Suku wa sapuila Adama hati: “Eteke o lia [kuti waco], haico o fa.” (Efetikilo 2:17) Nda okuti Suku wa lulikile Adama oco a kuke kuenda oku fa, nda ka sukilile oku eca olonumbi viaco kokuaye. Adama wa kũlĩhile okuti nda ka lile kepako liuti waco, nda ka file.

Adama la Eva ka va sukilile oku lia kepako liuti waco, oco va litekule momo, vocumbo mua kala oviti vialua via imile apako. (Efetikilo 2:9) Poku yuvula oku lia kepako liuti waco, ohueli yatete nda va lekisa epokolo ku Una wa eca omuenyo kokuavo. Nda va lekisavo okuti va kapako unene wa Suku woku va songuila.

Oco tu kuate elomboloko liesunga lieci Adama la Eva va fila, tu sukila oku konomuisa ombangulo yimue yi kuete esilivilo kokuetu. Satana Eliapu wa iñila vonyõha oco a vangule uhembi umue. Ulandu Wembimbiliya u popia ndoco: “Onyõha ya velelepo oku nyanga, ovinyama viosi viovusenge via lulika Yehova Suku vi sule. Kuenje ya pula ukãi yiti, ‘Ocili Suku wa popia hati, Ko ka li koviti viosi viovocumbo, ale?’”—Efetikilo 3:1.

Eva wa tambulula hati: “Tuakuakulia kapako oviti viovocumbo; te epako liuti owo u kasi vokati kocumbo, owo Suku a linga hati, ‘Ko ka liko, ndaño oku lambako, sanga vu fa.’” Noke, onyõha ya popia lukãi yiti: “Mbu, okufa ka vu fi; momo Suku wa kulĩha okuti eteke vu liako, ovaso ene haico a letuluka kuenje vu linga nda Suku, vu kulĩha eci ciwa leci cĩvi.” Satana wa lekisa okuti Suku ohembi kuenda ka yonguile okuti Adama la Eva va kala ciwa.—Efetikilo 3:2-5.

Eva wa tava kovina a yeva. Eye wa vanja kuti waco. Ocili okuti kokuaye, ca mõlehele ndocina cimue ciwa calua! Noke wopa epako limue kuenje wa fetika oku li lia. Embimbiliya li popia hati: “Wa ecavo limue ku veyaye kuenje wa liavo.”—Efetikilo 3:6.

Ocili okuti Suku wa yeva esumuo lialua eci a mola omãla vaye oku u sinila ocipango! Nye eye a linga? Ku Adama wa popia hati: “O tiukila vali keve; momo haiko wa tundile. Ove ukueve, keve haiko o tiukila.” (Efetikilo 3:17-19) Omo liaco, “Oloneke viosi Adama a kala lomuenyo ovita ecea kanyamo kanyamo akui atatu; yu wa fa.” (Efetikilo 5:5) Adama ka endele kilu ale kocitumãlo cimue cikuavo. Osimbu Suku ko lulikile leve lioposi, eye ka kaile handi komuenyo. Omo liaco, eci eye a fa, wa pumba omuenyo kuenje wa tiukila vali keve  kuna a tundile. Ka kaile vali komuenyo. Ci sumuisa calua!

Omo okuti Adama la Eva va linga ekandu ocipango, va pumba omuenyo wa lipua kuenda epuluvi lioku kala komuenyo otembo ka yi pui. Ocitumbulukila cavo cosi, ca piñala ekandu. Pole, esino liavo ka lia kokele lika ovitangi kokuavo. Ukanda ku Va Roma 5:12, liti: “Ndeci ekandu lia iñila voluali omo liomunu umosi kuenda oku fa omo liekandu kuenje oku fa kua li sanduila komanu vosi momo vosi va linga ekandu.”

Embimbiliya li sokisa ekandu kuenda olofa ‘ndocisikĩlĩlo ca sikĩlĩla omanu vosi kuenda aluwavili a sikĩlĩla olofeka viosi.’ (Isaya 25:7) Olofa vi sikĩlĩla omanu vosi ndelende limue li kuete ohule okuti lomue o pondola oku li yuvula. Ocili okuti “ku Adama vosi va fa.” (1 Va Korindo 15:22) Ndomo upostolo Paulu a popia, epulilo li votuiwa lieli: “Helie o popela etimba liange koku fa oku?” Anga hẽ, kuli omunu umue o pondola oku ci linga?—Va Roma 7:24.