Nda citiwila kutundilo kofeka yo Fransa vimbo limue li tukuiwa hati, Mulhouse. Omanu vaco va kũlĩhĩwile okuti olonalavayi haivo olongangala. Vutila wange ndi ivaluka lika ungangala wa enda oku lingiwa pokati kapata. Vepata lietu, akãi va enda oku sepuiwa, kuenda alume ka va kuatele ocituwa coku sapela ciwa lakãi. Nda longisiwa okuti ocitumãlo cukãi oku kala vokusinya, loku tata ulume kuenda omãla.

Omuenyo wange vutila ka wa lelukile. Isia yange wa fa luholua eci nda kala umalẽhe. Noke lianyamo atãlo, umue pokati ka vahuvange wa liponda. Kunyamo waco, nda mola omunu umue wa pondiwa lukuepata liaye noke yoku lihoya pokati, kuenje elinga liaco lia ndi sumuisile calua. Epata liange lia ndi longisa ndomo ndi pondola oku liyaka lolomoko kuenda lovota vapuluvi osi ci sukiliwa. Omo okuti olondunge viange via kala oku nyõleha, nda fetika oku yukisa etimba liange loviluvialuvia vioku litakula kuenda oku nyua calua evi vi koluisa.

Eci nda kuata 16 kanyamo, veteke nda enda oku nyua 10 ale 15 kolo serveja. Noke liotembo yimue nda fetikavo oku nyua olodroga. Oco ndi sange olombongo vioku landa ovina viaco, nda enda oku landisa ovikuata via nyolẽha kuenda oku nyana. Eci nda tẽlisa 17 kanyamo, nda kapiwile ale vokayike olonjanja vialua. Omo lioku nyana kuenda oku linga ungangala, nda sombisiwile eci ci soka 18 kolonjanja.

Eci nda kuata ci pitahãla 20 kanyamo, ovituwa viange vĩvi via livokiya. Veteke nda enda oku sipa 20 kolosikalu viodroga yimue yi tukuiwa hati marijuana lovihemba vikuavo vi koluisa. Olonjanja vialua nda puluka kolofa omo lioku pitahãla vonjongo yolodroga viaco. Nda fetika oku landisa olodroga loku ambata olomoko kuenda ovimalẽho viuyaki. Eteke limue eci nda seteka oku loya ulume umue, olusolo lua veta vocivela cuvia waye kuenje ka file. Eci nda kuata 24 kanyamo, ina yange wa fa, kuenje onyeño yange ya livokiya. Omanu poku lomboka etapalo eci va ndi mola okuti ñasi ocipepi lavo, va kuataile usumba. Omo liungangala wange, olonjanja vialua kasulilo osemana olosipayu via enda oku ndi kapa vokayike ale oku ngambata kosipitali omo liapute.

Eci nda kuata 28 kanyamo nda kuela. Pole, sia tatele ukãi wange lesumbilo. Nda enda oku u sepula loku u tipula. Pokati ketu ka pa kalele elitokeko. Nda simĩle okuti oku eca lika kukãi wange olomota via tĩla nda nyanaile oco ca velapo. Vokuenda kuotembo kueya ocina cimue sia lavokaile. Ukãi wange wa fetika oku lilongisa Embimbiliya Lolombangi Via Yehova. Noke yelilongiso liatete, wa liwekapo oku sipa, ka  tavele vali oku tambula olombongo vioku nyana, kuenda wa ndi tiuwila olomota viosi ndo wĩhile. Epongoloko liaco lia ndi temisile calua. Nda fetika oku u suvuka omo lioku lilongisa Embimbiliya, kuenje poku sipa ndi fuimĩla owisi waco kocipala caye. Nda siatele oku u popia lãvi pokati komanu tua lisunguile lavo.

Eteke limue koñolosi omo liuholua, nda timĩha onjo yetu. Ukãi wange wa ndi popela kumue lomõletu ukãi wa kuatele anyamo atãlo. Eci uholua wa pita, nda fetika oku livetela evelo. Nda simĩle okuti Suku lalimue eteke a ka ngecela. Nda ivaluka eci ocitunda cimue ca popele okuti, olondingaĩvi vi enda vondalu yifelu. Ndotolo yange wa ndi sapuililevo hati, “ekalo liomuenyo wove lĩvi calua! Ku kuete vali ongecelo.”

Noke yocilunga caco, tua ilukila konjo yolonjali viukãi wange. Eci Olombangi Via Yehova vieyile oku nyula ukãi wange, nda vi pulisa hati: “Anga hẽ Suku o pondola oku ecela akandu ange?” Ovio via ndi lekisa Vembimbiliya kukanda wa 1 Va Korindo 6:9-11, ku lekisa ovituwa ka vi taviwa la Suku. Pole, ovinimbu viaco vi amisako hati: ‘Vamue pokati kene, kosimbu, wa kaili lovituwa viaco.’ Olondaka evi via ndi kuatisa oku limbuka okuti citava oku linga apongoloko komuenyo. Noke Olombangi Via Yehova via ndi lekisa ukanda wa 1 Yoano 4:8, loku ndi lembeleka okuti Suku o ndi sole. Omo liaco, nda pinga Kolombangi Via Yehova oco vi ndi longise Embimbiliya olonjanja vivali vosemana, kuenje nda fetika oku enda kolohongele Viakristão. Nda likutilila ku Yehova olonjanja vialua.

Eci pa pita osãi, nda liwekapo oku nyua olodroga levi vi koluisa. Noke nda limbuka okuti etimba liange ka lia kuatele uhayele! Nda enda oku kuata anguengue, evalo liutue, ocikolotola, kuenda avalo akuavo. Pole, nda limbukile okuti Yehova wa kala oku ndi tata loku ndi kolisa. Nda liyeva ndeci upostolo Paulu a liyevele. Catiamẽla kekuatiso a tambuile ku Suku, wa soneha ndoco: “Kovina viosi ñuete ongusu mekonda lia una o nyĩha unene.” (Va Filipoi 4:13) Vokuenda kuotembo nda liwekapo oku sipa.—2 Va Korindo 7:1.

Embimbiliya ka lia ñuatisile lika ame, pole lia kuatisavo epata liange. Nda siapo ovituwa vĩvi nda lekasaile kukãi wange. Kuenje nda fetika oku u sumbila loku popia olondaka viokuti: “Mange ohenda” kuenda “nda pandula.” Nda fetikavo oku lekisa ovituwa vionjali yiwa komõletu ukãi. Eci pa pita unyamo loku lilongisa Embimbiliya, nda tumbika omuenyo wange ku Yehova, kuenje nda papatisiwa loku kuama ongangu yukãi wange.

Ocili okuti, olonumbi Viembimbiliya via popela omuenyo wange. Epata liange okuti Halombangiko Via Yehova, lia limbukavo okuti pamue nda nda fa omo liolodroga ale nda va ndi ponda.

Omuenyo wepata liange lia pongoloka, momo olonumbi Viembimbiliya via ndi lekisa ocikele cange coku kala ulume haeye onjali. (Va Efeso 5:25; 6:4) Tua fetika oku lingila kumuamue ovina vepata. Cilo, si ecelela vali okuti ukãi wange o kala vokusinya lika liaye, pole lesanju lialua ndu u kuatisa kovopange kuenda kupange waye wukundi wotembo yosi. Eye wa siatavo oku ndi kuatisa lesanju kocikele cange coku kala ukulu wekongelo.

Ocisola ca Yehova Suku kuenda ohenda yaye, via ndi vetiya oku pongolola omuenyo wange. Cilo, ndi kuete esanju lioku sapuila ovituwa viaco komanu vana va tendiwa okuti va nyõleha ndeci nda kala. Nda kũlĩha okuti, Embimbiliya li kuete unene woku kuatisa omanu vosi oku yelisa ekalo liomuenyo wavo kuenda oku kuata elavoko. Embimbiliya ka lia ndi longisile lika oku sola loku sumbila alume kuenda akãi, pole, lia ndi longisavo oku li sumbila ame muẽle.