Oku Yula Unyali Wetu Okuti Kufa—Ndamupi?—Ndamupi?
NDAÑO lesino olonjali vietu viatete Adama la Eva va lekisa, loku tu nenela ekandu kuenda olofa, ka ca pongolokele ocipango ca Suku catiamẽla komanu. Pocakati Condaka yaye Embimbiliya, Suku olonjanja vialua o popia okuti ocipango caye ka ca pongolokele.
-
“Olondingesunga vi piñala ofeka, vi tungamo oloneke ka vi pui.” —Osamo 37:29.
-
“O takisa olumue okufa, kuenje Ñala Yehova o puenya asuẽlẽla kovipala viosi.”—Isaya 25:8.
-
“Kuenje unyali o sulako oku imũha, kufa.”—1 Va Korindo 15:26.
-
“Oku fa ka ku kalako vali, ndaño oku lila loku liyula lupongo ka vi ka kalako vali.”—Esituluilo 21:4.
Suku o “ka takisa” ndati ale oku malako olofa? Ndomo ca lekisiwa, Embimbiliya li popia okuti ‘olondingesunga . . . vi ka kala oloneke ka vi pui.’ Pole, li popiavo okuti “ka kuli ukuesunga kilu lieve okuti o lingainga esunga kuenje ka lueya.” (Ukundi 7:20) Anga hẽ oco Suku a maleko olofa o ka sukila oku liwekapo oku lekisa esunga liaye? Sio! Suku ka ka ci linga momo “Eye . . . lalimue eteke a kemba.” (Tito 1:2) Oco hẽ, nye Suku a ka linga oco a tẽlise ocipango caye?
SUKU O “TAKISA OLUMUE OKUFA”—ISAYA 25:8
OKU YULA OLOFA POKU FETA OCISEMBI CIMUE
Yehova Suku wa linga eliangiliyo limue liocisola, oco a yovole omanu kolofa poku feta ocisembi cimue. Ocisembi ci lomboloka ofeto yeciwa omo liocina cimue ca nyõleha ale oku feta cimue ca kisikiwa kombonge. Omo okuti tuakuakandu kuenda onima yetu oku fa, Embimbiliya li popia hati: “Lomue omunu o tẽla oku liyovola, ndaño oku iha Suku ocisembi. (Momo eyovo liomuenyo waye lia tĩla, kuenje lalimue eteke li soka).”—Osamo 49:7, 8.
Eci omunu umue ka lipuile a fa, eye o fila lika ekandu liaye muẽle; ka pondola oku liyovola ale oku fila ekandu liomunu ukuavo. (Va Roma 6:7) Tua sukilile omunu umue wa lipua, oco a ece omuenyo waye omo liakandu etu.—Va Heveru 10:1-4.
Eli olio eliangiliyo Suku a linga. Eye wa tuma omõlaye Yesu, oco a citiwe palo posi ndomunu wa lipua. (1 Petulu 2:22) Yesu wa popia okuti weyilila oku “eca omuenyo waye ndocisembi coku yovola omanu valua.” (Marko 10:45) Eye wa fa oco a tu yovele kekandu kuenda kolofa.—Yoano 3:16.
OTEMBO YIPI OLOFA VI KA YULIWA?
Koloneke vilo omo lioku tẽlisiwa kuocitumasuku Cembimbiliya, tu lete “ohali yalua,” ci lekisa okuti tu kasi “koloneke via sulako” violuali lulo. (2 Timoteo 3:1) Oloneke via sulako, vi ka sulila “keteke liesombiso loku nyõliwa kuomanu va tomba Suku.” (2 Petulu 3:3, 7) Pole, omanu vana va sole Suku va ka sumũlũisiwa ‘lomuenyo ko pui.’—Mateo 25:46.
Yesu weyilila oku “eca omuenyo waye ndocisembi coku yovola omanu valua.”—Marko 10:45
Omanu valua eci va ka pinduiwa, va ka kuata epuluvi lioku tambula omuenyo kopui. Eci Yesu a nyula olupale luo Naini, wa lekisa okuti epinduko li ka tẽlisiwa. Omõla wongunga wocimbumba cimue, wa fa kuenje Yesu “wo kuatela ohenda” kuenda wo pindula. (Luka 7:11-15) Upostolo Paulu wa popia hati: “Kuenje ñuete elavoko ku Suku . . . okuti ku laika oku kala epinduko lia vakuesunga lava havakuesungako.” Elavoko liaco li komõhĩsa, li situlula ocisola Suku a kuetele omanu.—Ovilinga 24:15.
Omanu valua va ka pinduiwa oco va kale otembo ka yipui. Embimbiliya li popia hati: “Olondingesunga vi piñala ofeka, vi tungamo oloneke ka vi pui.” (Osamo 37:29) Kotembo yaco, ovo va ka kuata esanju lialua kuenda va ka pamisiwa lolondaka upostolo Paulu a popia okuti pa pita ale 2.000 vianyamo viokuti: “A kufa, oku yula kuove ku kasi pi? A kufa evalo liove li kasi pi?” (1 Va Korindo 15:55) Unyãli wa velapo womanu okuti olofa, u ka yuliwa!