OCIPAMA CELILONGISO 3
OCISUNGO 35 “Kũlĩhi Ovina Via Velapo”
Nõla Olonjila vi Sanjuisa Yehova
“Oku sumbila Yehova oco efetikilo liolondunge, kuenda oku kũlĩha Una o Kola Koku Kola, oco elomboloko.”—OLOSAP. 9:10.
OCIMÃHO CELILONGISO
Tu konomuisa ndomo tu talavaya lukũlĩhĩso, elomboloko kuenda olondunge oco tu nõle olonjila viwa.
1. Ocina cipi ka ca lelukile vosi yetu tu sukila oku linga?
ETEKE leteke tu sukila oku nõla onjila yimue. Vimue pokati kavio via leluka oku vi nõla ndeci, elivala tulia lomẽle ale elivala tu pekela. Olonjila vikuavo ka via lelukile oku vi nõla. Momo vi pondola oku kapa kohele uhayele wetu, esanju lietu, epata lietu ale efendelo lietu. Etu tu yongola okuti, onjila tu nõla yi tu kuatisa kumue lepata lietu. Handi vali, tu yongola okuti onjila tu nõla yi sanjuisa Yehova.—Va Rom. 12:1, 2.
2. Atosi api a ka ku kuatisa oku nõla onjila ya sunguluka?
2 O pondola oku nõla onjila yimue yolondunge nda (1) wa kũlĩha ovina via kongelamo, (2) nda wa sokolola kocisimĩlo ca Yehova catiamẽla konjila yaco, kuenda (3) nda wa sokolola lutate onjila o nõla. Ocipama cilo, ci ka lombolola atosi aco kuenda ci ka tu kuatisavo oku limbuka ndomo tu pindisa uluño wetu woku sokolola.—Olosap. 2:11.
KŨLĨHA OVINA VIA KONGELAMO
3. Tukula ocindekaise cimue ci pondola oku ku kuatisa oku kũlĩha ovina via kongela koku nõla onjila yimue.
3 Enanga liatete o sukila oku linga oco o nõle onjila yiwa, oku kũlĩha eci ca kongelamo. Momo lie ci kuete esilivilo? Sokolola okuti omunu umue wenda kondotolo omo liocitangi cimue cinene a kuete cuhayele. Anga hẽ ondotolo tete yi nõla onjila yimue ndomo ombeyi yi tatiwa, ndaño ko konomuisile ale oku u linga apulilo? Ocili okuti sio. Nda ove tete wa sokolola lutate ovina vi tiamisiwila kekalo liove, o ka nõla olonjila via sunguluka. O pondola oku ci linga ndati?
4. Ndomo ca tangiwa Kolosapo 18:13 o pondola oku kũlĩha ndati ovina via kongela konjila yimue? (Talavo ociluvialuvia.)
4 Olonjanja vimue o pondola oku kũlĩha ovina via kongela konjila yimue wa nõla poku linga apulilo. Sokolola okuti wa lalekiwa kocipito cimue. O sukila hẽ oku enda? Nda kua kũlĩhĩle usongui wocipito caco ale esokiyo liaco, o sukila oku linga apulilo akuãimo ndeci: “Pi ku ka lingiwila ocipito caco? Velie va ka kalako? Omanu vañami a ka kalako? Helie o ka kala usongui? Ovina vipi via sokiyiwa kocipito caco? Ku kala hẽ ovinyua vi koluisa?” Atambululo kapulilo ha-a, a ka ku kuatisa oku nõla onjila ya sunguluka.—Tanga Olosapo 18:13.
Linga apulilo oco o kũlĩhe ovina via kongelamo (Tala ocinimbu 4) a
5. Nye o sukila oku linga noke lioku kũlĩha ovina via kongela konjila yimue?
5 Noke lioku kũlĩha ovina via kongelamo, sokolola lutate catiamẽla kovina viaco. Ndeci, nye ci popiwa nda wa limbuka okuti omanu va ka kala kocipito caco ka va kapeleko olonumbi Viembimbiliya, ale ku kala ovinyua vi koluisa, pole, lomue o ka songuila omanu oco ka va kanyue calua? Osima hẽ okuti ocipito caco ci ka lingiwa lonjila ya sunguluka? (1 Pet. 4:3) Handi vali, nye ci popiwa nda elivala liocipito caco li ku tateka oku enda kohongele yekongelo ale kupange woku kunda? Ocili okuti, nda wa kũlĩha ovina via kongelamo, ci ka ku kuatisa oku nõla onjila yiwa. Pole, kuli ocina cikuavo o sukila oku linga. Noke lioku kũlĩha ovina viosi via kongelamo, lipula ove muẽle ndoco: Yehova o tenda ndati ocipito caco?—Olosap. 2:6.
KAPAKO OCISIMĨLO CA YEHOVA
6. Ndomo ca tangiwa ku Tiago 1:5 momo lie tu sukilila oku likutilila oku pinga ekuatiso ku Yehova?
6 Pinga ku Yehova oco a ku kuatise oku kuata elomboloko liovisimĩlo viaye. Yehova wa tu likuminya oku tu ĩha olondunge oco tu limbuke nda onjila yimue tu nõla yi pondola oku u sanjuisa ale sio. Eye eca olondunge viaco “lutima waye wosi, halokupisako.”—Tanga Tiago 1:5.
7. O pondola oku limbuka ndati ocisimĩlo ca Yehova poku nõla onjila yimue? Tukula ocindekaise cimue.
7 Noke lioku likutilila ku Yehova oku pinga olonumbi, kũlĩhĩsa lutate etambululo liaye. Sokolola kocindekaise eci: Nda okuti ove wa nyelela poku linga ungende, nda wa pinga ekuatiso komanu va kasi pocitumãlo caco. Anga hẽ ove nda wa tiukila osimbu omunu waco ka ku tambuluile? Ocili okuti sio. Ove nda wa yevelela lutate olonumbi viomunu waco. Cimuamue haico okuti, noke lioku pinga olondunge ku Yehova, likolisilako oku limbuka etambululo liaye. O pondola oku ci linga, poku sandiliya olonumbi Vembimbiliya vina vi tiamisiwila kekalo liove. Ndeci, poku nõla nda wenda ale ku endi kocipito cimue, o pondola oku konomuisa eci Embimbiliya li popia catiamẽla kovipito, koku kuata akamba ka va sungulukile kuenda esilivilo lioku pitisa kovaso Usoma wa Suku okuti kovina vietu muẽle sio.—Mat. 6:33; Va Rom. 13:13; 1 Va Kor. 15:33.
8. Nye o pondola oku linga nda o sukila ekuatiso lioku sanga onumbi yimue? (Talavo ociluvialuvia.)
8 Ove pamue o sukila ekuatiso oco o sange olonumbi o kasi oku sandiliya. Kuenje o pondola oku pinga onumbi ku manji umue wa loñoloha. Pole, ci ka ku kuatisavo nda ove muẽle wa linga akonomuiso. Tu pondola oku sanga olonumbi vialua vovimalẽho vietu vielilongiso, ndeci Elivulu Lioku Konomuisa Liolombangi Via Yehova kuenda elivulu Ovisonehua vi Songuila Omuenyo Wukristão. Ku ka ivaleko ocimãho cove cokuti: Oku nõla onjila yi sanjuisa Yehova.
Sokolola kocisimĩlo ca Yehova (Tala ocinimbu 8) b
9. Tu kolela ndati okuti onjila tua nõla yi sanjuisa Yehova? (Va Efeso 5:17)
9 Tu pondola oku kolela ndati okuti onjila tua nõla yi sanjuisa Yehova? Catete tu sukila oku kũlĩha ciwa Yehova. Embimbiliya li popia hati: “Oku kũlĩha Una o Kola Koku Kola, oco elomboloko.” (Olosap. 9:10) Ocili okuti, elomboloko liocili li tunda koku kũlĩha ovituwa via Yehova, ocipango caye kuenda ovina eye a sole, levi a suvuka. Omo liaco, lipula ndoco: ‘Poku sokolola kovina viosi nda kũlĩha viatiamẽla ku Yehova, anga hẽ eye o ka sanjuka lonjila ndi nõla?’—Tanga Va Efeso 5:17.
10. Momo lie olonumbi Viembimbiliya vi sukilila oku kala ocina ca velapo kokuetu?
10 Olonjanja vimue oco tu sanjuise Yehova, tu sukila oku linga cimue okuti ci sumuisa akamba vetu kuenda epata. Ndeci, olonjali vimue pamue vi vetiya omãla vavo vakãi oku likuela lalume va kuete olombongo vialua, ndaño okuti ulume waco ka pamele kespiritu. Ocili okuti, olonjali vi sakalala calua lomãla vavo kuenda vi yongola okuti, va kuata ekalo liwa komuenyo. Anga hẽ ulume waco o ka tẽla oku u kuatisa oku kula konepa yespiritu, loku amamako oku pamisa ukamba waye la Yehova? Nye Yehova a sima catiamẽla kondaka yaco? Tu sanga etambululo ku Mateo 6:33. Ocisonehua caco ci vetiya Akristão oku ‘Amamako oku sandiliya tete Usoma.’ Ocili okuti, tua sumbila ovisimĩlo violonjali vietu kuenda viomanu vakuavo tua kapako calua, pole, ocina ca velapo tu sukila oku linga oku sanjuisa Yehova.
SOKOLOLA LUTATE ONJILA O NÕLA
11. O cituwa cipi ca tukuiwa ku Va Filipoi 1:9, 10 ci ka tu kuatisa oku sokolola lutate olonjila tu nõla?
11 Noke lioku sanga ovisonehua vimue Viembimbiliya vi likuata lonjila wa nõla, o sukila oku sokolola ciwa kolonjila wa nõla. (Tanga Va Filipoi 1:9, 10.) Olondunge vi ka ku kuatisa oku sokolola eci ci pondola oku pita love poku nõla onjila yimue. Olonjanja vimue ca leluka oku nõla onjila yimue. Pole, halonjila viosiko via leluka oku vi nõla. Momo olonjila vimue via tatama calua oku vi nõla. Omo liaco, olondunge vi ka ku kuatisa oku nõla olonjila viwa ndaño vakalo ana ka a lelukile.
12-13. Poku nõla upange umue woku sanda eteku, olondunge vi ka ku kuatisa ndati oku nõla onjila yiwa?
12 Sokolola kulandu u kuãimo: Ove o kasi oku sandiliya upange woku sanda eteku oco o kuatise epata liove. Ove o kuete olonjila vivali viupange kuenda olonjila viaco vi likuata lolonumbi Viembimbiliya. Kuenje o talama loku sokolola kovina via kongelamo ndeci, upange waco, esokiyo, otembo o sukila oco o pitĩle kupange waco kuenda ovina vikuavo. Pamue o pondola oku nõla umue pokati kupange waco, momo o sole upange waco, ale ofeto yaco ya sunguluka. Pole, kuli asunga akuavo ove o sukila oku kapako, osimbu kua nõlele onjila yimue.
13 Ndeci, anga hẽ upange waco u ka ku tateka oku enda enda kolohongele? Anga hẽ upange waco u ka tepulula otembo yove yoku kala lepata kuenda yoku va kuatisa konepa espiritu? Oku tambulula apulilo aco, ci ka ku kuatisa oku pitisa kovaso “ovina via velapo vali,” ale oku velisapo efendelo lia Yehova kuenda a sukila epata liove okuti, olonjongele viove kuenda ofeto yaco yi sule. Nda wa ci linga, o ka tẽla oku nõla onjila yi sanjuisa Yehova kuenda eye o ka ku sumũlũisa.
14. Olondunge kuenda ocisola vi ka tu kuatisa ndati oku yuvula oku kokela ocilondokua vakuetu?
14 Olondunge vi ka tu kuatisavo oku sokolola ndomo olonjila tu nõla, vi pondola oku sanjuisa ale oku sumuisa vakuetu. Kuenje, ka tu ka ‘kokela ocilondokua vakuetu.’ (Va Fil. 1:10) Eci ci kuete esilivilo lialua kokuetu, ca piãla enene poku nõla olonjila viatiamẽla koku wala loku li posuisa. Ndeci, pamue tu nõlapo onjila yimue yoku wala kuenda yoku liposuisa. Pole, nye ci popiwa nda omanu vakuavo vekongelo, ale kosamua yekongelo, ci va kokela ocilondokua? Olondunge vi ka tu kuatisa oku sumbila ovisimĩlo viavo. Handi vali, ocisola ci ka tu kuatisa oku sanda olonjongole “viomunu ukuavo” kuenda oku lekisa esunguluko. (1 Va Kor. 10:23, 24, 32; 1 Tim. 2:9, 10) Nda tua ci linga, tu ka nõla onjila yi lekisa ocisola kuenda esumbilo tu kuetele vakuetu.
15. Ocina cipi o sukila oku kapako osimbu kua nõlele onjila yimue yi kuete esilivilo?
15 Nda ove o sukila oku nõla onjila yimue yi kuete esilivilo, sokolola kovina viosi via kongelamo poku ci linga. Yesu wa tu longisa “oku kũlĩhĩsa epese liaco.” (Luka 14:28) Omo liaco, sokolola lutate otembo, olombongo kuenda ongusu o sukila, oco onjila wa nõla yi tunde ciwa. Vapuluvi amue, ove o ka sukila oku sapela lepata liove oco o kũlĩhe eci omunu lomunu vepata a pondola oku linga okuti, onjila ya nõliwa yi kuata onima. Momo lie ci kuetele esilivilo oku ci linga? Momo pamue o ka sukila oku linga apongoloko amue konjila wa nõla, ale umue vepata o kuete ocisimĩlo ca litepa ci pondola oku kuatisa. Nda ove wa kongela epata liosi poku nõla onjila yimue kuenda oku yevelela ovisimĩlo viavo, ci ka leluka ku vosi yene oku kuatisa oku nõla onjila yimue ya sunguluka.—Olosap. 15:22.
NÕLA ONJILA YI PONDOLA OKU ECA ONIMA YIWA
16. Ananga api a ka ku kuatisa oku nõla onjila yiwa? (Talavo okakasia losapi hati, “ Ndomo tu Nõla Olonjila Violondunge.”)
16 Nda wa kuama ananga a tukuiwa vocipama cilo, wa lipongiyila oku nõla onjila yolondunge. Ove wa limbuka ovovangi kuenda olonumbi Viembimbiliya vi ka ku kuatisa oku nõla onjila yi sanjuisa Yehova. Cilo, o pondola oku pinga ku Yehova ekuatiso liaye oco onjila o nõla yi tunde ciwa.
17. Nye ci ka ku kuatisa oku nõla olonjila via sunguluka?
17 Ndaño okuti kosimbu wa nõlele ale olonjila viwa, pole, ivaluka okuti, oco o kuate onima yiwa poku nõla onjila yimue, ka ca tambele kuloño wetu, ale kovina vialua tua kũlĩha, catamba kũkũlĩhĩso wa Yehova. Momo eye lika o pondola oku eca kokuove ukũlĩhĩso wocili, elomboloko, uloño, okuti ovio vi kuatisa koku kuata olondunge. (Olosap. 2:1-5) Omo liaco, nda wa ci linga Yehova o ka ku kuatisa oku nõla olonjila viu sanjuisa.—Osa. 23:2, 3.
OCISUNGO 28 Kala Ekamba Lia Yehova
