Isiange wa citiwila kofeka yo Fransa pole, ina yange kofeka yo Italia. Eci nda tẽlisa anyamo ecelãla, tua ilukila vimbo limue mua kala uhukũi walua kofeka yo Italia, volupale luo Roma. Ekalo liomuenyo ka lia lelukile. Olonjali viange via enda oku lihoya omo liekambo liolombongo.

Eci nda tẽlisa 15 kanyamo, ina yange wa ndi vetiya oku tunda konjo yetu oco ndi kale lakamba. Kuenje, nda fetika oku kala lakamba vokuenda kuotembo yimue, loku tiukala konjo olonjanja vimue. Vokuenda kuotembo nda sanga akamba vãvi. Eteke limue, ulume umue wa kala ndu okuti ekamba liange, weya ponẽle yange. Kuenje wa nyiha olodroga, momo, nda yonguile oku kala ndukulu. Noke, nda fetika oku nyua olodroga, kuenda oku linga ovina via vĩha. Nda kuatiwa lomanu vamue olonjanja vialua, kuenje va lipekela lame. Omuenyo ka wa kuatele vali esilivilo kokuange, kuenda sia kuatele esakalalo lioku fa, ale lioku kala komuenyo. Nda sumuile calua omo lioku kala ulika. Eci nda tẽlisa 16 kanyamo, nda nyuile elitulu lio whiskey oco ndi li ponde, kuenje, nda wila vociva cimue covava. Noke, nda kala oloneke vitatu okuti si vangula.

Ndaño okuti nda likolisilako oco ndi sange ovina ndi sukila, pole, nda fetika oku linga ovina viungangala kuenda oku nyana. Nda kuatele ocituwa coku lipekela lomanu vamue volonjo viavo, kuenda oku va ĩha olodroga oco ndi nyane ovina viavo vi kuete esilivilo. Asongui voku linga ungangala va enda oku ndi tuma oku landisa olodroga vofeka yo Italia. Nda kuatiwile lolosipayu olonjanja vialua. Omuenyo wange wa kala ndu okuti ka u kuete esilivilo. Pole, nda kũlĩhĩle okuti kuli esunga lieci ndi kasilili komuenyo. Omo liaco, nda likutilila ku Suku oco a nyihe lika unyamo umosi wombembua kuenda wesanju.

Omo liupange wange woku landisa olodroga, omuenyo wange wa kala kohele. Osimbu sia ilukile vofeka yo Inglaterra, nda ka nyulile ina yange, kuenje nda komõha calua eci nda mola ulume umue o tukuiwa hati Annunziato Lugarà okuti, wa kala loku sapela laye catiamẽla Kembimbiliya. * Omo okuti nda kũlĩhĩle ulandu waye wungangala,  nda kuata usumba, kuenje ndo pulisa esunga lieci a endelele konjo ya ina yange. Eye wa ndi sapuila apongoloko a linga komuenyo waye, oco a linge Ombangi ya Yehova. Kuenje, wa ndi vetiya oco ndi sapele Lolombangi Via Yehova, eci ndi tiukila kofeka yo Inglaterra. Nda tava kevetiyo liaye. Pole, eci nda pitĩla vofeka yaco, nda fetika vali oku ambata omuenyo wosimbu.

Eteke limue, eci nda kala vokololo mua siata oku pita omanu valua volupale luo Londre, nda li sanga Lombangi yimue ya Yehova, kuenje ya nyiha Utala Wondavululi lo Despertai!. Eci nda ivaluka ohuminyo nda lingile ku Annunziato, nda pula Kombangi ya Yehova nda yi pondola oku ndi longisa Embimbiliya.

Ovina nda lilongisa Vembimbiliya via ndi komõhisa calua. Nda komõhavo lolondaka vi sangiwa vukanda 1 Yoano 1:9, u popia hati: “Nda tua litavela akandu etu, omo okuti eye wa kolelua haeye ukuesunga, ecela akandu etu.” Ocinimbu eci Cembimbiliya ca ndi komõhisa calua, momo nda simĩle okuti nda vĩha omo liovina vĩvi nda enda oku linga komuenyo wange. Noke, nda fetika oku endaenda kolohongele Vonjango Yusoma Yolombangi Via Yehova. Kuenje, Olombangi Via Yehova via ndi tambula lesanju. Eci nda limbuka ukamba wa kala pokati kavo okuti owo nda yonguile oku kuata, nda lekisa onjongole yoku panga onepa kekongelo liaco li kasi ndepata.

Ndaño okuti ca lelukile oku liwekapo oku nyua olodroga loku siapo omuenyo wa vĩha ndambatele, pole oku ivalako ovina viosi vĩvi nda enda oku linga ka ca lelukile. Kuenje, nda limbuka okuti ndi sukila oku tata omanu lesumbilo, kuenda oku va kapako. Toke cilo nda siata oku liyaka lovisimĩlo vimue ka via sungulukile. Pole, lekuatiso lia Yehova nda siata oku pamisa ekolelo liange. Noke yoku lilongisa Embimbiliya vokuenda kuolosãi epandu kunyamo wo 1997, nda nõlapo oku papatisiwa, kuenje nda linga Ombangi ya Yehova.

Eci umue pokati kakamba vange a limbuka apongoloko nda linga, wa fetikavo oku lilongisa Embimbiliya. Vokuenda kuotembo, eye kumue la kota liaye ukãi va linga Olombangi Via Yehova. Noke, nyokulu yaye wa kuata ci pitahãla 80 kanyamo, wa fetikavo oku lilongisa Embimbiliya, kuenje osimbu ka file wa papatisiwa.

Cilo ndukulu wekongelo, kuenda ame lukãi wange tua litumbika kupange wakundi votembo yosi. Kuenje, tu kasi oku longisa Embimbiliya komanu va vangula elimi lio Italianu volupale luo Londre. Olonjanja vimue nda siata oku sumua omo lioku sokolola omuenyo ndambatele kosimbu. Pole, ukãi wange Barbara wa siata oku ndi kuatisa calua. Cilo ndi kuete epata limue li kuete esanju okuti, olio nda yonguile oku kuata kosimbu. Ndi kuetevo Isia umue ukuacisola okuti, eye nda yonguile oku kuata kosimbu. Ndaño okuti nda pingile ku Suku oco a nyihe lika unyamo umosi wombembua kuenda wesanju pole, wa nyiha ovina vialua okuti, evi nda pingile vi sule!