1. Koloneke vilo omanu valua va tiamisila utima kocina cipi?

 CITAVA okuti koloneke vilo, wa limbuka ale okuti omanu valua va li sokolola lika ovo muẽle okuti, vakuavo ci sule. Ndeci, vamue va siata oku talavaya lo internet oco va li sivaye ovo muẽle, loku sandeka ovina va kasi oku linga. Kuenje koloneke vilo, vatito va kasi oku eca ulamba ku Yehova Suku. Vocipama cilo, tu konomuisa eci ci lomboloka oku eca ulamba ku Yehova kuenda eci ci pondola oku tu vetiya oku ci linga. Tu lilongisavo ndomo tu eca ku Yehova ulamba eye a sesamẽla kuenda ndomo eye a ka kemalisa onduko yaye kovaso yoloneke.

NYE CI LOMBOLOKA OKU ECA ULAMBA KU YEHOVA?

2. Yehova wa situlula ndati ulamba waye komunda Sinai? (Talavo koñoño.)

² Ulamba u lomboloka nye? Vembimbiliya ondaka “ulamba,” yi pondola oku lomboloka ocina cosi ci kokela okuti omunu umue o komõhiwa. Yehova wa lekisa ulamba waye noke lioku yovola epata lia va Isareli kupika wo Kegito. Sokolola kulandu waco: Olohulukãi via va Isareli, va liongolola ocipepi lomunda Sinai oco va liñualehele la Yehova. Elende limue li tekãva li sitika omunda. Vocipikipiki ocilemawe cimue ci yokokisa ci tuñunya osi, osimbu ovilemĩlo loviliakulo kuenda ocileñi cimue columbeta ci sika. (Etu. 19:16-18; 24:17; Osa. 68:8) Sokolola ndomo va Isareli va liyeva eci Yehova a situlula unene kuenda ulamba waye.

3. Nye cilomboloka oku eca ulamba ku Yehova?

³ Koloneke vilo, omanu va pondola hẽ oku eca ulamba ku Yehova? Oco, va pondola. Onjila yimue yoku eca ulamba ku Yehova, oku sapuilako vakuetu unene waye kuenda ovituwa viaye vi komõhisa. Tu ecavo ulamba ku Yehova kovina viosi tu  linga omo liekuatiso liaye. (Isa. 26:12) Soma Daviti wa kala ongangu yiwa koku eca ulamba ku Yehova. Vohutililo yimue Soma Daviti a linga kovaso yowiñi wa va Isareli, wa popia ku Yehova hati: “A Yehova, unene, lupami, lunumbu, leposo kuenda ulamba viove, momo ovina viosi vi kasi kovailu kuenda posi viove.” Noke Daviti wa malusula ohutililo yaye kuenje “ekongelo liosi lia sivaya Yehova Suku.”—1 Asa. 29:11, 20.

4. Yesu a eca ndati ulamba ku Yehova?

⁴ Eci Yesu a kala palo posi, wa eca ulamba ku Isiaye poku sapuila komanu okuti, Yehova eye wo wĩha unene woku linga ovikomo. (Mar. 5:18-20) Yesu wa kuatisavo vakuavo oku limbuka ndomo Yehova a komõhisa, konjila ndomo a vangula catiamẽla ku Isiaye kuenda ndomo a tata vakuavo. Vepuluvi limue, Yesu wa kala oku longisa vo sunangonga yimue. Pokati kolonjeveleli pa kala ukãi umue wa kuatiwile londele yimue vokuenda kueci ci soka 18 kanyamo. Ondele yaco ya lingisa okuti etimba liaye li kotovala kuenda ka tẽla oku miũha. Ci sumuisa calua! Yesu omo lioku vetiyiwa lohenda kuenda ocikembe, wamela kokuaye yu wo sapuila hati: “Okãi, wa yovuiwa kuvei wove.” Yesu wo kapa ovaka aye kuenje vocipikipiki ukãi wa votoka “yu wa fetika oku sivaya Suku.” Eye wa eca olopandu vialua ku Suku omo lioku u kayisa! (Luka 13:10-13) Ukãi waco, wa kuata asunga awa oku eca ulamba ku Yehova kuenje etu tu kuetevo esunga lioku ci linga.

ESUNGA LIECI TU ECELA ULAMBA KU YEHOVA

5. Asunga api tu kuete oku sumbila Yehova?

⁵ Tu eca ulamba ku Yehova omo tuo sumbila calua. Tu kuete asunga alua oku sumbila Yehova. Momo eye ukuonene wosi; kuenda unene waye ka u pui. (Osa. 96:4-7) Ukũlĩhĩso waye walua, wa situluiwa ciwa kovina eye a lulika. Eye wa tu ĩha omuenyo kuenda ovina viosi tu sukila oco tu kale komuenyo. (Esit. 4:11) Yehova eye lika ukuacili. (Esit. 15:4) Cosi eye a linga ca suapo kuenda olonjanja viosi o tẽlisa olohuminyo viaye. (Yeh. 23:14) Eli olio esunga lieci uprofeto Yeremiya a popela catiamẽla ku Yehova hati: “Pokati ka vosi vakualondunge vo kolofeka kuenda pokati kovosoma avo osi, ka kuli laumue wa lisoka love!” (Yer. 10:6, 7) Ocili okuti, tu kuete asunga awa oku sumbila Isietu wokilu. Etu ka tua sumbilile lika Yehova, pole, tu u solevo.

6. Momo lie tu solile Yehova?

⁶ Tu eca ulamba ku Yehova momo tu u sole calua. Kũlĩhĩsa ovituwa vialua via Yehova vi tu vetiya oku u sola. Eye ukuahenda kuenda ukuacikembe. (Osa. 103:13; Isa. 49:15) Eci tu sumuisiwa, eye o sumuavo. (Sak. 2:8) Eye o tu kuatisa oku u kũlĩha kuenda oku kala ekamba liaye. (Osa. 25:14; Ovil. 17:27) Handi vali, Yehova embombe; “eye o petama oco a vanje kilu kuenda kilu lieve, o votola osuke voneketela.” (Osa. 113:6, 7) Omo liasunga aco, tu yongola oku eca ulamba ku Suku yetu wa velapo.—Osa. 86:12.

7. Epuluvi lipi lilikasi tu kuete?

⁷ Tu eca ulamba ku Yehova momo tu yongola okuti vakuetu vo kũlĩha. Omanu valua ka va kũlĩhĩle ocili catiamẽla ku Yehova. Momo lie? Momo Satana wa tekãvisa ovisimĩlo viavo poku sandeka ovohembi akãla atiamẽla ku Yehova. (2 Va Kor. 4:4) Satana wa siata oku vetiya omanu oku tava okuti, Yehova ongangala ka tu kapeleko kuenda eye o kuete eko kovitangi viosi omanu va siata oku pita lavio. Pole, etu tua kũlĩha ocili catiamẽla ku Suku yetu! Etu tu kuete epuluvi lioku kuatisa vakuetu oku sivayavo Suku. (Isa. 43:10) Osamo 96 yi tiamisila koku eca ulamba  ku Yehova. Poku konomuisa olondaka vimue viosamo eyi, sokolola kolonjila vioku eca ku Yehova ulamba eye a sesamẽla.

TU ECA NDATI KU YEHOVA ULAMBA EYE A SESAMẼLA?

8. Yipi onjila yimue yoku eca ulamba ku Yehova? (Osamo 96:1-3)

⁸ Tanga Osamo 96:1-3. Tu pondola oku eca ulamba ku Yehova kovina tu popia catiamẽla kokuaye. Kovinimbu evi, afendeli va Yehova va lalekiwa oku ‘imbila Yehova ocisungo,’ oku ‘sivaya onduko yaye,’ oku ‘sapula olondaka viwa viepopelo’ kuenda oku ‘sapula ulamba waye pokati kolofeka.’ Ovina viosi evi, olonjila tu pondola oku eca ulamba ku Isietu wokilu. Va Yudea vakuekolelo kuenda Akristão vo kocita catete, ka va kuatele ohele yoku sapuilako vakuavo ovina viosi viwa Yehova a va lingila, loku teyuila ekalo liaye. (Dan. 3:16-18; Ovil. 4:29) Tu setukula ndati ongangu yavo?

9-10. Nye wa lilongisila kulandu wa manji Angelena? (Talavo ociluvialuvia.)

⁹ Kũlĩhĩsa ulandu wa manji umue o tukuiwa Angelena, a o kasi ko Estadus Unidus. Eye lutõi, wa teyuila ekalo lia Yehova kupange kuna a talavaya. Omo okuti eye ndopo a fetikile oku talavaya kupange waco, wa lalekiwa kohongele yimue kumosi la vana va fetikavo ndopo kupange waco. Kohongele yaco vosi va ponduile oku lombolola ku vakuavo ovina viatiamẽla komuenyo wavo. Manji Angelena wa sokiya oku lekisa alitalatu amue, oco a lombolole esanju eye a kuete omo lioku kala Ombangi ya Yehova. Pole, osimbu handi onjanja yaye yoku vangula ka ya pitililepo, ekula liaye liupange lia li situlula okuti wa kulila vepata Liombangi Via Yehova. Noke wa fetika oku popia ovina vĩvi viatiamẽla Kolombangi Via Yehova. Manji Angelena wa popia hati: “Vepuluvi liaco nda fetika oku yeva esakalalo lialua. Pole, sia yonguile okuti omanu va tava kuhembi waco. Kuenje nda nõlapo oku lombolola ocili catiamẽla ku Yehova. Omo liaco, nda sokolola ndoco: ‘Si pondola okũha. Ndi sukila oku va sapuila ndomo Yehova a tuwa.’”

¹⁰ Eci ekula liupange a mala oku vangula, manji Angelena wa linga ohutililo yimue yonjanga vutima. Kuenje lumbombe wa enda toke kokuaye, loku u sapuila hati: “Ekalo liove ndeli liange. Nda kulilavo vepata limue  Liolombangi Via Yehova kuenje omo ñasi toke cilo.” Ndaño okuti, ekalo liaco ka lia lelukile, manji Angelena wamamako oku tula utima. Eye wa lekisa kakula vaye vupange alitalatu aye la-a a vamanji vakuavo va kasi oku vumbila kumosi Yehova lesanju kuenda lesumbilo wa lombolola ovina a kasi oku lilongisa. (1 Pet. 3:15) Onima yipi yeyililako? Eci manji Angelena a mala oku vangula, ulume wa tulumũha. Ulume waco wa limbuka okuti, wa kuata olonjivaluko viwa omo lioku kulila vepata Liolombangi Via Yehova. Manji Angelena wamisako hati: “Yehova o sesamela oku teyuiwa. Esumũlũho linene oku teyuila onduko yaye.” Tu kuetevo esumũlũho lioku eca esivayo kuenda ulamba ku Yehova eci omanu vakuavo ka va lekisa esumbilo kokuaye.

11. Afendeli vocili va Yehova va siata oku kapako ndati onumbi yi sangiwa Kosamo 96:8, vokuenda kuanyamo alua?

¹¹ Tanga Osamo 96:8. Tu pondola oku eca ulamba ku Yehova lovina tu kuete. Afendeli vocili va Yehova, olonjanja viosi va ka vumba Yehova lovipako viavo. (Olosap. 3:9) Ndeci, va Isareli va ecaile olombongo kuenda ovina via velapo, oco vi kuatise koku tunga onembele loku yitata. (2 Olos. 12:4, 5; 1 Asa. 29:3-9) Olondonge vimue via Yesu via eca “ovipako viavo,” oco Yesu kumue lovapostolo vaye va kuate ovina va sukilile. (Luka 8:1-3) Akristão vo kocita catete, va ecavo ekuatiso liavo ku vamanji va kala kovitumãlo vikuavo omo lionjala va kala oku pita layo. (Ovil. 11:27-29) Koloneke vilo, tu pondolavo oku eca ulamba ku Yehova pocakati covilumba vietu vi eciwa lutima wosi.

12. Olombanjaile vietu vi pondola oku eca ndati ulamba ku Yehova? (Talavo ociluvialuvia.)

¹² Kũlĩhĩsa ulandu umue u lekisa ndomo tua siata oku eca ulamba ku Yehova pocakati colombanjaile vietu. Kunyamo wo 2020 kofeka yo Zimbabue kua pita ocitenya cimue ca tumãla otembo yalua. Omanu valua va kala kohele yokufa omo lionjala, oku kongelamo manji umue ukãi o tukuiwa Prisca. Ndaño locitenya, manji Prisca wamamako lesokiyo liaye lioku kunda Votatu, Lovotãlo votembo yoku lima. Vana va lisunguile laye, va enda oku u pembula omo lioku endaenda kupange woku kunda okuti ka endi kepia. Ovo va nda oku u popia ndoco: “Ove o ka fa lonjala.” Manji Prisca wa kolele okuti Yehova wa laikele oku u tata. Omo liaco, olonjanja viosi wa tambulula hati: “Yehova ka la yanduluka  afendeli vaye.” Ka pa pitile otembo yalua, eye wa tambula ekuatiso liokulia lia eciwa locisoko cetu. Vana va lisunguile laye va komõha calua kuenje vo sapuila ndoco: “Suku ka la ku yanduluka, tu yongola oku lilongisa vali calua catiamẽla kokuaye.” Ci soka epanduvali ka vana va lisungue laye, va fetika oku endaenda kolohongele viekongelo.

13. Ovituwa vietu vi eca ndati ulamba ku Yehova? (Osamo 96:9)

¹³ Tanga Osamo 96:9. Tu eca ulamba ku Yehova pocakati covituwa vietu. Ovitunda via sukilile oku li sukula loku li yelisa eci va enda oku vumba Yehova vonembele. (Etu. 40:30-32) Letuvo tu sukilavo oku liyelisa, pole, haketimbako lika, tu ci lingavo poku yuvula ovina Yehova a suvuka. (Osa. 24:3, 4; 1 Pet. 1:15, 16) Tu sukila oku likolisilako oku lula “omunu wosimbu” okuti ovituwa kuenda ovilinga via vĩha, loku ‘wala omunu wokaliye’ okuti, oku sokolola loku linga ovina vi situlula ovituwa via Yehova. (Va Kol. 3:9, 10) Lekuatiso lia Yehova, omanu vana okuti vambatele omuenyo wa vĩha kuenda wungangala, va pondola oku pongoloka kuenda oku wala omunu wokaliye.

14. Nye wa lilongisila kulandu wa Jack? (Talavo ociluvialuvia.)

¹⁴ Kũlĩhĩsa ulandu wa Jack, ulume umue wa kala ongangala haiye wa kokele ohele yalua okuti omanu va enda oku u tukula hati, Ondele. Omo liungangala waye Jack wa pisiwila oku fa. Pole, osimbu a kala oku talamẽla oco a pondiwe, eye wa tava oku lilongisa Embimbiliya la manji umue wa nyula okayike muna Jack a kapiwile. Ndaño okuti, eye wa enda oku linga ovina vialua vĩvi, wa pongolola ovituwa viaye kuenje vokuenda kuotembo wa papatisiwa Ndombangi ya Yehova. Jack wa pongoloka calua okuti, keteke a laikele oku pondiwa, vamue pokati kolondavululi va lila poku liusika laye. Kesongo umue wovita okuti wa kala oku talavaya vokayike, wa popia hati: “Jack wa kala omandekua yimue ongangala calua vocitumãlo cilo. Cilo, pokati kolomandekua vikuavo, eye uwapo vali.” Vosemana ya kuamamo yoku pondiwa kua Jack, vamanji va tiuka oco va linge ohongele yovokati kosemana vokayike kuenje va sanga omandekua yimue yeya onjanja yatete kohongele. Nye co vetiya oku iya kohongele? Eye wa komõha calua lepongoloko Jack a linga kovituwa  kuenje wa yonguile oku kũlĩha eci a sukilile oku linga oco a vumbe Yehova. Ocili okuti, ekalo lietu li pondola oku eca ulamba ku Isietu wokilu!—1 Pet. 2:12.

YEHOVA O KA KEMÃLISA NDATI ONDUKO YAYE KOVASO YOLONEKE?

15. Yehova oka kemãlisa ndati onduko yaye kovaso yoloneke? (Osamo 96:10-13)

¹⁵ Tanga Osamo 96:10-13. Ovinimbu evi via sulako Viosamo 96, vi tukula Yehova okuti Onganji haiye Soma yesunga. Yehova o ka kemãlisa ndati onduko yaye kovaso yoloneke? Poku ka nena esunga. Ndopo muẽle Yehova o ka kundula o Bavulono Yinene, momo atavo esanda a linga ovina vĩvi, loku longisa ovohembi atiamẽla konduko yaye. (Esit. 17:5, 16; 19:1, 2) Eci o Bavulono Yinene yi ka kunduiwa, citava okuti omanu vamue va ka nõlapo oku vumba letu Yehova. Oku sulako, kuyaki wo Harmagedo, Yehova o ka kundula oluali lulo lua Satana kuenda vana ka vo sumbilile, haivo va pembula onduko yaye. Pole, eye o ka popela vosi vana vo sole, haivo va pokola kokuaye kuenda va sanjukila oku wĩha ulamba. (Mar. 8:38; 2 Va Tes. 1:6-10) Noke lioseteko ya sulako yi ka pita koku sulila Kuviali wa Kristu Wohulukãi Yanyamo, Yehova o ka kemãlisa onduko yaye. (Esit. 20:7-10) Kotembo yaco, “ilu lieve li keyuka lukũlĩhĩso wulamba wa Yehova ndeci ovava a sikĩlĩla okalunga.”—Hav. 2:14.

16. Nye wa nõlapo oku linga? (Talavo ociluvialuvia.)

¹⁶ Ci ka komõhisa calua eci omanu vosi va ka eca ku Yehova ulamba u sesamẽla onduko yaye! Pole, osimbu otembo yaco ka ya pitĩlile, vosi yetu tu sukila oku likolisilako oku eca ulamba ku Suku yetu kapuluvi osi. Omo liaco, oco tu kuatisiwe oku tiamisila utima kocikele caco ca velapo, Ukuenje wa Kolelua Haiye wa Lunguka wa nõla Osamo 96:8, oco ci linge ocisonehua cetu cunyamo wo 2025, cina ci popia hati: “Eci ku Yehova ulamba onduko yaye yi sesamẽla.”