UNGANGALA VEPATA KUENDA OKU PUTUIWA: Ulandu umue wo kofeka yo Estados Unidos wa lekisa okuti: “Pokati kakãi vatatu, umosi wa lipita ale lungangala vepata ale oku putuiwa lulume waye.” Handi vali, “voluali luosi pokati kakãi vatãlo, umosi wa putuiwa ale wa setekiwa oku putuiwa.”

UNGANGALA VOLOKOLOLO: Ovolandu a lekisa okuti kofeka yo Estados Unidos kuli eci ci pitahãla 30.000 kovisoko viomanu va siata oku linga ungangala. Kofeka yo Amerika Latina, pokati komanu vatatu, umosi wa lipita locitangi cungangala.

OKU PONDIWA: Ovolandu a lekisa okuti, vokuenda kunyamo umosi omanu valua va pondiwa okuti etendelo liomanu va fa vuyaki ci sule. Kolofeka vio kombuelo yo Afrika kuenda ko América Central ku sangiwa etendelo lialua liomanu va pondiwa okuti etendelo liaco li pitahãla etendelo liomanu va pondiwa voluali luosi. Kofeka yo América Latina ci pitahãla 100.000 komanu, va pondiwa vokuenda kunyamo umosi, kuenda kofeka yo Brasil etendelo liomanu va pondiwa li panda eci ci soka 50.000. Anga hẽ eteke limue ungangala u ka pua?

Momo lie voluali mu sangiwila ungangala walua? Kuli asunga alua oku kongelamo ovina vimue ndeci: Ovitangi viuhũkui kuenda ekambo liolombongo, omãla va setukula ungangala u lingiwa lakulu, uholua kuenda oku sipa eliamba, omanu ka va sumbilile omuenyo wa vakuavo kuenda elianjo li kasi pokati komanu vana va litumbika koku linga ungangala.

Ocili okuti, kolonepa vialua violuali ungangala wa siata oku tepuluka. Omanu va kasi volupale luo São Paulo kofeka yo Brasil, va lombolola okuti vokuenda kuanyamo akũi a pita, etendelo liomanu va pondiwa lia tepuluka ci soka 80 koloporsendu. Pole, volupale luaco muli ungangala walua, kuenda pokati keci ci soka 100.000 komanu, ku pondiwa eci ci soka 10 komanu. Nye ci pondola oku kuatisa oku malako ungangala waco?

Ocina cimue ci pondola oku malako ungangala ci panga onepa kovilinga kuenda kovituwa viomanu. Omanu va siata oku linga ungangala okuti va lekisa epela kuenda ocipululu, va sukila oku lekisa ovituwa ndeci ocisola, esumbilo kuenda oku kapako vakuavo.

Nye ci vetiya omanu oku linga apongoloko aco? Sokolola ovina Embimbiliya li longisa:

• “Eci oco ci lomboloka ocisola ca Suku okuti, tu pokola kovihandeleko viaye.”​—1 Yoano 5:3.

• “Oku sumbila Yehova oko oku suvuka evĩho.” *​—Olosapo 8:13.

Oku kuatela ocisola Suku kuenda oku lekisa esumbilo kokuaye, ci pondola oku kuatisa omunu ongangala oku linga apongoloko komuenyo waye. Anga hẽ, eci oco ca siata oku pita lomanu?

 Kũlĩhĩsa ulandu wa Alex, * okuti wa kala vokayike kofeka yo Brazil vokuenda kueci ci soka 19 kanyamo omo wa kala ocimunu. Kunyamo wo 2000 wa fetika oku lilongisa Embimbiliya kuenje wa linga Ombangi ya Yehova. Anga hẽ, wa siapo ovituwa viaye viungangala? Ocili okuti Alex wa siapo ovituwa viaco kuenda wa likekembela omo liovina vĩvi a linga kosimbu. Eye wa popia hati: “Ndi lekisa ocisola ku Suku omo okuti wa ecela akandu ange lutima wosi. Oku lekisa olopandu kuenda ocisola ku Yehova ca siata oku ñuatisa oku pongolola ovisimĩlo viange.”

César okuti o kasivo kofeka yo Brasil, wa enda oku nyana omanu luta. Wa litumbikile komuenyo waco vokuenda kueci ci soka 15 kanyamo. Nye co kuatisa oku linga apongoloko komuenyo waye? Osimbu a kala vokayike, Olombangi Via Yehova via sapela laye kuenje wa lilongisavo Embimbiliya. César wa lombolola hati: “Nda limbuka ocimãho comuenyo wange. Nda lilongisa oku sola Yehova. Nda lilongisavo oku u sumbila, kuenje cilo ndi kuete usumba woku linga ovina vi sumuisa Yehova. Ndi yongola oku lekisa olopandu omo liohenda yaye. Ocisola kuenda esumbilo, via ndi vetiya oku linga apongoloko.”

Ovolandu aco a tu longisa nye? Ovolandu aco a tu longisa okuti Embimbiliya li kuete unene woku pongolola omuenyo womanu poku pongolola ovisimĩlo viavo. (Va Efeso 4:23) Alex wa tukuiwa kefetikilo, wa popia vali hati: “Ovina nda lilongisa Vembimbiliya via kala ndovava a yela a pesiwa kokuange, okuti via ndi yelisa poku pongolola ovisimĩlo viange ka via sungulukile. Sia la sima okuti ovina viaco vi ka pita komuenyo wange.” Ocili okuti nda tua yukisa ovisimĩlo vietu lovina Embimbiliya li longisa, ci pondola oku tu kuatisa oku yuvula ovisimĩlo ka via sungulukile. Ondaka ya Suku yi kuete unene woku linga apongoloko. (Va Efeso 5:26) Oyo yi pondola oku kuatisa omanu olongangala kuenda vakuepela oku lekisa umbombe kuenda oku kala vakuambembua. (Va Roma 12:18) Ovo va kuete ombembua omo lioku kapako olonumbi Viembimbiliya komuenyo wavo.​—Isaya 48:18.

Ci pitahãla olohuluwa ecelãla Violombangi Via Yehova okuti vi sangiwa kueci ci soka 240 kolofeka, via siata oku limbuka onjila yoku malako ungangala. Omanu vakuapata osi, okuti va kuete ekalo lia litepa kuenda vokolofeka via litepa, va siata oku lilongisa oku lekisa ocisola ku Suku, oku u sumbila, oku lisola pokati kuenda oku kala vakuambembua ndepata limuamue voluali luosi. (1 Petulu 4:8) Ovituwa viomuenyo wavo vi lekisa okuti, citava okuti voluali ka mu kala vali ungangala.

Embimbiliya li likuminya okuti Suku o ka malako ungangala wa siata voluali lulo. Oluali lulo lungangala u lavoka eteke “liesombiso loku nyõliwa kuomanu va tomba Suku.” (2 Petulu 3:5-7) Ka mu ka kala vali olongangala vi ka talisa ohali vakuavo. Tu pondola oku kolela ndati okuti Suku o yongola oku malako ungangala wosi?

Embimbiliya li popia hati: Suku o “suvuka u o sole ungangala.” (Osamo 11:5) Ululiki wetu o sole ombembua kuenda esunga. (Osamo 33:5; 37:28) Omo liaco, eye ka ka ecelela okuti olongangala vi kala otembo ka yi pui.

Oluali lumue luokaliye luombembua lu kasi ocipepi. (Osamo 37:11; 72:14) Momo lie ku lilongisila ovina o sukila oku linga oco o kale voluali lumue ka mu ka kala vali ungangala?