Tua Lulikiwa Oco Tu Kale Otembo ka yi Pui
HELIE pokati ketu ka sanjukila oku kala otembo yalua komuenyo kuenda oku kuata esanju? Sokolola oku kala otembo ka yi pui lesanju okuti ku yevi evalo! Nda ca tu ecelela oku linga ovongende voluali luosi, oku kuata ovoloño okaliye, loku lilongisa oku linga ovina vialua tu sole.
Anga hẽ eci hacoko vosi yetu tu yongola? Momo lie omanu va yonguila oku kala otembo yalua komuenyo? Ovisonehua vi tu sapuila okuti Suku wa tu lulika lonjongole yaco. (Ukundi 3:11) Ovio vi tu sapuilavo okuti “Suku eye ocisola.” (1 Yoano 4:8) Ca sunguluka hẽ okuti Suku umue ukuacisola, o tu lulika lonjongole yoku kala lomuenyo otembo ka yi pui, pole, ka ci tẽlisa?
Ocili okuti, lomue o yongola oku fa. Eli olio esunga lieci Embimbiliya li tukula okuti olofa “unyali” o sulako. (1 Va Korindo 15:26) Komanu vamue ndopo ci ka lipita lavo; ku vakuavo ci keya noke. Vamue va ka fa osimbu va kasi amãlehe, vakuavo va ka amamako lomuenyo vokuenda kuotembo yimue, pole, ocili ceci okuti vosi yetu tu laika oku fa. Omanu valua va yeva usumba eci va sokolola okuti eteke limue va ka fa. Anga hẽ olofa vi ka yuliwa? Ci ka tẽliwa muẽle?
UVANGI WELAVOKO TU KUETE
Anga hẽ nda wa komõha poku kũlĩha okuti Suku ka yonguile okuti omanu va fa? Embimbiliya kelivulu Liefetikilo, li eca uvangi wokuti, ocipango ca Suku ca kala cokuti omanu va kala otembo ka yi pui palo posi. Yehova Suku wa lulika ongongo lovina viosi vi sukiliwa, oco omanu va kalemo kuenda oku kuata esanju. Eye wa lulika ulume watete Adama, kuenda wo kapa vocumbo Cedene. Noke, “Suku yu wa ci mola okuti ovina viosi a lulika via posoka.”—Efetikilo 1:26, 31.
Adama wa lipuile kuenda wa lulikiwile lesetahãlo lia Suku. (Esinumuĩlo 32:4) Eva, ukãi wa Adama, wa lipuilevo. Yehova wa va sapuila hati: “Liciti, siati, yukisi oluali, lu yuli, viali kolõsi viovokalunga, lokolonjila viovusenge, lokovinyama viosi vi ñuala ñuala kilu lieve.”—Efetikilo 1:28.
Oco Adama la Eva va yukise ongongo lomãla vavo, va sukilile otembo yalua. Eva wa ponduile oku cita omãla, kuenda omãla vavo nda va citavo omãla toke eci ongongo yi yuka lomanu, ndomo ca kala ocipango ca Suku. (Isaya 45:18) Ca sunguluka hẽ oku sima okuti Yehova wa ecele ku Adama la Eva elavoko liaco, nda okuti ovo va ponduile lika oku kala komuenyo otembo yimue oco va mole omãla vavo ale pamue olonekulu okuti ka va ponduile oku va kũlĩha?
Sokololavo kocikele va kuata coku tata ovinyama. Adama wa tambuile ocikele coku eca onduko kovinyama kuenje eci nda ca sukila otembo. (Efetikilo 2:19) Pole, oco a tate ovinyama viaco, wa sukilile oku lilongisa catiamẽla kokuavio kuenda oku kũlĩha ndomo ovio via tuwa. Oku linga ovina viaco, nda ca sukila otembo yalua.
Olonumbi via Suku viatiamẽla koku yukisa oluali kuenda oku tata ovinyama, vi lekisa okuti ohueli yatete ya lulikiwa oco yi kale otembo yalua komuenyo. Ocili okuti, Adama wa kala muẽle otembo yalua komuenyo.
OCIPANGO CA SUKU CECI COKUTI OMANU VA KALA OTEMBO KA YI PUI VOLUALI LUOKALIYE PALO POSI
OVO VA KALA OTEMBO YALUA KOMUENYO
Adama, wa kala komuenyo ci soka 930 kanyamo
Metusele, wa kala komuenyo ci soka 969 kanyamo
Noha, wa kala komuenyo ci soka 950 kanyamo
Koloneke, vilo tu kala komuenyo ci soka 70 ale 80 kanyamo
Embimbiliya li lekisa okuti omanu vamue va kala otembo yalua komuenyo okuti etu ci sule. Olio liti: “Oloneke viosi Adama a kala lomuenyo ovita ecea kanyamo kanyamo akui atatu.” Olio li tukulavo ci soka alume epandu va kala komuenyo ci soka 900 kanyamo! Alume vaco vava: Seti, Enosi, Kenana, Yarede, Metusele kuenda Noha. Vosi yavo va kala komuenyo osimbu Etande liokoloneke via Noha ka lieyile kuenda Noha wamamako lomuenyo noke Yetande ci soka 600 kanyamo. (Efetikilo 5:5-27; 7:6; 9:29) Va tẽla ndati oku kala otembo yalua komuenyo?
Eci Alume vaco va citiwa, ka pa pitile handi otembo yalua tunde eci Adama la Eva va kala komuenyo kuenje va kala ocipepi loku lipua. Citava okuti eli olio esunga ovo va kalela otembo yalua komuenyo. Oku lipua ku kuete ndati elitokeko loku kala otembo yalua komuenyo? Olofa vi ka yuliwa ndati? Oco tu sange atambululo aco, tu sukila oku kuata elomboloko lieci tu kukila kuenda tu fila.