi lombembua, loku linga upange uwa haiwo u sanjuisa. Suku wa nõla Yesu Kristu oco a viale ongongo. Koloneke vilo, olombiali vialua ka via kapeleko omanu. Pole, ca litepa la Yesu ceci okuti, eye olonjanja viosi o lingila omanu eci ca velapo. Uviali waye, u ka kunamẽla kohenda, kocisola, kocikembe kuenda Osoma yimue yesunga.—Isaya 11:4.

Omanu va ka kala voluali, ka va ka kala olonyitiwe violofeka via litepa. Omanu va ka likuata omunga. (Esituluilo 7:9, 10) Omanu vosi va ka kala vongongo, va ka sola Suku la vana va ka kala lavo kumosi kuenda oku talavaya lombembua, oco va tẽlise ocipango ca Suku coku tata ongongo.—Olosamo 115:16.

Eci Usoma wa Suku u ka viala ongongo, Ululiki o ka songuila ovina viosi via tiamẽla kotembo, loku ecelela okuti vi lingiwa votembo ya sokiyiwa. (Olosamo 24:1, 2) Eci Yesu a tulumula ehunguhungu liofela, wa lekisa okuti wa ci linga lunene wa Suku. (Marko 4:39, 41) Vemẽhi liuviali wa Kristu, lomue omunu o ka kuatela usumba ovilunga. Eci Usoma wa Suku u ka viala, tu ka kala lombembua lovinyama.—Hosea 2:18.

Omanu vosi va ka kuata uhayele wa lipua. Lomue o ka vela, o ka kuka ale oku fa. (Isaya 35:5, 6) Omanu va ka sanjukila ekalo limue lia fina hailio lia yela, ndeli ohueli yatete ya kuata Vocumbo Cedene. Voluali luokaliye, ndeci Vocumbo Cedene, ongongo yi ka yima okulia kualua kuenda olonungi vialio vi ka kuata ovina vialua. (Efetikilo 2:9) Ndeci ca pita lo Isareli ya Suku yosimbu, vosi Voluali luokaliye va ‘ka lia okulia [kuavo] toke eci va kuta.’—Ovisila 26:4, 5.

Vemẽhi liuviali wa Suku, omanu vosi va ka sanjukila ombembua loku tata vakuavo lohenda kuenda lesunga. Ka ku ka kala ovoyaki, oku tomba omanu omo liunene kuenje vosi va ka kuata ovina va sukila. Embimbiliya li likuminya hati: “Ovo va ka tumãla, omunu lomunu vemẽhi liuti waye wuyuva kuenda vuti waye wukuyu kuenje lomue o ka va lingisa usumba.”—Mika 4:3, 4.

Epata liosi li ka kuata onjo yimue okuti ka va kuata usumba woku tundamo kuenda tu ka sanjukila upange wosi tu ka linga. Ndomo Embimbiliya li ci popia, vana va ka kala voluali luokaliye lua Suku, “ka va ka talavaya elivova.”—Isaya 65:21-23.

Embimbiliya li likuminya ndoco: “Ongongo yi keyuka muẽle lukũlĩhĩso wa Yehova.” (Isaya 11:9) Omanu va ka kala voluali luokaliye, va ka lilongisa olondunge ka vi pui Viululiki wavo, Yehova kuenda ovina vi komõhisa eye a lulika. Ovo ka va ka talavaya lukũlĩhĩso wavo oco va pange ovota ale oku linga cimue cĩvi ku vakuavo. (Isaya 2:4) Omo liaco, va ka lilongisa ndomo va kala lombembua lavakuavo kuenda ndomo va tata ongongo.—Olosamo 37:11.

Suku wa pongiya lutate ongongo oco okuti tu kuata esanju komuenyo eteke leteke. Ocipango caye ceci okuti, omanu va kala vongongo otembo ka yi pui. (Olosamo 37:29; Isaya 45:18) Oco Suku a tẽlise ocipango caye catete, eye “o ka malako oku fa otembo ka yi pui.” (Isaya 25:8) Embimbiliya li likuminya ndoco: “Eye o ka puenya asuẽlẽla osi vovaso avo, oku fa ka ku ka kalako vali.” (Esituluilo 21:4) Suku o ka eca komanu vosi oku kongelamo vana eye a ka popela, epuluvi lioku kala otembo ka yi pui eci a ka kundula oluali lulo lua vĩha kuenda omanu valua a ka pindula oco va kale voluali luokaliye.—Yoano 5:28, 29; Ovilinga 24:15.

 Koloneke vilo, olohuluwa viomanu vi kasi oku lipongiyila oku ka kala voluali luokaliye lu kasi oku iya. Ndaño ka va lipuile, ovo va likolisilako oku kala omanu Suku a yongola okuti, ovo va ka tunga voluali luokaliye. Ndamupi? Poku lilongisa catiamẽla ku Yehova kuenda ku una eye a tuma, Yesu Kristu.—Yoano 17:3.

Kũlĩha ovina vikuavo vi lekisa ndomo o pondola oku puluka kesulilo lioluali lulo kuenda oku ka kala voluali luokaliye lu laika oku iya. Tava oku lilongisa Embimbiliya ocali Lombangi yimue ya Yehova velivulu losapi Sanjukili Omuenyo Otembo ka yi pui!