Volosãi via kuamamo Hitoshi wa sumuĩle calua omo lioku sokolola nda o ka sanga upange ukuavo. Eci Hitoshi a pulisiwa oco a iñile kupange ukuavo wa lombolola hati, ka yongola oku iñila kupange umue okuti vo kisika oku kemba. Omunu wa kala oku u pulisa wo tambulula hati, “ocisimĩlo cove ci komõhisa!” Epata kumue lakamba va Hitoshi vo vetiya oco amameko oku kala ukuacili, pole, wa fetika oku kuata atatahãi. Eye wa popia hati: “Nda lipula nda oku kala ukuacili omo liekolelo liange, ci kuete esilivilo.”

Ulandu Hitoshi a pita lawo u tu ivaluisa okuti, kuli omanu vamue ka va kapeleko ocituwa coku kala vakuacili. Omanu vamue va siata oku sima okuti, ocituwa caco ca sunguluka koku linga olomĩlu. Ukãi umue o talavaya kofeka yo Afrika do Sul wa popia hati: “Nda ñualiwa lomanu okuti ka va lekisa ocituwa coku kala vakuacili. Kuenje, olonjanja vimue va siata oku ndi vetiya calua oco ndi kuame ovituwa viavo.”

Koloneke vilo, oku kemba oyo onjila yimue omanu va siata oku kuama poku nyana. Ekonomuiso lia lingiwa vokuenda kuanyamo a pita lulongisi umue wo kosikola ya velapo yo ko Massachusetts Amherst, o tukuiwa hati Robert S. Feldman, u lombolola okuti, vokuenda kuakukutu ekũi, akulu valua va siata oku kemba onjanja yimosi vombangulo yavo. Eye wamisako hati: “Tua komõha calua eci tua limbuka ndomo etendelo liomanu va siata oku kemba lia li vokiya voluali. Ka tu yongola okuti, oku kemba ku panga onepa komuenyo wetu.” Kuli omanu vamue okuti ka va sole oku kembiwa, pole va siata oku kemba vakuavo.

Momo lie oku kemba loku nyana kuenda olonjila vikuavo vioku kemba via siatela calua koloneke vilo? Ocituwa coku kemba ca li sanduila ndati voluali luosi? Tu yuvula ndati oku litenga vovituwa viaco ka via sungulukile?