“A Yehova, toke pi ndi likutilila ekuatiso liove kuenje ku yevi? Toke pi mbilikiya siti, Popela, kuenje ku popela?” (Havakuki 1:2, 3) Olondaka evi via Havakuki, ulume umue uwa wa sanjuisa Suku. Anga hẽ epingilo eye a linga lia lekisa ekambo liekolelo? Sio! Suku wa kolisa Havakuki poku u sapuila okuti wa sokiya otembo yimue yoku malako ohali.—Havakuki 2:2, 3.

Eci ove ale umue ukuepata liove a tala ohali, ca leluka oku sima okuti Suku eye wa koka ohali yaco kuenda okuti eye wa sukilile oku u teyuila. Pole Embimbiliya li tu kolisa poku popia hati: “Yehova ka livala lohuminyo yaye ndeci omanu vamue va sima, pole, eye o pandikisa lene, momo ka yongola okuti umue o nyõliwa, puãi o yongola okuti vosi va likekembela.”—2 Petulu 3:9.

Ndopo muẽle! Yesu wa situlula okuti ocitumbulukila cimue, ci ka mola ondimbukiso “yesulilo lioluali” lulo. (Mateo 24:3-42) Oku tẽlisiwa kuocitumasuku ca Yesu koloneke vilo, ci lekisa okuti, otembo Suku a sokiya yoku malako ohali omanu va siata oku tala, yi kasi ocipepi. a

Pole, Suku o ka malako ndati ohali yosi? Eci Yesu a kala palo posi, wa lekisa unene wa Suku poku tepulula ohali yomanu. Kũlĩhĩsa ovolandu amue a kuãimo.

Ovilunga: Osimbu Yesu kumue lovapostolo vaye va kala Vokalunga ko Galilea, ehunguhungu liofela lia fetika oku vombisa owato. Pole, Yesu wa lekisa okuti eye kumue la Isiaye va pondola oku tateka olongunsu violuali. (Va Kolosai 1:15, 16) Yesu wa popia hati: “Uhãko! Tulumuha!” Nye ceyililako? “Ofela ya pita kuenje kua kala etulumuho lialua.”—Marko 4:35-39.

Ovoveyi: Yesu wa kũlĩhĩwile calua omo liunene waye woku sakula olomeke, ovilema, omanu vana va kuatele ocinyonya, vakuavilundu kuenda ovoveyi akuavo. Eye “wa sakula vosi va kala oku tala ohali.”—Mateo 4:23, 24; 8:16; 11:2-5.

Ekambo Liokulia: Yesu wa talavaya lunene a tambula ku Isiaye oco a vokiye okulia kua kala kutito. Embimbiliya li lekisa okuti vapuluvi avali vokuenda kupange waye woku kunda, wa tekula olohuluwa viomanu.—Mateo 14:14-21; 15:32-38.

Olofa: Tu pondola oku limbuka okuti Yehova o kuete unene woku malako olofa poku kũlĩhisa apinduko atatu Yesu a linga. Limue pokati kapinduko aco, ceci a pindula umue wa file ale vokuenda kuoloneke vikuãla.—Marko 5:35-42; Luka 7:11-16; Yoano 11:3-44.