Suku wa likuminya kuprofeto Avirahama, okuti umue pokati kombuto yaye wa laikele oku nenela asumũlũho “olofeka viosi vio kilu lieve.” (Efetikilo 22:18) Helie wa laikele oku kala ombuto yaco?

Ci panda 2.000 kanyamo a pita, Suku wa eca ku Yesu una wa kala ombuto ya Avirahama, unene woku linga ovikomo. Ovikomo viaco via lekisa okuti, ohuminyo ya lingiwile ku Avirahama ya laikele oku pitĩla kolofeka pocakati ca Yesu. —Va Galatia 3:14.

Ovikomo Yesu a linga, via situlula okuti eye una Suku a nõla oco a sumũlũise omanu kuenda via sitululavo ndomo Suku a ko songuila oco asumũlũise omanu otembo ka yi pui. Kũlĩhĩsa ndomo ovikomo via Yesu, vi situlula vimue pokati kovituwa viaye vi komohĩsa.

Ohenda—Yesu wa sakula olombei.

Eteke limue ulume umue ukuavilundu wa livondela ku Yesu oco o sakule. Yesu wo lamba loku u sapuila hati “Nda panga!” Vonjanja yaco haico ovilundu vio tunda. —Marko 1:40-42.

Ocali—Yesu wa tekula vana va kala lonjala.

Yesu ka yonguile okuti omanu va kala onjala. Eteke limue, locikomo wa tekula omanu valua lolombolo vitito kuenda olõsi vitito. (Mateo 14:17-21; 15:32-38) Noke lioku lia, vosi ve kuta kuenda pa supa okulia kualua.

Ocikembe—Yesu wa pindula ava va fa.

Yesu omo lioku vetiyiwa ‘lohenda,’ wa pindula omõla wongunga wocimbumba, momo ka kuatele vali umue wa ponduile oku u tata. —Luka 7:12-15.