1. Tu pondola oku sanjuisa ndati Yehova?

 SOKOLOLA okuti, ove eca ombanjaile yimue yi likasi komunu umue ove o sole. Ombanjaile yaco ya fina kuenda yi kuetevo esilivilo lialua komunu waco. Pole, omunu waco o soleka ombanjaile yaco vokasia yimue kuenje ivalako. Ocili okuti, eci ci pondola oku ku sumuisa calua! Pole, nda omunu wa kapako ombanjaile yaco loku ku sapuila okuti wa yi sola, ci pondola oku ku sanjuisa calua. Ulandu owu u likuata ndati locisembi? Yehova wa eca Omõlaye kokuetu. Ocili okuti, eye o sanjuka calua eci a limbuka okuti tua sanjukila ombanjaile yaco yi kuete esilivilo lialua kuenda ocisola eye a lekisa poku eca ocisembi kokuetu.—Yoa. 3:16; Va Rom. 5:7, 8.

2. Nye tu konomuisa vocipama cilo?

² Vokuenda kuotembo, citava okuti tu ivalako esilivilo liocisembi. Volondaka vikuavo, ci kasi ndu okuti tua kapa vokasia ombanjaile yaco yi kuete esilivilo lialua Yehova a tu ĩha. Etu tu sanjuka oku kũlĩha okuti ombanjaile yaco yi kasi vokasia, pole, lalimue eteke tua yi sokoluile. Oco ka ci ka lipite letu, otembo lotembo, tu sukila oku ivaluka kovina Yehova la Yesu va tu lingila. Ocipama cilo, ci ka tu kuatisa oku ci linga. Tu konomuisa asumũlũho tu kuete cilo kuenda ava tu ka kuata kovaso yoloneke omo liocisembi. Tu konomuisavo eci tu sukila oku linga oco tu lekise olopandu vietu kocisola Yehova a tu kuetele, ca piãla enene, osimbu handi osemana Yocipito Conjivaluko ka ya pitile kuenda noke Yonjivaluko.

ASUMŨLŨHO TU KUETE CILO

3. Esumũlũho lipi tu kuete ale cilo omo liocisembi?

³ Cilo, tu kuete asumũlũho alua omo liocilumba cocisembi ca Yesu. Ndeci, omo liocisembi, Yehova ecela akandu etu. Eye ka ci lingi omo liekisika. Eci Yehova a yongola oku tu ecela. Ukualosamo wa lekisa olopandu omo liongecelo ya Yehova  kuenje wa popia hati: “Ove uwa a Yehova, kuenda olonjanja viosi wa likapelako oku ecela.”—Osa. 86:5; 103:3, 10-13.

4. Ku velie Yehova a lingila eliangiliyo liocisembi? (Luka 5:32; 1 Timoteo 1:15)

⁴ Vamue va sima okuti ka va sesamẽla ongecelo ya Yehova. Pole, ocili ceci okuti, lomue pokati ketu o yi sesamẽla. Upostolo Paulu wa kũlĩhĩle okuti ka “sesamẽla oku tukuiwa upostolo.” Pole, ndaño ndoco eye hati: “Ñuete ocikele caco omo liohenda ya piãla ya Suku.” (1 Va Kor. 15:9, 10) Eci tu likekembela akandu etu Yehova o tu ecela. Momo lie? Hamomoko tu sesamẽla, pole, momo eye o tu sole calua. Omo liaco, nda ove wa sumua poku sima okuti ku sesamẽla ongecelo ya Yehova, ivaluka okuti eye ka lingile eliangiliyo liocisembi komanu va lipua okuti lalimue eteke va lueya, pole, komanu vakuakandu vana va likekembela.—Tanga Luka 5:32; 1 Timoteo 1:15.

5. Anga hẽ tu sukila oku sima okuti tu kuete omoko yoku tambula ongecelo ya Yehova? Ci lombolola.

⁵ Lomue pokati ketu o sukila oku sima okuti, o kuete omoko yoku tambula ongecelo ya Yehova, ndaño okuti eye o kasi ale oku u vumba vokuenda kuanyamo alua. Ocili okuti, Yehova wa kapako kuenda ivaluka ovina viosi tuo lingila ale. (Va Hev. 6:10) Yehova poku tu ĩha omõlaye ndombanjaile, ka ci lomboloka ofeto yimue omo liupange tua siata oku u lingila. Omo liaco, ka ca sungulukile oku sima okuti tu sesamẽla ongecelo ya Yehova, ale eye o sesamẽla oku tu tata lonjila yimue yi likasi. Oku sima ndoco, ci kasi ndoku popia okuti Kristu ka sukilile oku tu fila.—Sokisa la Va Galatia 2:21.

6. Momo lie Paulu a likolisililako calua kupange wa Yehova?

⁶ Paulu wa kũlĩhĩle okuti lalimue eteke a sesamẽlele ohenda ya Yehova. Oco hẽ, momo lie eye a likolisililako calua oku linga upange wa Yehova? Eye wa ci lingila, oco a lekise olopandu vialua omo liuwa kuenda ohenda Yehova a lekisa kokuaye. (Va Efe. 3:7) Ndeci ca linga Paulu, etu tuamamako oku vumba Yehova lombili, hamomoko tu sesamẽla ongecelo yaye, pole, oco tu lekise olopandu vietu kovina viosi eye a tu lingila.

7. Esumũlũho lipi likuavo tu kuete omo liocisembi? (Va Roma 5:1; Tiago 2:23)

⁷ Esumũlũho likuavo tu kuete cilo omo liocisembi, epuluvi lioku kuata ukamba uwa la Yehova. a Ndomo tua ci konomuisa ale vocipama ca pita, etu ka tua citiwile okuti tu kuete ale ukamba la Suku. Pole, omo liocisembi tu pondola oku kuata “ombembua la Suku” loku kala akamba vaye.—Tanga Va Roma 5:1; Tiago 2:23.

8. Momo lie tu ecela olopandu ku Yehova omo liombanjaile yohutililo?

⁸ Konomuisa onjila yikuavo yoku kuata ukamba la Yehova okuti, ombanjaile yohutililo. Yehova ka yevi lika olohutililo vi lingiwa eci tu liongolola poku u fendela, pole, eye o yevavo olohutililo omunu lomunu a linga eci a kasi lika waye. Ohutililo yi pondola oku tulumula utima wetu, loku tu ĩha ombembua. Ohutililo yi tu kuatisa kovina vialua. Oyo yi tu kuatisa oku pamisa ukamba wetu la Yehova. (Osa. 65:2; Tia. 4:8; 1 Yoa. 5:14) Eci Yesu a kala palo posi, olonjanja viosi wa likutilila momo wa kũlĩhĩle okuti, Yehova wa kala oku u yevelela. Eye wa kũlĩhĩlevo okuti oku likutilila ca laikele oku pamisa ukamba waye la Yehova. (Luka 5:16) Omo liaco, tu eca olopandu vialua omo okuti, pocakati cocilumba ca Yesu, tu pondola oku kuata ukamba la Yehova kuenda oku vangula laye lutima wosi!

 ASUMŨLŨHO TU PONDOLA OKU KUATA KOVASO YOLONEKE

9. Asumũlũho api afendeli va Yehova va ka kuata kovaso yoloneke omo liocisembi?

⁹ Asumũlũho api afendeli va Yehova va ka kuata kovaso yoloneke omo liocisembi? Va ka tambula omuenyo ko pui. Omanu valua va sima okuti ka ci tẽliwa, momo olofa vi panga onepa kokuetu. Pole, tunde kosimbu, ocipango ca Yehova ceci okuti, omanu va kala komuenyo otembo ka yi pui. Nda Adama ka lingile ekandu, lomue nda wa sima okuti ka ci tẽliwa oku kala otembo ka yi pui. Ndaño okuti, cilo ka ca lelukile oku tava kocisimĩlo coku kala komuenyo otembo ka yi pui, tu pondola oku ci kolela, momo tua kũlĩha okuti Yehova wa feta ondando yinene okuti, omuenyo Womõlaye oco ci tẽliwe.—Va Rom. 8:32.

10. Elavoko lipi olombuavekua kuenda olomeme vikuavo vi kuete?

¹⁰ Esumũlũho limue linene kokuetu oku ka kuata omuenyo ko pui kovaso yoloneke. Pole, cilo tu pondola oku sokolola ndomo owo u ka kala kuenda Yehova o yongola okuti tu ci linga. Olombuavekua vi lavoka oku kuata omuenyo umue u komõhisa oko kilu kuenda esumũlũho lioku viala ongongo kumue la Kristu. (Esit. 20:6) Olomeme vikuavo vi lavoka calua oku kala vocumbo celau palo posi, muna okuti ka mu ka kala vali evalo, ohali kuenda esumuo. (Esit. 21:3, 4) Ove hẽ wa tiamẽla kolomeme vikuavo vina vi kuete elavoko lioku kala palo posi otembo ka yi pui? Elavoko liaco, ka yi lomboloka ño ombanjaile yimue yelembeleko. Eci oco ca kala ocipango ca Yehova tunde eci a lulika omanu. Omuenyo ka u pui palo posi, u ka tu nenela esanju lialua.

11-12. Api amue pokati kasumũlũho tu lavoka kovaso yoloneke Vocumbo Celau? (Talavo ociluvialuvia.)

¹¹ Sokolola ndomo omuenyo wove u ka kala Vocumbo Celau palo posi. Lalimue eteke o ka kuatela vali usumba oku vela kuenda oku fa. (Isa. 25:8; 33:24) Yehova o ka ku ĩha ovina viosi viwa ove o yongola. Ovina vipi o yongola oku lilongisa? O yongola hẽ oku lilongisa vali calua catiamẽla kovinyama? O kuete hẽ  onjongole yoku lilongisa oku sika? O yongola hẽ oku lilongisa oku pindala? Ocili okuti, voluali luo kaliye, tu ka sukila omanu va kuate uloño woku sokiya ndomo olonjo vi ka tungiwa, vakuakutunga kuenda vakuakulima. Tu ka sukilavo omanu va ka pongiya ovikulia, oku tela ovimalẽho vioku talavaya kuenda oku tata olonelẽho. (Isa. 35:1; 65:21) Eci o ka kala otembo ka yi pui, o ka kuata otembo yalua yoku mioñolola ovoloño osi o yongola.

¹² Sokolola esanju tu ka kuata poku ka tambula vangandietu va fa! (Ovil. 24:15) Sokolovo esanju tu ka kuata poku kũlĩha ovina vialua Yehova a lulika kuenda oku lilongisa vali calua catiamẽla kokuaye. (Osa. 104:24; Isa. 11:9) Ca velapo vali, oku ka fendela Yehova okuti lalimue eteke tu lueya! Anga hẽ ca velapo oku pumba asumũlũho aco o kovaso yoloneke, loku a piñainya ‘lasanju ekandu ana a pua pua?’ (Va Hev. 11:25) Ocili okuti sio! Alikolisilo osi tu linga cilo, ka a sokisiwa lomuenyo wesanju tu ka kuata kovaso yoloneke. Ivaluka okuti, ohuminyo yocumbo celau ka yi ka kala ocina cimue tu ka lavoka otembo yosi. Kuiya otembo okuti, oyo yi ka tẽlisiwa muẽle ocili. Momo, Yehova wa tu sola calua poku tu ĩha omuenyo Womõlaye wa soliwa!

LEKISA OLOPANDU VIOVE OMO LIOCISOLA CA YEHOVA

13. Tu lekisa ndati olopandu ku Yehova omo lioku tu ĩha ocisembi? (2 Va Korindo 6:1)

¹³ Tu lekisa ndati olopandu omo Yehova a tu ĩha ocisembi? Poku pitisa kovaso upange waye komuenyo wetu. (Mat. 6:33) Ocili okuti Yesu “wa fila vosi oco okuti, vana va kasi lomuenyo ka va li sanjuisa ovo muẽle, te oku sanjuisa una wa va fila kuenje wa pinduiwa.” (2 Va Kor. 5:15) Yehova uwa calua kuenda o tu ecela. Poku likolisilako oku linga cosi ci kasi vepondolo lietu oco tu vumbe Yehova, tu lekisa okuti tua limbuka ovina Yehova a siata oku tu lingila kuenda tua sanjukila ovina viaco.—Tanga 2 Va Korindo 6:1.

14. Tu lekisa ndati okuti tua kolela kolonumbi via Yehova?

¹⁴ Onjila yikuavo yoku lekisa olopandu kocisola ca Yehova, oku kolela kolonumbi viaye kuenda oku vi kuama. Tu ci linga ndati? Poku nõla onjila yimue tu yongola oku kuama, ndeci, nda tu tanga ale sio kosikola ya velapo, upanga tu yongola oku kuata, tu sukila oku ivaluka ovina Yehova a yongola okuti ovio tu linga. (1 Va Kor. 10:31; 2 Va Kor. 5:7) Eci tu nõla olonjila vi litava lolonumbi via Yehova, ekolelo lietu, lelavoko lietu lio kovaso yoloneke kuenda ukamba wetu la Yehova, vi pama calua.—Va Rom. 5:3-5; Tia. 2:21, 22.

15. Tu lekisa ndati olopandu vepuluvi Liocipito Conjivaluko?

¹⁵ Kuli vali onjila yatatu tu pondola oku lekisa olopandu omo liocisola ca Yehova okuti: Oku kala Kocipito Conjivaluko oco tu lekise ku Yehova okuti ocisembi ci kuete esilivilo lialua kokuetu. Ka tu lingi lika esokiyo lioku kala  Konjivaluko, pole, tu lalekavo vakuetu oku kalako. (1 Tim. 2:4) Lomboluila komanu vaco ovina vi ka kala Kocipito Conjivaluko. Ciwa oku lekisa ovideo losapi hati, Momo Lie Yesu a Fila? kuenda Onjivaluko Yolofa Via Yesu. Akulu vekongelo va sukila oku linga esokiyo lioku laleka vana va liwekapo oku kunda, loku enda enda kolohongele. Ivaluka esanju li pondola oku kala oko kilu, ale palo posi, eci omeme yimue yi tiuka vocunda ca Yehova! (Luka 15:4-7) Omo liaco, Kocipito Conjivaluko, ka tu sukila lika oku lama vamanji, pole, tu lamavo vana veya onjanja yatete kuenda vana va kasi ale otembo yalua okuti ka va leya vali kolohongele. Tu yongola okuti ovo va lianja poku kala letu!—Va Rom. 12:13.

16. Momo lie tu sukilila oku sokiya oku vokiya upange wetu woku kunda votembo Yocipito Conjivaluko?

¹⁶ Anga hẽ o pondola oku vokiya upange wove vokuenda kuotembo Yocipito Conjivaluko? Eli epuluvi limue lioku lekisa olopandu kovina viosi Yehova la Yesu, va tu lingila. Osimbu tu likolisilako oku linga vali calua kupange wa Yehova, tu pondola oku limbuka ekuatiso liaye kuenje ekolelo lietu kokuaye li pamisiwa. (1 Va Kor. 3:9) Handi vali, ku ka ivaleko oku tanga ovisonehua Viembimbiliya votembo Yonjivaluko vina via kunamẽla vo kalivulu Konomuisa Ovisonehua Eteke Leteke ale vulala u molẽha Vekalo Lietu Tuakristão Kuenda Oku Kunda—Ovipama Viohongele vi lingiwa vokati kosemana. O pondola oku kuama ulandu waco kelilongiso liove lio pokolika.

17. Ocina cipi ci sanjuisa Yehova? (Talavo okakasia losapi hati, “ Ndomo tu Lekisa Olopandu Omo Liocisola ca Yehova.”)

¹⁷ Pamue omo liekalo liove, ku tẽla oku kapako olonumbi viosi via tukuiwa vocipama cilo. Pole, ivaluka okuti Yehova ka luluvulela kovina o linga loku vi sokisa levi vakuane va linga; eye o vanja eci ci kasi vutima wove. Yehova o sanjuka calua eci a mola olopandu viove kombanjaile eye a tu ĩha yocisembi.—1 Sam. 16:7; Mar. 12:41-44.

18. Momo lie tu ecela olopandu vietu ku Yehova kuenda ku Yesu?

¹⁸ Tu kuete ongecelo yakandu etu, ukamba la Yehova kuenda elavoko liomuenyo ko pui, omo liocisembi. Omo liaco, olonjanja viosi tu yongola oku lekisa olopandu, omo liocisola ca Yehova cina co vetiya oku tu ĩha asumũlũho osi a-a. (1 Yoa. 4:19) Tu yongolavo oku lekisa olopandu vietu ku Yesu una wa tu sola, poku eca eca omuenyo waye kokuetu!—Yoa. 15:13.